Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Maʼ a waʼalik: «Beyoʼ, ku tsʼoʼokoleʼ Maʼ»

Maʼ a waʼalik: «Beyoʼ, ku tsʼoʼokoleʼ Maʼ»

Tukulteʼ juntúul anciano ku meyaj teʼ ­Comité tiʼ Enlace yéetel le Hospitaloʼoboʼ u invitarmaj juntúul táankelem utiaʼal u jóokʼloʼob kʼaʼaytaj tu kʼiinil domingo. Baʼaleʼ jach taʼaytak u kʼuchul u yorail u jóokʼloʼobeʼ, ku tʼaʼanal le anciano tumen juntúul sukuʼun accidentarnaj u yatan tiʼ junpʼéel coche, yéetel tsʼoʼok u jáan bisaʼal hospital. Le sukuʼunoʼ ku yaʼalik tiʼ le anciano ka áantaʼak u kaxt juntúul doctor jeʼel u operartik u yatan x-maʼ kʼiʼikʼeloʼ. Le oʼolaleʼ le ancianooʼ ku yaʼalik tiʼ le xiʼipaloʼ maʼ kun béeytal u jóokʼol tu yéetel tumen yaan u yáantik le ­sukuʼunoʼ.

Beoraaʼ tukulteʼ juntúul sukuʼun yéetel u yataneʼ, ku invitartikoʼob cenar juntúul kiik tu juunal ku líiʼsik kaʼatúul u mejen paalal. Ka tu yojéeltaj le mejen paalaloʼ jach kiʼimakchaj u yóoloʼob yéetel joʼopʼ u tsʼíiboltkoʼob u kʼuchul le kʼiin jeʼeloʼ. Chéen baʼaleʼ jach junpʼéel kʼiin u bineʼ, le sukuʼun ­yéetel u yatanoʼ ku yaʼalikoʼob tiʼ le ­maamatsiloʼ maʼ kun béeytal u múul cenaroʼob tumen yaan baʼax ken u beetoʼob. Ka máan kʼiineʼ le kiikoʼ tu yojéeltaj baʼaxten maʼ béeychajiʼ. Jeʼel ­bakáanaʼ le tsʼoʼok u invitartikoʼob le kiikoʼ, letiʼobeʼ invitartaʼaboʼob xan tumen u amigoʼob láayliʼ teʼ áakʼab jeʼeloʼ, yéetel tu yaʼaloʼob jeʼel u binoʼobeʼ.

Toʼon táan k-meyajtik Dioseʼ kʼaʼabéet k-beetik baʼax k-aʼalik. Mix juntéen unaj k-aʼalik «Beyoʼ, ku tsʼoʼokoleʼ Maʼ» (2 Cor. 1:18). Jeʼex k-ilkoʼ yaan máaxeʼ ku kʼexik baʼax u yaʼalmaj yoʼolal junpʼéel baʼax jach kʼaʼabéet, baʼaleʼ yaan máakeʼ chéen yoʼolal jeʼel baʼaxakeʼ. Úuchjeakileʼ tak apóstol Pabloeʼ kʼaʼabéetchaj u kʼexik baʼax u yaʼalmaj.

¿TU TSʼOʼOKBESAJ PABLO WA BAʼAX U YAʼALMAJ?

Tu jaʼabil 55, le tiaʼan kaʼach Pablo tu kaajil Éfeso tu yóoxpʼéel u viajeil u kʼaʼaytajoʼ, u tukultmaj kaʼach u kʼáatmáansik u kʼáaʼnáabil Egeo utiaʼal u bin Corinto yéetel ken tsʼoʼokkeʼ ku bin Macedonia. Tsʼoʼoleʼ utiaʼal u kaʼa suut Jerusaleneʼ u tukultmaj kaʼach u kaʼa máan u xíimbalt u múuchʼulil Corinto, maʼ xaaneʼ utiaʼal ka kʼuʼubuk siibaloʼob tiʼ utiaʼal u bis tiʼ le sukuʼunoʼob yaan Jerusalenoʼ (1 Cor. 16:3). Letiʼe baʼax u tukultmaj u beetik kaʼach Pablooʼ tumen 2 Corintoiloʼob 1:15 yéetel 16, ku yaʼalik: «Teneʼ in tukultmaj kaʼach in bin ta wiknaleʼex utiaʼal ka yanak uláakʼ baʼax oʼolal u kiʼimaktal a wóoleʼex. Le ken xiʼiken Macedoniaeʼ yaan in jeʼelel junsúutuk in wileʼex, le ken lukʼken Macedoniaeʼ kin kaʼa máan ta wiknaleʼex utiaʼal ka a láakʼinteneʼex junjaats tiʼ le bej ku bin Judeaoʼ».

 Maʼ xaaneʼ Pabloeʼ tsʼokaʼaniliʼ u yaʼalik tiʼ le sukuʼunoʼob corintoiloʼob baʼax u tukultmaj kaʼach u beetkoʼ (1 Cor. 5:9). Baʼaleʼ maʼ sen úuch u túuxt le cartaoʼ, jujuntúul máaxoʼob yanoʼob tu yotoch Cloeeʼ tu yaʼaloʼob tiʼ ­Pablo yaan bin jatslantáambailoʼob tu múuchʼulil Corinto (1 Cor. 1:10, 11). Le oʼolal Pabloeʼ maʼ biniʼ, baʼaxeʼ tu túuxtajtiʼob junpʼéel carta, bejlaʼeʼ kʼaj óolaʼan bey Yáax tiʼ Corintoiloʼobeʼ. Yéetel le cartaaʼ tu tsolnuʼuktaj yéetel yaabilaj le sukuʼunoʼoboʼ. Tu yaʼalaj xaneʼ yáax yaan u bin Macedonia tsʼoʼoleʼ ku bin Corinto (1 Cor. 16:5, 6). *

Le ka kʼaʼam u carta Pablo tumen le corintoiloʼoboʼ jujuntúul tiʼ letiʼob «ku taaskubaʼob nukuch apostoloʼob» teʼ múuchʼuliloʼ tu yaʼaloʼob maʼ tu tsʼoʼokbesik baʼax ku yaʼalik. Baʼaleʼ utiaʼal u yeʼesik Pablo maʼ jaajeʼ, tu yaʼalaj: «Le ka tin tuklaj kaʼach in bin ta wiknaleʼexeʼ, maʼ chéen tin tuklaj in jáajan beetkiʼ, ¿máasaʼ? ¿Ka tuklikeʼex wa chéen utiaʼal in wutsil kin chʼaʼtuklik in beetik wa baʼax, le oʼolal kin waʼalik «Beyoʼ, Beyoʼ», ku tsʼoʼokoleʼ «Maʼ, Maʼ» (2 Cor. 1:17; 11:5).

¿Chéen wa tu jáan aʼalaj Pablo u bin Corinto? Maʼatech, tumen juntúul máak chéen ku jáajan tʼaaneʼ, maʼ ojéelaʼan wa yaan u beetik baʼax u yaʼalmiʼ wa mix tech u beetik. Pabloeʼ tu yaʼalaj: «¿Ka tuklikeʼex wa chéen utiaʼal in wutsil kin chʼaʼtuklik in beetik wa baʼax?». Le kʼáatchiʼ tu beetaʼ tu yáantaj wal u yil le corintoiloʼob maʼ chéen tu jáan kʼexaj baʼax u yaʼalmaj u beetkiʼ.

Utiaʼal u yeʼesik maʼ jaaj baʼax ku yaʼalaʼal tu contraeʼ, Pabloeʼ tu tsʼíibtaj: «Baʼaxeʼ tu yoʼolal Dioseʼ jeʼel u páajtal a kʼubik a wóoleʼex tiʼ le baʼax k-aʼalikteʼexoʼ, maʼatech k-aʼalikteʼex Beyoʼ, ku tsʼoʼokoleʼ Maʼ» (2 Cor. 1:18). Pabloeʼ tu chʼaʼtuklaj maʼ u jáan bin Corinto tumen táan u kaxtik u yutsil le sukuʼunoʼoboʼ. Kaʼapʼéel tiʼ Corintoiloʼob 1:23, ku yaʼalikeʼ tu kʼexaj baʼax u tukultmaj u beetik tumen ku ‹chʼaʼiktiʼob óotsilil›. Úuchik u beetik beyaʼ tu tsʼáaj tiempo u kʼexkoʼob baʼax ku beetkoʼob táanil tiʼ u bin Corinto. Le tiaʼan Macedoniaoʼ Pabloeʼ kiʼimakchaj u yóol ka aʼalaʼabtiʼ tumen Tito tsʼoʼok u yáantaj le carta tu túuxtaj tiʼ le corintoiloʼoboʼ: péeksaʼaboʼob utiaʼal u kʼexik bix u tuukuloʼob (2 Cor. 6:11; 7:5-7).

YOʼOLAL JESUSEʼ KU BÉEYCHAJAL

Yoʼolal le baʼax aʼalaʼab tu contra Pablooʼ, tsʼaʼab naʼatbil maʼatech u beetik baʼax ku yaʼalik yéetel maʼ jaaj baʼax ku kaʼansikiʼ. Baʼaleʼ letiʼeʼ tu kʼaʼajsaj tiʼ le corintoiloʼoboʼ le baʼax tu kaʼansajtiʼoboʼ letiʼe baʼax xan tu kaʼansaj Jesucristooʼ. Tu yaʼalajtiʼob: «Cristo Jesús u Paal Dios, le máax t-kʼaʼaytajteʼexoʼ, teen yéetel Silvano bey xan Timoteoeʼ, maʼ t-aʼalaj Beyoʼ, ku tsʼoʼokoleʼ Maʼ, baʼaxeʼ t-aʼalaj Beyoʼ, ku tsʼoʼokoleʼ tu yoʼolal Cristoeʼ Béeychaji» (2 Cor. 1:19). Jesucristo, le máax tsaypachtaʼab tumen Pablooʼ, ku béeytal u kʼubik u yóol máak tiʼ. Letiʼeʼ mantatsʼ tu yaʼalaj u jaajil, kex táan u kaʼansaj wa táan u beetik uláakʼ baʼaloʼob (Juan 14:6; 18:37). Wa jach jaaj baʼax tu kaʼansaj Jesús yéetel ku béeytal u kʼubik u yóol máak tiʼeʼ, u kʼáat u yaʼaleʼ jeʼel xan u béeytal kaʼach u kʼubik u yóol máak tiʼ baʼax tu kaʼansaj Pabloeʼ.

Jéeobaeʼ ‹u Diosil jaaj› (Sal. 31:5). Bey u yeʼesik le baʼaxoʼob tu tsʼíibtaj Pabloaʼ: «Tumen kex jeʼel bukaʼaj baʼaloʼob u yaʼalmaj Dios u beetkeʼ tsʼoʼok u béeytaloʼob tu yoʼolal Cristo». Ka taal way Luʼumeʼ Jesuseʼ tu láaj beetaj baʼax u yaʼalmaj Jéeoba. Pabloeʼ ku yaʼalik xan: «Le oʼolaleʼ tu yoʼolal xan [Jesuseʼ] ku yaʼalaʼal «Amén» tiʼ Dios, utiaʼal u tsʼaʼabal nojbeʼenil tiʼ Dios t-oʼolal» (2 Cor. 1:20). Jesuseʼ letiʼe «Amen[oʼ]», lelaʼ ku yeʼesikeʼ yaan u béeytal tuláakal baʼaxoʼob u yaʼalmaj Jéeoba.

Jeʼex Jéeoba yéetel Jesús mantatsʼ ku yaʼalikoʼob u jaajileʼ, Pablo xaneʼ tuláakal baʼax ku yaʼalikeʼ jach tu jaajil ku yilik u beetik (2 Cor. 1:19). Jeʼel u béeytal u kʼubik u yóol máak  kaʼach tiʼeʼ, tumen maʼ chéen u yutsil ku kaxtikiʼ (2 Cor. 1:17). Baʼaxeʼ ku «nuʼukti[kuba] yéetel le kiliʼich muukʼoʼ» (Gal. 5:16). Tuláakal baʼax tu beeteʼ tu yeʼesaj ku tuukul tiʼ u maasil. Ken u yaʼal kaʼach u beetik junpʼéel baʼaleʼ jach tu jaajil u tukultmaj u beetik.

TECHEʼ ¿KA TSʼOʼOKBESIK WA BAʼAX KA WAʼALIK

Bejlaʼeʼ le máaxoʼob maʼatech u nuʼuktikubaʼob yéetel le Bibliaoʼ ken u yaʼal u beetkoʼob junpʼéel baʼaleʼ ku jubikoʼob chéen yoʼolal jeʼel baʼalakeʼ. Tiʼ baʼaloʼob yaan yil yéetel negocioeʼ, yaan horaeʼ maʼatech u tsʼoʼokbesaʼal junpʼéel baʼal kex tak firmartaʼan u juʼunil. Yaʼab ­máakoʼob xaneʼ maʼatech u yilik u beetkoʼob baʼax ku yaʼalikoʼob ken tsʼoʼokok u beeloʼob kex u firmarmoʼob u juʼunil. Le bukaʼaj máakoʼob ku divorciarkubaʼoboʼ ku yeʼesikeʼ maʼ kʼaʼanaʼan u yilkoʼob le tsʼoʼokol beeloʼ, le oʼolal ku jubikoʼob chéen yoʼolal jeʼel baʼalakeʼ (2 Tim. 3:1, 2).

Techeʼ ¿ka tsʼoʼokbesik wa baʼax ka waʼalik? Jeʼex t-ilaj tu káajbal le xookaʼ yaan horaeʼ yoʼolal junpʼéel baʼax jach kʼaʼanaʼaneʼ yaan u kʼaʼabéettal a waʼalik maʼ kun béeytal a beetik junpʼéel baʼax a waʼalmaj. Baʼaleʼ le máaxoʼob meyajtik Diosoʼ ken u yaʼal u beetkoʼob junpʼéel baʼaleʼ unaj u yilik u tsʼoʼokbeskoʼob (Sal. 15:4; Mat. 5:37). Beyoʼ yaan a kʼaj óoltaʼal bey juntúul máak ku tsʼoʼokbesik baʼax ku yaʼalikeʼ yéetel mantatsʼ ku yaʼalik u jaajil (Efe. 4:15, 25; Sant. 5:12). Wa u maasil ku yilkoʼob ka wilik a beetik baʼax ka waʼalikeʼ, maʼ xaaneʼ maas yaan u yuʼubikechoʼob ken a tsikbaltiʼob u Reino Dios. Le oʼolaleʼ ilawil a tsʼoʼokbesik mantatsʼ baʼax ka waʼalik.

^ xóot’ol 7 Maʼ úuch u tsʼíibt Yáax tiʼ Corintoiloʼobeʼ, Pabloeʼ bin Troas tsʼoʼoleʼ ka bin Macedonia, teʼeloʼ tu tsʼíibtaj Kaʼapʼéel tiʼ Corintoiloʼob (2 Cor. 2:12; 7:5). Yéetel ka máan kʼiineʼ bin Corinto.