Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

¡Kiʼimakchajak k-óol ikil u tsʼoʼokol u beel le Tamanoʼ!

¡Kiʼimakchajak k-óol ikil u tsʼoʼokol u beel le Tamanoʼ!

«Chuʼupuk k-puksiʼikʼal yéetel nojoch kiʼimak óolal [...] tumen tsʼoʼok u kʼuchul u kʼiinil u tsʼoʼokol u beel le Tamanoʼ.» (APO. 19:7)

1, 2. 1) ¿Máakalmáak le boda ken u taas kiʼimak óolal teʼ kaʼanoʼ? 2) ¿Baʼax kʼáatchiʼiloʼob ken k-il u núukil?

JEʼEX k-ojliloʼ jeʼel baʼaxak bodaileʼ ku bisik tiempo u preparartaʼal. Baʼaleʼ koʼoneʼex tʼaan tiʼ junpʼéel boda jach especial, u boda juntúul rey. Chéen tukle: ¡yaan kex dos mil jaʼaboʼob joʼopʼok u preparartaʼal! Bejlaʼeʼ taʼaytak u kʼuchul u kʼiinil le tsʼoʼokol beeloʼ. Ichil junpʼíit kʼiineʼ yaan u yuʼubaʼal jatsʼuts paax tu palacio le Reyoʼ, yéetel yaʼab angeloʼob ken u kʼayoʼob: «Kiʼikiʼtʼanteʼex Jah, tumen Jéeoba k-Dios, u Yuumil tuláakal páajtalileʼ, tsʼoʼok u káajal u reinar. Kiʼimakchajak k-óol yéetel chuʼupuk k-puksiʼikʼal yéetel nojoch kiʼimak óolal, yéetel koʼoneʼex tsʼáaik nojbeʼenil tiʼ Dios tumen tsʼoʼok u kʼuchul u kʼiinil u tsʼoʼokol u beel le Tamanoʼ; u yataneʼ u líiʼsmuba» (Apo. 19:6, 7).

2 «Le Taman» kun beetik u sen antal kiʼimak óolal teʼ kaʼan tumen yaan u tsʼoʼokol u beeloʼ, Jesucristo (Juan 1:29). ¿Bix le nookʼ ken u tak utiaʼal le kʼiin jeʼeloʼ? ¿Máax u novia? ¿Bix u yáantaʼal u líiʼsuba le noviatsil utiaʼal le bodaoʼ? ¿Baʼax kʼiin ken tsʼoʼokok u beeloʼob? K-ojleʼ leloʼ yaan u taasik kiʼimak óolal teʼ kaʼanoʼ, baʼaleʼ ¿yaan wa xan u kiʼimaktal u yóol le máaxoʼob kun pʼáatloʼob kuxtal way Luʼumoʼ? Jach taak k-ojéeltik u núukil le  kʼáatchiʼobaʼ, le oʼolal koʼoneʼex seguert k-xakʼaltik Salmo 45.

KIʼIBOK U NOOKʼ

3, 4. 1) ¿Bix u nookʼ le Noviotsiloʼ? 2) ¿Baʼax uláakʼ beetik u kiʼimaktal u yóol le Noviotsiloʼ? 3) ¿Máaxoʼob le ‹u hijas le reyoʼob› yéetel le ‹reina› ku kiʼimaktal u yóoloʼob yéetel le Noviotsiloʼ?

3 (Xok Salmo 45:8, 9.) Jesucristo, le Noviotsiloʼ, jach jatsʼuts le nookʼ ku tsʼáaikoʼ. Tsʼoʼoleʼ kiʼibokkíintaʼan yéetel u maas «kiʼibokil cheʼob», jeʼex mirra yéetel casia, le baʼaloʼobaʼ ku tsʼaʼabal kaʼach ichil le kiliʼich aceite ku meyaj utiaʼal u yéeyaʼal wa máax tu kaajil Israeloʼ (Éxo. 30:23-25).

4 Le taʼaytak le bodaoʼ, yaan uláakʼ baʼax beetik u kiʼimaktal u yóol le Noviotsiloʼ: letiʼe paax ku yuʼubaʼal tu palaciooʼ. Ku kiʼimaktal xan u yóol le ‹reinaoʼ› —u kaajal Dios yaan teʼ kaʼanoʼ— ichileʼ táakaʼan ‹u hijas reyoʼob›, wa tuláakal le angeloʼoboʼ. Jach jatsʼuts u yaʼalik le angeloʼoboʼ: «Kiʼimakchajak k-óol yéetel chuʼupuk k-puksiʼikʼal yéetel nojoch kiʼimak óolal [...] tumen tsʼoʼok u kʼuchul u kʼiinil u tsʼoʼokol u beel le Tamanoʼ».

KU YÁANTAʼAL LE NOVIATSIL U LÍIʼSUBAOʼ

5. ¿Máax «u yatan le Tamanoʼ»?

5 (Xok Salmo 45:10, 11.) Tsʼoʼok k-ojéeltik máax le Noviotsiloʼ, baʼaleʼ ¿máax u novia? Le noviatsiloʼ letiʼe 144,000 yéeyaʼanoʼoboʼ. Jesuseʼ letiʼ u Poolil le u múuchʼ sukuʼunoʼobaʼ (xok Efesoiloʼob 5:23, 24). Letiʼobeʼ yaan u gobernaroʼob yéetel Cristo teʼ kaʼanoʼ (Luc. 12:32). Le 144,000 sukuʼunoʼob yéeyaʼanoʼob yéetel kiliʼich muukʼoʼ «ku binoʼob tu paach le Taman jeʼel tuʼuxak ka xiʼikoʼ» (Apo. 14:1-4). Ku kʼuchul u beetubaʼob «u yatan le Tamanoʼ» yéetel ku binoʼob tu yotoch yaan teʼ kaʼanoʼ (Apo. 21:9; Juan 14:2, 3).

6. 1) ¿Baʼaxten ku yaʼalaʼal tiʼ le yéeyaʼanoʼob ‹u hija le reyoʼ› 2) ¿Baʼaxten ku yaʼalaʼal tiʼ yéeyaʼanoʼob ka u tuʼubs u kaajaloʼoboʼ?

6 Le noviatsiloʼ maʼ u hija jeʼel máaxakeʼ, baʼaxeʼ ‹u hija juntúul rey› (Sal. 45:13). ¿Máax le reyoʼ? Jéeoba, letiʼeʼ ku máatik le yéeyaʼanoʼob bey «u paalaloʼob[oʼ]» (Rom. 8:15-17). Tumen yaan u kʼuchul u beetubaʼob juntúul noviatsil teʼ kaʼanoʼ, ku yaʼalaʼaltiʼob: «Tuʼubs a láakʼtsiloʼob, tuʼubs xan a kaajal». Ku yaʼalaʼaltiʼob xan: «Chʼik a tuukuleʼex tiʼ le baʼaloʼob yanoʼob teʼ kaʼanoʼ, maʼ tiʼ le baʼaloʼob yanoʼob way Luʼumeʼ» (Col. 3:1-4).

7. 1) ¿Bix u yáantik Cristo le máax kun kʼuchul u beetuba u yatanoʼ? 2) Le noviatsiloʼ, ¿bix u yilik le máax kun kʼuchul u beetuba u yíichamoʼ?

7 Jesuseʼ úuch joʼopʼok u yáantik le máax kun kʼuchul u beetuba u yatan utiaʼal u tsʼoʼokol u beeloʼob teʼ kaʼanoʼ. Apóstol Pabloeʼ tu yaʼaleʼ Cristoeʼ «tu yaabiltaj [...] le múuchʼuliloʼ yéetel tu kʼububa tu yoʼolal, utiaʼal ka u kiliʼichkúunt ikil u yisíinsik yéetel u jaʼil u tʼaan Dios, utiaʼal beyoʼ ka u taas le múuchʼulil tu yiknal letiʼ yéetel tuláakal u kiʼichpanil, minaʼan u jóojom éekʼil, minaʼan u yuʼuyuchʼil, minaʼan mix junpʼíit tiʼ le baʼaloʼobaʼ, baʼaxeʼ kiliʼich yéetel minaʼan mix junpʼéel baʼal kʼaas tiʼ» (Efe. 5:25-27). Pabloeʼ tu yaʼalaj xan tiʼ le sukuʼunoʼob yéeyaʼanoʼob yaan kaʼach Corintooʼ: «In kʼáat in kanáanteʼex jeʼex u kanáantkeʼex Dioseʼ, tumen teen aʼal yaan u tsʼoʼokol a beeleʼex yéetel juntúuliliʼ máak, Cristo, yéetel in kʼáat in kʼubeʼex tiʼ letiʼ bey juntúul x-lóoʼbayan chʼúupal mix baʼal kʼaskúuntmileʼ» (2 Cor. 11:2). Le Rey Jesucristo wa le Noviotsiloʼ, kiʼichpan u yilik le máax kun kʼuchul u beetuba u yatanoʼ tumen maʼalob yanil tu táan Dios. Le noviatsil xanoʼ ku yilik bey u ‹tsʼuulil› le máax kun kʼuchul u beetuba u yíichamoʼ yéetel ku ‹yuʼubik u tʼaan›.

LE NOVIATSILOʼ «KU BISAʼAL TU TÁAN [REY]»

8. ¿Baʼaxten ku yaʼalaʼal jach «kiʼichpan» le noviatsiloʼ?

8 (Xok Salmo 45:13, 14 u yáax jaats.) Le noviatsiloʼ jach «kiʼichpan» u yilaʼal tu kʼiinil u tsʼoʼokol u beel. Apocalipsis 21:2, ku ketik yéetel junpʼéel kaaj, le Túumben Jerusalenoʼ, yéetel ku yaʼalikeʼ «jatsʼutskíintaʼan [...]  utiaʼal u yíicham». Le kaaj yaan teʼ kaʼanoʼ chuup yéetel «u nojbeʼenil Dios» yéetel ku léetsʼbal jeʼex «junpʼéel tuunich jach táaj kiʼichkelmeʼ, jeʼex ka jóopbalnak junpʼéel u tuunichil jaspe sáaskʼaleʼen jeʼex le cristaloʼ» (Apo. 21:10, 11). U libroil Apocalipsiseʼ ku yaʼalik bix jatsʼutsil u léetsʼbal le Túumben Jerusalenoʼ (Apo. 21:18-21). Le oʼolal bakáan le salmistaoʼ ku yaʼalikeʼ le noviatsiloʼ ku bin «yéetel tuláakal u kiʼichpanil». Lelaʼ beyoʼ, tumen teʼ kaʼan ku tsʼoʼokol u beel le reyoʼ.

9. 1) ¿Tu táan máax reyil ku bisaʼal le noviatsiloʼ? 2) ¿Bix u vestirmiluba le noviatsiloʼ?

9 Le noviatsiloʼ ku bisaʼal tu táan u Novio, le Rey yéeyaʼan tumen Diosoʼ. Le reyoʼ ku yáantik u novia, ku «yisíinsik yéetel u jaʼil u tʼaan Dios», le oʼolal «kiliʼich yéetel minaʼan mix junpʼéel baʼal kʼaas tiʼ» (Efe. 5:26, 27). Baʼaleʼ le noviatsiloʼ unaj xan u vestirtkuba maʼalob utiaʼal le bodaoʼ. ¡U jaajileʼ maʼalob u vestirmiluba! Ken bisaʼak tu táan le reyoʼ jatsʼuts u nookʼ, «chuyaʼan yéetel oro». Utiaʼal u boda le Tamanoʼ, le noviatsiloʼ «tsʼoʼok u tsʼaʼabal u páajtalil u búukintik junpʼéel nookʼ beetaʼan yéetel jach maʼalob lino, ku léembal yéetel jach limpio. Tumen le jach maʼalob linooʼ ku chíikbesik le baʼaloʼob maʼalobtak ku beetik le j-kiliʼichoʼoboʼ» (Apo. 19:8).

«TSʼOʼOK U KʼUCHUL U KʼIINIL U TSʼOʼOKOL U BEEL»

10. ¿Baʼax kʼiin u tsʼoʼokol u beel le Tamanoʼ?

10 (Xok Apocalipsis 19:7.) ¿Baʼax kʼiin u tsʼoʼokol u beel le Tamanoʼ? Apocalipsis 19:7, ku yaʼalikeʼ «u yataneʼ u líiʼsmuba» utiaʼal le bodaoʼ, baʼaleʼ le baʼax ku yaʼalik le versiculoʼob ku segueroʼ maʼ táan u tʼaan tiʼ baʼax kun úuchul teʼ kʼiinbesajoʼ. Baʼaxeʼ ku yaʼalik baʼax kun úuchul tu tsʼoʼokbal le nojoch muʼyajiloʼ (Apo. 19:11-21). ¿U kʼáat wa túun u yaʼaleʼ le bodaoʼ yaan u beetaʼal táanil tiʼ u chúukaʼan tsʼáanchaʼatik u enemigoʼob Jesucristo, le Noviotsiloʼ? Maʼ. Le náayoʼob ku chíikpajal tu libroil Apocalipsisoʼ maʼ tu tsoolol kun bin u yúuchliʼ. Le Salmo 45, ku yaʼalikeʼ le reyoʼ yaan u tsʼoʼokol u beel ken tsʼoʼokok u kʼaxnakʼtik u espada yéetel ku «bin táanil» utiaʼal u tsʼáanchaʼatik u enemigoʼob (Sal. 45:3, 4).

11. ¿Baʼaxoʼob kun úuchul táanil tiʼ le bodaoʼ?

11 Le oʼolaleʼ jeʼel u páajtal k-aʼalikeʼ bey kun bin u yúuchul le baʼaloʼobaʼ. Yáaxeʼ yaan u xuʼulsaʼal tiʼ le «x-nuk koʼolel chéen bey u máanoʼ», le Nojoch Babilonia wa tuláakal le religionoʼob maʼatech u kaʼanskoʼob u jaajiloʼ (Apo. 17:1, 5, 16, 17; 19:1, 2). Tsʼoʼoleʼ Cristoeʼ yaan u xuʼulsik tiʼ u kʼasaʼan yóokʼol kaab Satanás teʼ Armagedón, «u baʼatelil u noj kʼiinil le Dios yaan tuláakal páajtalil tiʼoʼ» (Apo. 16:14-16; 19:19-21). Tu tsʼookeʼ le Reyoʼ yaan u chúukaʼan tsʼáanchaʼatik Satanás yéetel u demonioʼob le ken u puloʼob teʼ taamkach chʼeʼenoʼ, yaan u pʼáatloʼob bey kimenoʼobeʼ tumen mix baʼal kun páajtal u beetkoʼob (Apo. 20:1-3).

12, 13. 1) ¿Baʼax kʼiin ken páajchajak u tsʼoʼokol u beel le Tamanoʼ? 2) Teʼ kaʼanoʼ, ¿máaxoʼob kun kiʼimaktal u yóoloʼob ken tsʼoʼokok u beel le Tamanoʼ?

12 Jeʼex u bin u kíimil le yéeyaʼanoʼob tu kʼiinil way yaan Cristoeʼ bey kun binoʼob teʼ kaʼanoʼ. Ken máanak junpʼíit tiempo xuʼulsaʼak tiʼ le Nojoch Babiloniaoʼ, Jesuseʼ yaan u muchʼik tu yiknal u yalab le sukuʼunoʼob yéeyaʼanoʼoboʼ wa le noviatsiloʼ (1 Tes. 4:16, 17). Le oʼolaleʼ tuláakal le yéeyaʼanoʼob wa le «noviatsiloʼ» tsʼoʼok u binoʼob teʼ kaʼan ken káajak le Armagedonoʼ. Ken tsʼoʼokok le Armagedonoʼ ku páajtal u tsʼoʼokol u beel le Tamanoʼ. ¡Jach yaan u taasik kiʼimak óolal! Apocalipsis 19:9, ku yaʼalik: «Kiʼimak u yóol le máaxoʼob invitartaʼanoʼob utiaʼal u cenail u tsʼoʼokol u beel le Tamanoʼ». Le 144,000 wa le noviatsiloʼ jach yaan u kiʼimaktal u yóoloʼob. Tsʼoʼoleʼ le Noviotsiloʼ jach yaan u kiʼimaktal u yóol ken múuchʼ anak yéetel tuláakal le máaxoʼob kun gobernar tu yéeteloʼ, bey ka kulakoʼob janal tu yéetel tu Reinoeʼ  (Luc. 22:18, 28-30). Baʼaleʼ maʼ chéen le Noviotsil yéetel le noviatsil kun kiʼimaktal u yóoloʼoboʼ.

13 Jeʼex tsʼoʼok k-ilkoʼ teʼ kaʼanoʼ yaʼab angeloʼob kun kʼayik: «Kiʼimakchajak k-óol yéetel chuʼupuk k-puksiʼikʼal yéetel nojoch kiʼimak óolal, yéetel koʼoneʼex tsʼáaik nojbeʼenil tiʼ Dios tumen tsʼoʼok u kʼuchul u kʼiinil u tsʼoʼokol u beel le Tamanoʼ; u yataneʼ u líiʼsmuba» (Apo. 19:6, 7). Baʼaleʼ ¿kux túun le máaxoʼob meyajtik Dios way Luʼumoʼ? ¿Yaan wa xan u kiʼimaktal u yóoloʼob?

«TÁAN U BINOʼOB YÉETEL KIʼIMAK ÓOLAL»

14. ¿Máaxoʼob le «xunáanoʼob» ku chʼaʼchiʼitaʼal teʼ Salmo 45?

14 (Xok Salmo 45:12, 14 u tsʼook jaats, 15.) Le profeta Zacaríasoʼ tu yaʼaleʼ tu tsʼook kʼiinoʼobeʼ yaan u yantal máakoʼob tiʼ tuláakal kaajoʼobeʼ kiʼimak u yóoloʼob kun múuchʼ antaloʼob yéetel u Israel Dios. Tu yaʼalaj: «Tiʼ le kʼiinoʼob túunoʼ diez j-táanxel luʼumiloʼobeʼ bíin u cháachoʼob juntúul judío tu nookʼ utiaʼal ka u yaʼaloʼobtiʼ: Toʼoneʼ k-kʼáat bin ta wéeteleʼex tumen tsʼoʼok k-uʼuyik tiʼ yaan [Dios] ta wéeteleʼexeʼ» (Zac. 8:23). Teʼ Salmo 45:12, tiʼ le «diez j-táanxel luʼumiloʼob[oʼ]» ku yaʼalaʼaltiʼob ‹u hija Tiro› yéetel u ‹j-ayikʼaliloʼob le kaajoʼ›. Letiʼobeʼ ku natsʼkubaʼob tiʼ le yéeyaʼanoʼob pʼaatloʼob way Luʼum utiaʼal u yaʼalikoʼob jeʼel u yáantajoʼobeʼ yéetel ku kʼáatkoʼob ka áantaʼakoʼob u meyajtoʼob Dios. Desde 1935, u millonesil máakoʼob tsʼoʼok u chaʼik u kaʼansaʼaloʼob tumen le yéeyaʼanoʼoboʼ (Dan. 12:3). Uláakʼ máaxoʼob ku múul meyajtikoʼob Dios yéetel le yéeyaʼanoʼoboʼ tsʼoʼok u kʼexik bix u kuxtaloʼob, le oʼolal maʼ éekʼ u kuxtaloʼob tu táan Diosiʼ. «Le xunáanoʼob láakʼintik» le noviatsiloʼ tsʼoʼok u kʼubik u kuxtaloʼob tiʼ Jéeoba yéetel maʼ xuʼuluk u tsaypachtikoʼob Rey Jesucristo, le Noviotsiloʼ.

15. ¿Bix u múul meyaj le «xunáanoʼob» yéetel u yalab le yéeyaʼanoʼoboʼ?

 15 U yalab le yéeyaʼanoʼob wa le noviatsiloʼ jach ku tsʼáaikoʼob u diosboʼotikil tiʼ le ‹xunáanoʼob láakʼintikoʼoboʼ›, tumen táan u yáantajoʼob utiaʼal u kʼaʼaytaʼal «u maʼalob péektsilil le Reino» tiʼ tuláakal yóokʼol kaaboʼ (Mat. 24:14). Maʼ chéen «le kiliʼich muukʼ yéetel le noviatsil [...] táan u yaʼalikoʼob: «¡Koʼoten!», baʼaxeʼ tak le máaxoʼob uʼuyikoʼ ku yaʼalikoʼob xan: «¡Koʼoten!» (Apo. 22:17). Jeʼex k-ilkoʼ le «uláakʼ tamanoʼob[oʼ]» tsʼoʼok u yuʼubikoʼob u yaʼalik le yéeyaʼanoʼob «¡Koʼoten!» yéetel letiʼob xaneʼ ku yaʼalikoʼob tiʼ tuláakal u kajnáaliloʼob le Luʼumaʼ (Juan 10:16).

16. ¿Baʼax páajtalil tsʼoʼok u tsʼáaik Jéeoba tiʼ le uláakʼ tamanoʼoboʼ?

16 Le sukuʼunoʼob yéeyaʼanoʼob pʼaatloʼob way Luʼumoʼ u yaabiltmoʼob le «uláakʼ tamanoʼob[oʼ]» yéetel kiʼimak u yóol u yojéeltikoʼobeʼ Jéeoba, u Taata le Noviotsiloʼ, tsʼoʼok u tsʼáaik xan u páajtalil u múul kiʼimaktal u yóoloʼob yoʼolal u tsʼoʼokol u beel le Tamanoʼ. Aʼalaʼaneʼ le «xunáanoʼob láakʼintik» le noviatsiloʼ yaan «u binoʼob yéetel kiʼimak óolal». Jach beyoʼ le uláakʼ tamanoʼob táan u páaʼtik u kuxtaloʼob way Luʼumoʼ yaan u múul kiʼimaktal u yóoloʼob yéetel tuláakal u familia Dios ken tsʼoʼokok u beel le Tamanoʼ. U libroil Apocalipsiseʼ ku yaʼalikeʼ le «yaʼabkach máakoʼob», wa le máaxoʼob meyajtik Jéeoba way Luʼumoʼ, «waʼalakbaloʼob tu táan le trono yéetel tu táan le Tamanoʼ». Letiʼobeʼ ku meyajtikoʼob Jéeoba tu táankabil u templo (Apo. 7:9, 15).

Le «xunáanoʼob láakʼintik» le noviatsiloʼ ku kiʼimaktal u yóoloʼob ken tsʼoʼokok u beel le Tamanoʼ (Ilawil xóotʼol 16)

‹A PAALALOʼOBEʼ TU KʼAANCHEʼ A ÚUCHBEN CHʼIʼIBALOʼOB KUN ANTAL›

17, 18. 1) ¿Baʼax utsiloʼob kun antal ken tsʼoʼokok u beel le Tamanoʼ? 2) Ichil le mil jaʼaboʼob kun reinar Cristooʼ, ¿máaxoʼob kun kʼuchul u beetubaʼob u paalal?

17 (Xok Salmo 45:16.) Le «xunáanoʼob láakʼintik» u novia Cristooʼ yaan u maas kiʼimaktal u yóoloʼob ken u yiloʼob le utsiloʼob kun antal teʼ túumben luʼum ken tsʼoʼokok u beel le Tamanoʼ. Ken tsʼoʼokkeʼ Jesucristo, le Noviotsiloʼ yaan u kaʼa kuxkíintik u «úuchben chʼiʼibaloʼob», letiʼob túuneʼ yaan u kʼuchul u beetubaʼob u «paalaloʼob» way Luʼumeʼ (Juan 5:25-29; Heb. 11:35). Yaan tiʼ letiʼobeʼ yaan «u méekʼtáantikoʼob tuláakal» yóokʼol kaab. Maʼ xaaneʼ yaan jujuntúul tiʼ le ancianoʼob chúukaʼan u yóoloʼob bejlaʼoʼ yaan u tsʼaʼabaloʼob nuʼuktaj teʼ túumben luʼumoʼ (Isa. 32:1).

18 Ken reinarnak Cristo tu yáamil le mil jaʼaboʼoboʼ yaan u kʼuchul u beetuba u taata uláakʼ máakoʼob. ¿Baʼaxten? Tumen le máaxoʼob ken u tsʼáa u fejoʼob tiʼ u kuxtal tu kʼuboʼ yaan u kuxtaloʼob minaʼan u xuul (Juan 3:16). Bey túunoʼ Jesuseʼ yaan u kʼuchul u beetuba juntúul Taatatsil minaʼan xuʼulul tiʼ (Isa. 9:6, 7).

KU TAAKTAL U KʼAʼAJSIKOʼOB U KʼAABAʼ

19, 20. ¿Baʼax ku taaktal u beetik máak yoʼolal le baʼaxoʼob ku yaʼalik le Salmo 45?

19 (Xok Salmo 45:1, 17.) Jeʼex tsʼoʼok k-ilkoʼ le baʼaxoʼob ku yaʼalik le Salmo 45, jach kʼaʼanaʼan utiaʼal tuláakal máax meyajtik Dios. Le yéeyaʼanoʼob pʼaatloʼob way Luʼumoʼ jach táan u páaʼtkoʼob u binoʼob kaʼan utiaʼal u múul antaloʼob yéetel u sukuʼunoʼob bey xan yéetel le Noviotsiloʼ. Le uláakʼ tamanoʼoboʼ jach taak u yantaloʼob yáanal u nuʼuktaj u Reyoʼob, tumen kiʼimak u yóol u múul meyajoʼob yéetel le noviatsiloʼ wa le yéeyaʼanoʼob pʼaatloʼob way Luʼumoʼ. Ken tsʼoʼokok le bodaoʼ, Cristo yéetel u yéet reyiloʼobeʼ yaan u taaskoʼob yaʼab utsiloʼob tiʼ wíinikoʼob (Apo. 7:17; 21:1-4).

20 Ken tuukulnakoʼon tiʼ le «jatsʼuts» baʼaloʼob ken u beet le Rey yéeyaʼan tumen Diosoʼ, ¿máasaʼ ku taaktal ‹k-kʼaʼajsik u kʼaabaʼ› wa k-tsʼáaik kʼaj óoltbil? Le oʼolaleʼ, ¡koʼoneʼex kiʼikiʼtʼantik mantatsʼ le Reyoʼ!