Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

«Toʼoneʼ k-kʼáat bin ta wéeteleʼex»

«Toʼoneʼ k-kʼáat bin ta wéeteleʼex»

«Toʼoneʼ k-kʼáat bin ta wéeteleʼex tumen tsʼoʼok k-uʼuyik tiʼ yaan [Dios] ta wéeteleʼexeʼ.» (ZAC. 8:23)

KʼAAYOʼOB: 65, 122

1, 2. 1) ¿Baʼax tu yaʼalaj Jéeoba kun úuchul teʼ kʼiinoʼobaʼ? 2) ¿Baʼax kʼáatchiʼiloʼob kun núukbil teʼ xookaʼ? (Ilawil le dibujo yaan tu káajbal le xookaʼ.)

JÉEOBAEʼ tu yaʼaleʼ teʼ kʼiinoʼobaʼ «diez j-táanxel luʼumiloʼobeʼ bíin u cháachoʼob juntúul judío tu nookʼ utiaʼal ka u yaʼaloʼobtiʼ: Toʼoneʼ k-kʼáat bin ta wéeteleʼex tumen tsʼoʼok k-uʼuyik tiʼ yaan [Dios] ta wéeteleʼexeʼ» (Zac. 8:23). Le ‹judíooʼ› ku chíikbesik le máaxoʼob yéeyaʼanoʼob tumen Dios yéetel u kiliʼich muukʼoʼ. Letiʼobeʼ ku yaʼalaʼal xan tiʼob «u Israel Dios» (Gal. 6:16). Le «diez j-táanxel luʼumiloʼob[oʼ]» ku chíikbeskoʼob le máaxoʼob kun pʼáatloʼob kuxtal way Luʼumoʼ. Letiʼobeʼ u yojloʼobeʼ Dioseʼ ku bendecirtik le máaxoʼob yéeyaʼanoʼoboʼ yéetel kiʼimak u yóoloʼob ikil u múul meyajtikoʼob Jéeoba.

2 Le profeta Zacarías bey xan Jesusoʼ tu yaʼaloʼobeʼ u kaajal Dioseʼ yaan u múuchʼ meyaj. Jesuseʼ tu yaʼaleʼ le máaxoʼob kun binoʼob kuxtal kaʼanoʼ ‹u chan múuchʼ tamanoʼob› yéetel le máaxoʼob kun pʼáatloʼob kuxtal way Luʼumeʼ «uláakʼ tamanoʼob». Chéen baʼaleʼ tu yaʼalaj xaneʼ «yaan u pʼáatloʼob junmúuchʼ» yéetel yaan u beetkoʼob baʼax ku yaʼalik le «j-kanan taman[oʼ]» (Luc. 12:32; Juan 10:16). Wa kaʼa jaatsoʼobeʼ maʼ xaaneʼ jeʼel k-tuklik lelaʼ: Le uláakʼ tamanoʼoboʼ, ¿kʼaʼabéet wa u yojéeltikoʼob u kʼaabaʼ tuláakal le máaxoʼob yéeyaʼanoʼoboʼ? ¿Bix unaj u yuʼubikuba le máaxoʼob yéeyaʼanoʼob yoʼolal le privilegio tsʼaʼantiʼoboʼ? Wa yaan máax teʼ múuchʼulil ku káajal u  jaantik le waaj yéetel u yukʼik le vinooʼ, ¿bix unaj k-tratartik? Wa cada año táan u maas yaʼabtal le máaxoʼob jaantik le waaj yéetel ku yukʼikoʼob le vino teʼ Kʼaʼajsajiloʼ, ¿unaj wa k-sen máansik t-tuukul baʼaxten ku yúuchul lelaʼ? Le xookaʼ yaan u núukik le kʼáatchiʼobaʼ.

¿KʼAʼABÉET WA K-OJÉELTIK U KʼAABAʼ TULÁAKAL LE MÁAXOʼOB YÉEYAʼANOʼOBOʼ?

3. ¿Baʼaxten maʼ tu páajtal k-ojéeltik u kʼaabaʼ tuláakal le máaxoʼob yéeyaʼanoʼoboʼ?

3 Le uláakʼ tamanoʼoboʼ, ¿kʼaʼabéet wa u yojéeltikoʼob u kʼaabaʼ tuláakal le máaxoʼob yéeyaʼanoʼoboʼ? Maʼatech. Tsʼoʼoleʼ maʼ xan tu páajtal k-ojéeltik tumen mix máak way Luʼum u yojel jach máaxoʼob kun binoʼob kaʼan. [1] Kex tsʼoʼok u yéeyaʼaloʼob tumen Dioseʼ chéen wa ku chúukpajal u yóoloʼobeʼ ku tsʼaʼabaltiʼob le privilegio aʼalaʼantiʼoboʼ. Satanaseʼ u yojel lelaʼ, le oʼolal ku meyajtiʼ ‹máakoʼob ku yaʼalikubaʼob profetaʼob› «utiaʼal u tuskoʼob» (Mat. 24:24). Le sukuʼunoʼoboʼ kex jach seguroʼob yéeyaʼanoʼobeʼ u yojloʼob chéen Jéeoba kun aʼalik wa chúukpaj u yóoloʼob utiaʼal ka xiʼikoʼob kaʼan. Lelaʼ ku yaʼalaʼaltiʼob wa ku sellartaʼaloʼob ken kíimkoʼob, yanoʼob xaneʼ yaan u sellartaʼaloʼob junpʼíit antes tiʼ u káajal «le nojoch yaayaj óolaloʼ» (Apo. 2:10; 7:3, 14).

4. Wa maʼ tu páajtal k-ojéeltik u kʼaabaʼ tuláakal le máaxoʼob yéeyaʼanoʼoboʼ, ¿bix túun jeʼel u páajtal u bin le uláakʼ tamanoʼob tu yéeteloʼoboʼ?

4 Wa maʼ tu páajtal k-ojéeltik u kʼaabaʼ tuláakal le máaxoʼob yéeyaʼanoʼoboʼ, ¿bix túun jeʼel u páajtal u bin le uláakʼ tamanoʼob tu yéeteloʼoboʼ? Le Bibliaoʼ ku yaʼalikeʼ le «diez j-táanxel luʼumiloʼob[oʼ] bíin u cháachoʼob juntúul judío tu nookʼ utiaʼal ka u yaʼaloʼobtiʼ: Toʼoneʼ k-kʼáat bin ta wéeteleʼex tumen tsʼoʼok k-uʼuyik tiʼ yaan [Dios] ta wéeteleʼexeʼ». Jeʼex k-ilkoʼ le tekstoaʼ chéen ku tʼaan tiʼ juntúul judío, chéen baʼaleʼ ken tsʼoʼokkeʼ ku yaʼalik «ta wéeteleʼex», lelaʼ ku tsʼáaik naʼatbileʼ táan u tʼaan tiʼ yaʼab máakoʼob. Lelaʼ u kʼáat u yaʼaleʼ le judíooʼ maʼ chéen juntúul máakiʼ, baʼaxeʼ ku chíikbesik tuláakal le máaxoʼob yéeyaʼanoʼoboʼ. Le uláakʼ tamanoʼoboʼ u yojloʼob lelaʼ, le oʼolal junmúuchʼ u meyajtikoʼob Jéeoba yéetel le yéeyaʼanoʼoboʼ. Le uláakʼ tamanoʼoboʼ maʼ tsaaj u yojéeltikoʼob u kʼaabaʼ cada juntúul tiʼ le yéeyaʼanoʼob utiaʼal ka múul meyajnakoʼob tu yéeteloʼoboʼ. Toʼoneʼ k-ojleʼ Jesús nuʼuktikoʼon yéetel le Bibliaoʼ ku yaʼalikeʼ chéen letiʼ unaj u yaʼaliktoʼon baʼax unaj k-beetik (Mat. 23:10).

¿BIX UNAJ U YUʼUBIKUBA LE MÁAXOʼOB YÉEYAʼANOʼOB YOʼOLAL U PRIVILEGIOʼOBOʼ?

5. ¿Baʼax jach unaj u chʼaʼik en cuenta le máaxoʼob yéeyaʼanoʼoboʼ, yéetel baʼaxten?

5 Le máaxoʼob yéeyaʼanoʼoboʼ jach unaj u chʼaʼikoʼob en cuenta le baʼax ku yaʼalik Yáax tiʼ Corintoiloʼob 11:27 tak 29 (xoke). Juntúul máax yéeyaʼaneʼ, ¿bix jeʼel u páajtal u jaantik le waaj yéetel u yukʼik le vino «kex maʼ tu náajmatik[oʼ]»? Wa maʼ maʼalob yanil tu táan Jéeoba yéetel maʼ chúukaʼan u yóol tiʼeʼ, le ken u jaant le waaj yéetel ken u yukʼ le vinooʼ maʼ táan u yeʼesik tsiikil tiʼ Jéeobaiʼ (Heb. 6:4-6; 10:26-29). Lelaʼ ku yeʼesik tiʼ le máaxoʼob yéeyaʼanoʼoboʼ kʼaʼabéet u chúukpajal u yóoloʼob utiaʼal u kʼamkoʼob ‹le siibaloʼ; lelaʼ letiʼe kuxtal teʼ kaʼan kun tsʼaabiltiʼob tumen Dios tu yoʼolal Cristo Jesusoʼ› (Fili. 3:13-16).

6. ¿Bix unaj u yuʼubikuba le máaxoʼob yéeyaʼanoʼob yoʼolal u privilegioʼoboʼ?

6 Pabloeʼ tu yaʼalaj tiʼ le máaxoʼob yéeyaʼanoʼoboʼ: «Teen, máax kʼalaʼanen tu yoʼolal Yuumtsileʼ, kin kʼáatikteʼex ka xíimbalnakeʼex jeʼex u páaʼtaʼal tiʼ teʼex le ka tʼaʼaneʼexoʼ». ¿Bix jeʼel u beetkoʼob lelaʼ? Pabloeʼ tu yaʼalaj: «Ka kabalchajak a wóoleʼex mantatsʼ, ka yanakteʼex jetsʼ óolal, ka chúukpajak a wóoleʼex, ka a muʼyajtabaʼex ta baatsileʼex yéetel yaabilaj, ka yanakteʼex jeetsʼelil ta baatsileʼex yéetel ka a xachabaʼex [wa ka a tsʼáa a wóoleʼex] utiaʼal ka múuchʼ pʼáatkeʼex jeʼex úuchik a muʼuchʼleʼex tumen le kiliʼich muukʼoʼ» (Efe. 4:1-3).  U kiliʼich muukʼ Jéeobaeʼ ku yáantik máaxoʼob meyajtik utiaʼal ka u yeʼesoʼob kabal óolal, maʼ utiaʼal ka u nojbaʼalkúuntubaʼobiʼ (Col. 3:12). Le oʼolaleʼ le máaxoʼob yéeyaʼanoʼoboʼ maʼatech u tuklikoʼob wa maas maʼaloboʼob tiʼ u maasiliʼ. Letiʼobeʼ u yojloʼobeʼ Jéeobaeʼ maʼ tu tsʼáaik maas yaʼab kiliʼich muukʼ tiʼ letiʼob ke tiʼ u maasil máaxoʼob maʼ yéeyaʼanoʼoboʼ. Maʼ xan tech u tuklikoʼob wa maas maʼalob bix u naʼatkoʼob le baʼaxoʼob ku yaʼalik le Biblia ke tiʼ u maasiloʼ. Juntúul máax yéeyaʼaneʼ junpuliʼ maʼ maʼalob ka u yaʼal tiʼ uláakʼ sukuʼun jeʼel u páajtal u jaantik xan le waaj yéetel u yukʼik le vinooʼ. Baʼaxeʼ le máaxoʼob yéeyaʼanoʼoboʼ ku yeʼeskoʼob kabal u yóoloʼob yéetel u yojloʼobeʼ chéen Jéeoba jeʼel u páajtal u yaʼalik máax uláakʼ yéeyaʼaneʼ.

7, 8. 1) ¿Baʼax maʼ tu páaʼtik le máaxoʼob yéeyaʼanoʼoboʼ? 2) ¿Baʼaxten maʼ unaj u biskuba juntúul máax yéeyaʼan chéen yéetel uláakʼ máaxoʼob yéeyaʼanoʼobiʼ?

7 Le máaxoʼob yéeyaʼanoʼoboʼ u yojloʼobeʼ junpʼéel nojoch privilegio u binoʼob kaʼan, chéen baʼaleʼ maʼ unaj u páaʼtkoʼob ka tratartaʼakoʼob maas maʼalob yoʼolal lelaʼ (Efe. 1:18, 19; xok Filiposiloʼob 2:2, 3). U yojloʼobeʼ Jéeobaeʼ maʼ tiʼ tuláakal máak tu tsʼáaj u yojéelt wa tsʼoʼok u yéeyikoʼobiʼ. Le oʼolaleʼ maʼ unaj u jaʼakʼal u yóoloʼob wa maʼ tu creertaʼal tumen u maasil wa yéeyaʼanoʼob. U yojloʼob xaneʼ le Bibliaoʼ ku kaʼansikeʼ maʼ unaj k-jáan creertik wa yaan máax ku yaʼalik tsʼoʼok u tsʼaʼabaltiʼ junpʼéel nojoch privilegioiʼ (Apo. 2:2). Juntúul máax yéeyaʼaneʼ maʼatech u páaʼtik ka tratartaʼak bey juntúul máax jach especialeʼ, tsʼoʼoleʼ ken u kʼaj óolt wa máaxeʼ maʼatech u jáan aʼaliktiʼ wa yéeyaʼan. Maʼ xaaneʼ hasta maʼ ten u yaʼal tiʼ mix máak. Tsʼoʼoleʼ maʼ xan tech u creerkuba yoʼolal le jatsʼuts meyajoʼob ken u beet teʼ kaʼanoʼ (1 Cor. 1:28, 29; xok 1 Corintoiloʼob 4:6-8).

8 Le máaxoʼob yéeyaʼanoʼoboʼ maʼ unaj u tuklikoʼob wa chéen unaj u biskubaʼob yéetel uláakʼ máaxoʼob yéeyaʼanoʼobiʼ wa u beetkoʼob u chan grupoʼob. Maʼ xan tech u máan u kaxtoʼob uláakʼ sukuʼunoʼob yéeyaʼanoʼob chéen utiaʼal ka joʼopʼok u tsikbaltikoʼob bix u yuʼubikubaʼob yoʼolal le esperanza yaantiʼoboʼ wa utiaʼal u múul xokikoʼob le Bibliaoʼ (Gal. 1:15-17). Wa ka u beet le máaxoʼob yéeyaʼanoʼob lelaʼ yaan u jatskuba le sukuʼunoʼob teʼ múuchʼuliloʼ. Tsʼoʼoleʼ yaan xan u binoʼob tu contra u kiliʼich muukʼ Dios, le baʼax beetik u yantal kiʼimak óolal yéetel u múuchʼ meyaj le sukuʼunoʼob teʼ múuchʼuliloʼ (xok Romailoʼob 16:17, 18).

¿BIX UNAJ K-TRATARTIKOʼOB?

9. ¿Baʼaxten unaj k-kanáantik bix k-tratartik juntúul sukuʼun wa juntúul kiik yéeyaʼan? (Ilawil le cuadro « Le yaabilajoʼ ‹maʼ tu beetik baʼaloʼob suʼtsiltak›».)

9 ¿Bix unaj k-tratartik juntúul sukuʼun wa juntúul kiik ku jaantik le waaj yéetel ku yukʼik le vino teʼ Kʼaʼajsajiloʼ? Jesuseʼ tu yaʼalaj tiʼ u disipuloʼob: «Teʼexeʼ láaj sukuʼuntsileʼex». Tsʼoʼoleʼ tu yaʼalaj: «Le máax ku nojbeʼenkúuntkubaeʼ yaan u mixbaʼalkúuntaʼal, le máax ku mixbaʼalkúuntkubaeʼ yaan u nojbeʼenkúuntaʼal» (Mat. 23:8-12). Maʼ maʼalob ka k-nojbeʼenkúunt mix máakiʼ mix tumen juntúul sukuʼun yéeyaʼan. Le Bibliaoʼ ken tʼaanak tiʼ le ancianoʼoboʼ ku yaʼalikeʼ unaj u yantaltoʼon le fe yaantiʼoboʼ, chéen baʼaleʼ maʼ tu yaʼalik ka k-iloʼob bey u maas nojchiloʼob ichiloʼoneʼ (Heb. 13:7). U jaajileʼ le Bibliaoʼ ku yaʼalikeʼ le ancianoʼoboʼ ku náajmatkoʼob ka tsʼaʼabak «kaʼamáal tsiikil tiʼob». Pero ku yaʼalikeʼ lelaʼ unaj k-beetik tumen «maʼalob u meyajoʼob» yéetel «jach ku tsʼáaik u yóoloʼob u tsikbaltoʼob yéetel u kaʼansoʼob u tʼaan Dios» maʼ tumen wa yéeyaʼanoʼobiʼ (1 Tim. 5:17). Wa k-nojbeʼenkúuntik yéetel k-tratartik le yéeyaʼanoʼob bey jach especialoʼobeʼ, jeʼel k-beetik u suʼlaktaloʼobeʼ wa jeʼel k-beetik u káajal u yuʼubikoʼob maas maʼaloboʼob tiʼ u maasileʼ (Rom. 12:3). ¿Máasaʼ toʼoneʼ jach junpuliʼ maʼ k-kʼáat k-beet u lúubul tiʼ baʼax kʼaas juntúul máax yéeyaʼaniʼ? (Luc. 17:2.)

Wa yaan máax ku jaantik le waaj yéetel ku yukʼik le vinooʼ, ¿bix unaj k-tratartik? (Ilawil xóotʼol 9 tak 11)

10. ¿Bix jeʼel k-eʼesik tsiikil tiʼ le máaxoʼob yéeyaʼanoʼob tumen Jéeobaoʼ?

 10 ¿Bix jeʼel k-eʼesik tsiikil tiʼ le máaxoʼob yéeyaʼanoʼob tumen Jéeobaoʼ? Maʼ unaj k-kʼáatiktiʼob bix úuchik u yéeyaʼaloʼobiʼ tumen lelaʼ chéen letiʼob yéetel Jéeoba u yojloʼob, tsʼoʼoleʼ maʼ junpʼéel baʼal unaj k-ojéeltik toʼoniʼ (1 Tes. 4:11; 2 Tes. 3:11). Maʼ unaj xan k-kʼáatiktiʼob wa yéeyaʼan u núup, u taataʼob wa uláakʼ máax ichil u láakʼtsiloʼobiʼ, tumen u yéeyaʼal máakeʼ maʼ bey jeʼex u máansaʼal junpʼéel herencia tiʼ wa máaxeʼ (1 Tes. 2:12). Maʼ maʼalob xan ka k-kʼáat tiʼ u yatan juntúul sukuʼun yéeyaʼan bix u yuʼubikuba ikil u yojéeltik maʼ kun kuxtal u yíicham tu yéetel teʼ Paraíso kun antal way Luʼumoʼ, tumen lelaʼ jeʼel u beetik u lúubul u yóoleʼ. Toʼoneʼ k-ojleʼ Jéeobaeʼ teʼ túumben luʼumoʼ yaan u tsʼáaik tuláakal baʼax kun kʼaʼabéettal tiʼ máak (Sal. 145:16).

11. ¿Baʼaxten maʼ unaj k-tratartik bey jach especial mix máakiʼ?

11 K-tratartik le sukuʼunoʼob yéeyaʼanoʼob jeʼex u maasil sukuʼunoʼoboʼ ku kanáantkoʼon xan. ¿Baʼaxten? Le Bibliaoʼ ku yaʼalikeʼ teʼ múuchʼuliloʼ yaan u yantal «máaxoʼob ku yaʼalikubaʼob sukuʼunoʼob», maʼ xaaneʼ hasta yaan u yaʼalikoʼob yéeyaʼanoʼob (Gal. 2:4, 5; 1 Juan 2:19). Maʼ xaaneʼ yaan tiʼ le yéeyaʼanoʼoboʼ maʼ tun chúukpajal u yóoloʼob tiʼ Jéeoba (Mat. 25:10-12; 2 Ped. 2:20, 21). Tsʼoʼoleʼ mix máak unaj k-tratartik bey jach especialeʼ, tumen leloʼ jeʼel u beetik u joʼopʼol k-tsaypachtik le máaxoʼob yéeyaʼanoʼoboʼ, le máaxoʼob k-kʼaj óoloʼoboʼ wa le sukuʼunoʼob úuch joʼopʼok u meyajtikoʼob Diosoʼ. Wa k-tsaypachtik chéen máakoʼob yéetel ku náachtaloʼob tiʼ Dioseʼ yaan xan u beetkoʼob k-náachtal tiʼ Dios (Jud. 16).

¿UNAJ WA K-SEN TUKLIK BAʼAXTEN TÁAN U YAʼABTAL LE MÁAXOʼOB JAANTIK LE WAAJ YÉETEL UKʼIK LE VINOOʼ?

12, 13. ¿Unaj wa k-sen tuklik baʼaxten táan u yaʼabtal le máaxoʼob jaantik le waaj yéetel ukʼik le vinooʼ?

12 Kaʼacheʼ cada año ku máaneʼ ku menostal le máaxoʼob jaantik le waaj yéetel ukʼik le vino teʼ Kʼaʼajsajiloʼ. Chéen baʼaleʼ teʼ tu tsʼook añoʼobaʼ táan u maas yaʼabtal. ¿Unaj wa k-sen tuklik baʼaxten ku yúuchul lelaʼ? Maʼ unajiʼ. Koʼox ilik baʼaxten.

13 «Jéeobaeʼ u kʼaj óol le máaxoʼob u tiaʼaloʼoboʼ.» (2 Tim. 2:19.) Le sukuʼunoʼob xokik jaytúul máaxoʼob jaantik le waaj yéetel ukʼik le vinooʼ maʼ u yojloʼob jach máaxoʼob kun binoʼob kaʼaniʼ, lelaʼ chéen Jéeoba u yojel. Unaj k-kʼaʼajsikeʼ ichil le máaxoʼob ku xoʼokloʼoboʼ táakaʼan le sukuʼunoʼob wa kiikoʼob chéen letiʼob tuklik yéeyaʼanoʼoboʼ. Maʼ xaaneʼ yaan sukuʼunoʼobeʼ káaj u jaantkoʼob le waaj yéetel u yukʼikoʼob le vinooʼ, chéen baʼaleʼ xuʼul u beetkoʼob. Yanoʼob  xaneʼ tumen kʼojaʼanoʼobeʼ maʼ jach maʼalob bix u tuukuloʼobiʼ, le oʼolal ku tuklikoʼob yaan u binoʼob gobernar yéetel Jesús teʼ kaʼanoʼ. Jeʼex túun k-ilkoʼ bejlaʼeʼ maʼ tu páajtal k-ojéeltik jach jaytúul tiʼ le yéeyaʼanoʼob pʼaatloʼob way Luʼum kun binoʼob kaʼanoʼ.

14. ¿Ku yaʼalik wa le Biblia jaytúul yéeyaʼanoʼob pʼaatal way Luʼum ken káajak le nojoch muʼyajiloʼ?

14 Tiʼ tuláakal yóokʼol kaab kun antal yéeyaʼanoʼob ken taalak Jesús u chʼaʼob utiaʼal u biskoʼob kaʼan. Le Bibliaoʼ ku yaʼalikeʼ Jesuseʼ «yaan u túuxtik u angeloʼob utiaʼal ka u muchʼkíintoʼob yéetel u juum junpʼéel trompeta tuláakal le máaxoʼob u yéeymaj desde tu kantiʼitsil le yóokʼol kaaboʼ, desde tiʼ junpʼéel u tiʼits le kaʼanoʼ tak tuláakʼ u tiʼits» (Mat. 24:31). Le Bibliaoʼ ku yaʼalik xaneʼ teʼ tu tsʼook kʼiinoʼoboʼ chéen junpʼíit yéeyaʼanoʼob kun pʼaatloʼob way Luʼumeʼ (Apo. 12:17). Chéen baʼaleʼ maʼ tu yaʼalik jaytúul pʼaatal way Luʼum ken káajak le nojoch muʼyajiloʼ.

15, 16. ¿Baʼax uláakʼ unaj k-chʼaʼik en cuenta tu yoʼolal le 144,000?

15 Jéeoba chʼaʼtuklik baʼax kʼiin ken u yéey le máaxoʼob kun binoʼob kaʼanoʼ (Rom. 8:28-30). Jéeobaeʼ káaj u yéeyik le máaxoʼob kun binoʼob kaʼan ka tsʼoʼok u kaʼa kuxkíintik Jesusoʼ. Maʼ xaaneʼ teʼ yáax siglooʼ tuláakal le sukuʼunoʼob tu tsʼáaj u yóol u meyajtoʼob Dios yéeyaʼaboʼoboʼ. Úuchjeakileʼ yaʼab máaxoʼobeʼ chéen ku yaʼalikubaʼob kaʼach cristianoʼob. Teʼ kʼiinoʼoboʼ Jéeobaeʼ chéen tu yéeyaj jujuntúul máaxoʼob jach tu jaajil meyajtik. Le sukuʼunoʼob yéeyaʼanoʼobaʼ letiʼe trigo tu yaʼalaj Jesús kun nuuktal ichil le kʼaakʼas xíiwoʼ (Mat. 13:24-30). Tak teʼ kʼiinoʼobaʼ Jéeobaeʼ láayliʼ táan u yéeyik ichil u kaajal le máaxoʼob kun táakpajloʼob ichil le 144,000. [2] Bey túunoʼ wa Dios ku chʼaʼtuklik u yéeyik wa máax le jach taʼaytak le xuʼulsajiloʼ maʼ unaj k-aʼalik wa maʼ maʼalob baʼax ku beetkiʼ (Isa. 45:9; Dan. 4:35; xok Romailoʼob 9:11, 16). [3] Toʼoneʼ maʼ unaj k-tʼaan tu contra Jéeoba jeʼex úuchik u beetik le j-meyajoʼob tu yaʼalaj Jesús tiʼ junpʼéel ejemplooʼ, le j-meyajoʼoboʼ joʼopʼ u kʼuuxiloʼob tumen igual úuchik u boʼotaʼaloʼob yéetel le máaxoʼob meyajnajoʼob chéen junpʼéel horaoʼ (xok Mateo 20:8-15).

16 Maʼ tuláakal le máaxoʼob kun binoʼob kaʼan táakaʼanoʼob ichil «le palitsil chúukaʼan u yóol yéetel yaan u naʼat[oʼ]» (Mat. 24:45-47). Teʼ yáax siglooʼ, Jéeoba yéetel Jesuseʼ chéen junpʼíit máakoʼob meyajnajtiʼob utiaʼal u tséentik wa u kaʼansik yaʼab máak. Teʼ yáax siglo xanoʼ chéen jujuntúul tiʼ le sukuʼunoʼob yéeyaʼanoʼob táakpajoʼob utiaʼal u tsʼíibtikoʼob le Kiliʼich Tsʼíiboʼob ich Griegooʼ. Bejlaʼa xaneʼ chéen junpʼíit sukuʼunoʼob ku táakpajloʼob utiaʼal u tsʼáaikoʼob le ‹janal jach tu yorail› tiʼ u kaajal Diosoʼ.

17. ¿Baʼax tsʼoʼok k-kanik teʼ xookaʼ?

17 ¿Baʼax tsʼoʼok k-kanik teʼ xookaʼ? Tsʼoʼok k-kanikeʼ Jéeobaeʼ yaan u tsʼáaik kuxtal minaʼan u xuul way Luʼum tiʼ u maas yaʼabil le máaxoʼob meyajtikoʼ yéetel yaan u tsʼáaik kuxtal minaʼan u xuul tiʼ le máaxoʼob kun gobernar yéetel Jesús teʼ kaʼanoʼ. Jéeobaeʼ yaan u bendecirtik le ‹judíooʼ› bey xan le «diez j-táanxel luʼumiloʼob[oʼ]», wa tuláakal le máaxoʼob meyajtikoʼ. Chéen baʼaleʼ utiaʼal u bendecirtaʼaloʼobeʼ kʼaʼabéet u beetkoʼob baʼax uts tu tʼaan, maʼ u náachtaloʼob tiʼ letiʼ, u yeʼeskoʼob kabal óolal, u múul meyajoʼob yéetel u paklan yaabiltikubaʼob teʼ múuchʼuliloʼ. Bey túunoʼ beora jach tsʼoʼok u náatsʼal le xuʼulsajiloʼ koʼoneʼex tsʼáaik k-óol k-meyajt Jéeoba yéetel k-tsaypacht Cristo, le «juntúuliliʼ j-kanan taman[oʼ]».

^ [1] (xóotʼol 3) Salmo 87:5 yéetel 6, ku tsʼáaik naʼatbileʼ teʼ kʼiinoʼob ku taaloʼ, maʼ xaaneʼ Dioseʼ yaan u tsʼáaik ojéeltbil u kʼaabaʼ le máaxoʼob kun gobernar yéetel Jesús teʼ kaʼanoʼ (Rom. 8:19).

^ [2] (xóotʼol 15) U libroil Baʼaxoʼob 2:33, ku yeʼesikeʼ kex ku táakpajal Jesús utiaʼal u yéeyaʼal le máaxoʼob kun binoʼob kaʼanoʼ, chéen Jéeoba chʼaʼtuklik máax tiʼ ken u tsʼáa le privilegiooʼ.

^ [3] (xóotʼol 15) Wa taak a wojéeltik u maasileʼ ilawil le xook «Kʼáatchiʼob ku beetaʼal» tiʼ U Pʼíich Tulumil Kanan ich español, 1 tiʼ mayo tiʼ 2007, táan juʼun 30 yéetel 31.