Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Kiʼimak k-óol chéen yéetel junpʼíit baʼaloʼob

Kiʼimak k-óol chéen yéetel junpʼíit baʼaloʼob

DANIEL YÉETEL MÍRIAMEʼ tsʼoʼok u beeloʼob tu mesil septiembre tiʼ u añoil 2000 yéetel binoʼob kajtal Barcelona, España. Danieleʼ ku yaʼalik: «Maʼalob bix kuxlikoʼon kaʼachi. Tumen maʼalob k-náajaleʼ k-bin janal tiʼ maʼalob restauranteʼob, k-bin xíimbal táanxel luʼumil yéetel maʼalob bix k-vestirtikba. Tsʼoʼoleʼ jach suuk k-jóokʼol kʼaʼaytaj». Chéen baʼaleʼ kʼexpaj u kuxtaloʼob.

Tiʼ junpʼéel asamblea anchaj 2006, máansaʼab junpʼéel tsoltʼaan jach kʼuch tu puksiʼikʼal Daniel, kʼáataʼabiʼ: «¿Táan wa k-beetik tuláakal le ku páajtal utiaʼal ka yanak kuxtal minaʼan u xuul tiʼ le máaxoʼob kun xuʼulsbiloʼoboʼ?» (Pro. 24:11). Aʼalaʼabeʼ tiʼ toʼon kʼubéentaʼan k-áant le máakoʼob utiaʼal ka u salvartubaʼoboʼ (Bax. 20:26, 27). Danieleʼ tu yuʼubaj bey Jéeoba aʼaliktiʼ baʼax unaj u beetkeʼ. Teʼ tsoltʼaanoʼ aʼalaʼab xaneʼ maas kiʼimak u yóol máax u tsʼaamaj u yóol u meyajt Jéeoba. Danieleʼ u yojel lelaʼ tumen u yataneʼ precursora yéetel yaʼab utsiloʼob ku kʼamik.

Danieleʼ ku yaʼalik: «Tin tsʼáaj cuenta kʼaʼabéet in kʼexik in kuxtal». Bey xan tu beetil. Xuʼul u sen meyaj, tu beetaj u precursoril yéetel tu tukleʼ maas jeʼel u kiʼimaktal u yóoloʼob wa ku binoʼob áantaj tuʼux maas kʼaʼabéeteʼ.

KU LÚUBUL K-ÓOL, KU KIʼIMAKTAL K-ÓOL

Tu añoil 2007, Daniel yéetel Míriameʼ tu pʼataj u meyajoʼobeʼ ka binoʼob Panamá, junpʼéel luʼumil tsʼoʼok u yáax xíimbaltikoʼob. Tu tukloʼobeʼ yéetel junpʼíit centavo u líiʼsmoʼoboʼ jeʼel u pʼáatloʼob tak ocho meseseʼ. Ku kʼaʼaytajoʼob teʼ mejen islaʼob yaan Bocas del Toro teʼ mar Caribeoʼ. Teʼeloʼ le máasewáal máakoʼob kajaʼanoʼoboʼ ku yaʼalaʼaltiʼob Ngäbe.

Tiʼ barco ku binoʼob teʼ islaʼoboʼ yéetel ken kʼuchukoʼobeʼ ku meyajtiʼob bicicleta. Maʼ tu tuʼubultiʼob le yáax ka binoʼob kʼaʼaytajoʼ, 8 leguas (32 kilómetros) viajarnajoʼob yóoʼ bicicleta, tsʼoʼoleʼ tu naʼaksoʼob yéetel tu yéemsoʼob le puʼukoʼob tu kiʼil le Kʼiinoʼ. Danieleʼ tumen xuʼul u yóoleʼ óolak desmayarnak. Baʼaleʼ le máakoʼob kajaʼanoʼob teʼeloʼ tu yeʼesoʼob u yutsil tiʼob, maases le ka tu yiloʼob Daniel yéetel Míriameʼ tsʼoʼok u kankoʼob jujunpʼéel tʼaanoʼob ichil u idiomaʼob. Maʼ xáanchajeʼ joʼopʼ u tsʼáaikoʼob xook tiʼ 23 máakoʼob.

Letiʼobeʼ pʼáat maʼ tu kaxtik baʼax u beetoʼob ka xuʼup taakʼin tiʼob. Danieleʼ ku yaʼalik: «Taakchaj k-okʼol ka t-tuklaj yaan k-suut España. Yaj t-óol k-pʼatik le máaxoʼob k-tsʼáaik xook tiʼoboʼ». Chéen baʼaleʼ ka máan junpʼéel meseʼ yaan baʼax kiʼimakkúunt u yóoloʼob. Míriameʼ ku yaʼalik: «Invitartaʼaboʼon k-beet k-precursor especialil. Kiʼimakchaj k-óol tumen maʼ suunajoʼon Españaiʼ».

JACH KIʼIMAKCHAJ K-ÓOL

Baʼaleʼ tu yoʼolal le kʼeexoʼob anchaj ichil u kaajal Jéeoba tu añoil 2015, aʼalaʼab yaan u meyajoʼob bey precursor regularoʼobeʼ. ¿Baʼax tu beetoʼob? Tu kʼubaj u yóoloʼob tiʼ baʼax ku yaʼalik Salmo 37:5: «Tsʼáa a kuxtal tu kʼab Yuumtsil; kʼub óolnen tiʼ, letiʼ túuneʼ bíin u yáantech». Tu kaxtoʼob meyaj yéetel seguernaj u beetik u precursoriloʼob. Teʼ kʼiinoʼobaʼ tiaʼanoʼob tiʼ junpʼéel múuchʼulil yaan tu chan kaajil Veraguaseʼ.

Danieleʼ ku yaʼalik: «Antes k-lukʼul Españaeʼ chiʼichnakoʼon tumen maʼ k-ojel wa jeʼel k-kuxtal chéen yéetel junpʼíit baʼaloʼobeʼ. Bejlaʼeʼ kiʼimak k-óol yéetel yaantoʼon tuláakal baʼax kʼaʼabéettoʼon». ¿Baʼax kiʼimakkúuntik u yóoloʼob? Ku yaʼalikoʼob: «Minaʼan uláakʼ baʼax taasik kiʼimak óolal toʼon jeʼex k-áantik le máakoʼob kabal u yóoloʼob u kʼaj óoltoʼob Jéeobaoʼ».