Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Táankelem paal, tsʼáaba tu contra le Kʼaasilbaʼaloʼ

Táankelem paal, tsʼáaba tu contra le Kʼaasilbaʼaloʼ

«Búukinteʼex tuláakal le u nuʼukulil baʼateʼel ku taal tiʼ Diosoʼ, utiaʼal maʼ a táabsaʼaleʼex tumen le baʼaloʼob ku beetik le Kʼaasilbaʼal yéetel naʼatiloʼ.» (EFE. 6:11)

KʼAAYOʼOB: 139, 55

1, 2. 1) ¿Baʼaxten yaʼab táankelmoʼobeʼ táan u ganartikoʼob le baʼateʼel tu contra Satanás yéetel le demonioʼoboʼ? (Ilawil le dibujo yaan tu káajbal le xookaʼ.) 2) ¿Baʼax ken k-il teʼ xookaʼ?

APÓSTOL PABLOEʼ tu ketaj juntúul máax meyajtik Dios yéetel juntúul soldado, tumen ku kʼaʼabéettal u baʼateʼel. Chéen baʼaleʼ maʼ táan u baʼateʼel tu contra wíinikoʼobiʼ, baʼaxeʼ tu contra Satanás yéetel le demonioʼoboʼ. Kex maʼ tu páajtal k-ilkoʼobeʼ jach tu jaajil yanoʼob, yaan u naʼatoʼob yéetel úuch káajak u baʼateloʼob t-contra. Yoʼolal lelaʼ jeʼel k-tuklikeʼ maʼ kun béeytal k-ganartikoʼob, lelaʼ maases letiʼe táankelmoʼob jeʼel u tuklikoʼob beyoʼ. Chéen baʼaleʼ, ¿jeʼel wa u páajtal u ganartikoʼob le baʼateʼel tu contra le kʼasaʼan angeloʼobaʼ? Jeʼeleʼ, yaʼab tiʼ letiʼobeʼ táan u beetkoʼob, tumen táan u chaʼik u yáantaʼaloʼob tumen Jéeoba. Tsʼoʼoleʼ jeʼex u beetik le soldadoʼoboʼ, u tsʼaamoʼob «le u nuʼukulil baʼateʼel ku taal tiʼ Diosoʼ» (xok Efesoiloʼob 6:10-12).

2 Le ka tʼaanaj Pablo tiʼ le u nuʼukulil baʼateloʼ, maʼ xaaneʼ táan u tʼaan tiʼ le ku takik u soldadoiloʼob Romaoʼ (Bax. 28:16). Le táan k-xakʼaltik le baʼax tu yaʼalaj Pablooʼ yaan k-ilik baʼax ku yaʼalik jujuntúul táankelmoʼob yoʼolal le utsiloʼob ku taasik tiʼob wa le talamiloʼob ku aktáantkoʼob ikil u biskoʼob le u nuʼukulil baʼateloʼ.

¿A láaj búukintmaj wa u nookʼil le baʼateloʼ?

 BÁAʼKʼAXTEʼEX «LE JAAJ TA NAKʼEʼEX BEY JUNPʼÉEL KʼAXNAKʼOʼ»

3, 4. ¿Baʼaxten ku keʼetel le baʼax ku kaʼansik le Biblia yéetel le kʼaxnakʼ ku meyaj kaʼach tiʼ u soldadoiloʼob Romaoʼ?

3 (Xok Efesoiloʼob 6:14). Le ka tu yaʼalaj Pablo a «báaʼkʼaxtmeʼex le jaaj ta nakʼeʼex bey junpʼéel kʼaxnakʼoʼ», táan kaʼach u tʼaan tiʼ le kʼaxnakʼ ku tsʼáaik u soldadoiloʼob Romaoʼ. Leloʼobaʼ ku taaskoʼob jaajay fierroʼob yéetel ku meyaj utiaʼal u jepʼik u nakʼoʼob utiaʼal u páajtal u biskoʼob tubeel le nuʼukul pixik u tseemoʼoboʼ. Tsʼoʼoleʼ jujunpʼéeloʼobeʼ ku taaskoʼob u nuʼukul tuʼux ku tsʼaʼabal junpʼéel espada yéetel junpʼéel cuchillo. Kéen u jepʼ u nakʼ le soldado yéetel le kʼaxnakʼoʼ ku yáantaj utiaʼal maʼ u chʼaʼik saajkil bin teʼ baʼateloʼ.

4 Jeʼex le kʼaxnakʼoʼ, le baʼaxoʼob ku kaʼansik le Bibliaoʼ ku kanáantkoʼon tiʼ le baʼaloʼob maʼ jaajtak ku kaʼansaʼaloʼoboʼ (Juan 8:31, 32; 1 Juan 4:1). Wa k-yaabiltik le baʼaxoʼob k-kanikoʼ maas chéen chʼaʼabil jeʼel ‹k-pixik k-tseem yéetel le justiciaoʼ›, lelaʼ u kʼáat u yaʼaleʼ k-kuxtal jeʼex u yaʼalik Diosoʼ (Sal. 111:7, 8; 1 Juan 5:3). Tsʼoʼoleʼ wa k-naʼatik tubeel le baʼaxoʼob ku kaʼansik le Bibliaoʼ maʼ ken k-chʼaʼ saajkil k-aʼal maʼ jaaj le baʼaxoʼob ku yaʼalik le máaxoʼob pʼekmiloʼonoʼ (1 Ped. 3:15).

5. ¿Baʼaxten maʼ unaj k-tuusiʼ?

5 Wa k-báaʼkʼaxtmaj t-nakʼ le jaaj yaan teʼ Bibliaoʼ yaan k-ilik k-kuxtal jeʼex u kaʼansikoʼ yéetel yaan k-aʼalik u jaajil mantatsʼ. ¿Baʼaxten maʼ unaj k-tuusiʼ? Utiaʼal maʼ k-lúubul tu léech Satanás. Máax ku tuuseʼ ku bin kʼaasil tiʼ yéetel ku beetik kʼaas tiʼ u maasil (Juan 8:44). Le oʼolaleʼ kex kʼebanoʼoneʼ k-ilik maʼ k-tuus (Efe. 4:25). Chéen baʼaleʼ yaan horaeʼ maʼ chéen chʼaʼabil u beetaʼaliʼ. Abigail, yaan 18 años tiʼeʼ, ku yaʼalik: «Yaan horaeʼ ku taaktal u tuus máak, maases wa ku yilik jeʼel u castigartaʼal wa ka u yaʼal u jaajileʼ». Baʼaleʼ ¿baʼaxten ku yilik maʼ u tuus? Letiʼeʼ ku yaʼalik: «Tumen beyoʼ ku yantalten junpʼéel maʼalob conciencia tu táan Jéeoba. Tsʼoʼoleʼ in taataʼob yéetel in amigoʼobeʼ maas ku confiaroʼob tiʼ teen». Victoria, yaan 23 años tiʼeʼ, ku yaʼalik: «Kéen a waʼal u jaajil yéetel kéen a defendert baʼax ka creertikeʼ jeʼel u yaʼalaʼaltech baʼaleʼ. Baʼaleʼ yaan a kʼamik yaʼab utsiloʼob, maʼ kan sajaktal, yaan a wuʼuyik naatsʼ yanilech tiʼ Jéeoba yéetel maas yaan a yaabiltaʼal tumen u maasil». Jeʼex túun k-ilkoʼ yaʼab utsil ku taasik u meyajtoʼon le jaaj yaan teʼ Biblia bey junpʼéel kʼaxnakʼoʼ.

U kʼaxnakʼil le jaajoʼ (Ilawil xóotʼol 3 tak 5)

UNAJ K-PIXIK K-TSEEM YÉETEL LE JUSTICIAOʼ

6, 7. ¿Baʼaxten u tsolnuʼukoʼob Jéeobaeʼ ku keʼetel yéetel junpʼéel coraza?

6 Junpʼéel tiʼ le corazaʼob ku meyaj tiʼ u soldadoiloʼob Roma teʼ yáax siglo utiaʼal u pixik u tseemoʼoboʼ, beetaʼan yéetel u yáayalal laminaʼob de fierro. Junjaatseʼ kʼatkúuntbil u beetaʼaloʼob, baʼaleʼ ku wúutsʼloʼob utiaʼal u baʼpachtik u wíinklil le soldadooʼ. Uláakʼ junjaatseʼ ku tsʼaʼabal yóokʼol u keléembaloʼob. Tsʼoʼoleʼ ku meyaj kʼéewel yéetel hebillaʼob utiaʼal u kʼaxkoʼob. U jaajileʼ le corazaoʼ maʼ tu chaʼik u péek le soldadoʼob jach jeʼex u kʼáatoʼoboʼ, chéen baʼaleʼ ku kanáantik u puksiʼikʼaloʼob utiaʼal maʼ u beetaʼal loob tiʼob yéetel espada wa flechaʼob. Le oʼolaleʼ mantatsʼ unaj u yilkoʼob wa maʼalob u tsʼaamiloʼob yéetel wa maʼalob u kʼaxmiloʼob.

7 Le corazaoʼ jach maʼalob u chíikbesik bix u kanáantaʼal k-puksiʼikʼal tumen le tsolnuʼukoʼob ku tsʼáaiktoʼon Jéeobaoʼ (Pro. 4:23). Juntúul soldadoeʼ maʼ tu kʼexik le nuʼukul de fierro yaantiʼ yéetel uláakʼ maʼ de fierroiʼ. Toʼon xaneʼ maʼ unaj k-kʼexik le baʼaxoʼob ku yaʼalik Jéeoba chéen yéetel le baʼaxoʼob k-tuklikoʼ. Toʼoneʼ maʼ yaʼab baʼax k-ojliʼ, le oʼolal maʼ tu páajtal k-kanáantikba t-juunal (Pro. 3:5, 6). Le beetkeʼ jach kʼaʼanaʼan k-ilik mantatsʼ wa k-pixmaj k-puksiʼikʼal yéetel le tsolnuʼukoʼob ku tsʼáaiktoʼon Jéeobaoʼ.

8. ¿Baʼaxten ku taasik utsil u beetaʼal baʼax ku yaʼalik Jéeoba?

8 Maʼ xaaneʼ yaan horaeʼ jeʼel a wuʼuyik bey  talam u tsʼoʼokbesaʼal baʼax ku yaʼalik Dioseʼ yéetel jeʼel a tuklik yaʼab baʼaxoʼob maʼ tu chaʼik a beetkeʼ. Daniel, yaan 21 años tiʼeʼ, ku yaʼalik: «In maestroʼob yéetel in wéet xookoʼobeʼ ku pʼaʼastikenoʼob ikil in beetik le baʼax ku yaʼalik le Bibliaoʼ. Yoʼolal leloʼ xáanchaj lubaʼan in wóol tumen kin wuʼuyik mix baʼal ku páajtal in beetik». ¿Baʼax áant utiaʼal u xuʼulul u yuʼubikuba beyoʼ? Letiʼeʼ ku yaʼalik: «Ka máan kʼiineʼ tin tsʼáaj cuentaeʼ u beetaʼal baʼax ku yaʼalik Jéeobaeʼ jach ku taasik yaʼab utsiloʼob. Jujuntúul tiʼ in wéet xookoʼobeʼ káaj u drogarkubaʼob, yanoʼobeʼ xuʼul u binoʼob xook. Jach yaachaj tin wóol ka tin wilaj bix tsʼoʼokik tiʼob. Tin tsʼáaj cuentaeʼ Jéeobaeʼ ku kanáantkoʼon». Madison, juntúul kiik yaan 15 años tiʼeʼ, ku yaʼalik: «Maʼ chéen chʼaʼabil in wilik in beetik baʼax ku yaʼalik Jéeobaiʼ, ku taaktal in náaysik in wóol jeʼex u beetik in wéet paaliloʼoboʼ». ¿Baʼax áantik u aktáante? Letiʼeʼ ku yaʼalik: «Mantatsʼ kin wilik in kʼaʼajsik u j-jaajkunajen Jéeoba yéetel Satanaseʼ u kʼáat u beet in lúubul utiaʼal ka náachchajken tiʼ Jéeoba. Kéen in wil maʼ in lúubul tiʼ le túuntaj óolaloʼ jach ku kiʼimaktal in wóol».

U corazail le justiciaoʼ (Ilawil xóotʼol 6 tak 8)

TSʼÁAʼEX U XANABIL U KʼAʼAYTAʼAL LE MAʼALOB PÉEKTSILOʼ

9-11. 1) ¿Baʼaxten le máaxoʼob meyajtik Dios bejlaʼoʼ bey ku kʼaxik u xaanaboʼobeʼ? 2) ¿Baʼax unaj k-beetik utiaʼal maʼ k-sajaktal kʼaʼaytaj?

9 (Xok Efesoiloʼob 6:15). Juntúul soldado minaʼan u xaanabeʼ maʼ listo utiaʼal u bin baʼateliʼ. Le xaanaboʼob ku meyajtiʼoboʼ óox yáal kʼéewel tsʼaʼan tu táan yéetel tsʼaʼan u tirailoʼob utiaʼal u kʼaxik tu yookoʼob. Tsʼoʼoleʼ maʼatech u séeb kʼastaloʼob yéetel maʼatech u kaʼansik máak.

10 U soldadoiloʼob Romaeʼ ku kʼaxik u xaanaboʼob utiaʼal u binoʼob baʼateʼel, chéen baʼaleʼ le máaxoʼob meyajtik Dios bejlaʼoʼ bey ku kʼaxik u xaanaboʼob utiaʼal u bin u kʼaʼaytoʼob u maʼalob péektsilil jeetsʼelileʼ (Isa. 52:7; Rom. 10:15). Baʼaleʼ kʼaʼabéet maʼ k-sajaktal kʼaʼaytaj kéen yanak u súutukil. Bo, juntúul sukuʼun yaan 20 años tiʼeʼ, ku yaʼalik: «Kaʼacheʼ saajken kʼaʼaytaj tiʼ in wéet xookoʼob, tumen suʼlaken. U jaajileʼ maʼ in wojel baʼaxten bey in wuʼuyikinbaoʼ. Bejlaʼeʼ uts tin wich in kʼaʼaytaj tiʼ uláakʼ táankelem paalaloʼob».

11 Yaʼab táankelem paalaloʼobeʼ tsʼoʼok u yilkoʼobeʼ maas maʼatech u sajaktaloʼob kʼaʼaytaj wa ku líiʼskubaʼob tubeel. ¿Baʼax jeʼel u yáantkech utiaʼal a beetik xan beyoʼ? Julia, yaan 16 años tiʼeʼ, ku yaʼalik: «Kéen xiʼiken xookeʼ kin bisik publicacionoʼob, kin wuʼuyik baʼax ku yaʼalik in wéet xookoʼob yéetel baʼax ku creertikoʼob. Leloʼ ku yáantken in wil baʼax jeʼel u yáantkoʼobeʼ. Wa in líiʼsminba tubeeleʼ jeʼel u páajtal in tsikbaltiktiʼob baʼaloʼob jeʼel u yáantkoʼobeʼ». Makenzie, juntúul kiik yaan 23 años tiʼeʼ, ku yaʼalik: «Wa ka weʼesik a wutsil tiʼ a wéet xookoʼob yéetel ka chʼenxikintikoʼobeʼ yaan a wojéeltik baʼax chiʼichnakkúuntikoʼob. Kin wilik in xokik le publicacionoʼob ku jóoʼsaʼal utiaʼal le táankelmoʼoboʼ. Beyoʼ jeʼel u páajtal in weʼesiktiʼob junpʼéel baʼax ku yaʼalik le Bibliaoʼ wa le sitio jw.org jeʼel u yáantkoʼobeʼ». Jeʼex túun k-ilkoʼ u líiʼskuba máak utiaʼal u kʼaʼaytajeʼ bey jeʼex u xíimbal yéetel junpʼéel xanab maʼalob u kʼaxmil tu yookeʼ.

U xanabil le kʼaʼaytajoʼ (Ilawil xóotʼol 9 tak 11)

«U NOJOCH ESCUDOIL LE FEJOʼ»

12, 13. ¿Máakalmáak jujunpʼéel tiʼ le «tʼabaʼan flechaʼob» ku meyaj tiʼ Satanasoʼ?

12 (Xok Efesoiloʼob 6:16). Le escudo ku meyaj kaʼach tiʼ u soldadoiloʼob Romaoʼ nojoch, ku pixik desde tu tojil u kaal tak tu tojil u píix. Lelaʼ ku meyaj utiaʼal maʼ u chʼaʼakaloʼob yéetel espada, maʼ u chʼiʼiniloʼob yéetel flecha wa uláakʼ nuʼukuloʼob.

13 Jujunpʼéel tiʼ le «tʼabaʼan flechaʼob» ku meyaj tiʼ Satanás utiaʼal u chʼinkechoʼ, letiʼe baʼaloʼob maʼ jaajtak ku yaʼalaʼal tu contra Jéeoba, jeʼex kéen aʼalaʼak maʼ u yaabiltmech yéetel maʼ tu chʼaʼik en cuentail baʼaxoʼob ku yúuchultech. Ida, juntúul kiik yaan 19 años tiʼeʼ, ku yaʼalik: «Yaan kʼiineʼ kin tuklikeʼ Jéeobaeʼ  náach yanil tiʼ teen yéetel maʼ u kʼáat ka in amigotiʼ». ¿Baʼax áant utiaʼal u xuʼulul u yuʼubikuba beyoʼ? Letiʼeʼ ku yaʼalik: «Le muchʼtáambaloʼoboʼ jach ku muʼukʼaʼankúuntikoʼob in fe. Kaʼacheʼ chéen kin biniʼ, maʼatech in núukik le kʼáatchiʼob ku beetaʼaloʼ. Kin tuklik kaʼacheʼ mix máak beetik u cuentail le baʼaxoʼob kin waʼalikoʼ. Chéen baʼaleʼ bejlaʼeʼ kin líiʼskinba yéetel kin wilik in táakpajal kaʼatéen wa óoxtéeniʼ. Maʼ chéen chʼaʼabil in beetkiʼ, baʼaleʼ kéen in beeteʼ ku kiʼimaktal in wóol. Tsʼoʼoleʼ le sukuʼunoʼoboʼ jach u yaabiltmenoʼob. Cada ken tsʼoʼokok le muchʼtáambaloʼ maas kin creertik yaabiltaʼanen tumen Jéeoba».

14. ¿Baʼax ku kaʼansiktoʼon le baʼax úuch tiʼ Idaoʼ?

14 Le baʼax úuch tiʼ Idaoʼ yaan baʼax ku kaʼansiktoʼon. Le escudo ku meyaj kaʼach tiʼ u soldadoiloʼob Romaoʼ junpʼéeliliʼ u nojchil, baʼaleʼ u escudoil le fejoʼ jeʼel u maas nojochtaleʼ wa jeʼel u maas chichantaleʼ. Cada juntúul tiʼ toʼon unaj u yilik bukaʼaj nojchil le fe u kʼáat ka yanaktiʼoʼ (Mat. 14:31; 2 Tes. 1:3). Le oʼolal jach kʼaʼanaʼan k-muʼukʼaʼankúuntik k-fe.

U nojoch escudoil le fejoʼ (Ilawil xóotʼol 12 tak 14)

«U CASCOIL LE SALVACIONOʼ»

15, 16. ¿Baʼaxten ku keʼetel le esperanza yéetel junpʼéel cascooʼ?

15 (Xok Efesoiloʼob 6:17). Le casco ku meyaj kaʼach tiʼ u soldadoiloʼob Romaoʼ ku yáantaj utiaʼal maʼ u beetaʼal loob tiʼob tu pooloʼob, tu kaaloʼob wa tu táan u yichoʼob. Jujunpʼéeloʼobeʼ tsʼaʼan u xikin utiaʼal u chʼúuyaʼal.

16 Jeʼex le casco ku kanáantik u pool le soldadoʼoboʼ, le esperanzaoʼ ku kanáantik k-tuukul (1 Tes. 5:8; Pro. 3:21). Le esperanzaoʼ ku yáantkoʼon utiaʼal k-tuukul tiʼ le jatsʼuts baʼaloʼob ken u beet Diosoʼ bey xan utiaʼal  maʼ k-sen chiʼichnaktal kéen k-aktáant wa baʼax (Sal. 27:1, 14; Bax. 24:15). Chéen baʼaleʼ wa k-kʼáat ka u kanáant k-kuxtal le casco ku tsʼáaiktoʼon Diosoʼ, t-pool unaj u yantal, maʼ t-kʼabiʼ. Lelaʼ u kʼáat u yaʼaleʼ unaj k-jach creertik yaantoʼon junpʼéel jatsʼuts esperanza.

17, 18. 1) Satanaseʼ ¿bix jeʼel u taaktal u luʼsiktoʼon le esperanza ku tsʼáaiktoʼon Diosoʼ? 2) ¿Baʼax unaj k-beetik utiaʼal maʼ k-tuʼusul tumen Satanás?

17 Satanaseʼ ¿bix jeʼel u taaktal u luʼsiktoʼon le esperanza ku tsʼáaiktoʼon Diosoʼ? Tuukulnakoʼon tiʼ baʼax tu yóotaj u beet tiʼ Jesús. Satanaseʼ u yojel Jesuseʼ yaan u kʼuchul u kʼiinil u gobernartik tuláakal máak. Chéen baʼaleʼ táanil tiʼ lelaʼ yaan u kʼaʼabéettal u muʼyaj, u kíimil yéetel u páaʼtik u kʼuchul le kʼiin aʼalaʼan tumen Jéeobaoʼ. Le oʼolal le Kʼaasilbaʼaloʼ tu túuntaj u yóol utiaʼal maʼ u páaʼtik yaʼab tiempo. Tu yaʼalajtiʼeʼ wa ka xolak u adorart kex chéen juntéeneʼ jeʼel u káajal u gobernar tu séebaʼanileʼ (Luc. 4:5-7). Satanás xaneʼ u yojel Jéeobaeʼ u yaʼalmaj u tsʼáaiktoʼon yaʼab baʼaloʼob teʼ túumben luʼumoʼ. Baʼaleʼ yaan u kʼaʼabéettal k-páaʼtik u kʼuchul u kʼiinil u yúuchul yéetel maʼ xaaneʼ yaan k-aktáantik jejeláas baʼaloʼob. Le oʼolal le Kʼaasilbaʼaloʼ ku túuntik k-óol utiaʼal ka yanaktoʼon yaʼab baʼaloʼob teʼ kʼiinoʼobaʼ. U kʼáat ka xiʼikoʼon tu paach le ayikʼaliloʼob utiaʼal maʼ k-tsʼáaik táanil le Reinooʼ (Mat. 6:31-33).

18 Yaʼab táankelem paalaloʼob ku meyajtikoʼob Jéeobaeʼ maʼ u chaʼa u tuʼusloʼob tumen Satanasiʼ. Kiana, juntúul kiik yaan 20 años tiʼeʼ, ku yaʼalik: «In wojel chéen u Reino Dios kun utskíintik tuláakal le talamiloʼoboʼ». ¿Bix u yáantaʼal tumen le jatsʼuts esperanzaaʼ? Letiʼeʼ ku yaʼalik: «Le Paraíso u yaʼalmaj Dios u tsʼáaikoʼ ku yáantken in chʼaʼtukult tubeel baʼax ken in beet ichil in kuxtal. Maʼatech in kíimskinba meyaj chéen utiaʼal in náajaltik taakʼin wa chéen utiaʼal ka tsʼaʼabakten junpʼéel nojoch puesto tiʼ junpʼéel empresa. Baʼaxeʼ kin xupik in tiempo yéetel in muukʼ utiaʼal in maas meyajtik Dios».

U cascoil le salvacionoʼ (Ilawil xóotʼol 15 tak 18)

«U ESPADAIL LE KILIʼICH MUUKʼOʼ» U TʼAAN DIOS

19, 20. ¿Baʼax unaj k-beetik utiaʼal u meyajtoʼon le Biblia tubeeloʼ?

19 Ka tu tsʼíibtaj Pablo u carta tiʼ le efesoiloʼoboʼ, u soldadoiloʼob Romaeʼ ku meyajtiʼob espadaʼob kex 50 centímetros u chowakil utiaʼal u baʼateloʼob. Le soldadoʼoboʼ jach maʼalob u meyajtiʼob tumen sáamsamal u practicaroʼob.

20 Pabloeʼ tu ketaj u Tʼaan Dios yéetel junpʼéel espada. Lelaʼ unaj u meyajtoʼon tubeel kéen tʼaanakoʼon tiʼ baʼaxoʼob k-creertik wa kéen joʼopʼok k-ilik baʼaxoʼob unaj k-kʼexik t-kuxtal (2 Cor. 10:4, 5; 2 Tim. 2:15). ¿Baʼax unaj a beetik utiaʼal u meyajtech tubeel? Sebastian, yaan 21 años tiʼeʼ, ku yaʼalik: «Kéen in xok le Bibliaoʼ, kin tsʼíibtik junpʼéel versículo tiʼ cada capítulo. Táan in beetik u listail le tekstoʼob maas jatsʼuts in wilkoʼ. Beyoʼ maas kin wilik in tuukul jeʼex u tuukul Jéeobaeʼ». Daniel, t-aʼalaj teʼ xóotʼol 8, ku yaʼalik: «Le kéen in xok le Bibliaoʼ kin yéeyik le versiculoʼob kin wilik jeʼel u yáantik le máakoʼob kéen jóokʼken kʼaʼaytajoʼ. Tsʼoʼok in wilkeʼ ku kiʼimaktal u yóoloʼob kéen u yiloʼob uts tin wich in tsolik baʼax ku yaʼalik le Bibliaoʼ yéetel kin wilik in wáantkoʼob».

U espadail le kiliʼich muukʼoʼ (Ilawil xóotʼol 19 yéetel 20)

21. ¿Baʼaxten maʼ unaj k-sajaktal tiʼ Satanás yéetel le demonioʼoboʼ?

21 Le baʼax ku yaʼalik le táankelem paalaloʼob teʼ xookaʼ ku yeʼesiktoʼon maʼ unaj k-sajaktal tiʼ Satanás yéetel tiʼ le demonioʼoboʼ. Letiʼobeʼ yaan u páajtaliloʼob, baʼaleʼ jeʼel u páajtal k-ganartikoʼobeʼ. Tsʼoʼoleʼ maʼ tu páajtal u kuxtaloʼob utiaʼal mantatsʼ. Tu yáamil le Mil Años kun Reinar Cristooʼ, yaan u kʼaʼalaloʼob, maʼ kun páajtal u beetkoʼob mix baʼal. Kéen tsʼoʼokkeʼ yaan u xuʼulsaʼal tiʼob (Apo. 20:1-3, 7-10). Toʼoneʼ k-kʼaj óol le máax pʼekmiloʼonoʼ, baʼaxoʼob ku meyajtiʼ utiaʼal u táabsik máak yéetel baʼax oʼolal u kʼáat u beete. Yéetel u yáantaj Jéeobaeʼ jeʼel u páajtal k-tsʼáaikba tu contra le Kʼaasilbaʼaloʼ.