Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 24

Unaj k-nikik le tuukuloʼob ku líikʼloʼob tu contra le baʼaxoʼob kʼaj óolaʼan tiʼ Diosoʼ

Unaj k-nikik le tuukuloʼob ku líikʼloʼob tu contra le baʼaxoʼob kʼaj óolaʼan tiʼ Diosoʼ

«Táan k-nikik jejeláas tuukuloʼob yéetel jejeláas nukuch baʼaloʼob ku líikʼloʼob tu contra le baʼaxoʼob kʼaj óolaʼan tiʼ Diosoʼ» (2 COR. 10:5).

KʼAAY 124 Koʼoneʼex eʼesik chúukaʼan óolal

TIʼ BAʼAX KUN TʼAAN *

1. ¿Baʼax tu yaʼalaj apóstol Pablo unaj u beetik le sukuʼunoʼob yéeyaʼanoʼob utiaʼal u binoʼob kaʼanoʼ?

APÓSTOL PABLOEʼ tu yaʼalaj tiʼ le cristianoʼob teʼ yáax siglooʼ: «Xuʼuluk xan a kuxtaleʼex jeʼex u máakiloʼob le yóokʼol kaabaʼ» (Rom. 12:2). Lelaʼ tu yaʼalaj tiʼ le xiiboʼob yéetel le koʼoleloʼob u kʼubmaj u kuxtaloʼob utiaʼal u meyajtikoʼob Dios yéetel yéeyaʼanoʼob utiaʼal u binoʼob kaʼanoʼ. ¿Baʼaxten tu yaʼalajtiʼob beyoʼ? (Rom. 1:7).

2, 3. 1) ¿Baʼax ku beetik Satanás utiaʼal k-tsʼáaikba tu contra Jéeoba? 2) ¿Bix jeʼel k-luʼsik t-tuukul le «baʼaloʼob jach chich pakʼaʼaniloʼob[oʼ]»?

2 Pabloeʼ chiʼichnakchaj ka tu yilaj yaan tiʼ le sukuʼunoʼoboʼ tsʼoʼok u káajal u tuukuloʼob jeʼex le máaxoʼob yanoʼob tu yóokʼol kaab Satanasoʼ (Efe. 4:17-19). Lelaʼ jeʼel xan u yúuchultoʼoneʼ. Satanás, u diosil le yóokʼol kaabaʼ, ku meyajtiʼ jejeláas baʼaloʼob utiaʼal u yilik u náachkuntkoʼon tiʼ Jéeoba. Junpʼéel tiʼ le baʼaxoʼob ku meyajtiʼoʼ letiʼe u tsʼíiboltik máak u kaxtik chéen u yutsiloʼ wa u jach kʼaj óoltaʼal teʼ yóokʼol kaabaʼ. Jeʼel tak u meyajtiʼ le bix líiʼsaʼaniloʼon, le baʼaxoʼob suukaʼan k-beetik yéetel le baʼaxoʼob kaʼansaʼantoʼon utiaʼal k-tuukul jeʼex u kʼáat letiʼoʼ.

3 ¿Jeʼel wa u páajtal k-luʼsik t-tuukul le baʼaloʼob «jach chich pakʼaʼaniloʼob[oʼ]»? (2 Cor. 10:4). Koʼoneʼex ilik le baʼax tu yaʼalaj Pablooʼ: «Toʼoneʼ táan k-nikik jejeláas tuukuloʼob yéetel jejeláas nukuch baʼaloʼob ku líikʼloʼob tu contra le baʼaxoʼob kʼaj óolaʼan tiʼ Diosoʼ; lelaʼ bey ka k-kʼal u tuukul le máakoʼob utiaʼal ka u yuʼuboʼob u tʼaan Cristooʼ» (2 Cor. 10:5).  Bey túunoʼ, yéetel u yáantaj Jéeobaeʼ jeʼel u páajtal k-controlartik le baʼaxoʼob maʼ maʼalobtak yaan t-tuukuloʼ. Jeʼex junpʼéel tsʼaak ku páajtal u luʼsik u muukʼ junpʼéel venenoeʼ, u Tʼaan Dioseʼ jeʼel u yáantkoʼon xan utiaʼal maʼ u seguer u kʼaskúuntaʼal k-tuukul tumen u kʼasaʼan yóokʼol kaab Satanaseʼ.

UNAJ K-TÚUMBENKUNTIK K-TUUKUL

4. ¿Baʼax kʼeexiloʼob anchaj k-beetik le ka t-kanaj u jaajiloʼ?

4 Kʼaʼajaktoʼon le kʼeexoʼob t-beetaj le ka t-kanaj u jaajil ku kaʼansik le Biblia yéetel ka t-chʼaʼtuklaj k-meyajtik Jéeobaoʼ. Yaʼab tiʼ toʼoneʼ anchaj k-pʼatik baʼaloʼob kʼaastak (1 Cor. 6:9-11). ¿Máasaʼ jach kiʼimak k-óol úuchik u yáantkoʼon Dios utiaʼal k-pʼatik le baʼaloʼob kʼaastakoʼ?

5. ¿Máakalmáak le kaʼapʼéel baʼax ku yaʼalik Romailoʼob 12:2 unaj k-beetkoʼ?

5 Baʼaleʼ maʼ unaj k-tuklik wa maʼ kʼaʼabéet u seguer k-kanáantikbaiʼ. Kex t-pʼataj le baʼaloʼob kʼaastak k-beetik kaʼach táanil tiʼ k-okjaʼoʼ, láayliʼ unaj k-kanáantikba tiʼ le baʼaloʼob jeʼel u biskoʼon k-beetoʼob tu kaʼatéenoʼ. ¿Baʼax jeʼel u yáantkoʼoneʼ? Pabloeʼ ku yaʼalik: «Xuʼuluk xan a kuxtaleʼex jeʼex u máakiloʼob le yóokʼol kaabaʼ, baʼaxeʼ kʼex a tuukuleʼex utiaʼal ka páajchajak a kʼexik a kuxtaleʼex» (Rom. 12:2). Jeʼex k-ilkoʼ unaj k-beetik kaʼapʼéel baʼal. Yáaxeʼ, unaj u xuʼulul k-kuxtal jeʼex u máakiloʼob le yóokʼol kaabaʼ. U kaʼapʼéeleʼ, unaj k-kʼexik wa k-túumbenkuntik k-tuukul.

6. ¿Baʼax k-kanik tiʼ le baʼax tu yaʼalaj Jesús teʼ Mateo 12:43 tak 45?

6 Le u kʼexik u tuukul máak tu yaʼalaj Pablooʼ yaʼab baʼax táakaʼan ichil. Táakaʼan tuláakal bix u modos máak (ilawil le cuadro « ¿U kʼexik u tuukul máak tu chúukaʼanil wa u taʼakik jach máaxiʼ?»). Unaj k-túumbenkuntik k-tuukul, ichil lelaʼ táakaʼan le baʼaxoʼob k-tsʼíiboltikoʼ, bix k-modos yéetel bix k-uʼuyikba. Le oʼolal maʼalob ka k-tukle: «¿Baʼax kʼeexiloʼob  táan in beetik utiaʼal in kuxtal jeʼex Cristoeʼ? ¿Chéen wa letiʼe maas séeb u yilaʼaloʼ? ¿Wa táan in kʼexik baʼax yaan tin puksiʼikʼal utiaʼal in meyajtik Dios?». Lelaʼ jach kʼaʼanaʼan u beetik máak. Jesuseʼ tʼaanaj tiʼ junpʼéel kettʼaan utiaʼal u yeʼesik baʼax unaj k-beetik (xok Mateo 12:43-45). Le baʼax tu yaʼaloʼ ku yeʼesikeʼ maʼ chéen unaj k-luʼsik t-tuukul le baʼaxoʼob kʼaastakoʼ, baʼaxeʼ unaj k-ilik k-oksik t-tuukul baʼaxoʼob uts tu tʼaan Dios.

UNAJ U NUʼUKTAʼAL K-TUUKUL TUMEN JUNPʼÉEL TÚUMBEN MUUKʼ

7. ¿Bix jeʼel k-kʼexik bix k-tuukuleʼ?

7 ¿Jeʼel wa u páajtal u kʼexik bix u tuukul máakeʼ? Le Bibliaoʼ ku yaʼalik: «Unaj a chaʼikeʼex u nuʼuktaʼal a tuukuleʼex tumen junpʼéel túumben muukʼ, yéetel unaj a búukintikeʼex le túumben modos beetaʼan jeʼex uts tu tʼaan Dioseʼ, jeʼex u yaʼalik le jaajil justiciaoʼ bey xan le chúukaʼan óolaloʼ» (Efe. 4:23, 24). Jeʼex k-ilkoʼ jeʼel u páajtal u kʼexik u tuukul máakeʼ, baʼaleʼ maʼ chéen chʼaʼabiliʼ. Maʼ chéen unaj k-luʼsik t-tuukul kʼaakʼas tsʼíibolaloʼob yéetel k-xulik k-beetik baʼaloʼob kʼaastakiʼ, baʼaxeʼ unaj u yantaltoʼon «junpʼéel túumben muukʼ» utiaʼal u nuʼuktik k-tuukul. Lelaʼ u kʼáat u yaʼaleʼ unaj k-kʼexik baʼaxoʼob k-tsʼíiboltik, baʼaxoʼob suuk k-beetik yéetel baʼax oʼolal k-beetik wa baʼax. Lelaʼ maʼ unaj u xuʼulul k-beetkiʼ.

8, 9. ¿Bix u yeʼesik u kʼaʼanaʼanil u kʼexik u tuukul máak le baʼax úuch tiʼ juntúul sukuʼunoʼ?

8 Koʼoneʼex ilik baʼax tu beetaj juntúul sukuʼun jach séeb u kaxtik baʼateʼel yéetel yaʼab u káaltal kaʼachi. Ka tu kʼexaj u kuxtal utiaʼal ka okjaʼanakeʼ, jelaʼan ilaʼabik tumen u yéet kaajaloʼob. Le maʼ úuch okjaʼanakoʼ, tu aktáantaj junpʼéel talamil: bin kaxtbil baʼateʼel tiʼ tumen juntúul kalaʼan. Tu káajbaleʼ le sukuʼunoʼ maʼ tu yóotaj baʼateʼel tu yéeteliʼ. Baʼaleʼ ka aʼalaʼab baʼal tiʼ u kʼaabaʼ Jéeoba tumen le máakoʼ, le sukuʼunoʼ pʼuʼuji. Jóokʼeʼ ka tu loxaj le máakoʼ. ¿Baʼaxten tu beetaj? Tumen kex tsʼoʼok u yáantaʼal tumen le Biblia utiaʼal maʼ u séeb pʼuʼujuloʼ, maʼ u chaʼa u nuʼuktaʼal tumen junpʼéel túumben muukʼiʼ. U jaajileʼ maʼ u kʼex u modosiʼ.

9 Kex beyoʼ maʼ tu xulaj u meyajtik Diosiʼ (Pro. 24:16). Yéetel u yáantaj le ancianoʼoboʼ seguernaj u maʼalobkíintik u modos, ka máan kʼiineʼ kʼuch tak u beet u ancianoil teʼ múuchʼuliloʼ. Baʼaleʼ juntéenjeak tiaʼan tu táankabil le Najil Reinooʼ, taal juntúul kalaʼan utiaʼal u loxik uláakʼ juntúul anciano. ¿Baʼax tu beetaj le sukuʼunoʼ? Yéetel kabal óolaleʼ tu yilaj u tʼaan yéetel le kalaʼanoʼ, tu yilaj u beetik u jéetsʼel tsʼoʼoleʼ ka tu yáantaj utiaʼal ka xiʼik tu yotoch. ¿Baʼaxten tu beetaj beyoʼ? Tumen ku chaʼik u nuʼuktaʼal u tuukul tumen junpʼéel túumben muukʼ. Tsʼoʼok u túumbental bix u tuukul, le oʼolal maʼ séeb u pʼuʼujuliʼ yéetel kabal u yóol, lelaʼ tu beetaj u maas tsʼaʼabal nojbeʼenil tiʼ Jéeoba.

10. ¿Baʼax táakaʼan ichil u kʼexik u tuukul máak?

10 Le kʼeexoʼob beyaʼ ku xáantal táan u beetaʼal yéetel maʼ chéen ku jáan úuchliʼ. Maʼ xaaneʼ yaan u máan yaʼab tiempo utiaʼal u páajtal k-beetik (2 Ped. 1:5). Maʼ kun kʼexpajal k-tuukul chéen tumen úuch joʼopʼok k-meyajtik Jéeoba. Kʼaʼabéet k-beetik tuláakal le ku páajtal utiaʼal k-kʼexik k-tuukuloʼ. ¿Baʼax jeʼel u yáantkoʼoneʼ? Koʼoneʼex ilik jujunpʼéel baʼaxoʼob unaj k-beetik.

BIX JEʼEL U KʼEXIK MÁAK LE MUUKʼ NUʼUKTIK U TUUKULOʼ

11. ¿Bix u yáantkoʼon le oración utiaʼal k-kʼexik le muukʼ nuʼuktik k-tuukuloʼ?

11 Le yáax baʼax unaj k-beetkoʼ k-orar. Unaj k-kʼáatik le baʼax tu kʼáataj juntúul salmistaoʼ,  letiʼeʼ tu yaʼalaj: «¡Tsʼáaten junpʼéel sak puksiʼikʼaliʼ! ¡Tsʼáaten junpʼéel túumben yéetel toj [tuukul]!» (Sal. 51:10). Kʼaʼabéet k-naʼatik unaj k-kʼexik le muukʼ nuʼuktik k-tuukuloʼ yéetel k-kʼáatik u yáantaj Jéeoba utiaʼal u páajtal k-beetik. ¿Baʼaxten jach k-creertik jeʼel u yáantkoʼoneʼ? Jéeobaeʼ tu yaʼalaj tiʼ le israelitaʼob maʼ tu yuʼuboʼob tʼaan tu kʼiiniloʼob Ezequieloʼ: «Bíin in lukʼestiʼob le puksiʼikʼaloʼob tsʼuʼuy bey tuunicheʼ, utiaʼal ka in tsʼáatiʼob junpʼéel túumben puksiʼikʼal yéetel junpʼéel túumben [tuukul]» ku chaʼik u nuʼuktaʼal tumen Dios (Eze. 11:19). Le baʼax tu yaʼaloʼ jach ku líiʼsik k-óol. Jéeobaeʼ u kʼáat u yáant kaʼach le israelitaʼob utiaʼal ka u kʼex u tuukuloʼoboʼ, lelaʼ ku yeʼesikeʼ jeʼel xan u yáantkoʼon teʼ kʼiinoʼobaʼ.

12, 13. 1) Jeʼex u yaʼalik le Salmo 119:59, ¿tiʼ baʼaxoʼob unaj k-tuukul? 2) ¿Baʼax kʼáatchiʼiloʼob maʼalob ka k-beete?

12 U kaʼapʼéel baʼax unaj k-beetkeʼ k-tuukul tiʼ baʼax k-xokik. Unaj k-xokik le Biblia sáamsamaloʼ yéetel k-jóoʼsik u súutukil utiaʼal k-tuklik bix jeʼel u yáantkoʼon utiaʼal k-kʼexik le baʼaxoʼob maʼ maʼalobtak k-tuklikoʼ (xok Salmo 119:59; Heb. 4:12; Sant. 1:25). Unaj k-ilik baʼaxoʼob tsʼoʼok u yoksaʼal t-tuukul tumen le yóokʼol kaabaʼ. Kʼaʼabéet k-ilik baʼaxoʼob maʼ maʼalobtak yaan t-tuukul utiaʼal u béeytal k-luʼskoʼobiʼ.

13 Le oʼolal maʼalob ka k-tukle: «¿Kin kʼuuxil wa yoʼolal baʼaxoʼob yaan tiʼ u maasil?» (1 Ped. 2:1). «¿Kin taaskinba wa nojbaʼalil yoʼolal bix líiʼsaʼanilen, yoʼolal baʼaxoʼob in wojel wa tumen yaanten taakʼin?» (Pro. 16:5). «¿Kin taasik wa mix baʼalil le máaxoʼob minaʼantiʼob le baʼaxoʼob yaanten wa yaanal u chʼiʼibaloʼoboʼ?» (Sant. 2:2-4). «¿Jatsʼuts wa in wilik le baʼaxoʼob ku tsʼáaik u yóokʼol kaab Satanasoʼ?» (1 Juan 2:15-17). «¿Uts tin wich wa le náaysaj óolaloʼob yaan yil yéetel baʼaloʼob kʼaastak wa tuʼux ku chíikpajal u sen beetaʼal loob?» (Sal. 97:10; 101:3; Amós 5:15). Maʼ xaaneʼ le bix ken k-núukil le kʼáatchiʼobaʼ jeʼel u yáantkoʼon utiaʼal k-ilik baʼaxoʼob maas unaj k-pʼatkeʼ. Wa k-nikik le «baʼaloʼob jach chich pakʼaʼaniloʼob» t-tuukulaʼ, yaan k-lúubul utsil tiʼ Jéeoba, k-Taata yaan teʼ kaʼanoʼ (Sal. 19:14).

14. ¿Baʼaxten jach kʼaʼanaʼan k-yéeyik tubeel k-amigoʼob?

14 U yóoxpʼéel baʼax unaj k-beetkeʼ k-yéeyik tubeel k-amigoʼob. Le máaxoʼob yéetel k-bisikbaoʼ jeʼel u yáantkoʼoneʼ wa jeʼel u kʼaskúuntikoʼob k-tuukuleʼ (Pro. 13:20). Teʼ escuela wa teʼ tuʼux k-meyajoʼ yaan máakoʼob maʼ tu yáantkoʼonoʼob tuukul jeʼex Jéeobaeʼ. Baʼaleʼ le muchʼtáambaloʼoboʼ ku tsʼáaik tuʼux k-bisikba yéetel máaxoʼob jeʼel u yáantkoʼonoʼob utiaʼal k-eʼesik yaabilaj yéetel k-beetik baʼaloʼob maʼalobtakeʼ (Heb. 10:24, 25).

JEETSʼEL PʼÁATKOʼON TIʼ LE FEJOʼ

15, 16. ¿Baʼaxoʼob ku beetik Satanás utiaʼal u kʼexik bix u tuukul máak?

15 Maʼ u tuʼubultoʼoneʼ Satanaseʼ táan u yilik u kʼaskúuntik k-tuukul. Le oʼolal ku meyajtiʼ jejeláas baʼaloʼob utiaʼal maʼ k-beetik le baʼaxoʼob ku yaʼaliktoʼon Diosoʼ.

16 Satanaseʼ láayliʼ táan u meyajtiʼ le kʼáatchiʼ tu beetaj tiʼ Eva tu jardinil Edenoʼ: «¿Jach wa tu jaajil Dioseʼ tu yaʼalajteʼex...?» (Gén. 3:1, TNM). Tu yóokʼol kaab Satanaseʼ ku beetaʼal kʼáatchiʼob jeʼel u beetik u kaʼapʼéeltal u tuukul máakeʼ. Yaan máaxeʼ ku kʼáatik: «¿Jach wa tu jaajil Dioseʼ maʼatech u kʼamik ka tsʼoʼokok u beel juntúul xiib yéetel u yéet xiibil wa juntúul koʼolel yéetel u yéet koʼolelil? ¿Jach wa tu jaajil Dioseʼ ku yaʼalik maʼ u kʼiinbesaʼal Navidad mix le kʼiin kʼaabaʼoʼ?  ¿Jach wa tu jaajil Dioseʼ ku yaʼalik maʼ u kʼamik máak kʼiʼikʼ? ¿Jach wa tu jaajil le Dios jach nojoch u yaabilajoʼ ku yaʼalik maʼ k-bisikba yéetel le máaxoʼob jóoʼsaʼanoʼob teʼ múuchʼuliloʼ?».

17. 1) ¿Baʼax unaj k-beetik wa ku beetaʼaltoʼon kʼáatchiʼob jeʼel u beetik u kaʼapʼéeltal k-tuukuleʼ? 2) Jeʼex u yaʼalik Colosasiloʼob 2:6 yéetel 7, ¿baʼax utsiloʼob ken k-kʼame?

17 Jach kʼaʼabéet k-naʼatik baʼaxten k-creertik wa baʼax. Le baʼaxoʼob maʼ t-jach naʼatik tubeeloʼ jeʼel u beetik u kaʼapʼéeltal k-tuukul utiaʼal ka xuʼuluk u yantaltoʼon fejeʼ. Le oʼolaleʼ, ¿baʼax túun unaj k-beetik? Le Bibliaoʼ ku yaʼaliktoʼon ka k-kʼex k-tuukul utiaʼal k-ilik t-juunal «le baʼax u kʼáat Diosoʼ uts, kʼambeʼen yéetel jach chúukaʼan» (Rom. 12:2). Wa k-xakʼalxook sáamsamaleʼ jeʼel u yáantkoʼon utiaʼal k-creertik le baʼaxoʼob tsʼoʼok k-kanik teʼ Bibliaoʼ letiʼ u jaajil. Tsʼoʼoleʼ yaan k-maas creertik le baʼaxoʼob ku yaʼalik Jéeoba ka k-beetoʼ letiʼ u maas maʼalobiloʼ. Bey túunoʼ yaan k-kʼuchul k-beetba jeʼex junkúul cheʼ taamchajaʼan u mootsoʼobeʼ, tumen yaan ‹k-jeetsʼel pʼáatal tiʼ le fejoʼ› (xok Colosasiloʼob 2:6, 7).

18. ¿Baʼaxoʼob jeʼel u yáantkoʼon utiaʼal maʼ u kʼaskúuntaʼal k-tuukul tumen u yóokʼol kaab Satanaseʼ?

18 Mix máak jeʼel u beetik k-jeetsʼel pʼáatal tiʼ k-fejeʼ, chéen toʼon jeʼel u páajtal k-beetkeʼ. Le oʼolal maʼ u xuʼulul k-túumbenkuntik le muukʼ nuʼuktik k-tuukuloʼ. Mantatsʼ unaj k-orar tiʼ Jéeoba yéetel k-kʼáatiktiʼ ka u tsʼáatoʼon u kiliʼich muukʼ. Unaj k-ilik mantatsʼ baʼaxoʼob yaan t-tuukul yéetel baʼax péeksikoʼon k-beet wa baʼax. Unaj k-bisikba yéetel máaxoʼob beetik baʼax maʼalob yéetel jeʼel u yáantkoʼon utiaʼal k-kʼexik k-tuukuleʼ. Wa k-beetik beyoʼ maʼ ken k-chaʼa u kʼaskúuntaʼal k-tuukul tumen u yóokʼol kaab Satanás yéetel yaan k-nikik «jejeláas tuukuloʼob yéetel jejeláas nukuch baʼaloʼob ku líikʼloʼob tu contra le baʼaxoʼob kʼaj óolaʼan tiʼ Diosoʼ» (2 Cor. 10:5).

KʼAAY 50 Kin kʼubiktech in kuxtal, Jéeoba

^ xóot’ol 5 Le bix líiʼsaʼaniloʼon, le baʼaxoʼob suukaʼan k-beetik wa le baʼaxoʼob kaʼansaʼantoʼonoʼ ku nuʼuktikoʼob bix k-tuukul. Maʼ xaaneʼ k-tsʼáaik cuentaeʼ yaan baʼaxoʼob maʼ maʼalobtak suukaʼan k-beetkiʼ. Le xookaʼ yaan u yáantkoʼon k-il bix jeʼel k-pʼatik le baʼaxoʼob maʼ maʼalobtak suukaʼan k-beetkoʼ.