Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Jeʼel kaʼach u kʼaʼamal tumen Dioseʼ

Jeʼel kaʼach u kʼaʼamal tumen Dioseʼ

TULÁAKLOʼON k-meyajtik Jéeobaeʼ k-kʼáat lúubul utsil tiʼ. Baʼaleʼ ¿baʼax unaj k-beetik utiaʼal k-lúubul utsil tiʼ? Jujuntúul máakoʼob ku chʼaʼchiʼitaʼaloʼob ichil le Bibliaoʼ kex lúuboʼob tiʼ nukuch kʼebanoʼobeʼ kʼaʼamoʼob tumen Dios. Uláakʼoʼobeʼ maʼ kʼaʼamoʼob kex tu yeʼesoʼob jatsʼuts modosiʼ. Le oʼolaleʼ maʼalob ka k-tukle: «¿Baʼax ku páaʼtik Jéeoba tiʼ cada juntúul tiʼ toʼon?». Le baʼax úuch tiʼ Rehoboam, u reyil Judaeʼ, jeʼel u yáantkoʼon k-il baʼax unaj k-beetkeʼ.

TU BEETAJ BAʼAX KʼAAS KA KÁAJ U REINAR

Rehoboameʼ u hijo Salomón (1 Rey. 11:42). Salomoneʼ cuarenta años tu beetaj u reyil Israel, kíim tu añoil 997 táanil tiʼ u taal Jesús. Rehoboam túuneʼ bin Siquem, tu noojol Jerusalén, utiaʼal ka tsʼaʼabak u beet u reyil (2 Cró. 10:1). Letiʼeʼ chiʼichnakchaj wal ka tsʼaʼab u beet u reyil tu jeel u papá, le máax jach kʼaj óoltaʼab yoʼolal le naʼat anchajtiʼoʼ. Maʼ xaaneʼ Rehoboameʼ mix tu tuukul máan bukaʼaj talamiloʼob ken u aktáante.

Ka káaj u reinar Rehoboameʼ jach yaʼab talamil yaan kaʼach Israel. Ka máan kʼiineʼ jujuntúul u nuuktakil le kaajoʼ tu yaʼaloʼobtiʼ: «A taataeʼ tu sen yetsʼajoʼon; pʼíitkúunt le sen boʼol u tsʼaamaj t-óokʼoloʼ, ka k-meyajtech» (2 Cró. 10:3, 4).

Maʼ xaaneʼ Rehoboameʼ maʼ tu kaxtik baʼax ken u beete. Wa ku beetik le baʼax kʼáataʼabtiʼoʼ, letiʼ, u familia yéetel le máaxoʼob ku meyaj tu palaciooʼ yaan u xuʼulul u yantal jujunpʼéel baʼaloʼob tiʼob. Baʼaleʼ wa maʼ tu beetkeʼ yaan u líikʼil le kaaj tu contraoʼ. ¿Baʼax túun tu beetaj? Yáaxeʼ, tu kʼáataj tiʼ le nukuch máakoʼob áantik kaʼach Salomón baʼax unaj u beetkoʼ. Baʼaleʼ ka tsʼoʼokeʼ tu kʼáataj xan tiʼ u yéet táankelmiloʼob baʼax unaj u beetik. Letiʼob túuneʼ tu yaʼaloʼobtiʼ ka u maas pechʼ le kaajoʼ, ka túun tu beetaj le baʼax tu yaʼaloʼoboʼ. Ka tsʼoʼokeʼ tu yaʼalaj: «Teneʼ yaan in beetik u maas aaltal a kuucheʼex, yaan in tsʼáaik u maasil ta wóokʼoleʼex. In papaeʼ tu castigarteʼex yéetel junpʼéel chicote, chéen baʼaleʼ teneʼ maas yaj ken in castigartileʼex, yaan in beetik yéetel junpʼéel chicote yaan u puntaʼob» (2 Cró. 10:6-14, TNM).

¿Baʼax ku kaʼansiktoʼon leloʼ? Ku kaʼansiktoʼoneʼ maas maʼalob ka k-beet le baʼax ku yaʼalaʼaltoʼon tumen le máaxoʼob úuch joʼopʼok u meyajtikoʼob Jéeobaoʼ. Letiʼobeʼ yaʼab baʼax tsʼoʼok u yilkoʼob ichil u kuxtaloʼob, le oʼolal jeʼel u yáantkoʼonoʼob k-il wa maʼalob le baʼax taak k-beetkoʼ (Job 12:12).

«TU YUʼUBOʼOB LE BAʼAX TU YAʼALAJ JÉEOBAOʼ»

Rehoboameʼ tu muchʼaj u soldadoʼob utiaʼal u bin baʼateʼel tu contra le máaxoʼob tsʼoʼok u jatskubaʼoboʼ. Baʼaleʼ Jéeobaeʼ tu túuxtaj profeta Semaya  utiaʼal u yaʼaltiʼ: «Teneʼ kin waʼalik maʼ u binoʼob baʼateʼel yéetel u sukuʼunoʼob [...], suunakoʼob tu yotochoʼob[,] tumen bey tsʼoʼok in waʼalik ka úuchkoʼ» (1 Rey. 12:21-24). *

¿Baʼax túun tu beetaj Rehoboam? Chéen tukult bukaʼaj úuchik u pʼuʼujul. Maʼ xaaneʼ pʼaʼastaʼab tumen le máakoʼoboʼ, tumen letiʼeʼ u yaʼalmaj yaan u castigartik le kaaj «yéetel junpʼéel chicote yaan u puntaʼoboʼ», baʼaleʼ maʼ tu beetaj mix baʼal utiaʼal maʼ u jatskubaʼobiʼ (ket yéetel 2 Crónicas 13:7). Kex beyoʼ letiʼ yéetel u soldadoʼobeʼ «le ka tu yuʼubajoʼob baʼax ku yaʼalik Yuumtsileʼ suunajoʼob jeʼel bix aʼalaʼabtiʼob tumen le Yuumtsiloʼ».

¿Baʼax ku kaʼansiktoʼon leloʼ? Ku kaʼansiktoʼoneʼ maas maʼalob ka k-uʼuy u tʼaan Dios kex ka pʼaʼastaʼakoʼon tumen u maasil. Wa k-beetik beyoʼ yaan k-kʼaʼamal yéetel k-bendecirtaʼal tumen Jéeoba (Deu. 28:2).

Bey tu beetil Rehoboam. Letiʼeʼ tu yuʼubaj tʼaan, maʼ baʼatelnaj tu contra le máaxoʼob tu jatsubaʼoboʼ. Baʼaxeʼ tu beetaj kaajoʼob yaan u pakʼiloʼob tu luʼumil Judá yéetel Benjamín, le kaajoʼob ku gobernartikoʼ, yéetel tu maas muʼukʼaʼankúuntaj u pakʼiloʼob le kaajoʼob yaan u pakʼiloʼoboʼ (2 Cró. 11:5-12). Baʼaleʼ u maas kʼaʼanaʼanileʼ tu beetaj baʼax ku yaʼalik Jéeoba teʼ kʼiinoʼob jeʼeloʼ. Kex tu reinoil xaman, ku gobernartaʼal tumen Jeroboán, joʼopʼ u adorartaʼal maʼ jaajil diosoʼobeʼ, yaan tiʼ u kajnáaliloʼobeʼ ku binoʼob kaʼach Jerusalén utiaʼal u tsʼáaikubaʼob tu tséel Rehoboam yéetel utiaʼal u adorartikoʼob Jéeoba (2 Cró. 11:16, 17). Bey túunoʼ, úuchik u yuʼubik tʼaan Rehoboameʼ maas bin utsil tiʼ u gobierno.

MAʼ ARREPENTIRNAJ TU JAAJIL U YÓOL KA KʼEBANCHAJIʼ

Chéen baʼaleʼ, le tsʼoʼok u máan kʼiin káajak u gobernar Rehoboamoʼ tu beetaj junpʼéel baʼal maʼ maʼalobiʼ. Xuʼul u beetik baʼax ku yaʼalik u Ley Jéeoba ka káaj u adorartik maʼ jaajil diosoʼobiʼ. ¿Baʼaxten tu beetaj? Maʼ xaaneʼ u maama péeks u beete, letiʼeʼ ammonita (1 Rey. 14:21). Baʼaleʼ jeʼel baʼaxak oʼolal tu beeteʼ, tuláakal le kaaj beet jeʼex tu beetiloʼ. Le oʼolal Jéeobaeʼ tu túuxtaj Sisak, u reyil Egipto, u xuʼuls tiʼ u kaajiloʼob Judá, kex tsʼoʼok u muʼukʼaʼankúuntaʼal u pakʼiloʼob tumen Rehoboam (1 Rey. 14:22-24; 2 Cró. 12:1-4).

Baʼaleʼ maas talamchaj ka kʼuch Sisak tu kaajil Jerusalén, le tuʼux ku reinar Rehoboamoʼ. Teʼ kʼiin jeʼeloʼ profeta Semayaeʼ bin u yaʼal tiʼ Rehoboam yéetel tiʼ u paalaloʼob baʼax ku yaʼalik Jéeoba: «Yuumtsileʼ ku yaʼalik tsʼoʼok a xúumpʼattikeʼex, le oʼolal ku xúumpʼattikeʼex tu kʼab Sisak». ¿Baʼax tu beetaj Rehoboam le ka tsolnuʼuktaʼab tumen Jéeobaoʼ? Tu kʼexaj u tuukul. Le Bibliaoʼ ku yaʼalik: «U nuukiloʼob Israel yéetel le [reyoʼ], tu yaʼaloʼob yéetel kabal óolal: ¡Yuumtsileʼ, jaaj baʼax ku yaʼalik!». Le oʼolal salvartaʼab Rehoboam tumen Jéeoba yéetel maʼ tu chaʼaj u xuʼulsaʼal u kaajil Jerusaleniʼ (2 Cró. 12:5-7, 12).

Ka tsʼoʼokeʼ Rehoboameʼ seguernaj u reinar yóokʼol le kaʼapʼéel tribu yanoʼob noojoloʼ. Táanil tiʼ u kíimileʼ tu síiaj yaʼab baʼaloʼob tiʼ u paalaloʼob, maʼ xaaneʼ utiaʼal maʼ u líikʼloʼob tu contra Abías, juntúul tiʼ u paalal, ken u beet u reyiloʼ (2 Cró. 11:21-23). Úuchik u beetik lelaʼ tu yeʼesaj naʼatil.

¿JUNTÚUL MAʼALOB REY WA?

Rehoboameʼ tu beetaj baʼaloʼob maʼalobtak, baʼaleʼ maʼ kʼaʼam tumen Diosiʼ. Le Bibliaoʼ ku yaʼalik baʼaxten: «Kʼeechel úuchik u kuxtal». ¿Baʼaxten bey u yaʼalik kex yaan baʼax maʼalob tu beetoʼ? Tumen maʼ tu jaajil u yóol úuchik u meyajtik Jéeobaiʼ (2 Cró. 12:14).

Rey Davideʼ jach tu bisuba maʼalob yéetel Jéeoba, Rehoboameʼ maʼatech

Maʼalob ka tuukulnakoʼon tiʼ lelaʼ: yaan kʼiineʼ Rehoboameʼ tu beetaj baʼax ku yaʼalik Dios yéetel tu beetaj baʼax maʼalob tu kaajal, baʼaleʼ maʼ tu bisuba tubeel yéetel Jéeobaiʼ yéetel maʼ tu yilaj u beetik tu jaajil u yóol baʼax uts tu tʼaaniʼ. Le oʼolal tu beetaj baʼaloʼob kʼaastak yéetel tu adorartaj maʼ jaajil diosoʼobiʼ. ¿Tu kʼamaj wa Rehoboam u tsolnuʼukoʼob Jéeoba tumen arrepentirnajaʼan tu jaajil u yóol yéetel tumen taak u lúubul utsil tiʼ? ¿Wa tu beetaj chéen tumen aʼalaʼabtiʼ tumen u maasil ka u beete? (2 Cró. 11:3, 4; 12:6). Ka máan kʼiineʼ Rehoboameʼ seguernaj u beetik baʼax kʼaas. Maʼ tu  beetaj jeʼex rey David, u abueloeʼ. U jaajileʼ Davideʼ tu beetaj baʼaloʼob maʼ maʼalobtakiʼ, baʼaleʼ jach tu yaabiltaj Jéeoba, tu yilaj ka adorartaʼak Jéeoba jeʼex uts tu tʼaanoʼ yéetel arrepentirnaj tu jaajil u yóol le ka kʼebanchajoʼ (1 Rey. 14:8; Sal. 51:1, 17; 63:1).

Le baʼax úuch tiʼ Rehoboamoʼ ku kaʼansiktoʼoneʼ, utiaʼal u kʼamkoʼon Dioseʼ maʼ chéen unaj k-tsʼáaik baʼax kʼaʼabéet tiʼ k-familiaiʼ mix chéen k-beetik jujunpʼéel meyajoʼob ichil u kaajal Diosiʼ. Baʼaxeʼ kʼaʼabéet k-tsʼáaik táanil k-meyajtik Jéeoba ichil k-kuxtal.

Lelaʼ jeʼel u páajtal k-beetik wa maʼ tu xuʼulul k-yaabiltik Jéeoba tu jaajil k-óoleʼ. Jeʼex le kʼáakʼ kʼaʼabéet u tsʼaʼabal siʼ ichil utiaʼal maʼ u tuʼupuloʼ, utiaʼal xan maʼ u xuʼulul k-yaabiltik Jéeobaeʼ kʼaʼabéet k-xakʼalxoktik le Bibliaoʼ, k-tuukul tiʼ le baʼax k-xokikoʼ yéetel k-orar mantatsʼ (Sal. 1:2; Rom. 12:12). Beyoʼ k-yaabilaj tiʼ Jéeobaeʼ yaan u péeksikoʼon k-beet chéen baʼax uts tu tʼaan. Tsʼoʼoleʼ wa k-lúubul tiʼ junpʼéel kʼebaneʼ k-yaabilaj tiʼ Jéeobaeʼ yaan u péeksikoʼon arrepentir tu jaajil k-óol. Bey túunoʼ maʼ ken k-beet jeʼex Rehoboameʼ, tumen yaan u chúukpajal k-óol k-meyajt Jéeoba mantatsʼ (Jud. 20, 21).

^ xóot’ol 9 Yoʼolal le baʼaloʼob kʼaastak tu beetaj Salomonoʼ, Dioseʼ tsʼokaʼaniliʼ u yaʼalik yaan u jatskuba le reinooʼ (1 Rey. 11:31).