Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 30

Bix jeʼel k-áantik máax minaʼan u religioneʼ

Bix jeʼel k-áantik máax minaʼan u religioneʼ

«Tsʼoʼok in beetkinba jeʼex tuláakal u jejeláasil máakoʼobeʼ, utiaʼal beyoʼ ka in beet tuláakal le ku páajtal utiaʼal in salvartik wa jaytúuliʼ» (1 COR. 9:22).

KʼAAY 82 «Juulnak a sáasileʼex»

TIʼ BAʼAX KUN TʼAAN *

1. ¿Baʼax tsʼoʼok u kʼexpajal teʼ tu tsʼook jaʼaboʼobaʼ?

DESDE úuchjeakileʼ u maas yaʼabil le máakoʼoboʼ yaan u religionoʼob. Baʼaleʼ teʼ tu tsʼook jaʼaboʼobaʼ tsʼoʼok u kʼexpajal bix u yilaʼal lelaʼ. Bejlaʼeʼ táan u bin u maas yaʼabtal máaxoʼob minaʼan u religionoʼob. * Tiʼ jujunpʼéel luʼumiloʼobeʼ u maas yaʼabil le máakoʼoboʼ ku yaʼalikoʼobeʼ minaʼan u religionoʼob * (Mat. 24:12).

2. ¿Baʼaxten tsʼoʼok u maas yaʼabtal máaxoʼob minaʼan u religionoʼob?

2 ¿Baʼaxten tsʼoʼok u maas yaʼabtal máaxoʼob minaʼan u religionoʼob? Yanoʼobeʼ maʼ xaaneʼ chéen ku yilik u náaysik u yóoloʼob wa chéen chʼiikiloʼob tuukul tiʼ u talamiloʼob (Luc. 8:14). Uláakʼoʼobeʼ maʼatech u creertikoʼob Dios. Yanoʼob xaneʼ ku creertikoʼob Dios, baʼaleʼ ku tuklikoʼobeʼ le religionoʼ maʼatech u yáantik máak, maʼ kʼaʼanaʼaniʼ yéetel ku bin tu contra le baʼax ku yaʼalik le ciencia yéetel le bix u tuukul máakoʼ. Maʼ xaaneʼ ku yuʼubikoʼob u yaʼalaʼal tumen u maestroʼob, u amigoʼob wa uláakʼ máakoʼobeʼ chéen yoʼolal evolución anchaj tuláakal baʼal. Baʼaleʼ óoliʼ maʼ áantaʼakoʼob u creertoʼob Diosiʼ. Uláakʼoʼobeʼ ku kʼuuxiloʼob kéen u yiloʼob u nuuktakil le religionoʼoboʼ chéen ku kaxtikoʼob taakʼin yéetel páajtalil. Tsʼoʼoleʼ yaan tuʼuxoʼobeʼ le gobiernooʼ maʼ tu jach chaʼik u táakpajal máak tiʼ u religión.

3. ¿Bix ken u yáantiloʼon le xookaʼ?

3 Jesuseʼ tu yaʼalaj: «Xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob» (Mat. 28:19). ¿Bix jeʼel k-áantik le máaxoʼob minaʼan u religionoʼob utiaʼal u yaabiltikoʼob Dios yéetel ka u tsaypachtoʼob Cristooʼ? Unaj k-kʼaʼajsikeʼ cada máakeʼ jejeláas tuʼux líikʼi, le oʼolal maʼ junpʼéeliliʼ bix ken u kʼamiloʼob le  maʼalob péektsiloʼ. Jeʼex le máaxoʼob líikʼoʼob Europaoʼ, maʼ xaaneʼ jelaʼan bix ken u kʼamiloʼob le maʼalob péektsil tiʼ le máaxoʼob líikʼoʼob Asiaoʼ. Yaʼab tiʼ le máaxoʼob yanoʼob Europaoʼ, u yojloʼob jujunpʼéel baʼaxoʼob ku kaʼansik le Bibliaoʼ yéetel u yojloʼob Dios beet tuláakal baʼal. Baʼaleʼ u maas yaʼabil le máaxoʼob yanoʼob Asiaoʼ, óoliʼ mix baʼal u yojloʼob tiʼ le Bibliaoʼ yéetel maʼ xaaneʼ maʼ tu creertikoʼob wa yaan Máax beet tuláakal baʼal. Le xookaʼ yaan u yáantkoʼon utiaʼal k-kʼuchul tu puksiʼikʼal le máaxoʼob k-kʼaʼaytik le maʼalob péektsil tiʼoboʼ kex jeʼel tuʼuxak u taaloʼobeʼ wa kex jeʼel baʼalak ka u creertoʼobeʼ.

MAʼ UNAJ K-TUKLIK WA MAʼ KEN U KʼEX U TUUKULOʼOBIʼ

4. ¿Baʼaxten maʼ unaj k-tuklik wa maʼ ken u kʼex u tuukul le máakoʼoboʼ?

4 Maʼ unaj k-tuklik wa maʼ ken u kʼex u tuukul le máakoʼoboʼ. Cada jaʼabeʼ yaʼab máakoʼob minaʼan u religionoʼob kaʼacheʼ ku káajal u meyajtikoʼob Jéeoba. Yaʼab tiʼ letiʼobeʼ u pʼeek u yilkoʼob kaʼach le baʼaxoʼob kʼaastak ku beetaʼal teʼ religionoʼoboʼ, uláakʼoʼobeʼ kʼaas bix u kuxtaloʼob. Yaʼab xaneʼ kʼaʼabéetchaj u pʼatkoʼob jujunpʼéel vicioʼob. Jeʼex túun k-ilkoʼ yéetel u yáantaj Jéeobaeʼ jeʼel u páajtal u kaxtaʼal «le máaxoʼob jach tu jaajil u kʼáatoʼob ka yanak kuxtal minaʼan u xuul tiʼoboʼ» (Bax. 13:48; 1 Tim. 2:3, 4).

Unaj k-kʼexik bix k-kʼaʼaytaj tiʼ le máaxoʼob maʼ tu creertikoʼob le baʼax ku kaʼansik le Bibliaoʼ. (Ilawil le xóotʼol 5 yéetel 6). *

5. ¿Baʼax beetik u kʼamik le máakoʼob le baʼax k-kʼaʼaytikoʼ?

5 Unaj k-tratartikoʼob tubeel yéetel k-kanáantik maʼ k-beetik u kʼuuxiloʼob. Yaan kʼiineʼ le baʼax beetik u kʼamik le máakoʼob le baʼax k-kʼaʼaytikoʼ maʼ letiʼe baʼaxoʼob k-aʼalikoʼ, baʼaxeʼ letiʼe bix k-aʼalikoʼ. Letiʼobeʼ uts tu tʼaanoʼob ka k-tratartoʼob maʼalob, ka eʼes tsiikil tiʼob yéetel ka k-eʼes jach tu jaajil taak k-áantkoʼob. Maʼatech k-obligarkoʼob u yuʼuboʼob baʼax k-aʼalik. Baʼaxeʼ k-ilik k-naʼatik baʼax oʼolal minaʼan u religionoʼob. Yanoʼobeʼ maʼ uts tu tʼaan u tsikbaloʼob tiʼ religión yéetel máaxoʼob maʼ u kʼaj óoloʼobiʼ. Uláakʼoʼob xaneʼ maʼ maʼalob u yilkoʼob ka kʼáataʼaktiʼob baʼax ku tuklikoʼob yoʼolal Diosiʼ. Tsʼoʼoleʼ yanoʼobeʼ suʼlakoʼob ka ilaʼak táan u xokikoʼob le Biblia yéetel juntúul testigooʼ. Jeʼel bixakeʼ unaj k-eʼesik tsiikil tiʼob (2 Tim. 2:24).

6. ¿Baʼax tu beetaj apóstol Pablo utiaʼal u kʼaʼaytaj tiʼ jejeláas máakoʼob, yéetel bix jeʼel k-beetik jeʼex letiʼeʼ?

6 ¿Baʼax jeʼel u páajtal k-beetik wa yaan máax maʼ uts tu tʼaan u tsikbal tiʼ le Bibliaoʼ, le baʼaxoʼob beetaʼanoʼ, tiʼ Dios wa tiʼ le religionoʼ? Jeʼel u páajtal k-tsikbal tiʼ yaanal baʼal jeʼex tu beetil apóstol Pabloeʼ. Ka kʼaʼaytajnaj tiʼ le judíoʼoboʼ meyajnajtiʼ le Kiliʼich Tsʼíiboʼob utiaʼal u tsikbal tu yéeteloʼoboʼ. Baʼaleʼ ka tʼaanaj yéetel le griegoʼob kaʼanchajaʼan u xookoʼob yanoʼob teʼ Areópagooʼ, maʼ tu yaʼalaj wa tiʼ le Kiliʼich Tsʼíiboʼob tu chʼaʼaj le baʼax tu yaʼaloʼ (Bax. 17:2, 3, 22-31). ¿Bix jeʼel k-beetik jeʼex tu beetiloʼ? Wa k-tsikbal yéetel wa máax maʼ tu creertik le baʼax ku yaʼalik le Bibliaoʼ, maʼ unaj k-aʼalik wa tiʼ le Biblia táan k-chʼaʼik le baʼax k-aʼalikoʼ. Wa k-ilik xan yaan máax maʼ uts tu tʼaan ka ilaʼak táan u xokik le Bibliaoʼ, maʼ xaaneʼ maas maʼalob ka k-eʼes le tekstoʼob tiʼ yéetel junpʼéel celular wa tabletoʼ.

7. Jeʼex u yaʼalik Yáax tiʼ Corintoiloʼob 9:20 tak 23, ¿baʼax kun kʼaʼabéettal k-beetik utiaʼal k-kʼaʼaytaj jeʼex Pabloeʼ?

7 Unaj k-naʼatik bix u yuʼubikuba u maasil yéetel k-chʼenxikintikoʼob. Unaj k-ilik k-naʼatik baʼaxten le máakoʼoboʼ jelaʼan bix u tuukuloʼob tiʼ toʼon (Pro. 20:5). Koʼoneʼex ilik tu kaʼatéen baʼax tu beetaj Pablo. Letiʼeʼ judío kaʼachi, le oʼolal kʼaʼabéetchaj u tʼaan tiʼ yaanal baʼal le ka kʼaʼaytajnaj tiʼ le j-táanxel luʼumiloʼoboʼ, tumen letiʼobeʼ óoliʼ mix baʼal u yojloʼob tiʼ Jéeoba mix tiʼ le Kiliʼich Tsʼíiboʼoboʼ. Toʼon xaneʼ wa k-kʼáat k-naʼat bix u yuʼubikuba le máakoʼoboʼ, maʼ xaaneʼ yaan u kʼaʼabéettal k-kaxtik teʼ publicacionoʼob baʼaxten jelaʼan bix u tuukuloʼoboʼ wa k-kʼáatik u yáantaj juntúul sukuʼun úuch joʼopʼok u kʼaʼaytaj (xok 1 Corintoiloʼob 9:20-23).

8. ¿Bix jeʼel k-káajsik k-tsikbal yéetel wa máax tiʼ le Bibliaoʼ?

8 Toʼoneʼ k-kʼáat k-kaxt le máakoʼob ku náajmatik  u yuʼubikoʼob le maʼalob péektsiloʼ (Mat. 10:11). Utiaʼal k-beetkeʼ unaj k-kʼáatik tiʼ le máakoʼob baʼax ku tuklikoʼoboʼ yéetel k-chʼenxikintik baʼax ku yaʼalikoʼob. Juntúul sukuʼun kajaʼan tu luʼumil Inglaterraeʼ ku kʼáatik tiʼ le máakoʼob baʼax ku tuklikoʼob unaj u beetaʼal utiaʼal u yantal kiʼimak óolal tiʼ le tsʼokaʼan u beeloʼoboʼ, u líiʼsaʼal le paalaloʼoboʼ wa bix jeʼel u aktáantik máak le talamiloʼoboʼ. Kéen núukaʼaktiʼeʼ ku yaʼalik: «¿Baʼax ka tuklik yoʼolal le baʼax tsʼíibtaʼab óoliʼ dos mil añosaʼ?». Kéen tsʼoʼokkeʼ ku yeʼesik tu celular jujunpʼéel tekstoʼob tiʼ le máax yéetel táan u tsikbaloʼ, baʼaleʼ maʼ tu yaʼalik wa teʼ Biblia ku xokikoʼ.

UNAJ K-KʼUCHUL TU PUKSIʼIKʼAL LE MÁAKOʼOBOʼ

9. ¿Bix jeʼel k-áantik le máaxoʼob maʼ uts tu tʼaan u tsikbaloʼob tiʼ Diosoʼ?

9 ¿Bix jeʼel k-kʼuchul tu puksiʼikʼal le máakoʼob maʼ jach uts tu tʼaan u tsikbaloʼob tiʼ Diosoʼ? Unaj k-tʼaan tiʼ baʼaloʼob u kʼaj óoloʼob. Yaʼab máakoʼobeʼ jatsʼuts u yilkoʼob le baʼaxoʼob yaan way Luʼumoʼ bey xan teʼ kaʼanoʼ. Le oʼolal jeʼel u páajtal k-aʼaliktiʼobeʼ: «Maʼ xaaneʼ tsʼoʼok a wilkeʼ yaʼab tiʼ le baʼaxoʼob u beetmaj wíinikoʼ ku chʼaʼik tiʼ le baʼaxoʼob yaan way Luʼumoʼ. Jeʼex le máaxoʼob ku beetkoʼob microfonoʼoboʼ ku yilkoʼob bix yanil le xikinoʼ, le máaxoʼob beetik camaraʼob xanoʼ ku xakʼaltikoʼob bix yanil le ichoʼ. ¿Baʼax ku taal ta tuukul kéen a wil le baʼaxoʼob yanoʼob way Luʼumoʼ? A tuklikeʼ ¿chéen wa bey anchajikoʼ wa yaan máax beetoʼob?». Kéen tsʼoʼokok k-uʼuyik baʼax ken u núukeʼ, jeʼel u páajtal k-aʼalikeʼ: «Kéen ilaʼak tumen le cientificoʼob bix beetaʼanil le ich yéetel le xikinoʼ, maʼ xaaneʼ jeʼel k-tuklikeʼ: ‹¿Tiʼ máax táan u kaanbaloʼob?›. Juntúul máak kuxlaj úuchjeakileʼ tu yaʼaleʼ le máax beet le xikin yéetel le ichoʼ ku páajtal u yuʼubik baʼax ku yaʼalaʼal yéetel ku páajtal u paakat. Ka tsʼoʼokeʼ tu yaʼaleʼ le máax beet le ich yéetel le xikinoʼ letiʼ tsʼáaik naʼat tiʼ wíinik. Yaan cientificoʼobeʼ bey u yaʼalikoʼob xanoʼ» (Sal. 94:9, 10). Kéen tsʼoʼokkeʼ jeʼel u páajtal k-eʼesiktiʼ junpʼéel video yaan teʼ sitio jw.org® tiʼ le jaats ku kʼaabaʼtik «Bix u tuklaʼal anchajik le kuxtaloʼ» (yáanal JÓOʼSAʼANILOʼOB > VIDEOʼOB). Wa maʼ xaaneʼ jeʼel u páajtal k-tsʼáaiktiʼ le folleto ¿Es la vida obra de un Creador? wa le folleto El origen de la vida. Cinco cuestiones dignas de análisis.

10. ¿Bix uláakʼ jeʼel k-káajsik k-tsikbal yéetel wa máax maʼ uts tu tʼaan u tsikbal tiʼ Dioseʼ?

10 U maas yaʼabil le máakoʼoboʼ ku tsʼíiboltkoʼob ka kʼuchuk u kʼiinil u maʼalobtal le kuxtaloʼ. Baʼaleʼ yaʼab máakeʼ sajak u xuʼulsaʼal tiʼ le Luʼumaʼ wa ka pʼáatak maʼ tu páajtal u kajtal máakiʼ. Juntúul superintendente tiʼ circuito yaan tu luʼumil Noruegaeʼ, ku yaʼalikeʼ le máaxoʼob maʼ uts tu tʼaan u tsikbaloʼob tiʼ Diosoʼ ku yóotkoʼob tsikbal tiʼ le  baʼaloʼob kʼaastak ku yúuchloʼob way yóokʼol kaabeʼ. Kéen tsʼoʼokok u tsikik u yuumil najeʼ ku kʼáatiktiʼ: «¿A tuklikeʼ jeʼel wa u kʼuchul u kʼiinil u yutskíintaʼal le baʼaxoʼob ku yúuchloʼob way yóokʼol kaabaʼ? ¿Máax a tuklik jeʼel u yutskíintikeʼ? ¿Le politicoʼoboʼ, le cientificoʼoboʼ wa uláakʼ wa máax?». Kéen tsʼoʼokok u yuʼubik baʼax ku núukik u yuumil najeʼ ku xokik wa ku chʼaʼchiʼitik junpʼéel teksto tuʼux ku tʼaan tiʼ le jatsʼuts baʼaxoʼob kun úuchul maʼ kun xáantaloʼ. Yaneʼ jatsʼuts u yuʼubik le baʼax ku kaʼansik le Biblia kéen u yaʼal maʼ kun xuʼulsbil le Luʼumaʼ yéetel chéen máakoʼob utsoʼob kun kajtaliʼ (Sal. 37:29; Ecl. 1:4).

11. 1) ¿Baʼaxten maʼalob ka tsikbalnakoʼon tiʼ baʼax uts tu tʼaan u yuumil naj? 2) ¿Baʼax unaj k-beetik jeʼex tu yaʼalil Pablo teʼ Romailoʼob 1:14 tak 16?

11 Maʼalob ka tsikbalnakoʼon tiʼ baʼax uts tu tʼaan u yuumil naj. Tumen yaan tuʼuxeʼ le baʼax ku kʼamik juntúul máakoʼ maʼ letiʼe baʼax jeʼel u yuʼubaʼal tumen uláakʼ máakoʼ. Yaan máaxeʼ uts tu tʼaan u tsikbaloʼob tiʼ Dios wa tiʼ le Bibliaoʼ, baʼaleʼ yaan máaxeʼ maas jeʼel u yóotik tsikbal wa ku káajal k-tʼaan tiʼ yaanal baʼaleʼ. Le oʼolal unaj k-ilik bix jeʼel k-káajsik k-tsikbal yéetel tuláakal máakeʼ (xok Romailoʼob 1:14-16). Maʼ unaj u tuʼubultoʼoneʼ Jéeoba beetik u nojochtal u semillail le jaaj tu puksiʼikʼal le máakoʼob u yaabiltmoʼob baʼax maʼaloboʼ (1 Cor. 3:6, 7).

BIX JEʼEL K-TSIKBAL YÉETEL LE MÁAXOʼOB KU TAALOʼOB ASIAOʼ

Yaʼab sukuʼunoʼobeʼ ku yáantkoʼob le máaxoʼob ku taaloʼob teʼ luʼumiloʼob minaʼan u religionoʼob utiaʼal u kʼaj óoltoʼob le tsolnuʼukoʼob ku tsʼáaik le Bibliaoʼ. (Ilawil le xóotʼol 12 yéetel 13).

12. ¿Baʼax jeʼel u páajtal k-beetik utiaʼal k-kʼaʼaytaj tiʼ le máaxoʼob ku taaloʼob tu luʼumil Asia ku tuklikoʼob minaʼan Máax beet tuláakal baʼaloʼ?

12 Yaʼab sukuʼunoʼob tiʼ tuláakal yóokʼol kaabeʼ ku tʼaanoʼob yéetel máaxoʼob ku taaloʼob tiʼ jejeláas u luʼumiloʼob Asia. Yaan tiʼobeʼ maʼatech u chaʼabal u kʼaʼaytaj le sukuʼunoʼob teʼ luʼumil tuʼux ku taaloʼoboʼ. Yaʼab tiʼ le máakoʼob tu luʼumiloʼob Asiaoʼ maʼatech u creertikoʼob wa yaan Máax beet tuláakal baʼal. Yaan tiʼ letiʼobeʼ ku taaktal u kʼaj óoltikoʼob, le oʼolal ku yóotkoʼob ka tsʼaʼabak xook tiʼob yéetel le Bibliaoʼ. Baʼaleʼ yaneʼ maʼ tu jáan kʼamik baʼaloʼob maʼ u yáax uʼuymaj u kaʼansaʼaliʼ. ¿Bix jeʼel u páajtal k-kʼaʼaytik u jaajil tiʼ letiʼobeʼ? Yaan sukuʼunoʼob úuch joʼopʼok u kʼaʼaytajoʼobeʼ ku yilkoʼob maas ku kʼaʼamal kéen káajak u tsikbaloʼob tiʼ yaanal baʼal yéetel kéen u yeʼes u yutsiloʼob. Tsʼoʼoleʼ kéen u yiloʼob jeʼel u páajtaleʼ ku tsikbaltikoʼobtiʼob baʼax utsil tsʼoʼok u kʼamkoʼob ikil u beetkoʼob le baʼax ku yaʼalik junpʼéel teksto tiʼ le Bibliaoʼ.

13. ¿Baʼax jeʼel u beetik u taaktal u yojéeltik le máakoʼob baʼax ku kaʼansik le Bibliaoʼ? (Ilawil le foto yaan tu yáax táan juʼunil le revistaaʼ).

13 Yaʼab máakeʼ jatsʼuts u yilik le utsiloʼob ku kʼamik kéen u tsʼáa ichil u kuxtal le baʼaxoʼob ku yaʼalik le Bibliaoʼ (Ecl. 7:12). Juntúul kiik ku kʼaʼaytaj tiʼ le máaxoʼob ku tʼankoʼob chino mandarín yanoʼob tu kaajil Nueva Yorkoʼ, ku yaʼalik: «Kin natsʼkinba tsikbal tu yéeteloʼob yéetel kin chʼenxikintik baʼax ku yaʼalikoʼob. Wa ku yaʼalikoʼob maʼ úuch kʼuchkoʼob wayeʼ, kin kʼáatiktiʼob bix u bin tiʼob, wa tsʼoʼok u kaxtikoʼob meyaj yéetel bix u tratartaʼaloʼob tumen u maasil». Yaan kʼiineʼ lelaʼ ku tsʼáaik tuʼux u tsikbaltik le baʼax ku kaʼansik le Bibliaoʼ. Kéen u yil ku páajtaleʼ, ku yaʼalik: «¿Baʼax a tuklik jeʼel u yáantik máak utiaʼal u biskuba maʼalob yéetel u maasileʼ? ¿Jeʼel wa u páajtal in weʼesiktech junpʼéel baʼax ku yaʼalik le Bibliaoʼ? Ku yaʼalik: ‹Máax chuʼunsik baʼateleʼ bey u luʼsaʼal u maak jaʼ ku tóochʼbaleʼ; maas uts ka a tselaba [táanil tiʼ] u bablikech›. A tuklikeʼ, ¿jeʼel wa u yáantik máak le teksto utiaʼal u biskuba maʼalob yéetel u maasiloʼ?» (Pro. 17:14). Le tsikbaloʼob beyaʼ jeʼel u yáantkoʼon k-il máaxoʼob jeʼel u yóotkoʼob tsikbal tu kaʼatéen t-éeteleʼ.

14. ¿Baʼax ku beetik juntúul sukuʼun ku taal teʼ Lejano Oriente utiaʼal u yáantik le máaxoʼob maʼatech u creertikoʼob wa yaan Diosoʼ?

14 ¿Baʼax jeʼel u páajtal k-aʼalik tiʼ le máaxoʼob maʼatech u creertikoʼob Diosoʼ? Juntúul sukuʼun ku taal teʼ Lejano Oriente, úuch joʼopʼok u kʼaʼaytaj tiʼ le máaxoʼob minaʼan u religionoʼoboʼ, ku yaʼalik: «U suukileʼ kéen aʼalaʼak tumen le máakoʼob maʼatech u creertikoʼob Diosoʼ, u kʼáat u  yaʼaloʼobeʼ ku tuklikoʼob maʼ unaj u adorartaʼal le diosoʼob suuk u adorartaʼal tumen u maasiloʼ. Teneʼ kin waʼaliktiʼobeʼ u maas yaʼabil le diosoʼoboʼ minaʼan páajtalil tiʼob, tumen chéen wíinik beetmiloʼob. Kin xokik tiʼob Jeremías 16:20, teʼeloʼ ku yaʼalik: ‹¿Wíinikeʼ ku páajtal u beetik u [diosoʼob]? ¡Wa máax beetikeʼ, maʼ u jaajil [diosoʼobiʼ]!›. Tsʼoʼoleʼ kin kʼáatiktiʼob bix jeʼel u kʼaj óoltaʼal u jelaʼanil le u jaajil Dios tiʼ le maʼ jaajil diosoʼob beetaʼan tumen wíinikoʼ. Kin wuʼuyik baʼax ku yaʼalikoʼob, tsʼoʼoleʼ kin xokik tiʼob Isaías 41:23: ‹Aʼaleʼex xan tiʼ toʼon baʼaxoʼob kun úuchul tu tsʼook, eʼeseʼex tiʼ toʼon wa [dioseʼex] tu jaajil›. Kéen tsʼoʼokkeʼ kin weʼesiktiʼob baʼax ku yaʼalik u beetik Jéeoba maʼ kun xáantal».

15. ¿Baʼax k-kanik tiʼ le baʼax ku beetik juntúul sukuʼun ku taal tu laakʼin u luʼumil Asiaoʼ?

15 Koʼoneʼex ilik baʼax ku beetik juntúul sukuʼun ku taal tu laakʼin u luʼumil Asia kéen suunak u kaʼa xíimbalt le máakoʼoboʼ. Letiʼeʼ ku yaʼalik: «Kin weʼesiktiʼob le jatsʼuts tsolnuʼukoʼob ku tsʼáaik le Bibliaoʼ, le profecíaʼob tsʼoʼok u béeytaloʼoboʼ bey xan le leyoʼob nuʼuktik tuláakal baʼax beetaʼanoʼ. Kéen tsʼoʼokkeʼ kin wáantik u yileʼ tuláakal lelaʼ ku yeʼesik yaan juntúul Máax beet tuláakal baʼal. Le kéen káajak u creertik le máak yaan Dios tu jaajiloʼ, kin weʼesiktiʼ baʼax ku yaʼalik le Biblia yoʼolal Jéeobaoʼ».

16. Jeʼex u yaʼalik Hebreoʼob 11:6, ¿baʼaxten le j-xoknáaloʼoboʼ unaj u tsʼáaik u fejoʼob tiʼ Dios bey xan tiʼ le baʼax ku yaʼalik le Bibliaoʼ, yéetel bix jeʼel k-áantkoʼobeʼ?

16 Kéen k-tsʼáa xook tiʼ le máaxoʼob minaʼan u religionoʼoboʼ kʼaʼabéet k-áantkoʼob u creertoʼob jach tu jaajil yaan Dios (xok Hebreoʼob 11:6). Tsʼoʼoleʼ kʼaʼabéet k-áantkoʼob u creertoʼob le baʼax ku yaʼalik le Bibliaoʼ. Utiaʼal k-beetik lelaʼ maʼ xaaneʼ yaan u kʼaʼabéettal k-tsolik yaʼab u téenel jujunpʼéel tiʼ le baʼaxoʼob k-kaʼansiktiʼoboʼ. Cada kéen xooknakoʼon tu yéeteloʼobeʼ, maʼ xaaneʼ yaan u kʼaʼabéettal k-xakʼaltik baʼaxoʼob eʼesik le Bibliaoʼ u Tʼaan Dios. Jeʼel u páajtal k-xakʼaltik jujunpʼéel profecíaʼob tsʼoʼok u béeytaloʼobeʼ, le baʼax ku yaʼalik le ciencia utiaʼal u yilaʼal jaaj le baʼax ku yaʼalik le Bibliaoʼ, le baʼaxoʼob uchaʼantakoʼ bey xan le tsolnuʼukoʼob ku tsʼáaikoʼ.

17. ¿Baʼax utsiloʼob jeʼel u taasik wa k-áantik tuláakal máak yéetel yaabilajeʼ?

17 Kéen k-tratart yéetel yaabilaj le máakoʼob kex yaanal u religionoʼob bey xan wa minaʼanoʼ, k-áantkoʼob utiaʼal ka u tsaypachtoʼob Cristo (1 Cor. 13:1). Toʼoneʼ k-kaʼansiktiʼob le baʼax ku yaʼalik le Biblia utiaʼal ka u naʼatoʼobeʼ yaabiltaʼanoʼob tumen Dios yéetel letiʼeʼ u kʼáat ka u yaabiltoʼob xan. Cada jaʼabeʼ ku yokjaʼ u milesil máaxoʼob minaʼan u religionoʼob kaʼachi, tumen ku kʼuchul u yaabiltoʼob Dios. Le oʼolaleʼ maʼ u xuʼulul k-ilik k-áantik yéetel yaabilaj tuláakal máak. Unaj k-uʼuyik baʼax ku yaʼalikoʼob yéetel k-naʼatik bix u yuʼubikubaʼob. Unaj k-kaʼansiktiʼob yéetel le baʼaxoʼob k-beetik bix jeʼel u tsaypachtikoʼob Cristooʼ.

KʼAAY 76 Kiʼimak in wóol ikil in kaʼansik u Tʼaan Dios

^ xóot’ol 5 Bejlaʼeʼ jach yaʼab máaxoʼob minaʼan u religionoʼob. Le xookaʼ yaan u yáantkoʼon utiaʼal k-ilik bix jeʼel k-kʼaʼaytik le maʼalob péektsil tiʼoboʼ, bix jeʼel k-áantkoʼob u creertoʼob le baʼax ku kaʼansik le Bibliaoʼ yéetel ka u tsʼáa u fejoʼob tiʼ Jéeoba.

^ xóot’ol 1 BAʼAX KU TSOʼOLOL: Teʼ xookaʼ kéen tʼaanakoʼon tiʼ le máaxoʼob minaʼan u religionoʼoboʼ, táan k-tʼaan tiʼ le máaxoʼob maʼatech u creertikoʼob Diosoʼ.

^ xóot’ol 1 Le luʼumiloʼobaʼ Albania, Alemania, Australia, Austria, Azerbaiyán, Canadá, China, Corea del Sur, Dinamarca, España, Francia, Hong Kong, Irlanda, Israel, Japón, Noruega, Países Bajos, Reino Unido, República Checa, Suecia, Suiza yéetel Vietnam.

^ xóot’ol 54 FOTO: Juntúul sukuʼun ku meyaj tiʼ junpʼéel hospitaleʼ táan u kʼaʼaytaj tiʼ juntúul u yéet meyaj, ka tsʼoʼokeʼ le u yéet meyajoʼ ook teʼ sitio jw.org.