Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

¿Kʼajaʼan wa tech?

¿Kʼajaʼan wa tech?

¿Ta xokaj wa u tsʼook revistailoʼob U Pʼíich Tulumil Kanan? Wa beyoʼ, ilawil wa jeʼel a núukik le kʼáatchiʼobaʼ:

¿Baʼax unaj u beetik le superintendenteʼob tiʼ circuito, le ancianoʼob yéetel u maasil sukuʼunoʼob ken tsʼaʼabaktiʼob nuʼuktaj tumen u kaajal Jéeobaoʼ?

Unaj u beetkoʼob tu séebaʼanil baʼax ku yaʼalaʼaltiʼob. Le oʼolal maʼalob ka u tukloʼob: «¿Kin wáantik wa le sukuʼunoʼob ka chúukpajak u yóoloʼob tiʼ Jéeobaoʼ? ¿Kin séeb beetik wa baʼax ku yaʼalik u kaajal Dios?» (w16.11, táan juʼun 11).

¿Baʼax kʼiin ka palitsiltaʼab le cristianoʼob tumen le Nojoch Babiloniaoʼ?

Palitsiltaʼaboʼob le maʼ úuch kíimik le u tsʼook apostoloʼ. Bey káajik le maʼ jaajil religionoʼ. Desde teʼ kʼiinoʼoboʼ le Iglesia yéetel le Gobiernooʼ káaj u kaʼanskoʼob baʼaloʼob ku bin tu contra le Bibliaoʼ. Baʼaleʼ yaʼab jaʼaboʼob táanil tiʼ 1914, le yéeyaʼanoʼob utiaʼal u binoʼob kaʼanoʼ káaj u jóokʼloʼob ichil le Nojoch Babiloniaoʼ (w16.11, táan juʼun 23 tak 25).

¿Baʼaxten jach maʼalob le meyaj tu beetaj Lefèvre dʼÉtaplesoʼ?

Tu jaʼabiloʼob 1520, Lefèvreeʼ tu traducirta le Biblia ich francés utiaʼal ka naʼataʼak tumen uláakʼ máakoʼob. Le bix úuchik u tsolik le baʼax ku kaʼansik le Bibliaoʼ jach tu yáantaj Martín Lutero, William Tyndale yéetel Juan Calvino (wp16.6, táan juʼun 10 tak 12).

¿Baʼax u kʼáat u yaʼal «u tuukul máak tiʼ le kʼeban wíinklil» yéetel tiʼ le «baʼaloʼob yaan yil yéetel le kiliʼich muukʼoʼ»? (Rom. 8:6)

Máax ku chaʼik u nuʼuktaʼal tumen le «kʼeban wíinkliloʼ» ku bin tu paach u kʼaakʼas tsʼíibolaloʼob yéetel maases chéen tiʼ letiʼ ku tʼaan. Máax ku tuukul tiʼ le baʼaloʼob yaan yil yéetel le kiliʼich muukʼoʼ ku tsʼaatáantik u meyajtik Dios, ku chaʼik u nuʼuktaʼal tumen le kiliʼich muukʼoʼ yéetel ku tuukul jeʼex Dioseʼ. U tuukul máak tiʼ le kʼeban wíinkliloʼ ku taasik kíimil, baʼaleʼ u tuukul tiʼ le kiliʼich muukʼoʼ ku taasik kuxtal yéetel jeetsʼelil (w16.12, táan juʼun 15 tak 17).

¿Baʼax unaj u beetik máak utiaʼal maʼ u sen chiʼichnaktal?

Unaj u beetik chéen le baʼaxoʼob maas kʼaʼanaʼantakoʼ, u beetik chéen le baʼax jeʼel u béeytal tiʼeʼ, u jóoʼsik tiempo utiaʼal u jeʼelel, u chaʼantik le baʼaloʼob u beetmaj Jéeobaoʼ, u kiʼimakkúuntik u yóol, u suuktal u beetik ejercicio yéetel u wenel tubeel (w16.12, táan juʼun 22 yéetel 23).

¿Bix úuchik u bisaʼal Enok «táanxel tuʼux utiaʼal maʼ u yilik le kíimiloʼ»? (Heb. 11:5)

Jéeobaeʼ tu beetaj u saʼatal u kuxtal, maʼ xaaneʼ utiaʼal maʼ u tsʼáaik cuenta wa táan u kíimil (wp17.1, táan juʼun 12 yéetel 13).

¿Baʼaxten láayliʼ unaj u yeʼesik máak kabal óolaleʼ?

Tumen wa kabal u yóol máakeʼ u yojel baʼax ku páajtal u beetik yéetel baʼax maʼ. Maʼ unaj u tuʼubultoʼoneʼ le baʼaxoʼob k-beetkoʼ jeʼel u beetik uts wa kʼaas tiʼ u maasil sin ke k-tsʼáaik cuentaeʼ (w17.01, táan juʼun 18).

¿Baʼax eʼesik desde teʼ yáax siglo tak teʼ kʼiinoʼobaʼ Jéeoba nuʼuktik le Cuerpo Gobernanteoʼ?

Tumen ku yáantaʼal u naʼat baʼax ku yaʼalik le Kiliʼich Tsʼíiboʼ, ku yáantaʼal tumen le angeloʼob u nuʼukt le kʼaʼaytajoʼ yéetel ku chaʼik u nuʼuktaʼal tumen le Bibliaoʼ (w17.02, táan juʼun 26 tak 28).

¿Baʼax jeʼel u yáantkoʼon k-tsʼáa u graciasil u kuxtal Jesús tu kʼuboʼ?

K-tuukul tiʼ le kanpʼéel baʼaloʼobaʼ: 1) Máax tsʼáae, 2) baʼaxten tu tsʼáaj, 3) baʼax anchaj u beetik yéetel 4) baʼaxten jach kʼaʼabéetchaji (wp17.2, táan juʼun 4 tak 6).

¿Maʼalob wa ka u kʼex baʼax tsʼoʼok u chʼaʼtuklik juntúul máax meyajtik Jéeoba?

Kex unaj u beetik baʼax tsʼoʼok u yaʼalik u beetkeʼ, yaan kʼiineʼ maʼ kʼaas ka u jach il wa unaj u beetkiʼ. Jeʼex le ka tu yilaj Jéeoba tsʼoʼok u kʼexik u kuxtal le ninivitaʼoboʼ tu kʼexaj baʼax u tukultmaj u beetik. Wa ku kʼexpajal bix k-kuxtal bey xan wa yaan baʼaxoʼob ku jel tsoʼololeʼ, maʼ xaaneʼ kʼaʼabéet k-kʼexik baʼax k-chʼaʼtukultmaj (w17.03, táan juʼun 16 yéetel 17).

¿Baʼaxten maʼ unaj k-chismeariʼ?

Tumen jeʼel u maas nojochkíintik junpʼéel problemaeʼ. Kʼaʼajaktoʼoneʼ mix junpʼéel utsil ku taasik u jáajan tʼaan máak, kex wa jaaj baʼax ku yaʼalik wa maʼ (w17.04, táan juʼun 21).