Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

‹U kiʼikiʼtʼantech Yuumtsil yoʼolal a maʼalob tuukul›

‹U kiʼikiʼtʼantech Yuumtsil yoʼolal a maʼalob tuukul›

LELAʼ letiʼe baʼax tu yaʼalaj úuchjeakil David tiʼ Abigail utiaʼal u yaʼalik jach maʼalob baʼax tu beetoʼ. ¿Baʼaxten tu yaʼalajtiʼ beyoʼ? ¿Baʼax k-kanik tiʼ Abigail yoʼolal le baʼax tu beetoʼ?

Davideʼ tu kʼaj óoltaj Abigail le táan u chʼaʼpachtaʼal kaʼach tumen rey Sauloʼ. Abigaileʼ tsʼokaʼan u beel kaʼach yéetel Nabal, juntúul máak jach ayikʼal, yaʼab u yalakʼ tamanoʼob ku kanáantaʼaloʼob teʼ puʼukoʼob yaan tu noojolil Judaoʼ. David yéetel u soldadoʼobeʼ tu kanáantoʼob u j-meyajoʼob Nabal bey xan u yalakʼ tamanoʼob. Juntéenjeakileʼ Davideʼ tu túuxtaj u soldadoʼob utiaʼal u kʼáatkoʼob wa jeʼel u siʼibil baʼal u jaantoʼob tumen Nabaleʼ (1 Sam. 25:8, 15, 16). Lelaʼ maʼ kʼaas úuchik u bin u kʼáatoʼobiʼ, tumen tu kanáantoʼob baʼaxoʼob yaan tiʼ Nabal.

Baʼaleʼ Nabaleʼ maʼ tu yáantoʼobiʼ, beyoʼ tu yeʼesaj maʼ chéen kunel le baʼax u kʼáat u yaʼal u kʼaabaʼoʼ: «J-maʼ naʼat» wa «j-maʼ tuukul». Tsʼoʼoleʼ jach pʼuʼujeʼ ka joʼopʼ u poochʼil táan u núukik le baʼax kʼáataʼabtiʼoʼ. Le oʼolal Davideʼ bin yéetel u soldadoʼob utiaʼal u kíimse. Yoʼolal baʼax tu beetaj Nabaleʼ yaan u kíimsaʼal bey xan u j-meyajoʼob (1 Sam. 25:2-13, 21, 22).

Abigaileʼ tu tsʼáaj cuenta yaʼab loobil ken u taas le baʼax tu jáan tuklaj u beetik Davidoʼ, le oʼolal maʼ sajakchaj bin tʼaan tu yéeteliʼ. Tu kʼáat óoltaj tiʼ yéetel tsiikil maʼ u beetik le baʼax ku tuklikoʼ yéetel tu yaʼalaj xan tiʼeʼ wa ku beetkeʼ yaan u kʼebantal tu contra Dios. Tsʼoʼoleʼ tu bisaj yaʼab baʼal jaantbil tiʼ David, le máax ken u beet kaʼach u reyil Israeloʼ, bey xan tiʼ u soldadoʼob. Davideʼ tu tsʼáaj cuentaeʼ Dios túuxt Abigail utiaʼal maʼ u beetik baʼax kʼaas. Le oʼolal tu yaʼalaj tiʼ Abigail: «U [kiʼikiʼtʼantech] [...] Yuumtsil tu yoʼolal a maʼalob tuukul, tumen bejlaʼeʼ, tsʼoʼok a wetʼik in wekik kʼiʼikʼ» (1 Sam. 25:18, 19, 23-35).

Jeʼex k-ilkoʼ maʼ unaj k-beetik jeʼex Nabaleʼ. Tsʼoʼoleʼ wa k-tsʼáaik cuenta taʼaytak u beetaʼal baʼax maʼ maʼalob tumen wa máaxeʼ, unaj k-áantik utiaʼal maʼ u beetik. Unaj k-kʼáatik u yáantaj Jéeoba jeʼex tu beetil le salmistaaʼ: «Kaʼanbesten maʼalob tuukul yéetel ka yanakten kʼaj óolal» (Sal. 119:66).

Maʼ xaaneʼ yaan máax jeʼel u tuklik jach maʼalob le baʼax t-chʼaʼtuklaj k-beetkoʼ. Chéen baʼaleʼ tak wa maʼ u yaʼalikoʼobeʼ jeʼel u tuukuloʼob jeʼex David le ka tu yaʼalaj: ‹U kiʼikiʼtʼantech Yuumtsil yoʼolal a maʼalob tuukul›.