Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

¡Jeʼel u béeytal a kuxtal minaʼan u xuul way Luʼumeʼ!

¡Jeʼel u béeytal a kuxtal minaʼan u xuul way Luʼumeʼ!

¿MÁASAʼ JACH JATSʼUTS LE PROMESAAʼ? Jéeoba, le Máax beetmiloʼonoʼ, u yaʼalmaj yaan k-kuxtal way Luʼum utiaʼal mantatsʼeʼ. Chéen baʼaleʼ yaʼab máaxeʼ talam u creertik. Yaʼabeʼ ku yaʼalikeʼ deporsi yaan k-kíimil. Uláakʼoʼobeʼ ku creertikoʼob jeʼel u béeytal u kuxtal máak minaʼan u xuuleʼ chéen baʼaleʼ hasta u kíimil utiaʼal u bin kaʼaneʼ. Techeʼ, ¿baʼax ka tuklik?

Táanil tiʼ a núukikeʼ, koʼox ilik baʼax ku yaʼalik le Bibliaoʼ, tsʼoʼoleʼ tukult lelaʼ: Yoʼolal le bix beetaʼaniloʼonoʼ, ¿bukaʼaj tiempo unaj k-kuxtal? ¿Baʼax oʼolal tu beetaj Dios le Luʼum yéetel wíinikoʼ? ¿Baʼaxten ku kíimil máak?

JACH MAʼALOB BEETAʼANIK MÁAK

Toʼoneʼ maʼ beetaʼaboʼon jeʼex u maasil baʼaloʼob yaan teʼ yóokʼol kaabaʼ. ¿Baʼaxten k-aʼalik beyoʼ? Tumen le Bibliaoʼ ku yaʼalikeʼ Dioseʼ tu beetoʼon jeʼex letiʼeʼ (Génesis 1:26, 27). ¿Baʼax u kʼáat u yaʼal lelaʼ? U kʼáat u yaʼaleʼ Dioseʼ tu beetoʼon yéetel u páajtalil k-eʼesik u jatsʼuts modos, jeʼex yaabilaj bey xan k-beetik baʼax maʼalob.

Tu tsʼáajtoʼon xan u páajtalil k-tuukul, k-ilik baʼax uts yéetel baʼax kʼaas, tsʼoʼoleʼ tu tsʼáajtoʼon u tsʼíibolal k-kʼaj óoltik yéetel k-amigotik. Le oʼolal jatsʼuts k-ilik tuláakal baʼax u beetmaj teʼ kaʼan bey xan way Luʼumeʼ, k-uʼuyik paax yéetel ku kiʼimaktal k-óol kéen k-il bix jatsʼutsil beetaʼanik wa baʼax. Chéen baʼaleʼ le baʼax maas jelaʼankúuntikoʼon tiʼ u maasil baʼaloʼob u beetmoʼ letiʼe u taaktal k-adorartik Dios, le Máax beetmiloʼonoʼ. Le bix beetaʼabik wíinikoʼ jach jelaʼan tiʼ u maasil baʼaloʼob beetaʼanoʼoboʼ.

Tuukulnen tiʼ lelaʼ: ¿Baʼaxten tu beetoʼon Dios yéetel u páajtalil k-eʼesik jatsʼuts modos bey xan k-kʼaj óoltik yaʼab baʼaloʼob? ¿Chéen wa tu beetoʼon jach maʼalob utiaʼal k-kuxtal wa jaypʼéel años? Maʼatech, letiʼeʼ u kʼáat ka kuxlakoʼon mantatsʼ ich kiʼimak óolal way Luʼumeʼ.

LE BAʼAX U TUKULTMAJ U BEETIK DIOSOʼ

Yaan máax aʼalikeʼ Dioseʼ maʼ tu beetoʼon utiaʼal k-kuxtal mantatsʼ way Luʼumeʼ. Ku yaʼalikoʼobeʼ le Luʼumaʼ beetaʼab chéen utiaʼal u yilaʼal máaxoʼob ku náajaltik u binoʼob kuxtal yéetel Dios teʼ kaʼanoʼ. Wa jaaj le baʼax ku creertaʼalaʼ, ¿máasaʼ kʼasaʼan Dios ikil u beetik u muʼyaj máak way Luʼumeʼ? Wa beyoʼ maʼ jaaj le baʼax ku yaʼalik le Biblia yoʼolal Diosoʼ, teʼeloʼ ku yaʼalik: «Baʼaxoʼob ku beetkeʼ tojtak. Letiʼ u [Diosil] jaaj, tiʼ letiʼeʼ minaʼan baʼax  maʼ tubeeliʼ, ¡[...] letiʼ xan u jaajil!» (Deuteronomio 32:4).

Le Bibliaoʼ ku yaʼalik baʼax oʼolal tu beetaj Dios le Luʼumaʼ: «Le kaʼanoʼ utiaʼal Yuumtsil, tiʼ wíinik tu tsʼáaj le luʼumaʼ» (Salmo 115:16). Jeʼex k-ilkoʼ Dioseʼ tu beetaj le jatsʼuts Luʼumaʼ utiaʼal u kajtal máak mantatsʼiʼ. Tsʼoʼoleʼ tu tsʼáaj tuláakal baʼax kʼaʼabéet utiaʼal maʼ u náakal u yóol máak kuxtal minaʼan u xuuliʼ (Génesis 2:8, 9).

«Le kaʼanoʼ utiaʼal Yuumtsil, tiʼ wíinik tu tsʼáaj le luʼumaʼ.» (Salmo 115:16.)

Le Bibliaoʼ ku yaʼalik baʼax oʼolal beetaʼab wíinik. Letiʼeʼ tu yaʼalaj tiʼ Adán yéetel Eva: «Yaʼabchajak a paalaleʼex; chupeʼex le yóokʼol kaaboʼ, méekʼtáanteʼex xan, yanak a páajtalileʼex yóokʼol [...] tuláakal le baʼalcheʼob ku jíiltikubaʼoboʼ» (Génesis 1:28). ¿Máasaʼ jach jatsʼuts le meyaj tsʼaʼabtiʼobaʼ? Yaan kaʼach u kanáantkoʼob tuláakal baʼax yaan way Luʼumeʼ yéetel yaan u sutkoʼob Paraísoil. Teʼelaʼ tiʼ kun kuxtaloʼob mantatsʼ yéetel u paalaloʼobiʼ, maʼ teʼ kaʼanoʼ.

¿BAʼAXTEN K-KÍIMIL?

Le Bibliaoʼ ku yaʼalikeʼ Dios beet le angeloʼoboʼ, chéen baʼaleʼ anchaj juntúul maʼ tu yuʼubaj tʼaaniʼ, lelaʼ kʼuch u kʼaabaʼt Satanás. Letiʼeʼ tu tsʼáajuba tu contra Dios yéetel tu yilaj u kʼaskúuntik le baʼax u tukultmoʼ. ¿Bix tu beetil?

Satanaseʼ tu beetaj maʼ u yuʼubaʼal u tʼaan Dios tumen Adán yéetel Eva. Tu yaʼaleʼ Dioseʼ kʼasaʼan yéetel maʼ u kʼáat ka u chʼaʼtukloʼob baʼax uts yéetel baʼax kʼaasiʼ. Letiʼobeʼ tu tsʼáajubaʼob tu tséel Satanás yéetel xuʼul u yuʼubikoʼob u tʼaan Dios. ¿Bix úuchik u bintiʼob? Ka máan kʼiineʼ kíimoʼob jeʼex aʼalaʼabiktiʼoboʼ. Tsʼoʼoleʼ tu peʼertoʼob u páajtalil u kuxtaloʼob mantatsʼ way Luʼum tiʼ junpʼéel Paraísoeʼ (Génesis 2:17; 3:1-6; 5:5).

Adán yéetel Evaeʼ maʼ tu yuʼuboʼob u tʼaan Diosiʼ lelaʼ yaʼab muʼyajil tsʼoʼok u taasik tiʼ wíinik. Le Bibliaoʼ ku yaʼalik: «Tu yoʼolal chéen juntúul máak ook le kʼeban way yóokʼol kaab, yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ tumen tuláakloʼob kaʼach tsʼoʼok u kʼebantaloʼob» (Romailoʼob 5:12). Jeʼex k-ilkoʼ k-kíimil tumen Adaneʼ tu máansajtoʼon le kʼeban yéetel le kíimiloʼ. Maʼ tumen wa yaan baʼax kʼaas u kʼáat ka úuchuktoʼoniʼ.

JEʼEL U PÁAJTAL A KUXTAL MANTATSʼ WAY LUʼUMEʼ

Le baʼax úuch tu Jardinil Edenoʼ maʼ tu beetaj u kʼexik Dios le baʼax u tukultmaj yoʼolal wíinik bey xan le Luʼumaʼ. Tumen u yaabiltmoʼon yéetel ku beetik baʼax tojeʼ tu beetaj le ku páajtal utiaʼal u jáalkʼabtikoʼon tiʼ le kʼeban yéetel le kíimiloʼ. Apóstol Pabloeʼ tu yaʼalaj: «Le boʼol ku tsʼáaik le kʼebanoʼ letiʼe kíimiloʼ, baʼaleʼ le siibal ku tsʼáaik Diosoʼ, kuxtal minaʼan u xuul tu yoʼolal k-Yuumtsil Cristo Jesús» (Romailoʼob 6:23). Le yaabilaj ku yuʼubik Dios t-oʼolaloʼ le péeks u tsʼáa «u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:16). Jesuseʼ kiʼimak u yóol ka tu tsʼáaj u kuxtal utiaʼal k-tiaʼalintik le baʼax tu peʼertaj Adanoʼ. *

Maʼ kun xáantal ken u sut Dios Paraísoil le Luʼum jeʼex u prometertmoʼ. Utiaʼal a wilik u béeytal le promesaaʼ unaj a beetik le baʼax tu yaʼalaj Jesusaʼ: «Ookeneʼex tiʼ le nuʼunutʼ joonajoʼ, tumen nojoch yéetel kóoch le bej ku bisik máak tiʼ xuʼulsajiloʼ, yéetel yaʼab máaxoʼob ku binoʼobiʼ; baʼaleʼ nuʼutʼ le joonajoʼ yéetel chichan le bej ku bisik máak tiʼ kuxtaloʼ, yéetel maʼ yaʼab máaxoʼob kaxtik le bejaʼ» (Mateo 7:13, 14). Jeʼex k-ilkoʼ tsʼaʼan ta kʼab u páajtalil a yéeyik bix a kʼáat ka xiʼiktech ichil a kuxtal. Techeʼ ¿baʼax ken a beete?

^ xóot’ol 17 Wa taak a wojéeltik u maasil yoʼolal le utsiloʼob ken u taas le boʼol tu tsʼáaj Jesusoʼ, ilawil u 5 xookil le libro ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba. Tiaʼan xan teʼ www.jw.org/yua.