Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 KʼEʼEX U KUXTALOʼOB TUMEN LE BIBLIAOʼ

Chéen kʼuuxilil yéetel loob yaan kaʼach tin puksiʼikʼal

Chéen kʼuuxilil yéetel loob yaan kaʼach tin puksiʼikʼal
  • SÍIJ TU JAʼABIL: 1974

  • TUʼUX SÍIJI: MÉXICO

  • KAʼACHEʼ: J-KAXAN BAʼATEʼEL, KʼAAS U PʼUʼUJUL

BIX KUXLIKEN KAʼACHI.

Síijen tu noj kaajil Mante, Tamaulipas (México). Jatsʼuts tuʼux yaan le kaajaʼ. U kajnáaliloʼobeʼ jatsʼuts u modosoʼob yéetel suuk u paklan áantkubaʼob. Chéen baʼaleʼ yoʼolal le delincuenteʼoboʼ pʼáat sajbeʼentsil u máan máakiʼ.

Yaan juntúul in sukuʼun yéetel kaʼatúul in wíitsʼinoʼob. Tin paalileʼ tsʼaʼab in wokjaʼ teʼ Iglesia Católicaoʼ yéetel ka máan kʼiineʼ káaj in kʼaay tu coroil le iglesiaoʼ. Taak in lúubul utsil tiʼ Dios tumen saajken in tóokaʼal infierno.

Seis años yaanten ka tu pʼatoʼon in papá. Jach tu lúuʼsaj in wóol, tin wuʼuyaj bey yaan baʼax ku bineltikteneʼ. Maʼ tin naʼatik baʼaxten tu pʼatoʼon; si jach in yaabiltmaj kaʼachi. In maamaeʼ anchaj u jóokʼol meyaj bul kʼiin utiaʼal u líiʼskoʼon.

Ka tin wilaj beyoʼ tu lugar in bin escuelaeʼ joʼopʼ in biskinba yéetel xiʼipalaloʼob maas nuuktakoʼob. Tu kaʼansenoʼob poochʼil, tsʼuʼutsʼ chamal, ookol yéetel loox. Como uts tin tʼaan in xanabchaʼatik uláakʼ máakoʼobeʼ tin kanaj box, lucha libre, yéetel uláakʼ baʼaloʼob jeʼex le karateoʼ. Tin kanaj tak in usart tsʼoon. Jach kʼaschajen tin paalil. Yaʼab u téenel tin tsʼoʼontsʼoninba yéetel uláakʼ máakoʼob. Yaan horaeʼ tiʼ kin pʼáatal pektal teʼ calle táan in wichíintik in kʼiʼikʼeloʼ, hasta ku tuklaʼal kimenen. Ken u yilen kaʼach in maama beyoʼ ku jáan bisken teʼ hospitaloʼ. ¡Jach túun tin beetaj u muʼyaj óotsil in maama!

Le yaanten kaʼach 16 añosoʼ taal u xíimbalten Jorge, juntúul in amigo tin kʼaj óoltaj tin chichnil. Tu yaʼalajteneʼ juntúul u j-jaajkunaj Jéeoba, yéetel tu yaʼaleʼ yaan junpʼéel baʼax jach kʼaʼanaʼan u kʼáat u tsikbalttoʼon. Káaj u tsoliktoʼon yéetel le Biblia baʼax ku creertikoʼ. Teneʼ mix juntéen in xokmaj kaʼach le Bibliaoʼ. Kiʼimakchaj in wóol ka tin wojéeltaj bix u kʼaabaʼ Dios yéetel baʼax u tukultmaj u beetik. Jorgeeʼ tu yaʼalaj jeʼel u tsʼáaiktoʼon xookeʼ, ka t-aʼalajtiʼ jeʼel u páajtaleʼ.

BIX TU KʼEXIL IN KUXTAL LE BIBLIAOʼ.

Kiʼimakchaj in wóol ka tin wojéelteʼ le Bibliaoʼ maʼatech u yaʼalik wa yaan u tóokaʼal máak teʼ infiernooʼ (Salmo 146:4; Eclesiastés 9:5). Desde ka tin wojéeltaj leloʼ xuʼul in sajaktal ka u castigarten Dios beyoʼ. Tin  tsʼáaj cuentaeʼ Jéeoba Dioseʼ juntúul Taatatsil jach u yaabiltmaj u paalal yu kʼáat ka xiʼik utsil tiʼob.

Jeʼex u bin in kanik baʼax ku yaʼalik le Bibliaoʼ, bey úuchik in tsʼáaik cuenta kʼaʼabéet in kʼexik in modosoʼ. Unaj u yantalten kabal óolal yéetel unaj u xuʼulul in baʼateʼel. Jach tu yáanten le baʼax ku yaʼalik 1 Corintoiloʼob 15:33: «U biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak». Tin wileʼ utiaʼal in kʼexik in modoseʼ kʼaʼabéet u xuʼulul in biskinba yéetel máaxoʼob jeʼel u kʼaskúuntikenoʼobeʼ. Tin pʼataj túun in úuchben amigoʼobeʼ ka joʼopʼ in biskinba yéetel le máaxoʼob jach tu jaajil ku meyajtikoʼob Diosoʼ. Letiʼobeʼ maʼ yéetel baʼateʼel ku yutskíintik u problemaʼobiʼ, baʼaxeʼ yéetel le tsolnuʼuk ku tsʼáaik le Bibliaoʼ.

Uláakʼ teksto jach tu péeksaj in wóoleʼ Romailoʼob 12:17-19: «Maʼ a boʼotkeʼex kʼaas yéetel kʼaas tiʼ mix máak. [...] Wa ku béeytaleʼ, tak tuʼux ku páajtal a beetkeʼexeʼ, beeteʼex baʼax kʼaʼabéet utiaʼal ka yanakteʼex jeetsʼelil yéetel tuláakal máak. Maʼ a sutkeʼex u jeel le kʼaas ku beetaʼalteʼexoʼ, [...] tumen tsʼíibtaʼan: ‹Teen ken in sut u jeel le kʼaas ku beetkoʼoboʼ; teen ken in tsʼáa baʼax ku náajmatkoʼob, ku yaʼalik Jéeoba›». Kʼuchen in naʼateʼ Jéeoba ken u yil bix ken u luʼs le kʼasaʼanil ken kʼuchuk u kʼiiniloʼ. Jujunpʼíitil úuchik u bin in pʼatik le kuxtal jach kʼaas yaantenoʼ.

Mix bikʼin u tuʼubulten baʼax úuchten junpʼéel áakʼab táan in suut tin wotoch. Junmúuchʼ paalaloʼob u pʼekmenoʼobeʼ tu machenoʼob teʼ calleoʼ. U poolileʼ tu kumajten junpʼéel jaatsʼ tin puʼucheʼ, ka tu yaʼalajten: «¡Defendertaba!». Teʼ súutukoʼ jáan orarnajen tiʼ Jéeoba, ka tin kʼáatajtiʼ ka u yáanten in controlartinba. Kex jach pʼuʼujeneʼ tu lugar in sutik u jeeleʼ áalkabil úuchik in lukʼliʼ. Tuláakʼ kʼiineʼ tin wilaj le máax jatsʼenoʼ; chéen tu juunal. Taakchaj in vengarkinba, hasta tin wuʼuyaj táan u look in kʼiʼikʼel. Pero kaʼa orarnajen tiʼ Jéeoba. Le xiʼipaloʼ náatsʼ tin wiknaleʼ ka tu yaʼalajten: «Disculparten yoʼolal le baʼax tin beetaj oʼneakoʼ. U jaajileʼ in kʼáat kuxtal jeʼex techoʼ. In kʼáat in xok le Bibliaoʼ». Yaaske tin controlartinba. Le xiʼipaloʼ káaj u xokik le Bibliaoʼ.

Teʼ kʼiinoʼoboʼ in láakʼtsiloʼobeʼ xuʼul u xokikoʼob le Bibliaoʼ. Kex beyoʼ tin chʼaʼtuklaj u seguer in xook yéetel tin waʼaleʼ mix baʼal ken u beet in pʼatik. In wojleʼ wa kin biskinba yéetel máaxoʼob meyajtik Dioseʼ jeʼel u yantalten jeetsʼel óolaleʼ yéetel jeʼel in kʼuchul in wil bey in láakʼtsiloʼobeʼ. Seguernaj in kʼexik in modos, ka okjaʼanajen 1991 bey juntúul u j-jaajkunaj Jéeobaeʼ.

UTSILOʼOB TSʼOʼOK U TAASIKTEN.

Kaʼacheʼ chéen kʼuuxilil yéetel loob yaan tin puksiʼikʼal. Pero le Bibliaoʼ jach tu kʼexaj in kuxtal. Bejlaʼeʼ kin tsikbaltik tiʼ uláakʼ máakoʼob le jatsʼuts baʼaloʼob kin kanik teʼ Bibliaoʼ. Ich 23 añoseʼ tsʼoʼok in táakpajal ichil le máaxoʼob chéen u kʼubmuba u meyajtoʼob Diosoʼ.

Junpʼéel tiempoeʼ meyajnajen teʼ sucursal yaan tiʼ u j-jaajkunajoʼob Jéeoba tu luʼumil Méxicooʼ. Teʼeloʼ tin kʼaj óoltaj Claudia, juntúul x-chʼúupal ku meyajtik xan Dios yéetel jach tʼaʼaj. Tsʼoʼok in beel tu yéetel tu añoil 1999. Kin tsʼáaik gracias tiʼ Jéeoba úuchik u tsʼáaikten juntúul atantsil jach u yaabiltmen.

Junmúuchʼ yéetel in wataneʼ binoʼon áantaj tiʼ junpʼéel múuchʼulil ich lengua de señas mexicana, teʼeloʼ ku yáantaʼal le máaxoʼob kóokoʼob kaanbal tiʼ Jéeobaoʼ. Tsʼoʼoleʼ invitartaʼaboʼon Belice utiaʼal k-kaʼansik baʼax ku yaʼalik le Bibliaoʼ. Wayeʼ kex maʼ yaʼab baʼax yaantoʼoneʼ kiʼimak k-óol. Minaʼan uláakʼ meyaj jeʼex lelaʼ.

Ka máan kʼiineʼ in maamaeʼ káaj u kaʼa xokik le Bibliaoʼ ka okjaʼanaji. Bejlaʼeʼ in sukuʼun, u yatan yéetel u paalaleʼ j-Jaajkunajoʼob xan. Jujuntúul tiʼ in úuchben amigoʼob tin tsikbaltajtiʼob baʼax ku yaʼalik le Bibliaoʼ táan xan u meyajtikoʼob Jéeoba bejlaʼeʼ.

Kex yaj tin wóol in waʼalikeʼ jujuntúul tiʼ in láakʼtsiloʼobeʼ kíimoʼob tumen maʼ tu kʼexaj u kʼaakʼas modosoʼobiʼ. Wa maʼ úuchik in kʼexik in modoseʼ, bejlaʼa xan maʼ kuxaʼaneneʼ. Kin agradecertik tiʼ Jéeoba úuchik u natsʼken tu yiknal bey xan úuchik u kʼamken tu kaajal, tumen teʼeloʼ yéetel paciencia bey xan yéetel utsileʼ kaʼansaʼaben kuxtal jeʼex u yaʼalik le Bibliaoʼ.