Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

U táax luʼumil Elah

¿Jach wa tu jaajil anchaj David yéetel Goliat?

¿Jach wa tu jaajil anchaj David yéetel Goliat?

Yaan máax tuklikeʼ u tsikbalil David yéetel Goliateʼ chéen cuento. Le táan a xokik le xook táant u tsʼoʼokoloʼ, ¿bey wa xan ta tuklil techoʼ? Wa beyoʼ ilawil u núukil le kʼáatchiʼobaʼ.

1 | ¿Jeʼel wa u chukik 2.9 metros u kaʼanlil juntúul máakeʼ?

Le Quiliʼich Bibliaoʼ ku yaʼalikeʼ «míin kaʼa sáap kaʼanlil u baakel» Goliat (1 Samuel 17:4). Uláakʼ bibliaʼobeʼ ku yaʼalikoʼobeʼ «seis kúuk yéetel junnáab». ¿Bukaʼaj túun leloʼ? Junpʼéel kúukeʼ 44.5 centímetros, junpʼéel náabeʼ 22.2 centímetros. Wa k-jóoʼsik u cuentaileʼ ku taal u tsʼáa 2.9 metros u kaʼanlil. Yaan máaxeʼ maʼ tu creertik wa bey u kaʼanlil u baakel Goliatoʼ. Chéen baʼaleʼ tukult lelaʼ: le máax maas kaʼanal anchajaʼan teʼ kʼiinoʼobaʼ 2.7 metros u kaʼanlil. ¿Jach wa talam u creertaʼal 20 centímetros maas kaʼanchajik Goliat? Letiʼeʼ tu chʼiʼibal Refaím u taal, máakoʼob jach kaʼanal u baakeloʼob. Junpʼéel juʼun kaxtaʼab Egipto tsʼíibtaʼab teʼ siglo 13 táanil tiʼ Cristooʼ, ku yaʼalikeʼ jujuntúul soldadoʼob cananeoʼobeʼ maas tiʼ 2.4 metros u kaʼanliloʼob. Jeʼex k-ilkoʼ kex sen kaʼanal u baakel Goliateʼ, jeʼel u páajtal k-creertik anchajeʼ.

2 | ¿Anchaj wa David?

Kaʼacheʼ jujuntúul máakoʼob kaʼanchajaʼan u xookoʼobeʼ ku yaʼalikoʼobeʼ chéen cuento u tsikbalil rey David, pero yaʼab baʼaxoʼob eʼesik maʼ beyiʼ. Le arqueologoʼoboʼ tu kaxtoʼob junpʼéel úuchben tsʼíib ku tʼaan tiʼ «u yotoch David». Tsʼoʼoleʼ tak Jesucristo tu tsʼáaj naʼatbil anchaj David (Mateo 12:3; 22:43-45). Utiaʼal u kʼaʼamal Jesús bey le Mesíasoʼ, anchaj u yilaʼal wa tiʼ u chʼiʼibal rey David taali, yéetel jeʼex u chíikpajal tu Evangelioil Mateo yéetel Lucasoʼ bey úuchikoʼ (Mateo 1:6-16; Lucas 3:23-31). Jeʼex k-ilkoʼ Davideʼ juntúul máak jach tu jaajil anchaji.

3 | ¿Anchaj wa le lugaroʼob ku chʼaʼchiʼitaʼal teʼ tsikbalaʼ?

Le Bibliaoʼ ku yaʼalikeʼ tu táax luʼumil Elah anchaj le baʼateloʼ. Ku yaʼalik xaneʼ le filisteoʼoboʼ jeʼeloʼob tiʼ junpʼéel níix luʼum yaan chúumuk tiʼ kaʼapʼéel kaaj: Socoh yéetel Azeqá. Le israelitaʼoboʼ tiʼ jeʼeloʼob tuláakʼ níix luʼum aktáan tiʼ le filisteoʼoboʼ. ¿Jach wa tu jaajil anchaj le lugaroʼobaʼ?

Ilawil baʼax tu yaʼalaj juntúul máak bin xíimbal teʼ bandaoʼ: «Le guía de turistasoʼ —juntúul máak maʼ religiosoeʼ— tu bisoʼon tu táax luʼumil Elah, ka naʼakoʼon teʼ wits tiʼ junpʼéel tʼuʼul bejoʼ. Mientras táan k-chaʼantik le táax luʼumoʼ tu yaʼalajtoʼon ka k-xok 1 Samuel 17:1-3. Ka tsʼoʼokeʼ tu tuchʼubteʼ, ka tu yaʼalaj: ‹Ta x-tsʼíikeʼexeʼ tiaʼan u ruinasil Socohiʼ›. Tu sutubaeʼ ka tu yaʼalaj: ‹Ta x-noʼojeʼexeʼ tiaʼan u ruinasil Azeqaiʼ. Le filisteoʼoboʼ tiʼ jeʼeloʼob tiʼ junpʼéel níix luʼum yaan chúumuk tiʼ le kaʼapʼéel kaajoʼobaʼ. Maʼ xaaneʼ jach tiʼ waʼalakbaloʼon tuʼux jeʼel le israelitaʼoboʼ›. Ka tin máansaj tin tuukul Saúl yéetel David waʼalakbaloʼob teʼ tuʼux yanenoʼ. Tsʼoʼoleʼ ka éemoʼon tuʼux ku máan junpʼéel río óoliʼ tikineʼ, tin wilaj yaan tuunichoʼob jayakbaliʼ. Ka tin máansaj tin tuukul bix úuchik u molik David cinco mejen wóolis tuunichoʼob; junpʼéel tiʼ le tuunichoʼoboʼ le kíims Goliat». Le máax bin xíimbal teʼ lugaroʼ, jeʼex u yúuchul tiʼ uláakʼ máakoʼobeʼ, péeknaj xan u yóol ka tu yilaj jach jaaj le baʼaxoʼob ku yaʼalik le Bibliaoʼ.

Jeʼex túun k-ilkoʼ yaʼab baʼax eʼesik jach tu jaajil úuch le baʼaxoʼob ku tsikbaltaʼaloʼ. Le máakoʼob yéetel le lugaroʼob ku chʼaʼchiʼitaʼaloʼ jach tu jaajil anchajoʼob. Tsʼoʼoleʼ táakaʼanoʼob teʼ Biblia, u Tʼaan le Dios maʼatech u tuusoʼ (Tito 1:2; 2 Timoteo 3:16).