Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 TIʼ U YÁAX TÁAN JUʼUNIL | JÓOʼS U YUTSIL U XOOKIL LE BIBLIAOʼ

¿Jeʼel wa u yáantkech le Bibliaoʼ?

¿Jeʼel wa u yáantkech le Bibliaoʼ?

Le Bibliaoʼ maʼ jeʼex u maasil libroʼoboʼ. Ku taasik u tsolnuʼukoʼob Dios (2 Timoteo 3:16). Jach jeʼel u yáantkoʼon le baʼaxoʼob ku kaʼansikoʼ. Le Bibliaoʼ ku yaʼalik: «Tumen u tʼaan Dioseʼ kuxaʼan yéetel yaan u páajtalil» (Hebreoʼob 4:12). Kaʼapʼéel bix jeʼel u yáantkecheʼ: ku tsʼáaik tsolnuʼukoʼob utiaʼal a nuʼuktik a kuxtal yéetel ku yáantkech a kʼaj óolt Dios bey xan baʼax u yaʼalmaj u beetik (1 Timoteo 4:8; Santiago 4:8).

Ku maʼalobkíintik a kuxtal. Le Bibliaoʼ jeʼel u yáantkech ichil a kuxtaleʼ. Ku tsʼáaik xan tsolnuʼukoʼob yoʼolal:

Vicent yéetel Annalou, máaxoʼob maʼ úuch tsʼoʼokok u beeloʼob kajaʼanoʼob tu luʼumil Asiaeʼ, tu yiloʼobeʼ jach maʼalob le tsolnuʼukoʼob ku tsʼáaik le Bibliaoʼ. Jeʼex suuk u yúuchul tiʼ yaʼab máaxoʼob táant u tsʼoʼokol u beeloʼobeʼ, tu káajbaleʼ talamchaj u biskubaʼob yéetel u múul tsikbaloʼob. Baʼaleʼ káaj u tsʼáaikoʼob ichil u kuxtaloʼob le tsolnuʼukoʼob yaan teʼ Bibliaoʼ. ¿Baʼax utsil tu taasajtiʼob? Vicenteʼ ku yaʼalik: «Le baʼax tin xokaj teʼ Bibliaoʼ tu yáanten in weʼes yaabilaj ka anchajtoʼon problemaʼob. Bejlaʼeʼ kiʼimak k-óol ikil k-beetik baʼax ku yaʼalik». U yataneʼ ku yaʼalik: «Jach tsʼoʼok u yáantkoʼon k-xokik u ejemplo le máaxoʼob meyajt Dios úuchjeakiloʼ. Bejlaʼeʼ kiʼimak in wóol, maʼalob k-bisikba yéetel junpʼéeliliʼ bix k-tuukul».

Ku yáantkech a kʼaj óolt Dios. Vincenteʼ ku yaʼalik uláakʼ bix tsʼoʼok u yáantaʼal: «Ikil in xokik le Bibliaoʼ bejlaʼeʼ maas naatsʼ in wuʼuyikinba tiʼ Jéeoba». Le baʼax tu yaʼalaʼ ku yeʼesikeʼ jeʼel u yáantkech a maas kʼaj óolt Dioseʼ. Maʼ chéen yaan u yáantkech le tsolnuʼukoʼob ku tsʼáaikoʼ, baʼaxeʼ yaan a amigotik Dios. Tsʼoʼoleʼ yaan a kanik teʼ Bibliaoʼ Dioseʼ maʼ tun xáantal ken u yutskíint le yóokʼol kaabaʼ yéetel yaan k-kuxtal ich kiʼimak óolal utiaʼal mantatsʼ (1 Timoteo 6:19). Minaʼan uláakʼ libro jeʼel u tsʼáaiktoʼon le jatsʼuts promesaaʼ.

Wa ka káajsik a xokik le Biblia yéetel maʼ ta xulik a beetkoʼ, yaan u maʼalobtal bix a kuxtal yéetel yaan a maas kʼaj óoltik Dios. Chéen baʼaleʼ ken káajak a xokik le Bibliaoʼ maʼ xaaneʼ yaʼab baʼaloʼob kun taaktal a wojéeltik. Ken úuchuktech beyoʼ kʼaʼajs baʼax tu beetaj juntúul máak etiopíail kuxlaj maas tiʼ dos mil años beoraaʼ. Le máakoʼ jach yaʼab baʼax taak u yojéeltik kaʼach yoʼolal le Bibliaoʼ. Felipe, juntúul u disipulo Jesuseʼ, tu kʼáataj tiʼ le máak wa ku naʼatik le baʼax ku xokikoʼ. Le máakoʼ tu núukaj: «¿Bix túun jeʼel u páajtal in naʼatik wa minaʼan máax tsolikteneʼ?». * Ka tsʼoʼokeʼ tu chaʼaj u yáantaʼal tumen Felipe, juntúul máak yaʼab baʼax u yojel yoʼolal le Bibliaoʼ (Baʼaxoʼob 8:30, 31, 34). Jeʼex le máakaʼ, wa a kʼáat xan ka áantaʼakech a maas naʼat le Bibliaoʼ, chup junpʼéel solicitud teʼ jw.org wa túuxt junpʼéel carta tiʼ junpʼéel tiʼ le direccionoʼob ku taasik le revistaaʼ. Jeʼel xan u páajtal a kʼáatik áantaj tiʼ u j-jaajkunajoʼob Jéeoba yaan teʼ tuʼux kajaʼanechoʼ wa a bin tiʼ junpʼéel u Najil Reino. Jeʼekʼabt junpʼéel Biblia desde bejlaʼeʼ yéetel chaʼa u nuʼuktik a kuxtal.

Wa ka tuklik maʼ jaaj baʼax ku yaʼalik le Bibliaoʼ chaʼant le video ¿Bix jeʼel a wojéeltik jaaj baʼax ku yaʼalik le Bibliaoʼ? Utiaʼal a kaxtikeʼ ookkech jw.org, teʼ jaats JÓOʼSAʼANILOʼOB > VIDEOʼOB > BIBLIA.

^ xóot’ol 8 Utiaʼal a wilik uláakʼ maʼalob tsolnuʼukoʼob ku tsʼáaik le Bibliaoʼ ookkech jw.org, teʼ jaats JÓOʼSAʼANILOʼOB.

^ xóot’ol 11 Ilawil xan le xook «¿Maʼalob wa bix a naʼatik le Bibliaoʼ?». Tiaʼan teʼ revistaaʼ.