Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Le bix a vestirkabaoʼ, ¿ku yeʼesik wa ka nojbeʼenkúuntik Dios?

Le bix a vestirkabaoʼ, ¿ku yeʼesik wa ka nojbeʼenkúuntik Dios?

«Beeteʼex tuláakal baʼal utiaʼal u nojbeʼenil Dios.» (1 Cor. 10:31)

KʼAAYOʼOB: 34, 61

1, 2. ¿Baʼaxten u j-jaajkunajoʼob Jéeobaeʼ ku kanáantkoʼob bix u vestirkubaʼob? (Ilawil le foto yaan tu káajbal le xookaʼ.)

JUNPʼÉEL periódico tu luʼumil Holandaeʼ, ka tʼaanaj tu yoʼolal le bix u vestirmiluba u nojchiloʼob junpʼéel religión ka binoʼob tiʼ junpʼéel muchʼtáambal anchajtiʼobeʼ, tu yaʼaleʼ le máakoʼobaʼ como jach ooxoleʼ u takmoʼob u nookʼil ooxol, chéen baʼaleʼ le nookʼoʼ maʼ maʼalob utiaʼal u binoʼob u adorartoʼob Diosiʼ. Le periodicoaʼ tu yaʼalaj xaneʼ le J-jaajkunajoʼoboʼ maʼ bey u tsʼaamil u nookʼoʼob ka binoʼob tu asambleaʼobiʼ. Tu yaʼaleʼ le mejen xiʼipalaloʼob yéetel le máakoʼoboʼ u tsʼaamaj u flusoʼob yéetel u corbataʼob. Le mejen x-chʼúupalaloʼob yéetel le koʼoleloʼoboʼ maʼ kóom u faldaʼobiʼ yéetel maʼ máanjaʼanoʼob xan de modaiʼ. Yaʼab u téenel tsʼoʼok u felicitartaʼal u j-jaajkunajoʼob Jéeoba yoʼolal bix u vestirmilubaʼob. Le apóstol Pablooʼ tu yaʼaleʼ le máaxoʼob meyajtik Diosoʼ unaj u yeʼeskoʼob «kabal óolal bey xan [...] maʼalob tuukul» le ken u yéeyoʼob bix ken u vestirtilubaʼob (1 Tim. 2:9, 10). Kex Pablo táan kaʼach u tʼaan tiʼ le koʼoleloʼoboʼ, lelaʼ láayliʼ xan unaj u chʼaʼik en cuenta le xiiboʼoboʼ.

2 Toʼoneʼ k-ilik k-kanáantik le bix k-vestirtikbaoʼ tumen lelaʼ junpʼéel baʼal jach kʼaʼanaʼan tu táan le Dios k-meyajtikoʼ (Gén. 3:21). Le Bibliaoʼ ku yeʼesikeʼ le Máax beet tuláakal baʼaloʼ u tsʼaamaj tsolnuʼukoʼob tiʼ bix unaj u vestirkuba le máaxoʼob meyajtikoʼ. Le oʼolaleʼ  ken k-il baʼax nookʼil ken k-tsʼáaeʼ maʼ unaj k-yéeyik chéen le jatsʼuts k-ilkoʼ, baʼaxeʼ le maas maʼalob u yilik Diosoʼ.

3. ¿Baʼax ku kaʼansiktoʼon u Ley Moisés yoʼolal bix unaj k-vestirtikba?

3 Le Ley tu tsʼáaj Jéeoba tiʼ Moisesoʼ ku yeʼesik kaʼach bix unaj u kanáantkuba le israelitaʼob utiaʼal maʼ u lúubloʼob tiʼ núupkʼeban jeʼex u maasil kaajoʼob yanoʼob tu baʼpachoʼoboʼ. Le Leyoʼ ku yeʼesikeʼ Jéeobaeʼ jach u pʼeek le clase nookʼ ku beetik maʼ u yilaʼal u jelaʼanil juntúul xiib tiʼ juntúul koʼoleloʼ (xok Deuteronomio 22:5). Le Ley tsʼaʼab tiʼ Moisesoʼ ku kaʼansik xaneʼ Jéeobaeʼ u pʼeek u yilaʼal u tsʼaʼabal le nookʼoʼob ku beetik u yilaʼal juntúul xiib bey koʼoleleʼ wa ku beetik u yilaʼal juntúul koʼolel bey xiibeʼ.

4. ¿Baʼax jeʼel u yáantik le máaxoʼob meyajtik Dios u yiloʼob bix unaj u vestirkubaʼoboʼ?

4 Le principioʼob yanoʼob teʼ Bibliaoʼ jeʼel u yáantkoʼon k-chʼaʼtukult maʼalob baʼax nookʼil ken tsʼáae. Le baʼaxoʼob ku yaʼalikoʼ jeʼel u yáantkoʼon k-il baʼax nookʼil unaj k-tsʼáaik kex jeʼel tuʼuxak kajaʼanoʼoneʼ, kex wa ooxol wa keʼel. Toʼoneʼ maʼ kʼaʼabéettoʼon junpʼéel lista ka u yaʼal baʼax nookʼil maʼalob ka k-tsʼáae yéetel máakalmáak maʼiʼ. Wa k-beetik baʼax ku yaʼalik le principioʼob ku taasik le Bibliaoʼ jeʼel k-vestirtikba jeʼex unajeʼ yéetel le bix maas jatsʼuts k-ilkoʼ. Koʼox ilik jujunpʼéel principioʼob jeʼel u yáantkoʼon k-il bix unaj k-vestirtikba jeʼex u kʼáat Dioseʼ (Rom. 12:1, 2).

«NOʼOJAʼANOʼON UTIAʼAL K-MEYAJTIK DIOS»

5, 6. ¿Baʼax unaj u tuklik le máakoʼob ken u yiloʼob bix k-vestirmikbaoʼ?

5 Jéeobaeʼ tu beetaj u tsʼíibtik le apóstol Pablo le principio ku chíikpajal tiʼ Kaʼapʼéel tiʼ Corintoiloʼob 6:4 (xoke). Le bix k-vestirtikbaoʼ ku yeʼesik bixoʼon yéetel yaʼab máakoʼobeʼ según bix le nookʼ k-takmoʼ bey u tuklikoʼob k-modos xanoʼ (1 Sam. 16:7). Toʼoneʼ maʼatech k-chʼaʼtuklik k-tsʼáaik junpʼéel nookʼ chéen tumen maʼalob k-uʼuyikba tu yéetel wa jatsʼuts k-ilik. Baʼaxeʼ toʼoneʼ k-ilik k-beetik le baʼax ku yaʼalik le principioʼob yanoʼob teʼ Bibliaoʼ, lelaʼ ku yáantkoʼon utiaʼal maʼ k-tsʼáaik nookʼoʼob jach tetepʼkiloʼob, jáaytsileʼen wa ku tsʼáaik tuʼux u chaʼantaʼal máak. Lelaʼ u kʼáat u yaʼaleʼ jach junpuliʼ maʼ unaj k-tsʼáaik nookʼoʼob ku beetik u yilaʼal wa baʼax parteil t-wíinklil maʼ unaj u yilaʼaliʼ. Ken paktaʼakoʼoneʼ mix máak unaj u yuʼubikuba jelaʼanil wa ka paakatnak táanxel tuʼux tu yoʼolal le nookʼ k-tsʼaamoʼ.

6 Wa limpio k-nookʼ yéetel kʼambeʼen tu táan Dioseʼ, maʼ xaaneʼ le máakoʼoboʼ yaan u maas respetarkoʼonoʼob bey xan u kaajal Jéeoba. Maʼ xaan xaneʼ jeʼel u taaktal u kaanbaloʼob tiʼ le Dios k-meyajtikoʼ yéetel u yuʼubikoʼob le baʼax k-kʼaʼaytik utiaʼal ka u salvartubaʼoboʼ.

7, 8. ¿Maases tiʼ baʼax súutukiloʼob unaj k-kanáantik bix le nookʼ k-tsʼáaikoʼ?

7 Le bix k-vestirtikbaoʼ unaj u yeʼesik k-nojbeʼenkúuntik Jéeoba bey xan le baʼax k-kʼaʼaytikoʼ. Tsʼoʼoleʼ ken k-beet lelaʼ k-eʼesik k-respetartik Jéeoba, le Dios kiliʼichoʼ, le sukuʼunoʼoboʼ yéetel le máaxoʼob tiʼ k-kʼaʼaytajoʼ (Rom. 13:8-10). Maases unaj k-kanáantik bix k-vestirtikba ken xiʼikoʼon teʼ muchʼtáambaloʼ wa teʼ kʼaʼaytajoʼ. Le nookʼ unaj k-tsʼáaikoʼ unaj u yeʼesik táan k-meyajtik Dios (1 Tim. 2:10). Chéen baʼaleʼ maʼ xaaneʼ yaan tuʼuxoʼobeʼ maʼ kʼaas u yilaʼal u tsʼaʼabal junpʼéel clase nookʼiʼ pero tiʼ uláakʼ tuʼuxoʼobeʼ kʼaas u yilaʼal. Le oʼolaleʼ kex jeʼel tuʼuxak kajaʼanoʼoneʼ toʼon u j-jaajkunajoʼon Jéeobaeʼ unaj k-kanáantik maʼ k-beetik u tʼóochpajal mix máak yéetel le nookʼ k-tsʼáaikoʼ.

Le nookʼ k-tsʼáaikoʼ, ¿ku yeʼesik wa k-respetartik le Dios k-adorartikoʼ? (Ilawil xóotʼol 7 yéetel 8)

8 (Xok 1 Corintoiloʼob 10:31.) Ken xiʼikoʼon teʼ asambleaʼoboʼ unaj k-vestirtikba maʼalob, jeʼex juntúul máax ku meyajtik Dioseʼ. Toʼoneʼ maʼ unaj k-copiartik le bix u vestirkuba le máakoʼob bejlaʼoʼ. Unaj k-kanáantik xan maʼ k-tsʼáaik junpʼéel nookʼ maʼ kʼambeʼen tu táan Jéeoba mix antes mix ken tsʼoʼokok le  asambleaoʼ, mix le tiaʼanoʼon teʼ hoteloʼ. Wa k-beetik beyoʼ maʼ ten k-suʼlaktal k-aʼal j-Jaajkunajoʼon yéetel yaan k-kʼaʼaytaj ken yanak u oportunidadil.

9, 10. Ken k-yéey bix ken vestirtbaeʼ, ¿baʼaxten unaj k-chʼaʼik en cuenta baʼax ku yaʼalik Filiposiloʼob 2:4?

9 (Xok Filiposiloʼob 2:4.) ¿Baʼaxten unaj k-chʼaʼik en cuenta baʼax ku tuklik u maasil sukuʼunoʼob yoʼolal le nookʼ k-tsʼáaikoʼ? Junpʼéel baʼax oʼolaleʼ tumen taak k-beetik le baʼax ku yaʼalik le Bibliaaʼ: «Kíimseʼex le tsʼíibolal yaan tiʼ u xéexetʼal a luʼumkabil wíinklileʼexoʼ, jeʼex núupkʼeban, éekʼ kuxtalil, u sen tsʼíiboltaʼal núupchital [yéetel] kʼaakʼas tsʼíibolaloʼob» (Col. 3:2, 5). Yaan sukuʼunoʼob yéetel kiikoʼobeʼ tsʼoʼok u pʼatkoʼob le kʼaakʼas kuxtal yaantiʼob kaʼachoʼ, jeʼex u núupkʼebantaloʼoboʼ. Maʼ xaaneʼ tak bejlaʼa táan u yilkoʼob maʼ u kaʼa lúubloʼob tiʼ baʼaloʼob beyaʼ. Le oʼolaleʼ wa maʼ t-kanáantik bix k-vestirtikbaeʼ, ¿máasaʼ jeʼel k-beetik u maas talamtaltiʼob u pʼatkoʼob le kʼaakʼas tsʼíibolaloʼob yéetel u beetkoʼob le baʼax ku yaʼalik le Bibliaoʼ? (1 Cor. 6:9-11).

10 Ichil le sukuʼunoʼoboʼ minaʼan mix máak jeʼel u túulchʼintkoʼon núupkʼebantaleʼ. Le bix k-vestirtikbaoʼ unaj u yáantaj utiaʼal maʼ u yajsik kʼaakʼas tsʼíibolaloʼob kex wa tiaʼanoʼon teʼ muchʼtáambaloʼoboʼ wa kex jeʼel tuʼuxak ka xiʼikoʼon tu yéetel le sukuʼunoʼoboʼ. Kex jeʼel u páajtal k-takik le nookʼ jatsʼuts k-ilkoʼ tiʼ cada juntúuleʼ yaan u responsabilidadil u tsʼáaik junpʼéel nookʼ ka u yáant u maasil tuukul yéetel u tʼaan maʼalob, bey xan ka pʼáatak limpioil tu táan Dios (1 Ped. 1:15, 16). Juntúul máax u yaabiltmaj u yéet máakileʼ «maʼ tu beetik baʼaloʼob suʼtsiltak, maʼ tu kaxtik chéen u yutsil» (1 Cor. 13:4, 5).

 JEʼEL TUʼUXAK KA YANAKOʼONEʼ UNAJ K-TSʼÁAIK JUNPʼÉEL NOOKʼ KʼAMBEʼEN TU TÁAN DIOS

11, 12. ¿Baʼax unaj k-chʼaʼik en cuenta ken k-yéey baʼax nookʼil ken tsʼáae?

11 Le máaxoʼob meyajtik Diosoʼ ken u chʼaʼtukloʼob baʼax nookʼil ken u tsʼáaʼobeʼ unaj u chʼaʼikoʼob en cuentaeʼ «yaan junsúutuk utiaʼal tuláakal baʼax ku yúuchul yéetel tuláakal baʼax ku beetaʼal» (Ecl. 3:1, 17). Óoliʼ tuláakal máakeʼ ku yéeyik baʼax nookʼil ken u tsʼáa según wa ku beetik ooxol wa keʼel. Maʼ xaaneʼ yaan uláakʼ baʼaloʼob jeʼel u beetik u yéeyik máak u tsʼáaik wa baʼax nookʼileʼ, chéen baʼaleʼ le tsolnuʼukoʼob ku tsʼáaik Jéeobaeʼ maʼatech u kʼexpajal kex jeʼel tuʼuxak ka yanakoʼoneʼ (Mal. 3:6).

12 Teʼ tuʼuxoʼob jach ooxoloʼ yaan horaeʼ maʼ chéen chʼaʼabil u yéeyik máak junpʼéel nookʼ kʼambeʼen tu táan Diosiʼ. Le sukuʼunoʼoboʼ maʼalob ken u yililoʼonoʼob wa maʼatech k-búukintik nookʼoʼob jach tetepʼkiloʼob wa jach kóochtakoʼob chéen baʼaleʼ láaj chíikaʼan u yilaʼal k-wíinklil (Job 31:1). Ken k-yéey baʼax nookʼil ken k-tsʼáa utiaʼal k-ichkíil jáal jaʼ wa tiʼ junpʼéel piscinaeʼ unaj k-ilik wa kʼambeʼen tu táan Dios (Pro. 11:2, 20). Kex u maasil ku tsʼáaikoʼob nookʼoʼob jach kʼaastakeʼ, toʼoneʼ maas unaj k-ilik wa le nookʼ k-takmoʼ ku nojbeʼenkúuntik Jéeoba, le Dios jach kiliʼichoʼ.

13. Ken k-yéey baʼax nookʼil ken k-tsʼáaeʼ, ¿baʼaxten unaj k-chʼaʼik en cuenta baʼax ku yaʼalik Yáax tiʼ Corintoiloʼob 10:32 yéetel 33?

13 Yaan uláakʼ principio jeʼel u yáantkoʼon k-yéey maʼalob le nookʼ ken tsʼáaoʼ. Lelaʼ letiʼe maʼ k-beetik u tʼóochpajal u maasiloʼ (xok 1 Corintoiloʼob 10:32, 33). Cada juntúul tiʼ toʼoneʼ unaj u kanáantik maʼ u beetik u yuʼubikuba jelaʼanil le sukuʼunoʼoboʼ bey xan uláakʼ máakoʼob yoʼolal le nookʼ ku tsʼáaikoʼ. Le apóstol Pablooʼ tu yaʼalaj: «Cada juntúul tiʼ toʼoneʼ ka u kaxt u yutsil u yéet máakil tiʼ baʼax maʼalob utiaʼal u líiʼsik u yóol». Pabloeʼ tu yaʼalaj xan baʼaxten: «Tumen mix Cristo tu kaxtaj chéen u yutsil» (Rom. 15:2, 3). Jeʼex Jesuseʼ, toʼoneʼ unaj k-ilik maas kʼaʼanaʼan k-beetik baʼax uts tu tʼaan Dios yéetel k-áantik u maasil ke tiʼ k-kaxtik chéen k-utsil. Toʼoneʼ kex jatsʼuts k-ilik junpʼéel nookʼeʼ unaj k-kanáantik bix vestirtikba tumen wa maʼeʼ jeʼel k-beetik maʼ u yuʼubaʼal le baʼax k-kʼaʼaytikoʼ.

14. Le taatatsiloʼoboʼ, ¿bix jeʼel u kaʼanskoʼob u paalal u respetartoʼob yéetel u beetoʼob baʼax ku yaʼalik Jéeobaeʼ?

14 Le taatatsiloʼoboʼ unaj u kaʼansik u paalaloʼob u beetoʼob le baʼax ku yaʼalik le Bibliaoʼ. Lelaʼ u kʼáat u yaʼaleʼ letiʼob yéetel u paalaloʼobeʼ unaj u vestirkubaʼob jeʼex u yaʼalik Jéeobaoʼ tumen beyoʼ jeʼel u kiʼimakkúuntkoʼob u yóoleʼ (Pro. 22:6; 27:11). Le taatatsiloʼoboʼ, ¿bix jeʼel u kaʼanskoʼob u paalal u respetartoʼob yéetel u beetoʼob baʼax ku yaʼalik Jéeoba, le Dios kiliʼichoʼ? Yáaxeʼ letiʼe taatatsiloʼob unaj u tsʼáaikoʼob junpʼéel maʼalob ejemplo tiʼ u paalaloʼoboʼ. Unaj xan u yáantkoʼob yéetel yaabilaj u paalaloʼob u yiloʼob tuʼux jeʼel u páajtal u manikoʼob nookʼoʼob kʼambeʼentak tu táan Diosoʼ. Le paalaloʼoboʼ maʼ unaj u manikoʼob nookʼoʼob chéen tumen uts tu yichoʼobiʼ, baʼaxeʼ kʼaʼabéet u kankoʼobeʼ le baʼax maas kʼaʼanaʼanoʼ letiʼe u tsʼáaikoʼob nookʼoʼob ka u yeʼes táan u nojbeʼenkúuntkoʼob Jéeoba, le Dios ku adorartikoʼoboʼ.

UNAJ K-YÉEYIK MAʼALOB BAʼAX NOOKʼ KEN K-TSʼÁAE

15. ¿Baʼaxoʼob unaj k-chʼaʼik en cuenta ken k-il bix ken k-vestirtba?

15 Le tsolnuʼukoʼob ku tsʼáaik le Bibliaoʼ jeʼel u yáantkoʼon k-chʼaʼtukult tubeel baʼax ken k-beeteʼ yéetel ku yáantkoʼon k-nojbeʼenkúunt Dios. Kex ku tsʼáaiktoʼon maʼalob tsolnuʼukoʼobeʼ ken k-maan k-nookʼeʼ k-chʼaʼik en cuenta kaʼapʼéel baʼaloʼob, wa jatsʼuts k-ilik bey xan bajux yaantoʼon. Chéen baʼaleʼ maʼ unaj u tuʼubultoʼoneʼ le nookʼ k-tsʼáaikoʼ unaj u yilaʼal  limpio, kʼambeʼen tu táan Dios yéetel unaj u yilaʼal maʼalob según tuʼux táan k-bin bey xan wa maʼalob u yilaʼal teʼ tuʼux kajaʼanoʼonoʼ.

16. ¿Baʼaxten k-beetik tuláakal le ku páajtal utiaʼal k-tsʼáaik nookʼ kʼambeʼen tu táan Dios?

16 Yaan kʼiineʼ maʼ chéen chʼaʼabil k-kaxtik junpʼéel nookʼ maʼalob u yilaʼal yéetel kʼambeʼen tu táan Diosiʼ. U maas yaʼabil le tiendaʼoboʼ chéen ku konkoʼob le nookʼoʼob yanoʼob de modaoʼ. Le oʼolal ku bisik tiempo tiʼ le kiikoʼob u máan u kaxtoʼob faldaʼob, vestidoʼob wa blusaʼob kʼambeʼenoʼob tu táan Diosoʼ. Le sukuʼunoʼoboʼ maʼ chéen chʼaʼabil xan u kaxtikoʼob flusoʼob yéetel pantalonoʼob maʼ tetepʼkiloʼobiʼ. Lelaʼ láayliʼ xan unaj u chʼaʼabal en cuenta wa chuybil u beetaʼal u nookʼ máakeʼ. U beetaʼal beyaʼ ku valer u penail. ¿Baʼaxten? Tumen le sukuʼunoʼob yéetel le kiikoʼoboʼ yaan u tsʼáaikoʼob cuenta táan a beetik le ku páajtal utiaʼal a tsʼáaik nookʼoʼob jatsʼutstak pero kʼambeʼenoʼob tu táan Dios. Kex maʼ chéen chʼaʼabil k-kaxtik junpʼéel nookʼ kʼambeʼeneʼ k-ojéeltik táan k-nojbeʼenkúuntik Jéeobaeʼ ku taasiktoʼon kiʼimak óolal tumen k-ojel t-beetaj baʼax uts tu tʼaan.

17. ¿Baʼax unaj u chʼaʼik en cuenta juntúul sukuʼun utiaʼal u yilik wa maʼalob ka u chaʼa u nuuktal u meʼex tu pʼuʼuk wa tak tu noʼoch?

17 Le sukuʼunoʼoboʼ, ¿maʼalob wa ka u chaʼob u nuuktal u meʼexoʼob tu pʼuʼukoʼob wa tak tu noʼochoʼob? Le Ley tsʼaʼab tiʼ Moisesoʼ ku yaʼalik kaʼacheʼ le xiiboʼoboʼ unaj u chaʼikoʼob u nuuktal u meʼexoʼob tu pʼuʼukoʼob yéetel tu noʼochoʼob. Chéen baʼaleʼ bejlaʼeʼ minaʼanoʼon tu yáanal le Leyaʼ (Lev. 19:27; 21:5; Gal. 3:24, 25). Yaan tiʼ luʼumiloʼobeʼ le sukuʼunoʼoboʼ ku chaʼik u nuuktal u meʼexoʼob tu pʼuʼukoʼob yéetel tu noʼochoʼob, pero teʼ lugaroʼobaʼ maʼ kʼaas u yilaʼaliʼ, hasta jeʼel u beetik u respetartaʼaloʼobeʼ. Chéen baʼaleʼ letiʼobeʼ ku yilik u areglarkoʼob yéetel u kʼosikoʼob tubeel. Tsʼoʼoleʼ lelaʼ maʼ tu beetik u yúuchul tʼaan kʼaas tiʼ le baʼax ku kaʼanskoʼoboʼ. Yaan horaeʼ tak le sukuʼunoʼob yaan u privilegioʼob beetik beyaʼ. Chéen baʼaleʼ yanoʼobeʼ ku chʼaʼtuklik u luʼsik u meʼexoʼob (1 Cor. 8:9, 13; 10:32). Tiʼ uláakʼ luʼumiloʼobeʼ maʼ maʼalob u yilaʼal ka u chaʼa u nuuktal u meʼex tu pʼuʼuk wa tak tu noʼoch juntúul j-Jaajkunajiʼ. Wa ka u beetoʼob lelaʼ jeʼel u yeʼeskoʼob maʼ táan u nojbeʼenkúuntkoʼob Diosiʼ yéetel jeʼel u tsolnuʼuktaʼaloʼob tu yoʼolaleʼ (1 Tim. 3:2, 7; Rom. 15:1-3).

18, 19. ¿Tiʼ baʼax jeʼel u yáantkoʼon Miqueas 6:8?

18 Ku kiʼimaktal k-óol k-ojéeltikeʼ Jéeobaeʼ maʼatech u tsʼáaiktoʼon junpʼéel lista tiʼ baʼax claseil nookʼ unaj k-tsʼáaik wa bix unaj k-vestirtikba. Baʼaxeʼ letiʼeʼ ku chaʼik k-yéeyik k-nookʼ pero kʼaʼabéet k-chaʼik u nuʼuktikoʼon le principioʼob yanoʼob teʼ Bibliaoʼ. Le oʼolaleʼ ken yéey baʼax nookʼil ken k-tsʼáaeʼ unaj k-eʼesik kabal óolal yéetel k-chʼaʼik en cuenta baʼax ku tuklik Jéeoba (Miq. 6:8).

19 Toʼoneʼ k-ojleʼ Jéeobaeʼ juntúul Dios limpio, kiliʼich yéetel le tsolnuʼukoʼob ku tsʼáaiktoʼonoʼ utiaʼal k-utsil. Wa k-kʼáat k-tsʼáa nookʼoʼob kʼambeʼentak tu táan Dios yéetel k-kʼáat eʼes kabal óolaleʼ yaan k-beetik tuláakal baʼax ku yaʼalik Dios. Lelaʼ yaan xan u yáantkoʼon k-respetart baʼax ku tuklik u maasil.

20. Le bix k-vestirtikbaoʼ, ¿tiʼ baʼax jeʼel u yáantajeʼ?

20 Le nookʼ k-tsʼáaikoʼ kʼaʼabéet u yeʼesik u j-jaajkunajoʼon Jéeoba. Teʼ Bibliaoʼ letiʼeʼ u tsʼaamajtoʼon principioʼob, wa k-nuʼuktik k-kuxtal tu yéeteloʼobeʼ yaan u kiʼimaktal k-óol. K-felicitartik le sukuʼunoʼob yéetel le kiikoʼob ku yilik u tsʼáaik nookʼoʼob kʼambenoʼob tu táan Dios yéetel ku beetkoʼob mantatsʼ baʼax ku yaʼalikoʼ. Ikil u beetkoʼob beyaʼ tsʼoʼok u yáantaj utiaʼal u taaktal u kaanbal le máakoʼob tiʼ le Bibliaoʼ, u tsʼaʼabal nojbeʼenil tiʼ Jéeoba, tsʼoʼoleʼ lelaʼ ku beetik u kiʼimaktal u yóol Jéeoba. Jeʼex k-ilkoʼ wa k-yéeyik tubeel baʼax nookʼil ken k-tsʼáaeʼ yaan k-nojbeʼenkúuntik Jéeoba, le Dios ku ‹búukbeskuba yéetel nojbeʼenil bey xan yéetel kiʼichkelmiloʼ› (Sal. 104:1, 2).