Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Xeeneʼex tiʼ tuláakal kaajoʼobeʼ ka a beeteʼex disipuloʼob

Xeeneʼex tiʼ tuláakal kaajoʼobeʼ ka a beeteʼex disipuloʼob

«Xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob, táan a tsʼáaikeʼex u yokjaʼob [...] yéetel táan a kaʼanskeʼexoʼob u tsʼoʼokbesoʼob tuláakal le baʼaxoʼob tsʼoʼok in waʼalikteʼex ka a beeteʼexoʼ.» (MAT. 28:19, 20)

KʼAAYOʼOB: 141, 97

1, 2. ¿Tiʼ baʼax kʼáatchiʼiloʼob k-tuukul ken k-xok Mateo 24:14?

JESUSEʼ tu yaʼaleʼ teʼ tu tsʼook kʼiinoʼoboʼ yaan u kʼaʼaytaʼal tiʼ tuláakal máak u maʼalob péektsilil le Reinooʼ wa le baʼaxoʼob jatsʼutstak ken u beetoʼ (Mat. 24:14). Toʼon, u j-jaajkunajoʼon Jéeobaeʼ kʼaj óolaʼanoʼon tuláakal tuʼux ikil k-kʼaʼaytaj. Yaan máaxeʼ jatsʼuts u yuʼubik le baʼax k-kʼaʼaytikoʼ pero yanoʼobeʼ maʼatech. Chéen baʼaleʼ kex yaan máaxoʼob maʼ jatsʼuts u yuʼubikoʼob le baʼax k-kʼaʼaytikoʼ ku tʼaanoʼob maʼalob yoʼolal le meyaj k-beetkoʼ. Chéen toʼon k-tsʼoʼokbesik le meyaj tu kʼubéentaj Jesusoʼ. ¿Baʼaxten k-aʼalik chéen toʼon táan k-beetik? ¿Yaan wa baʼax eʼesik chéen toʼon táan k-kʼaʼaytaj jeʼex tu yaʼaliloʼ?

2 Yaʼab religionoʼobeʼ ku yaʼalikoʼobeʼ táan u kaʼanskoʼob le baʼax tu yaʼalaj Jesusoʼ. Chéen baʼaleʼ chéen ku kaʼansajoʼob tu iglesiaʼob, tiʼ televisión, tiʼ Internet wa yaan horaeʼ chéen ku tsikbaltikoʼob bix úuchik u kʼaj óoltikoʼob Cristo. Uláakʼoʼobeʼ ku tuklikoʼobeʼ táan u beetkoʼob baʼax tu yaʼalaj Jesús ikil u yáantajoʼob bey doctoroʼob, enfermeraʼob wa maestroʼob cada wa baʼax kʼiin ken kʼaʼabéetchajkeʼ.  Le baʼaloʼob ku beetkoʼobaʼ, ¿táakaʼan wa ichil le kʼaʼaytaj tu yaʼalaj Jesús ka beetaʼakoʼ?

3. Jeʼex u yaʼalik Mateo 28:19 yéetel 20, ¿máakalmáak le kanpʼéel baʼaloʼob unaj u beetik u disipuloʼob Jesusoʼ?

3 Jesuseʼ maʼ tu yaʼalaj ka kulakoʼon k-páaʼt u taal le máakoʼob t-iknal utiaʼal k-kaʼanskoʼoboʼ. Ka tsʼoʼok u kaʼa kuxkíintaʼaleʼ tu yaʼalaj tiʼ u cientosil u disipuloʼob: «Xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob, táan a tsʼáaikeʼex u yokjaʼob [...] yéetel táan a kaʼanskeʼexoʼob u tsʼoʼokbesoʼob tuláakal le baʼaxoʼob tsʼoʼok in waʼalikteʼex ka a beeteʼexoʼ» (Mat. 28:19, 20). Toʼoneʼ u disipuloʼon Jesús le oʼolal unaj k-beetik le baʼaxoʼob tu yaʼalaʼ: k-beetik disipuloʼob, k-tsʼáaik u yokjaʼob yéetel k-kaʼanskoʼob. Chéen baʼaleʼ utiaʼal k-beetik le óoxpʼéel baʼaloʼobaʼ, yáaxeʼ kʼaʼabéet k-bin kaxt le máakoʼoboʼ. Juntúul máak ku xakʼaltik u tʼaaniloʼob le Bibliaoʼ, tu yaʼalaj: «Le tʼaan ‹xeeneʼexoʼ› junpʼéel baʼax unaj u beetik tuláakal le disipuloʼoboʼ, kex ka yanak u kʼáatmáanskoʼob junpʼéel calle wa junpʼéel kʼáaʼnáab» (Mat. 10:7; Luc. 10:3).

4. ¿Baʼax táakaʼan ichil u meyaj máak bey juntúul «j-chuk wíinik[eʼ]»?

4 ¿Baʼax ku páaʼtik Jesús ka u beet u disipuloʼob? ¿U kʼáat wa kaʼach ka kʼaʼaytajnak cada juntúul tu cuenta wa ka múuchʼ kʼaʼaytajnakoʼob? Chéen juntúul disipuloeʼ maʼ tu páajtal u kʼaʼaytaj tiʼ «u máakiloʼob tuláakal kaajoʼob», le oʼolaleʼ unaj kaʼach u múuchʼ kʼaʼaytaj tuláakal u disipuloʼob. Lelaʼ letiʼe baʼax tu tsʼáaj naʼatbil Jesús le ka tu yaʼalajtiʼob ka u beetubaʼob «j-chuk wíinikoʼo[boʼ]» (xok Mateo 4:18-22). Teʼelaʼ Jesuseʼ maʼ táan u tʼaan chéen tiʼ juntúul máak ku bin chuk kay chéen tu juunal yéetel táan u páaʼtik u léechel le kay teʼ anzuelooʼ. Teʼ tekstoaʼ Jesuseʼ táan u tʼaan kaʼach tiʼ le chuuk ku beetaʼal yéetel junpʼéel redoʼ. Le clase chuuk beyaʼ junmúuchʼ u beetaʼal, maʼalob nuʼuktaʼanil tsʼoʼoleʼ ku kʼaʼabéettal u tsʼáaik u yóol máakiʼ (Luc. 5:1-11).

5. ¿Baʼax kʼáatchiʼiloʼob ken k-núuk teʼ xookaʼ yéetel baʼaxten?

5 Utiaʼal k-ojéeltik máaxoʼob kʼaʼaytik le maʼalob péektsilil teʼ kʼiinoʼobaʼ, unaj k-núukik le kʼáatchiʼobaʼ:

  • ¿Baʼax unaj u kʼaʼaytaʼal?

  • ¿Baʼax unaj u péeksik máak u beete?

  • ¿Bix unaj u beetaʼal?

  • ¿Tiʼ bukaʼaj máakoʼob unaj u yúuchul kʼaʼaytaj yéetel bukaʼaj tiempo kun beetbil?

U núukil le kʼáatchiʼobaʼ yaan u yáantkoʼon k-il máaxoʼob jach tu jaajil táan u yáantajoʼob utiaʼal ka u salvartuba le máakoʼoboʼ. Le baʼaxoʼob ken k-ilaʼ yaan xan u yáantkoʼon utiaʼal maʼ u xuʼulul k-kʼaʼaytaj (1 Tim. 4:16).

¿BAʼAX UNAJ U KʼAʼAYTAʼAL?

6. ¿Baʼaxten k-aʼalik chéen u j-Jaajkunajoʼob Jéeoba kʼaʼaytik le baʼax tu yaʼalaj Jesusoʼ?

6 (Xok Lucas 4:43.) Jesuseʼ tu kʼaʼaytaj «u maʼalob péektsilil u Reino Dios» yéetel u kʼáat kaʼach ka u beet tuláakal u disipuloʼob beyoʼ. ¿Máaxoʼob táan u kʼaʼaytikoʼob le maʼalob péektsil tiʼ tuláakal máakoʼ? Chéen u j-jaajkunajoʼob Jéeoba. Lelaʼ tak máaxoʼob u pʼekmoʼonoʼob u yojloʼob de ke beyoʼ. Juntúul sacerdote ku bin kaʼach kaʼansaj tiʼ jejeláas náanach luʼumiloʼobeʼ tsikbalnaj yéetel juntúul sukuʼun, letiʼeʼ tu yaʼalaj tiʼ le sukuʼunoʼ tiʼ cada luʼumil ku bineʼ ku kʼáatik tiʼ le j-Jaajkunajoʼob baʼax ku kʼaʼaytikoʼoboʼ. Le sacerdoteoʼ, tu yaʼalaj: «Jach minaʼan u naʼatoʼob tumen tuláakloʼob junpʼéeliliʼ baʼax ku núukikoʼob: ‹u maʼalob péektsilil le Reinooʼ›». Le baʼax tu yaʼalaj le sacerdoteoʼ ku yeʼesik maas yaan u naʼat le j-Jaajkunajoʼoboʼ tumen kex jejeláas tuʼux yanoʼobeʼ junpʼéeliliʼ baʼax ku kaʼanskoʼob (1 Cor. 1:10). Le Reinooʼ letiʼe baʼax u kʼáat u kaʼans xan le revista  U Pʼíich Tulumil Kanan. Táan u kʼaʼaytik u Reino Jéeobaoʼ. Le revistaaʼ beetaʼan ich 254 jejeláas idiomaʼob yéetel cada juntéen u jóokʼoleʼ ku beetaʼal óoliʼ 59 millones copiaʼob. Le revistaaʼ letiʼe maas yaʼab u tʼoʼoxol tiʼ tuláakal yóokʼol kaaboʼ.

7. ¿Baʼaxten k-aʼalikeʼ le u nuuktakil le religionoʼoboʼ maʼ maʼalob u kaʼansajoʼobiʼ?

7 U nuuktakil le religionoʼob ku yaʼalikoʼob ku seguertikoʼob Cristooʼ maʼatech u tʼaanoʼob tiʼ u Reino Dios. Tsʼoʼoleʼ wa ku tʼaanoʼob tiʼeʼ ku yaʼalikoʼobeʼ chéen junpʼéel baʼax yaan tu puksiʼikʼal máak (Luc. 17:21). Letiʼobeʼ maʼatech u kaʼanskoʼob tiʼ le máakoʼob wa le Reinooʼ junpʼéel gobierno yaan teʼ kaʼanoʼ mix tech u yaʼalikoʼob wa Jesucristo u reyil, chéen ku tʼaanoʼob tiʼ Jesús tu kʼiiniloʼob Navidad wa utiaʼal Semana Santa. Tsʼoʼoleʼ maʼatech u kaʼanskoʼob xan wa u Reino Dios kun luʼsik tuláakal le problemaʼob yéetel le baʼaloʼob kʼaastak yaan way Luʼumoʼ (Apo. 19:11-21). Jeʼex k-ilkoʼ u nuuktakil le religionoʼoboʼ maʼ u yojloʼob baʼax ken u beet Jesús, le máax kun gobernar tu Reino Diosoʼ. Como maʼ tu naʼatkoʼob le baʼax tu kaʼansaj Jesusoʼ, maʼ xan tu naʼatkoʼob baʼaxten kʼaʼabéet u kʼaʼaytajoʼob.

¿BAʼAX UNAJ U PÉEKSIK MÁAK?

8. ¿Baʼax maʼ unaj k-beetik ken kʼaʼaytajnakoʼoniʼ?

8 U disipuloʼob Jesuseʼ maʼ unaj u kʼaʼaytajoʼob utiaʼal u náajaltikoʼob taakʼiniʼ mix utiaʼal u páajtal u beetkoʼob nukuch najoʼob koʼojtak utiaʼal u yúuchul adorariʼ. Jesuseʼ tu yaʼalaj: «Siibil ta kʼamileʼex; siibil xan ka a tsʼáaʼex» (Mat. 10:8). Jeʼex k-ilkoʼ le kʼaʼaytajoʼ maʼ junpʼéel negocioiʼ (2 Cor. 2:17). U disipuloʼob Jesuseʼ maʼ unaj u cobraroʼob ikil u kʼaʼaytajoʼobiʼ (xok Baʼaxoʼob 20:33-35). U jaajileʼ jach claro baʼax tu yaʼalaj Jesús, chéen baʼaleʼ kex beyoʼ óoliʼ tuláakal le religioʼonoʼoboʼ ku kʼáatkoʼob taakʼin utiaʼal maʼ u kʼaʼalal le iglesiaʼob wa le tuʼux ku muchʼkubaʼoboʼ. Ku kʼáatkoʼob xan taakʼin utiaʼal u boʼotkoʼob le máaxoʼob ku kaʼansajoʼob ichiloʼoboʼ wa uláakʼ máaxoʼob ku meyajoʼobiʼ. Ikil u beetkoʼob beyaʼ yaʼab tiʼ u nuuktakil le religionoʼoboʼ tsʼoʼok u ayikʼaltaloʼob (Apo. 17:4, 5).

9. ¿Bix u yeʼesik u j-jaajkunajoʼob Jéeoba táan u kʼaʼaytajoʼob jeʼex tu yaʼalil Jesusoʼ?

9 U j-jaajkunajoʼob Jéeobaeʼ, ¿ku máan wa u kʼáatoʼob taakʼin teʼ muchʼtáambaloʼob wa teʼ asambleaʼoboʼ? Maʼatech. Tuláakal le meyaj ku beetaʼaloʼ ku béeychajal yéetel le taakʼin ku síijil tu puksiʼikʼal máak u síikoʼ (2 Cor. 9:7). Teʼ año máanoʼ u j-jaajkunajoʼob Jéeobaeʼ tu máansoʼob óoliʼ 2,000 millones horaʼob táan u kʼaʼaytajoʼob yéetel tu tsʼáajoʼob maas tiʼ 9 millones xookoʼob cada mes. Letiʼobeʼ maʼ boʼotaʼaboʼob úuchik u beetkoʼob le meyajaʼ, baʼaxeʼ yéetel kiʼimak óolal tu xupaj u taakʼinoʼob utiaʼal u beetkoʼob. Le ka tʼaanaj yoʼolal le meyaj ku beetik u j-jaajkunajoʼob Jéeobaoʼ juntúul investigadoreʼ, tu yaʼalaj: «Le baʼax maas kʼaʼanaʼan u yilkoʼoboʼ letiʼe u kʼaʼaytajoʼob yéetel u kaʼansajoʼoboʼ». Tu yaʼalaj xaneʼ le j-Jaajkunajoʼoboʼ maʼatech u boʼotkoʼob juntúul máax utiaʼal u kaʼansaʼaloʼob teʼ tuʼux ku muchʼkubaʼoboʼ. Chéen baʼaleʼ wa maʼatech k-boʼotaʼal ikil k-kʼaʼaytajeʼ, ¿baʼax péeksikoʼon k-beet le meyajaʼ? Letiʼe yaabilaj k-uʼuyik tu yoʼolal Jéeobaoʼ yéetel le yaabilaj k-uʼuyik tu yoʼolal le máakoʼoboʼ. Le baʼax péeksikoʼonaʼ ku béeykuntik le profecía yaan teʼ Salmo 110:3 (xoke).

¿BIX UNAJ U BEETAʼAL?

Toʼoneʼ k-kʼaʼaytaj jeʼel tuʼuxak k-ilik le máakoʼoboʼ (Ilawil xóotʼol 10)

10. ¿Bix úuchik u kʼaʼaytaj Jesús yéetel u disipuloʼob?

10 ¿Bix úuchik u kʼaʼaytaj Jesús yéetel u disipuloʼob? Letiʼobeʼ binoʼob tiʼ tuláakal le tuʼuxoʼob u yojloʼob yaan máakoʼoboʼ. Kʼaʼaytajnajoʼob teʼ calleʼoboʼ bey xan teʼ tuʼuxoʼob ku yúuchul koonoloʼ. Letiʼobeʼ kʼaʼaytajnajoʼob xan joonaj joonajil (Mat. 10:11; Luc.  8:1; Bax. 5:42; 20:20). Lelaʼ le áantoʼob utiaʼal u múuchʼ kʼaʼaytajoʼob yéetel u tsikbaloʼob yéetel jejeláas máakoʼob.

11, 12. ¿Baʼax u jelaʼanil tiʼ bix u kaʼansaj u nuuktakil le religionoʼob tiʼ bix u kaʼansaj u j-jaajkunajoʼob Jéeobaoʼ?

11 Kux túun le máaxoʼob yanoʼob ichil le religionoʼob ku yaʼalikoʼob ku seguertikoʼob Cristooʼ, ¿ku kʼaʼaytajoʼob wa jeʼex úuchik u kaʼansik letiʼoʼ? Letiʼobeʼ maases ku boʼotkoʼob juntúul tiʼ u nuuktakiloʼob utiaʼal u kaʼansaʼaloʼob. Chéen baʼaleʼ letiʼobeʼ maʼatech u yilik u beetkoʼob disipuloʼob wa u kaʼanskoʼob uláakʼ túumben máakoʼob, baʼaxeʼ chéen ku kanáantkoʼob maʼ u lukʼul le máaxoʼob suuk u binoʼoboʼ. Yaan kʼiineʼ le religionoʼobaʼ u kʼáatoʼob ka kʼaʼaytajnak le máaxoʼob yanoʼob ichiloʼoboʼ. Jeʼex tu añoil 2001, le papa Juan Pablo Segundooʼ tu túuxtaj junpʼéel carta tiʼ tuláakal le iglesiaʼoboʼ. Teʼeloʼ tu yaʼalajtiʼobeʼ kʼaʼabéet u kʼaʼaytikoʼob le Evangeliooʼ yéetel u tsʼáaik u yóoloʼob jeʼex úuchik u beetik le apóstol Pablo, le máax tu yaʼalaj: «¡Óotsilen wa maʼ tin kʼaʼaytik le Evangeliooʼ!». Le papaoʼ tu yaʼaleʼ tuláakal máak unaj u kʼaʼaytaj, maʼ chéen le máaxoʼob kaʼansaʼantiʼob u beetoʼoboʼ. Chéen baʼaleʼ maʼ yaʼab máakoʼob tu beetoʼob u cuentailiʼ.

12 ¿Kux túun u j-jaajkunajoʼob Jéeoba? Chéen letiʼob kʼaʼaytik káaj u beetik u Reyil Jesús desde 1914. Letiʼobeʼ ku beetkoʼob baʼax tu yaʼalaj Jesús yéetel ku tsʼáaikoʼob táanil ichil u kuxtaloʼob le kʼaʼaytajoʼ (Mar. 13:10). Junpʼéel libroeʼ ku yaʼalikeʼ utiaʼal u j-jaajkunajoʼob Jéeobaeʼ le kʼaʼaytajoʼ letiʼe baʼax maas kʼaʼabéetoʼ (Pillars of Faith—American Congregations and Their Partners). Tu yaʼalaj xaneʼ letiʼobeʼ le ken u yiloʼob yaan máaxoʼob minaʼan baʼal u jaantoʼob, tu juunal u yuʼubikubaʼob yéetel kʼojaʼanoʼobeʼ ku yilik u yáantkoʼob. Chéen baʼaleʼ maʼatech u tuʼubultiʼobeʼ le baʼax maas kʼaʼanaʼan unaj u beetkoʼoboʼ letiʼe u kʼaʼaytikoʼob yaan u xuʼulsaʼal le baʼaloʼob kʼaastakoʼ yéetel u kaʼanskoʼob bix jeʼel u salvarkuba máakeʼ. Jach jeʼex u yaʼalik le libroaʼ u j-jaajkunajoʼob Jéeobaeʼ maʼatech u xuʼulul u kʼaʼaytikoʼob lelaʼ tsʼoʼoleʼ ku yilik u beetkoʼob jeʼex tu beetil Jesús yéetel u disipuloʼobeʼ.

¿TIʼ BUKAʼAJ MÁAKOʼOB UNAJ U YÚUCHUL KʼAʼAYTAJ YÉETEL BUKAʼAJ TIEMPO KUN BEETBIL?

13. ¿Tiʼ bukaʼaj máaxoʼob unaj u yúuchul kʼaʼaytaj?

13 Jesuseʼ tu yaʼaleʼ u disipuloʼobeʼ yaan kaʼach u kʼaʼaytikoʼob le maʼalob péektsil «tiʼ tuláakal yóokʼol kaab[oʼ]». Tiʼ letiʼobeʼ aʼalaʼab ka u beetoʼob disipuloʼob tiʼ «u máakiloʼob tuláakal kaajoʼob» (Mat. 24:14; 28:19, 20). Lelaʼ u kʼáat u yaʼaleʼ unaj kaʼach u kʼaʼaytikoʼob le maʼalob péektsilil tiʼ tuláakal yóokʼol kaaboʼ.

14, 15. ¿Baʼax eʼesik u j-jaajkunajoʼob Jéeobaeʼ táan u yilik u kʼaʼaytajoʼob tiʼ tuláakal máak jeʼex tu yaʼalil Jesús ka beetaʼakoʼ? (Ilawil le fotoʼob yaan tu káajbal le xookaʼ.)

14 Chéen u j-jaajkunajoʼob Jéeoba táan u kʼaʼaytikoʼob le maʼalob péektsil tiʼ tuláakal yóokʼol kaab jeʼex tu yaʼalil Jesusoʼ. ¿Baʼaxten k-aʼalik lelaʼ? Tu luʼumil Estados Unidoseʼ yaan óoliʼ 600,000 u nuuktakil le religionoʼob ku yaʼalikoʼob ku seguertikoʼob Cristooʼ, chéen baʼaleʼ láayliʼ teʼ luʼumilaʼ yaan  óoliʼ junpʼéel millón doscientos mil u j-jaajkunajoʼob Jéeoba ku kʼaʼaytikoʼob le maʼalob péektsiloʼ. Tiʼ tuláakal le yóokʼol kaabaʼ yaan junpʼíit maas tiʼ 400,000 sacerdoteʼob catolicoʼob, chéen baʼaleʼ teʼ yóokʼol kaab xanaʼ yaan maas tiʼ 8 millones tiʼ u j-jaajkunajoʼob Jéeoba táan u kʼaʼaytajoʼob ich 240 luʼumiloʼob. Jeʼex k-ilkoʼ u j-jaajkunajoʼob Jéeobaeʼ táan u kʼaʼaytikoʼob le maʼalob péektsiloʼ, lelaʼ ku taasik nojbeʼenil tiʼ Jéeoba yéetel ku beetik u alabartaʼal (Sal. 34:1; 51:15).

15 Toʼoneʼ táan k-ilik kʼaʼaytik le maʼalob péektsil tiʼ bukaʼaj máakoʼob ku páajtal táanil tiʼ u kʼuchul le xuʼulsajiloʼ. Utiaʼal k-beetik le meyajaʼ tsʼoʼok u jóoʼsaʼal u millonesil libroʼob, revistaʼob, tratadoʼob yéetel u invitacioniloʼob le asambleaʼob yéetel le Kʼaʼajsajil ich maas tiʼ 700 idiomaʼoboʼ. Toʼoneʼ maʼatech k-cobrartik mix baʼal tu yoʼolal le publicacionoʼobaʼ. Le año máanoʼ t-jóoʼsaj óoliʼ 4,500 millones publicacionoʼob ku tʼaanoʼob tiʼ le Bibliaoʼ. Tsʼoʼok xan u beetaʼal maas tiʼ 200 millones Bibliaʼob U suttʼaanil Túumben Luʼum ich maas tiʼ 130 idiomaʼob. Teʼ sitio yaantoʼon ich Internetoʼ yaan uláakʼ publicacionoʼob ich maas tiʼ 750 idiomaʼob. ¡Chéen u j-jaajkunajoʼob Jéeoba táan u beetkoʼob le nojoch meyajaʼ!

16. ¿Baʼaxten k-aʼalik yaantoʼon u kiliʼich muukʼ Dios?

16 ¿Bukaʼaj tiempo kun beetbil le kʼaʼaytajoʼ? Jesuseʼ tu yaʼaleʼ yaan u kʼaʼaytaʼal le maʼalob péektsil tak ken kʼuchuk le xuʼulsajiloʼ. Toʼoneʼ tsʼoʼok u chúukpajal k-óol kʼaʼaytaj teʼ tu tsʼook kʼiinoʼobaʼ tumen u tsʼaamajtoʼon Jéeoba u kiliʼich muukʼ (Bax. 1:8; 1 Ped. 4:14). Maʼ xaaneʼ uláakʼ máaxoʼob yaan u religionoʼobeʼ ku yaʼalikoʼob: «Si tiʼ toʼoneʼ yaan u kiliʼich muukʼ Dios». Chéen baʼaleʼ, ¿tsʼoʼok wa u beetkoʼob le bukaʼaj meyaj ku beetik u j-jaajkunajoʼob Jéeoba teʼ tu tsʼook kʼiinoʼobaʼ? Jujunpʼéel religionoʼobeʼ yaan kʼiineʼ ku tsʼáaikubaʼob kʼaʼaytaj jeʼex k-beetik toʼoneʼ, chéen baʼaleʼ maʼ xiʼik utsil tiʼobiʼ. Uláakʼoʼobeʼ ku yaʼalikoʼob jeʼel u kʼaʼaytajoʼobeʼ chéen baʼaleʼ chéen cada wa baʼax kʼiin ku beetkoʼob. Uláakʼoʼob xaneʼ ku kʼaʼaytajoʼob joonaj joonajil chéen baʼaleʼ maʼatech u kʼaʼaytikoʼob le baʼaxoʼob ken u beet le Reinooʼ. Tuláakal lelaʼ ku yeʼesikeʼ maʼ tu páajtal u beetkoʼob le meyaj tu kʼubéentaj Jesusoʼ.

¿MÁAXOʼOB KʼAʼAYTIK LE MAʼALOB PÉEKTSIL TEʼ KʼIINOʼOBAʼ?

17, 18. 1) ¿Baʼaxten k-aʼalik chéen u j-jaajkunajoʼob Jéeoba táan u kʼaʼaytikoʼob u maʼalob péektsilil le Reino teʼ kʼiinoʼobaʼ? 2) ¿Baʼax áantkoʼon utiaʼal maʼ u xuʼulul k-kʼaʼaytaj?

17 Bey túunoʼ, ¿jach máaxoʼob kʼaʼaytik le maʼalob péektsil teʼ kʼiinoʼobaʼ? ¡Chéen u j-jaajkunajoʼob Jéeoba! ¿Baʼaxten k-aʼalik lelaʼ? Yáaxeʼ tumen chéen toʼon k-kʼaʼaytik le baʼax jach tu yaʼalaj Jesús ka kʼaʼaytaʼakoʼ, u maʼalob péektsilil u Reino Dios. U kaʼapʼéeleʼ táan k-beetik jeʼex unajeʼ, k-bin teʼ tuʼuxoʼob k-ojel tiaʼan le máakoʼoboʼ. U yóoxpʼéeleʼ junpʼéel baʼal maʼalob péeksikoʼon k-beete, k-yaabilaj tu yoʼolal Jéeoba bey xan tiʼ k-éet máakil. U kanpʼéeleʼ k-kʼaʼaytaj tiʼ bukaʼaj máakoʼob ku páajtal, k-kʼaʼaytaj tiʼ tuláakal yóokʼol kaab yéetel ich jejeláas idiomaʼob. U tsʼookeʼ maʼ kun xuʼulul k-kʼaʼaytik u maʼalob péektsilil le Reino tak ken taalak le xuʼulsajiloʼ.

18 Jeʼex k-ilkoʼ jach ku taasiktoʼon kiʼimak óolal k-ilik le bukaʼaj meyaj táan u beetik u kaajal Dios utiaʼal u kʼaʼaytik le maʼalob péektsil teʼ tu tsʼook kʼiinoʼobaʼ. ¿Baʼax túun áantkoʼon k-beet tuláakal le meyajaʼ? Le apóstol Pablooʼ tu yaʼalaj: «Dioseʼ letiʼ muʼukʼaʼankúuntikeʼex ikil u tsʼáaikteʼex u tsʼíibolalil yéetel u páajtalil a beetkeʼex wa baʼax; letiʼeʼ bey uts tu tʼaan u beetkoʼ» (Fili. 2:13). Jéeobaeʼ yaan u seguer u tsʼáaiktoʼon u muukʼil utiaʼal k-beetik tuláakal le ku páajtal utiaʼal k-kʼaʼaytik le maʼalob péektsiloʼ (2 Tim. 4:5).