Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Le máax maʼ tsʼuʼutoʼ ku kʼamik yaʼab bendicionoʼob

Le máax maʼ tsʼuʼutoʼ ku kʼamik yaʼab bendicionoʼob

LE SIIBALOʼ junpʼéel baʼax jach suuk u beetaʼal utiaʼal u adorartaʼal Jéeoba. Le israelitaʼoboʼ ku síikoʼob baʼalcheʼob utiaʼal kʼubbil tiʼ Dios. Le máaxoʼob meyajtik Dios xan teʼ kʼiinoʼobaʼ ku kiʼikiʼtʼantikoʼob yéetel u chiʼob. Baʼaleʼ yaan uláakʼ siibaloʼob kʼambeʼenoʼob tu táan Dios (Heb. 13:15, 16). Le máaxoʼob tsʼáaikoʼ ku kiʼimaktal u yóoloʼob yéetel ku kʼamkoʼob yaʼab bendicionoʼob, jeʼex u yeʼesik le baʼaxoʼob uchaʼantakoʼobaʼ.

Anaeʼ juntúul israelita chúukpaj u yóol u meyajt Dios u kʼáat ka yanak juntúul u chan hijo, baʼaleʼ maʼ tu páajtal u yantal u paalal kaʼachi. Letiʼeʼ tu yaʼalaj tiʼ Jéeoba ichil junpʼéel oración wa ku yantal u hijoeʼ jeʼel u kʼubiktiʼ «tuláakal u kʼiiniloʼob u kuxta[leʼ]» (1 Sam. 1:10, 11). Ka máan kʼiineʼ Anaeʼ anchaj juntúul u hijo, ka tu tsʼáaj u kʼaabaʼt Samuel. Le ka tu luʼsaj u chuʼucheʼ tu bisaj teʼ tabernáculo utiaʼal u meyajtik Jéeoba, jeʼex úuchik u yaʼaliktiʼoʼ. Jéeobaeʼ tu bendecirtaj Ana yoʼolal le siibal tu beetoʼ. Letiʼeʼ anchaj uláakʼ cinco u túulal u paalal, tsʼoʼoleʼ Samueleʼ kʼuch u beetuba profetail yéetel juntúul tiʼ le máaxoʼob tsʼíibt le Bibliaoʼ (1 Sam. 2:21).

Jeʼex Ana yéetel Samueleʼ, jeʼel xan u páajtal k-kʼubik k-kuxtal utiaʼal k-meyajtik le Máax beetmiloʼonoʼ. Jesuseʼ tu yaʼaleʼ yaan k-kʼamik yaʼab bendicionoʼob yoʼolal le baʼaxoʼob k-beetik utiaʼal k-meyajtik Jéeobaoʼ (Mar. 10:28-30).

Teʼ yáax siglooʼ, Dorcaseʼ jach kʼaj óoltaʼab tumen ku «beetik baʼaloʼob maʼalobtak» yéetel ku «yáantik le óotsiloʼoboʼ». Baʼaleʼ «kʼojaʼanchajeʼ ka kíimi». Lelaʼ tu beetaj u jach yaatal u yóol le sukuʼunoʼoboʼ. Ka tu yojéeltoʼob naatsʼ yaan Pedroeʼ, tu kʼáat óoltoʼob tiʼ ka xiʼik tu séebaʼanil u yile. Chéen máans ta tuukul bix kiʼimakchajik u yóoloʼob ka kʼuch Pedro yéetel ka tu kaʼa kuxkíintaj Dorcas. Lelaʼ letiʼe yáax máax ku chʼaʼchiʼitaʼal ichil le Biblia kuxkíintaʼab tumen juntúul apostoloʼ (Bax. 9:36-41). Dioseʼ maʼ tu tuʼubsaj le baʼaxoʼob u beetmaj Dorcasoʼ (Heb. 6:10). Le baʼaxoʼob tu beetoʼ tsʼíibtaʼab ichil le Bibliaoʼ, beyoʼ jeʼel u páajtal k-beetik xan jeʼex tu beetiloʼ.

Apóstol Pabloeʼ jach tu xupaj u tiempo utiaʼal u yáantik u maasil, lelaʼ ku yeʼesik bix unaj k-beetik xan. Letiʼeʼ tu yaʼalaj tiʼ le sukuʼunoʼob yanoʼob Corintooʼ: «Teneʼ yéetel kiʼimak óolal ken in xup ta woʼolaleʼex le baʼaxoʼob yaantenoʼ yéetel yaan xan in jach xupkinba ta woʼolaleʼex» (2 Cor. 12:15). Pabloeʼ tu yileʼ k-xupikba yoʼolal u maasileʼ ku taasiktoʼon kiʼimak óolal, tsʼoʼoleʼ yaan k-kʼamik yaʼab bendicionoʼob yéetel yaan u kʼamkoʼon Jéeoba (Bax. 20:24, 35).

Jéeobaeʼ jach uts tu tʼaan ka k-xup k-tiempo yéetel k-muukʼ tu yoʼolal le Reinooʼ yéetel utiaʼal k-áantik k-sukuʼunoʼob. Baʼaleʼ ¿yaan wa uláakʼ baʼax jeʼel u páajtal k-beetkeʼ? Yaan. Kex k-beetik yaʼab baʼaloʼob utiaʼal k-áantik u maasileʼ, jeʼel u páajtal k-síik k-taakʼin utiaʼal k-nojbeʼenkúuntik Jéeobaeʼ. Le taakʼin k-síikoʼ ku meyaj utiaʼal maʼ u xuʼulul u kʼaʼaytaʼal le maʼalob péektsil tuláakal tuʼuxoʼ. Yéetel le taakʼinoʼ ku yáantaʼal le misioneroʼob yéetel uláakʼ sukuʼunoʼob ku xupkubaʼob u meyajtoʼob Diosoʼ. Le taakʼin k-síik xanoʼ ku meyaj utiaʼal u beetaʼal yéetel u traducirtaʼal le publicacionoʼob yéetel le videoʼoboʼ, u tsʼaʼabal áantaj tuʼux ku yúuchul loob yéetel utiaʼal u beetaʼal u maasil u Najiloʼob Reino. Maʼ u tuʼubultoʼoneʼ wa maʼ tsʼuʼutoʼoneʼ yaan k-kʼamik yaʼab bendicionoʼob. Tsʼoʼoleʼ yaan k-tsʼáaik nojbeʼenil tiʼ Jéeoba yéetel le baʼaxoʼob yaantoʼonoʼ (Pro. 3:9; 22:9).