Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Kʼáatchiʼob ku beetaʼal

Kʼáatchiʼob ku beetaʼal

¿Baʼax u kʼáat u yaʼal le úuchik u nuʼupul le kaʼapʼéel cheʼob ku yaʼalaʼal teʼ capítulo 37 tiʼ Ezequieloʼ?

Jéeobaeʼ tu yaʼalaj tiʼ Ezequiel ka u tsʼáa u yojéelt le israelitaʼob junpʼéel baʼax tu beetaj u líikʼil u yóoloʼoboʼ. Tu yaʼalajtiʼeʼ le ken xuʼuluk u palitsiltaʼaloʼobeʼ yaan u kaʼa suutoʼob teʼ Luʼum Aʼalaʼan u Tsʼaʼabaltiʼoboʼ yéetel yaan u pʼáatloʼob junmúuchʼ. Le profecíaaʼ ku chíikbesik xan le bix kun kaʼa múuchʼ meyaj u kaajal Jéeoba teʼ tu tsʼook kʼiinoʼobaʼ.

Jéeobaeʼ tu yaʼalaj tiʼ Ezequiel ka tsʼíibnak tiʼ kaʼapʼéel cheʼob. Tiʼ junpʼéeleʼ yaan u tsʼíibtik: «Utiaʼal Judá yéetel utiaʼal u paalaloʼob Israel u yéet kajnáaliloʼob». Tiʼ uláakʼ junpʼéeloʼ ku tsʼíibtik: «Utiaʼal José, u cheʼil Efraín, yéetel tuláakal le israelitaʼob u yéet kajnáaliloʼoboʼ». Ka tsʼoʼokeʼ aʼalaʼab tiʼ Ezequiel ka u nup le kaʼapʼéel cheʼobaʼ utiaʼal ka pʼáatkoʼob «junpʼéeliliʼ» (Eze. 37:15-17, Traducción de Nuevo Mundo).

 ¿Baʼax ku chíikbesik le kʼaabaʼ Efraín teʼ profecíaaʼ? Le yáax rey anchaj tiʼ u reinoil le diez tribuʼob anchaj xamanoʼ, Jeroboán. Le reyaʼ tiʼ u taal tiʼ u tribuil Efraíneʼ yéetel kʼuch kʼaj óoltbil bey letiʼe maas yaan u páajtaliloʼ (Deu. 33:13, 17; 1 Rey. 11:26). Le tribuaʼ tiʼ u taal tiʼ Efraín, u paal Joseeʼ (Núm. 1:32, 33). Tiʼ Joseeʼ tsʼaʼab junpʼéel nojoch bendición tumen Jacob, u taata. Le oʼolal jach maʼalob úuchik u tsʼaʼabal le kʼaabaʼ «Efraín» tiʼ junpʼéel tiʼ le cheʼob utiaʼal u chíikbesaʼal u reinoil le diez tribuʼoboʼ. Tu añoil 740 táanil tiʼ u taal Jesuseʼ, le asirioʼoboʼ tu chʼaʼajoʼob le reino yaan xamanoʼ ka tu bisoʼob u palitsiltoʼob le israelitaʼoboʼ (2 Rey. 17:6). Ka máan añoseʼ le babilonioʼoboʼ tu ganartoʼob le asirioʼoboʼ. Le oʼolaleʼ le ka tu yaʼalaj Jéeoba le profecía tiʼ Ezequieloʼ le israelitaʼoboʼ tsʼoʼok u pʼáatal minaʼanoʼob yáanal u páajtalil le asirioʼoboʼ, baʼaxeʼ letiʼe babilonioʼob palitsiltmiloʼoboʼ yéetel láaj kʼiʼitpajaʼanoʼob tu luʼumil Babilonia.

Tu añoil 607 táanil tiʼ u taal Jesuseʼ, le babilonioʼoboʼ tu bisoʼob palitsiltbil le máaxoʼob yanoʼob ichil u reinoil le kaʼapʼéel tribuʼob yaan noojoloʼ. Ichiloʼobeʼ tiaʼan xan jujuntúul tiʼ le máaxoʼob yanoʼob ichil le diez tribuʼob maʼ bisaʼaboʼob tumen le asirioʼoboʼ. Le reyoʼob taaloʼob tu chʼiʼibal Judaoʼ letiʼob gobernart le kaʼapʼéel tribuʼobaʼ. Ichiloʼobeʼ tiaʼan kaʼach le sacerdoteʼoboʼ tumen tiʼ ku meyajoʼob teʼ templo yaan tu kaajil Jerusalenoʼ (2 Cró. 11:13, 14; 34:30). Le oʼolal jach maʼalob úuchik u tsʼaʼabal le kʼaabaʼ «Judá» tiʼ le uláakʼ cheʼ utiaʼal u chíikbesaʼal u reinoil le kaʼapʼéel tribuʼoboʼ.

¿Baʼax kʼiin ka nuʼup le kaʼapʼéel cheʼobaʼ? Tu añoil 537 táanil tiʼ u taal Jesús, le ka suunaj tuláakal le israelitaʼob yanoʼob ichil le reino tiʼ le kaʼapʼéel tribuʼob bey xan le yanoʼob ichil le reino tiʼ diez tribuʼob utiaʼal u yutskíintikoʼob u temploil Jerusalenoʼ. Desde teʼ kʼiinoʼ le israelitaʼoboʼ maʼ tu kaʼa jatsubaʼobiʼ (Eze. 37:21, 22). Káaj xan u kaʼa múuchʼ adorartikoʼob Jéeoba. Le profeta Isaías yéetel Jeremíasoʼ tʼaanajoʼob xan tiʼ bix kun kaʼa múuchʼ antal le israelitaʼoboʼ (Isa. 11:12, 13; Jer. 31:1, 6, 31).

Le profecíaaʼ ku yaʼalik junpʼéel baʼal jach kʼaʼanaʼan: Jéeobaeʼ yaan u ‹junpʼéeliliʼkúuntik›, wa u muchʼik máaxoʼob meyajtik (Eze. 37:18, 19). ¿Tsʼoʼok wa u béeytal teʼ kʼiinoʼob le profecíaaʼ? Tsʼoʼoki, káaj u béeytal tu añoil 1919. Teʼ añooʼ káaj u kʼexpajal bix u nuʼuktaʼal u kaajal Dios yéetel pʼáat junmúuchʼ u meyajoʼob. Kex yaʼab baʼaloʼob tu beetaj Satanás utiaʼal u jatskoʼobeʼ maʼ béeychajiʼ.

Teʼ añoʼob jeʼeloʼ u maas yaʼabil tiʼ le máaxoʼob meyajtik Diosoʼ yaan kaʼach u binoʼob kaʼan utiaʼal u beetik u reyiloʼob yéetel u sacerdoteiloʼob junmúuchʼ yéetel Jesús (Apo. 20:6). Jeʼel u páajtal k-aʼalikeʼ letiʼobeʼ beyoʼob jeʼex le cheʼ tuʼux tsʼaʼab le kʼaabaʼ «Judaoʼ». Chéen baʼaleʼ ka máan kʼiineʼ joʼopʼ u yáantaʼaloʼob tumen le máaxoʼob kun pʼáatloʼob kuxtal way Luʼumoʼ (Zac. 8:23). Le máakoʼobaʼ beyoʼob kaʼach jeʼex le cheʼ tuʼux tsʼaʼab u kʼaabaʼ Joseoʼ, letiʼobeʼ maʼ táakaʼanoʼob ichil le máaxoʼob kun gobernaroʼob yéetel Cristooʼ.

Teʼ kʼiinoʼobaʼ le máaxoʼob kun binoʼob teʼ kaʼan yéetel le kun pʼáatloʼob way Luʼumoʼ ku yaʼalaʼaltiʼob u kaajal Jéeoba, letiʼobeʼ junmúuchʼ u meyajtikoʼob Jesucristo, le juntúuliliʼ Rey wa le u «palitsil David» ku yaʼalik u profecíail Ezequieloʼ (Eze. 37:24, 25). Ichil u oracioneʼ Jesuseʼ tu kʼáataj ka áantaʼak u disipuloʼob utiaʼal ka juntúuliliʼchajkoʼob jeʼex letiʼ yéetel u Taataeʼ (Juan 17:20, 21). * Tu yaʼalaj xaneʼ le yéeyaʼanoʼob bey xan le «uláakʼ tamanoʼob[oʼ]» yaan u pʼáatloʼob junmúuchʼ yéetel yaan u yantaloʼob «yáanal u kʼab juntúuliliʼ j-kanan taman[eʼ]» (Juan 10:16). Le baʼax tu yaʼalaj Jesusaʼ ku yeʼesik bix u múul meyaj le máaxoʼob meyajtik Jéeoba teʼ kʼiinoʼobaʼ, kex yaan u binoʼob kaʼan wa yaan u pʼáatloʼob way Luʼumeʼ.

^ xóot’ol 6 Ka tu tsikbaltaj Jesús le kettʼaanoʼob kun eʼesik wa tiaʼanoʼon tu tsʼook kʼiinoʼoboʼ, yáaxeʼ tʼaanaj tiʼ le «palitsil chúukaʼan u yóol yéetel yaan u naʼat[oʼ]», wa le u chan múuchʼ máakoʼob yéeyaʼan utiaʼal u nuʼuktik le meyaj ku beetik u kaajal Diosoʼ (Mat. 24:45-47). Ka tsʼoʼokeʼ tu tsikbaltaj uláakʼ kettʼaanoʼob ku chíikbesik tuláakal le máaxoʼob kun binoʼob kaʼanoʼ (Mat. 25:1-30). Tu tsʼookeʼ tʼaanaj tiʼ le máaxoʼob kun pʼáatloʼob kuxtal way Luʼum yéetel yaan u yáantkoʼob u sukuʼunoʼob Cristooʼ (Mat. 25:31-46). Teʼ kʼiinoʼobaʼ u profecíail Ezequieleʼ yáaxeʼ ku béeychajal ichil u kuxtal le máaxoʼob yéeyaʼanoʼoboʼ. Kex maʼ tu páajtal k-jach aʼalik wa u reinoil le diez tribuʼob ku chíikbesik le máaxoʼob kun pʼáatloʼob kuxtal way Luʼumeʼ, le ken u yaʼal u profecíail Ezequiel ku múuchʼ meyajoʼoboʼ, ku kʼaʼajsiktoʼon le bix u múuchʼ meyaj le máaxoʼob kun pʼáatloʼob kuxtal way Luʼum yéetel le máaxoʼob yéeyaʼanoʼoboʼ.