Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Unaj k-eʼesik kabal óolal tak ken k-aktáant baʼaloʼob talamtak

Unaj k-eʼesik kabal óolal tak ken k-aktáant baʼaloʼob talamtak

«Wíinik Yuumtsileʼ tsʼoʼok u yaʼalik tiʼ teech [...] ka wuʼuyajtʼant [Dios] yéetel kabal óolal.» (MIQ. 6:8)

KʼAAYOʼOB: 48, 95

1-3. ¿Baʼax maʼ maʼalob tu beetaj le profeta ku taal tiʼ u kaajil Judaoʼ, yéetel baʼax úuchtiʼ? (Ilawil le dibujo yaan tu káajbal le xookaʼ.)

JEROBOÁN u reyil Israeleʼ tu beetaj junpʼéel altar utiaʼal u adorartaʼal beetbil diosoʼob tu kaajil Betel. Chéen baʼaleʼ Jéeobaeʼ tu túuxtaj juntúul profeta ku taal tiʼ u kaajil Judá utiaʼal u yaʼalik tiʼ le rey baʼax kun úuchultiʼoʼ. Le profetaoʼ yéetel kabal óolal tu yuʼubaj u tʼaan Jéeobaeʼ ka bin u beet le baʼax aʼalaʼabtiʼoʼ. Le rey túunoʼ jach pʼuʼuj tu contra le profetaoʼ, chéen baʼaleʼ kanáantaʼab tumen Jéeoba (1 Rey. 13:1-10).

2 Jéeobaeʼ tu yaʼalaj tiʼ le profeta maʼ u jaantik yéetel maʼ u yukʼik mix baʼal tu kaajil Israeloʼ yéetel ka xiʼik yaanal bej ken suunak tu yotoch. Le táan u suut le profetaoʼ tuʼus tumen juntúul chʼijaʼan máak tu kʼaj óoltaj teʼ bejoʼ, le máakaʼ tu yaʼalajtiʼeʼ aʼalaʼabtiʼ tumen Jéeobaeʼ jeʼel u páajtal u beetik yaanal baʼaleʼ. Le chʼijaʼan máakoʼ tu invitartaj le profeta ka xiʼik tu yotoch u yukʼ wa baʼaxoʼ yéetel ka janak. Le profetaoʼ maʼ tu beetaj le baʼax aʼalaʼabtiʼ tumen Jéeobaoʼ tumen bin tu yotoch le chʼijaʼan máakoʼ. Jéeobaeʼ maʼ maʼalob tu yilil le baʼax tu beetaj le profetaoʼ, le oʼolaleʼ le táan u suut teʼ bejoʼ kíimsaʼab tumen juntúul león (1 Rey. 13:11-24).

 3 Toʼoneʼ maʼ k-ojel baʼaxten le profetaoʼ tu chʼaʼtuklaj u yuʼubik u tʼaan le chʼijaʼan máak tu lugar u yuʼubik u tʼaan Jéeobaoʼ. Chéen baʼaleʼ k-ojleʼ letiʼeʼ maʼ seguernaj u yuʼubik u tʼaan Jéeoba yéetel kabal óolaliʼ (xok Miqueas 6:8). Juntúul máak kabal u yóoleʼ u yojel kʼaʼabéet u orar mantatsʼ. Wa kabal u yóol le profetaoʼ tsʼoʼok kaʼach u kʼáatik tiʼ Jéeoba wa tu kʼexaj le baʼax u yaʼalmaj tiʼoʼ. Toʼon xaneʼ yaan kʼiineʼ ku kʼaʼabéettal k-chʼaʼtuklik k-beetik wa baʼax ichil k-kuxtal, pero maʼ xaaneʼ maʼatech k-tsʼáaik cuenta baʼax u kʼáat Jéeoba ka k-beete. Chéen baʼaleʼ wa kabal k-óoleʼ yaan k-kʼáatik tiʼ Jéeoba ka u nuʼuktoʼon, beyoʼ maʼ ken k-beet baʼax maʼ uts tu tʼaaniʼ.

4. ¿Baʼax ken k-il teʼ xookaʼ?

4 Teʼ xook máanikoʼ t-kanaj bix juntúul máak ku yeʼesik kabal óolal yéetel baʼaxten jach kʼaʼanaʼan u yeʼesaʼal tumen le máaxoʼob meyajtik Diosoʼ. Chéen baʼaleʼ, ¿bix jeʼel k-maas eʼesik kabal óolaleʼ? ¿Baʼaxoʼob jeʼel u talamkúuntik k-eʼesik kabal óolaleʼ? Teʼ xookaʼ yaan k-ilik óoxpʼéel baʼaloʼob jeʼel u talamkúuntikeʼ (Pro. 11:2).

KEN KʼEXPAJAK K-KUXTAL

5, 6. ¿Bix tu yeʼesil Barzilai kabal u yóol?

5 Ken kʼexpajak k-kuxtal yéetel ken tsʼaʼabak yaanal meyaj k-beet ichil u kaajal Dioseʼ jeʼel u talamtal k-eʼesik kabal óolaleʼ. Le oʼolaleʼ maʼalob ka kaanbalnakoʼon tiʼ Barzilai, u amigo le rey Davidoʼ. Le yaan 80 años tiʼ Barzilaioʼ invitartaʼab tumen David utiaʼal ka xiʼik kajtal teʼ palaciooʼ. Kex nojoch baʼal tu yilil Barzilai le baʼax aʼalaʼabtiʼ tumen le reyoʼ, tu lugar u bin letiʼeʼ tu yaʼalaj maas maʼalob ka xiʼik Kimham, maʼ xaaneʼ juntúul tiʼ u paalaloʼob (2 Sam. 19:31-37).

6 ¿Baʼaxten maʼ tu kʼamaj Barzilai le invitación beetaʼabtiʼoʼ? ¿Maʼ wa u kʼáat u beet u maasil meyajoʼobiʼ? ¿Chéen wa ta tʼaan maʼ u kʼáat u talamkúunt u kuxtaliʼ? Maʼatech, baʼaxeʼ Barzilaieʼ kabal u yóol kaʼachi. Letiʼeʼ tu máansaj tu tuukul yaan baʼaxoʼob maʼ tu páajtal u beetik tumen tsʼoʼok u yantal u edab (xok Galaciailoʼob 6:4, 5). Jeʼex tu beetil Barzilaieʼ, toʼoneʼ kʼaʼabéet xan k-eʼesik kabal óolal. Tu lugar k-beetik chéen baʼax k-kʼáat wa tu lugar k-beetik u yilaʼal maas maʼaloboʼon tiʼ u maasileʼ, unaj k-ilik maas maʼalobkíintik bix k-meyajtik Jéeoba. Lelaʼ maas maʼalob tiʼ jeʼel baʼalak meyajil ka tsʼaʼabaktoʼon teʼ múuchʼuliloʼ yéetel maas maʼalob tiʼ u kʼaj óoltikoʼon u maasil (Gal. 5:26). Wa kabal k-óoleʼ yaan k-múul meyaj yéetel le sukuʼunoʼob utiaʼal k-alabartik Jéeobaoʼ bey xan utiaʼal k-áantik u maasil (1 Cor. 10:31).

7, 8. ¿Bix u yáantkoʼon le kabal óolal utiaʼal maʼ k-confiar chéen tiʼ baʼax k-ojel k-beetoʼ? Tsʼáa junpʼéel ejemplo.

7 Wa maas yaʼab meyaj ku tsʼaʼabal tiʼ máakeʼ maas istikyaj u yeʼesik kabal óolal. Yaan baʼax jeʼel k-kanik tiʼ le baʼax tu beetaj Nehemíasoʼ. Le ka tu yuʼubaj táan u aktáantik yaʼab problemaʼob u kajnáaliloʼob Jerusaleneʼ, letiʼeʼ tu kʼáat óoltaj tiʼ Jéeoba ka u yáantoʼob (Neh. 1:4, 11). Jéeobaeʼ tu núukaj u oración Nehemías le ka tsʼaʼab u beet u gobernadoril tumen le rey Artajerjesoʼ. Kex ayikʼalchaj Nehemías yéetel kex anchaj yaʼab páajtalil tiʼeʼ mantatsʼ tu kaxtaj u nuʼuktaj Jéeoba yéetel mantatsʼ tu xokaj u Ley (Neh. 8:1, 8, 9). Yaʼab máak yaan kaʼach yáanal u autoridad Nehemías, chéen baʼaleʼ mix juntéen meyajnaj u autoridad utiaʼal u kaxtik chéen u yutsil mix utiaʼal u beetik u kʼasaʼanil tiʼ u maasil (Neh. 5:14-19).

8 Jeʼex tu beetil Nehemíaseʼ wa ku tsʼaʼabaltoʼon u maasil meyajoʼob k-beet ichil u kaajal Dios bey xan wa ku kʼeʼexel le meyaj k-beetkoʼ kʼaʼabéet k-ilik u seguer k-eʼesik kabal óolal. Kex yaʼab u téenel k-beet wa baʼaxeʼ, maʼ unaj k-confiar chéen tiʼ baʼaxoʼob k-ojliʼ. ¿Bix jeʼel u káajal u yeʼesik máak maʼ u kʼáat ka áantaʼakeʼ? Maʼ xaaneʼ juntúul ancianoeʼ ku pʼáatal maʼatech u orar táanil tiʼ u beetik wa baʼax  meyajil teʼ múuchʼuliloʼ. Wa maʼ xaaneʼ juntúul sukuʼun wa juntúul kiikeʼ yáax táanil ku chʼaʼtuklik baʼax ken u beete ku tsʼoʼoleʼ ku kʼáatik ka áantaʼak tumen Jéeoba. Chéen baʼaleʼ juntúul máak kabal u yóoleʼ yáax táanil ku kʼáatik áantaj, lelaʼ bey u beetik tak tiʼ baʼaxoʼob úuch joʼopʼok u beetkoʼ. Letiʼeʼ u yojel de ke Jéeobaeʼ maas yaʼab baʼax u yojel tiʼ letiʼ (xok Proverbios 3:5, 6). Le máakoʼob teʼ yóokʼol kaabaʼ ku kaxtikoʼob chéen u yutsiloʼob yéetel ku yuʼubikubaʼob maas maʼaloboʼob tiʼ u maasil. Chéen baʼaleʼ le máaxoʼob meyajtik Jéeobaoʼ maʼatech u beetkoʼob beyoʼ. Toʼoneʼ maʼatech k-uʼuyik wa maas maʼaloboʼon tiʼ uláakʼ sukuʼunoʼob bey xan tiʼ k-láakʼtsiloʼob chéen ikil u tsʼaʼabaltoʼon wa baʼax meyaj k-beet teʼ múuchʼuliloʼ. K-ojel chéen táan k-áantaj utiaʼal k-beetik le meyaj u tsʼaamajtoʼon Diosoʼ, le oʼolaleʼ k-múul meyaj yéetel le sukuʼunoʼoboʼ (1 Tim. 3:15).

KEN AʼALAʼAKTOʼON BAʼAL BEY XAN KEN SEN TRATARTAʼAKOʼON MAʼALOB

9, 10. ¿Bix jeʼel u yáantkoʼon le kabal óolal ken aʼalaʼaktoʼon baʼaloʼ?

9 Maʼ xaaneʼ jach jeʼel u yaatal u yóol máak ken aʼalaʼak baʼal tiʼeʼ. Lelaʼ letiʼe baʼax úuch tiʼ Anaoʼ. Letiʼeʼ kex jach yaabiltaʼan tumen u yíichameʼ yaan baʼax beetik maʼ u kiʼimaktal u yóol. Tiʼ letiʼeʼ mantatsʼ kaʼach ku yaʼalaʼal baʼal tiʼ tumen Peniná, uláakʼ juntúul u yatan Elcana. Anaeʼ kex u kʼáat kaʼach ka yanak u paalaleʼ deporsi maʼ tu páajtal u yantal. Juntéenjeakileʼ tumen jach lubaʼan u yóoleʼ bin orar teʼ templooʼ. Le tiaʼan teʼeloʼ Elí, le Nojoch Sacerdoteoʼ, tu yaʼalaj baʼal tiʼ Ana yéetel tu tukleʼ kalaʼan. Anaeʼ jeʼel kaʼach u pʼuʼujul tu yoʼolal le baʼax aʼalaʼabtiʼoʼ, chéen baʼaleʼ letiʼeʼ maʼ tu kʼáat núuktaj u tʼaan Eliiʼ, baʼaxeʼ tu yeʼesaj tsiikil tiʼ. Ka tsʼoʼokeʼ Anaeʼ tu beetaj junpʼéel oración tuʼux tu yeʼesaj nojoch u fe yéetel u yaabiltmaj Jéeoba (1 Sam. 1:5-7, 12-16; 2:1-10).

10 Máax kabal u yóoleʼ jeʼel u páajtal u «tsʼáanchaʼatik le kʼaas yéetel le baʼax utsoʼ» (Rom. 12:21). Teʼ yóokʼol kaab nuʼuktaʼan tumen Satanasaʼ jach ku beetaʼal baʼaloʼob kʼaastakiʼ. Le oʼolaleʼ yaan kʼiineʼ jeʼel u beetaʼaltoʼon baʼax maʼ maʼalobeʼ, lelaʼ jeʼel u beetik u yaatal k-óol wa k-pʼuʼujuleʼ, chéen baʼaleʼ kʼaʼabéet k-kanik controlartba (Sal. 37:1). Wa ka yanaktoʼon problemaʼob yéetel le sukuʼunoʼob teʼ múuchʼuliloʼ maas jeʼel u  yaatal k-óoleʼ. Wa ku yúuchul lelaʼ unaj k-beetik jeʼex Jesuseʼ. Le Bibliaoʼ ku yaʼalik: «Le táan u poʼopochʼaʼaloʼ maʼ tu núukaj yéetel poochʼiloʼobiʼ», baʼaxeʼ «tu kʼubéentuba tiʼ le máax toj bix u juzgaroʼ» (1 Ped. 2:23). Jesuseʼ kabal u yóol yéetel u yojel jeʼel u yutskíintik Jéeoba le baʼaloʼob kʼaastak ku beetaʼaloʼ (Rom. 12:19). Toʼoneʼ k-kʼáat k-eʼes kabal óolal yéetel maʼ k-kʼáat ‹sut kʼaas tu yoʼolal kʼaasiʼ› (1 Ped. 3:8, 9).

11, 12. 1) ¿Bix jeʼel u seguer k-eʼesik kabal oʼolal ken tratartaʼakoʼon maʼalobeʼ? 2) Wa kabal k-óoleʼ, ¿bix ken k-vestirtba yéetel bix le modos ken k-eʼesoʼ?

11 Uláakʼ baʼal jeʼel u beetik u xuʼulul k-eʼesik kabal óolaleʼ letiʼe k-sen tratartaʼal maʼaloboʼ. Estereʼ yaʼab u téenel sen tratartaʼab maʼalob tumen letiʼ kaʼacheʼ u maas kiʼichpanil tiʼ u luʼumil Persia. Ichil junpʼéel añoeʼ ilaʼab bix jeʼel u maas u kiʼichpankúuntaʼaleʼ, ka tsʼoʼokeʼ junmúuchʼ yéetel uláakʼ chʼúupalaloʼobeʼ bisaʼab tu táan le reyoʼ. Le rey túunoʼ tu yéeyaj Ester utiaʼal ka u beet u reinail, chéen baʼaleʼ kex sen tratartaʼab maʼalobeʼ Estereʼ maʼ kaʼanchaj u yichiʼ. Letiʼeʼ seguernaj u yeʼesik kabal óolal, tsiikil yéetel yaabilaj (Est. 2:9, 12, 15, 17).

Le bix k-vestirtikbaoʼ, ¿ku yeʼesik wa k-respetartik Jéeoba bey xan u maasil, wa ku yeʼesik maʼ kabal k-óoliʼ? (Ilawil xóotʼol 12)

12 Wa kabal k-óoleʼ yaan k-eʼesik k-respetartik u maasil yéetel bix k-vestirtikba bey xan yéetel le modos k-eʼesikoʼ, tsʼoʼoleʼ yaan xan k-tsʼáaik tuʼux k-respetartaʼal. Tu lugar u kaʼanchajal k-ich wa k-beetik baʼaxoʼob chéen utiaʼal ka ilaʼak tumen u maasileʼ, unaj u yilaʼal ‹kabal k-óol yéetel jeetsʼel u yóol k-puksiʼikʼal› (xok 1 Pedro 3:3, 4; Jer. 9:23, 24). Le baʼaxoʼob k-aʼalik yéetel k-beetkoʼ ku yeʼesik bixoʼon. Maʼ xaaneʼ jeʼel k-beetik u tuklaʼaleʼ maas maʼaloboʼon tiʼ u maasil tumen yaʼab baʼaxoʼob k-beetik, yaʼab baʼaxoʼob k-ojel yéetel yaʼab máaxoʼob k-kʼaj óol. Jeʼel k-beetik u tuklaʼal xaneʼ chéen t-juunal t-beetaj wa baʼax meyajil, kex u jaajileʼ yanchaj máax áantkoʼon. Tuukulnakoʼon tiʼ baʼax tu beetaj Jesús. Letiʼeʼ jeʼel kaʼach u nojbaʼalkúuntkuba tu táan le máakoʼob yoʼolal le naʼat yaantiʼoʼ, chéen baʼaleʼ mantatsʼ tu chʼaʼchiʼitaj le Kiliʼich Tsʼíiboʼob ich Hebreooʼ. Mix juntéen tu kaxtaj ka nojbeʼenkúuntaʼak letiʼ, baʼaxeʼ mantatsʼ tu yilaj ka nojbeʼenkúuntaʼak Jéeoba (Juan 8:28).

KEN K-CHʼAʼTUKULT K-BEETIK WA BAʼAX

13, 14. ¿Bix u yáantkoʼon le kabal óolal utiaʼal k-chʼaʼtuklik baʼax maʼaloboʼ?

13 Toʼoneʼ unaj k-eʼesik kabal óolal ken k-chʼaʼtukult k-beetik wa baʼax ichil k-kuxtal bey xan ken u chʼaʼtukult u maasil u beetik wa baʼax yaan yil yéetel k-kuxtal. Le tiaʼan le apóstol Pablo tu kaajil Cesareaoʼ tu chʼaʼtuklaj u bin Jerusalén utiaʼal u tsʼoʼokbesik le meyaj kʼubéentaʼan tiʼ tumen Jéeobaoʼ. Chéen baʼaleʼ le profeta Ágabooʼ tu yaʼalajtiʼeʼ wa ku bineʼ yaan u kʼaʼalal yéetel maʼ xaaneʼ jeʼel u kíimsaʼaleʼ. Le sukuʼunoʼoboʼ tu kʼáat óoltoʼob tiʼ Pablo maʼ u bin, chéen baʼaleʼ letiʼeʼ tu chʼaʼtuklaj u bin. ¿Bin wa Pablo tumen chéen tuukulnaj tu yoʼolal? Maʼatech, letiʼeʼ kabal u yóol yéetel tu kʼubaj u yóol tiʼ Jéeoba. Le sukuʼunoʼoboʼ tumen kabal u yóoloʼob xaneʼ tu naʼatoʼob lelaʼ, le oʼolaleʼ maʼ seguernaj u yaʼalikoʼob mix baʼal tiʼiʼ (Bax. 21:10-14).

14 Le kabal óolaloʼ jeʼel u yáantkoʼon k-chʼaʼtukult baʼax ken k-beet kex maʼ k-ojel baʼax jeʼel u yúuchultoʼoneʼ. Maʼ xaaneʼ táan k-tuklik k-máansik maas yaʼab tiempo utiaʼal k-meyajtik Jéeoba. Chéen baʼaleʼ, ¿kux túun wa k-kʼojaʼantal? ¿Kux túun wa ku kʼojaʼantal k-taataʼob yéetel kʼaʼabéet k-áantkoʼob? ¿Kux túun ken chʼíijikoʼon? Kex ka orarnakoʼon yéetel ka tuukulnakoʼon tu yoʼolal le baʼaloʼobaʼ u jaajileʼ maʼ tu páajtal k-aʼalik baʼax jeʼel k-beetik wa ku yúuchultoʼoneʼ (Ecl. 8:16, 17). Chéen baʼaleʼ wa k-kʼubik k-óol tiʼ Jéeobaeʼ yaan k-naʼatik yaan baʼaxoʼob maʼ tu páajtal k-beetik. Tsʼoʼoleʼ yaan k-ilik naʼatik jach baʼax táan u yúuchultoʼon, k-kʼáatik áantaj, k-orar tiʼ Jéeoba yéetel k-beetik le baʼax ku  nuʼuktiktoʼonoʼ (xok Eclesiastés 11:4-6). Jéeobaeʼ jeʼel u páajtal u bendecirkoʼoneʼ wa jeʼel xan u yáantkoʼon utiaʼal ka k-kʼex le baʼaxoʼob k-chʼaʼtuklik k-beetkoʼ (Pro. 16:3, 9).

¿BAʼAX JEʼEL U YÁANTKOʼON EʼES KABAL ÓOLALEʼ?

15. K-tuukul tiʼ bix Jéeobaeʼ, ¿bix u yáantkoʼon k-eʼes kabal óolal?

15 ¿Baʼax jeʼel u yáantkoʼon eʼes kabal óolaleʼ? Kanpʼéel baʼaloʼob, yáaxeʼ maʼalob ka tuukulnakoʼon tiʼ le bukaʼaj páajtalil yéetel bukaʼaj jatsʼuts modos yaan tiʼ Jéeobaoʼ. Toʼoneʼ wa k-ketikba yéetel Jéeobaeʼ yaan k-tsʼáaik cuentaeʼ mix baʼaloʼon tu tséel (Isa. 8:13). Kʼaʼajaktoʼoneʼ táan k-adorartik le Dios maas nojoch u páajtaliloʼ maʼ chéen juntúul wíinikiʼ wa juntúul angeliʼ. K-tuukul tiʼ lelaʼ yaan u yáantkoʼon utiaʼal k-tsʼáaikba yéetel kabal óolal «yáanal u páajtalil u kʼab Dios» (1 Ped. 5:6).

16. K-tuukul tiʼ bukaʼaj u yaabiltmoʼon Jéeobaeʼ, ¿bix u yáantkoʼon k-eʼes kabal óolal?

16 U kaʼapʼéel baʼax jeʼel u yáantkoʼoneʼ letiʼe k-tuukul tiʼ bukaʼaj u yaabiltmoʼon Jéeobaoʼ. Le apóstol Pablooʼ tu ketaj le múuchʼulil yéetel u xéexetʼal le wíinkliloʼ. Tu yaʼaleʼ Jéeobaeʼ tu beetaj u tsʼaʼabal tsiikil tiʼ tuláakal u xéexetʼal le wíinkliloʼ (1 Cor. 12:23, 24). Cada juntúul tiʼ toʼoneʼ jach kʼaʼanaʼan tu táan Jéeoba. Letiʼeʼ maʼatech u ketkoʼon yéetel mix máak yéetel maʼatech u xuʼulul u yaabiltikoʼon kex ka k-beet yaan hora baʼaloʼob maʼ jach maʼalobtakiʼ. K-ojéeltik u yaabiltmoʼoneʼ ku beetik u kiʼimaktal k-óol kex jeʼel baʼalak meyajil ka k-beet ichil u kaajaleʼ.

17. Wa k-ilik le baʼax maʼalob ku beetik u maasiloʼ, ¿baʼax maʼ ken k-beete?

17 U yóoxpʼéel baʼax jeʼel u yáantkoʼoneʼ letiʼe k-ilik le baʼax maʼalob ku beetik u maasil jeʼex u beetik Jéeobaoʼ. Wa k-beetik lelaʼ maʼ ken k-beet u tuklaʼal bey tuláakal baʼal k-ojleʼ yéetel maʼ ken aʼal xan tiʼ u maasil baʼax unaj u beetkoʼob, baʼaxeʼ yaan k-kʼáatik u yáantajoʼob yéetel yaan k-chʼaʼik en cuenta le baʼax ku yaʼalikoʼoboʼ (Pro. 13:10). Toʼoneʼ unaj u kiʼimaktal k-óol ken tsʼaʼabak junpʼéel túumben meyaj u beet juntúul sukuʼun wa kiik teʼ múuchʼuliloʼ. Unaj xan k-tsʼáaik u graciasil tiʼ Jéeoba ikil u tsʼáaiktoʼon u páajtalil k-meyajtik (1 Ped. 5:9).

18. K-kaʼansik concienciaeʼ, ¿bix jeʼel u yáantkoʼon k-eʼes kabal óolaleʼ?

18 U kanpʼéel baʼax jeʼel u yáantkoʼoneʼ letiʼe k-kaʼansik conciencia yéetel le principioʼob yaan teʼ Bibliaoʼ. Lelaʼ jeʼel u yáantkoʼon k-il bix u tuukul Jéeobaeʼ yéetel bix u yuʼubikuba. Wa k-ilik tuláakal baʼal jeʼex u yilik Jéeobaeʼ yaan k-beetik u kiʼimaktal u yóol yéetel le baʼaxoʼob k-chʼaʼtuklik k-beetkoʼ. Jeʼex kun bin k-maas xook, k-orar yéetel k-tsʼáaik ichil k-kuxtal le baʼax k-kanikoʼ bey kun bin k-maas kaʼansik k-concienciaoʼ (1 Tim. 1:5). Tsʼoʼoleʼ yaan xan k-kanik kaxt táanil u yutsil u maasil. Wa k-beetik tuláakal le baʼaloʼobaʼ Jéeobaeʼ yaan u beetik k-noʼojaʼantal tu chúukaʼanil wa yaan u yáantkoʼon utiaʼal k-eʼesik kabal óolal yéetel uláakʼ jatsʼuts modos (1 Ped. 5:10).

19. Tsol baʼax jeʼel u yáantkoʼon k-eʼes kabal óolal bejlaʼeʼ yéetel tuláakal u kʼiiniloʼob k-kuxtal.

19 Le profeta ku taal tiʼ u kaajil Judá t-chʼaʼchiʼitaj tu káajbal le xookaʼ tumen xuʼul u yeʼesik kabal óolaleʼ xuʼul u kʼaʼamal tumen Jéeoba yéetel kíimi. Toʼoneʼ kex ka k-aktáant problemaʼob ichil k-kuxtaleʼ jeʼel u páajtal k-eʼesik kabal óolaleʼ. Lelaʼ bey u yeʼesik le bix kuxlajik jujuntúul máaxoʼob meyajt Dios úuchjeakiloʼ. Wa úuch joʼopʼok k-meyajtik Jéeobaeʼ maas unaj k-kʼubik k-óol tiʼ letiʼ (Pro. 8:13). Kex jeʼel baʼaxak ka k-aktáant ichil k-kuxtaleʼ unaj u seguer k-beetik tuláakal baʼal jeʼex u kʼáat Jéeobaeʼ tumen letiʼe baʼax maas maʼalob jeʼel u páajtal k-beetkoʼ. Le oʼolaleʼ koʼox beetik tuláakal le ku páajtal utiaʼal k-eʼesik kabal óolaloʼ yéetel utiaʼal maʼ u xuʼulul k-meyajtik Jéeoba.