Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 JAATSIL 5

¿Máaxoʼob uʼuy u tʼaan Dios táanil tiʼ u taal le Búulkabaloʼ?

¿Máaxoʼob uʼuy u tʼaan Dios táanil tiʼ u taal le Búulkabaloʼ?

Tu kʼiiniloʼob Noeeʼ, óoliʼ tuláakal máak ku beetik baʼax kʼaas (Génesis 6:5)

Adán yéetel Evaeʼ yanchaj u paalaloʼob, bey úuchik u yaʼabtal máakoʼob way Luʼumeʼ. Ka máan kʼiineʼ, jujuntúul angeloʼobeʼ tu nupubaʼob yéetel Satanás tu contra Dios.

Letiʼobeʼ éemoʼob way Luʼumeʼ ka tu sutubaʼob bey wíinikoʼob utiaʼal u tsʼoʼokol u beeloʼob yéetel le koʼoleloʼoboʼ. Ka yanchaj u paalal le koʼoleloʼoboʼ, jelaʼantakoʼob tumen jach kʼasaʼanoʼob yéetel jach yaan u muukʼoʼob.

Le Luʼumaʼ chuʼup yéetel máakoʼob chéen baʼaloʼob kʼaastak ku beetkoʼob. Le Bibliaoʼ ku yaʼalik: «Máan tipʼaʼan u kʼasaʼanil le wíinik yóokʼol le luʼumaʼ, mantatsʼ xan chéen loob ku tukultik u beetik».

 Noeeʼ tu yuʼubaj u tʼaan Dios ka tu beetaj junpʼéel arca (Génesis 6:13, 14, 18, 19, 22)

Noeeʼ juntúul máak tu beetaj baʼax maʼalob. Jéeobaeʼ tu yaʼalajtiʼ yaan u taasik junpʼéel búulkabal utiaʼal u xuʼulsik tiʼ le kʼasaʼan máakoʼoboʼ.

Dioseʼ tu yaʼalaj xan tiʼ ka u beet junpʼéel nojoch barco wa arca yéetel ka u yoks u familia ichil bey xan tuláakal jejeláas baʼalcheʼob.

Noeeʼ tu yaʼalaj tiʼ le máakoʼob yaan u taal junpʼéel búulkabaloʼ, baʼaleʼ letiʼobeʼ maʼ tu creertoʼobiʼ. Yanoʼobeʼ tu cheʼejtoʼob Noé yéetel yanoʼobeʼ tu pʼektoʼob.

Ka tsʼoʼok u beetik Noé le arcaoʼ, tu yoksaj le baʼalcheʼob ichiloʼ.