Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 Xook 14

¿Baʼaxten unaj u múuchʼ meyaj u kaajal Dios?

¿Baʼaxten unaj u múuchʼ meyaj u kaajal Dios?

1. ¿Baʼaxten tu yéeyaj Dios u úuchben kaajil Israel?

Dioseʼ tu yéeyaj u chʼiʼibaloʼob Abrahán utiaʼal ka kʼuchuk u beetuba u kaajal yéetel tu tsʼáaj u leyoʼob tiʼob. Le kaajaʼ kʼuch kʼaj óoltbil «Israel», letiʼobeʼ yéeyaʼaboʼob utiaʼal u adorartikoʼob Dios bey xan utiaʼal u beetoʼob baʼax ku yaʼalik (Salmo 147:19, 20). Tu yoʼolal u kaajil Israeleʼ yaan u kiʼikiʼtʼantaʼal kaʼach tuláakal le máakoʼoboʼ. Xok Baʼaxoʼob 3:25.

Dioseʼ tu yéeyaj le israelitaʼob utiaʼal u tʼaanoʼob tu yoʼolaloʼ. Le Bibliaoʼ ku yeʼesiktoʼon le utsiloʼob ku taasik tiʼ máak u beetik le baʼax ku yaʼalik Dios jeʼex úuchik yéetel le israelitaʼoboʼ (Deuteronomio 4:6). Jeʼex túun k-ilkoʼ, uláakʼ máakoʼobeʼ jeʼel u páajtal kaʼach u kʼaj óoltikoʼob Dios le ken u yiloʼob bix úuchik u adorartaʼal tumen le israelitaʼoboʼ. Xok Isaías 43:10, 12.

2. ¿Baʼaxten unaj u múuchʼ meyaj u kaajal Dios?

Ka máan kʼiineʼ, u kaajil Israeleʼ xuʼul u kʼaʼamal tumen Jéeoba, ka jeelintaʼab tumen le máaxoʼob tsaypachtik Jesusoʼ (Mateo 21:43; 23:37, 38). Le oʼolal teʼ kʼiinoʼobaʼ le u jaajil cristianoʼoboʼ letiʼob ku tʼaanoʼob tu kʼaabaʼ Jéeoba, maʼ letiʼe israelitaʼoboʼ. Xok Baʼaxoʼob 15:14, 17.

Jesuseʼ tu nuʼuktaj u disipuloʼob utiaʼal ka u kʼaʼaytoʼob le maʼalob péektsil yéetel ka u beetoʼob disipuloʼob tuláakal yóokʼol kaab (Mateo 10:7, 11; 24:14; 28:19, 20). Teʼ tu tsʼook kʼiinoʼobaʼ, jach taʼaytak u tsʼoʼokol u kʼaʼaytaʼal le maʼalob péektsiloʼ. Yáax u yilaʼal u muʼuchʼul u millonesil máakoʼob tumen Jéeoba ichil u jaajil religionoʼ (Apocalipsis 7:9, 10). Ikil u múuchʼ meyajoʼobeʼ, ku paklan líiʼsik u yóoloʼob yéetel ku yáantkubaʼob. Tsʼoʼoleʼ kiʼimak u yóoloʼob tumen tiʼ tuláakal yóokʼol kaabeʼ junpʼéeliliʼ baʼax ku kaʼansaʼaltiʼob teʼ muchʼtáambaloʼoboʼ. Xok Hebreoʼob 10:24, 25.

 3. ¿Bix káajik u múuchʼ meyaj u j-jaajkunajoʼob Jéeoba teʼ kʼiinoʼobaʼ?

U j-jaajkunajoʼob Jéeobaeʼ káaj u múuchʼ meyajoʼob tu jaʼabil 1870. U múuchʼ j-xoknáaloʼob tiʼ le Bibliaoʼ káaj u kaʼa kaʼanskoʼob le baʼaxoʼob ku yaʼalik le Biblia xuʼul u kaʼansaʼal kaʼachoʼ. Letiʼobeʼ u yojloʼob Jesuseʼ tu muchʼaj yéetel tu yaʼalaj tiʼ le máaxoʼob tsaypachtik ka u kʼaʼaytoʼob le maʼalob péektsiloʼ, le oʼolal tu káajsaj u kʼaʼaytikoʼob le Reino tiʼ tuláakal yóokʼol kaaboʼ. Tu jaʼabil 1931, kʼaj óoltaʼaboʼob bey u j-jaajkunajoʼob Jéeobaeʼ. Xok Baʼaxoʼob 1:8; 2:1, 4, 11; 5:42.

4. ¿Bix u múuchʼ meyaj u j-jaajkunajoʼob Jéeoba?

Teʼ yáax siglooʼ, le máaxoʼob meyajtik Dios yanoʼob tiʼ jejeláas luʼumiloʼoboʼ jach áantaʼaboʼob tumen le ancianoʼob yanoʼob ichil le Cuerpo Gobernante, nuʼuktaʼab tumen Jesús u Poolil le múuchʼuliloʼ (Baʼaxoʼob 16:4, 5). Bejlaʼaʼ xaneʼ, u j-jaajkunajoʼob Jéeoba yanoʼob tuláakal yóokʼol kaabeʼ ku yáantaʼaloʼob tumen junmúuchʼ máakoʼob yanoʼob ichil le Cuerpo Gobernanteoʼ. Letiʼob nuʼuktik le meyajoʼob ku beetaʼal tu najiloʼob Betel tiʼ u j-jaajkunajoʼob Jéeobaoʼ. Teʼeloʼ ku suʼutul, ku beetaʼal yéetel ku túuxtaʼal jóoʼsaʼaniloʼob ich maas tiʼ seiscientos tʼaanoʼob utiaʼal u xoʼokol le Bibliaoʼ. Yéetel u yáantaj le Bibliaoʼ, le Cuerpo Gobernanteoʼ ku líiʼsik u yóol yéetel ku nuʼuktik le maas tiʼ cien mil múuchʼuliloʼob yanoʼob tuláakal yóokʼol kaaboʼ. Tiʼ cada múuchʼulileʼ, yaan ancianoʼob kanáantik yéetel yaabilaj le máaxoʼob meyajtik Diosoʼ. Xok 1 Pedro 5:2, 3.

U j-jaajkunajoʼob Jéeobaeʼ ku múuchʼ kʼaʼaytikoʼob le maʼalob péektsiloʼ yéetel ku kaʼanskoʼob tiʼ uláakʼ máakoʼob bix jeʼel u tsaypachtikoʼob Jesuseʼ. Jeʼex tu beetil le apostoloʼoboʼ, letiʼobeʼ ku kʼaʼaytajoʼob joonaj joonajil (Baʼaxoʼob 20:20). Tsʼoʼoleʼ ku tsʼáaikoʼob xook yéetel le Biblia tiʼ le máaxoʼob u yaabiltmoʼob u jaajiloʼ. Baʼaleʼ u j-jaajkunajoʼob Jéeobaeʼ maʼ chéen ku múuchʼ meyajoʼobiʼ. U yaabiltmubaʼob, ku yilkubaʼob bey sukuʼuntsiloʼobeʼ yéetel yaantiʼob juntúul Taata jach yaan u yaabilaj (2 Tesalonicailoʼob 1:3). Tumen múuchʼ u meyajoʼob utiaʼal u kiʼimakkúuntkoʼob u yóol Jéeoba yéetel utiaʼal u yáantkoʼob uláakʼ máakoʼobeʼ, letiʼob le máaxoʼob maas kiʼimak u yóoloʼob tiʼ tuláakal le yóokʼol kaabaʼ. Xok Salmo 33:12; Baʼaxoʼob 20:35.