Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 Xook 4

¿Máax Jesucristo?

¿Máax Jesucristo?

¿Baʼax jatsʼuts modos beet u taaktal u náatsʼal máak tu yiknal Jesús? (MATEO 11:29; MARCOS 10:13-16)

1. ¿Bix úuchik u yantal Jesús?

Táanil tiʼ u síijil Jesús way Luʼumeʼ kuxaʼan kaʼach bey juntúul ángel teʼ kaʼanoʼ, letiʼeʼ maʼ bey jeʼex u maasil máakoʼobeʼ (Juan 8:23). Jesuseʼ letiʼ le yáax beetaʼab tumen Diosoʼ. Ka tsʼoʼokeʼ tu yáantaj Jéeoba utiaʼal ka u beet tuláakal u maasil baʼaloʼoboʼ. Teʼ Bibliaoʼ ku yaʼalaʼaltiʼ u «juntúuliliʼ» Paal Dios tumen mix máak áant utiaʼal ka u beete (Juan 1:14). Jesuseʼ ku yaʼalaʼal xan tiʼ «le Tʼaan[oʼ]», tumen letiʼ bis u yaʼalmajtʼaanoʼob u Taata. Xok Proverbios 8:22, 23, 30; Colosasiloʼob 1:15, 16.

2. ¿Baʼaxten taal Jesús way Luʼumeʼ?

Utiaʼal ka páajchajak u síijil Jesús way Luʼumeʼ, Dioseʼ tu máansaj u kuxtal u Paal tu jobnel María, juntúul x-chʼúupal judía. Le oʼolal Jesuseʼ maʼ yanchaj juntúul u taata way Luʼumeʼ (Lucas 1:30-35). Letiʼeʼ taal way Luʼum utiaʼal 1) u kaʼansik u jaajil yoʼolal Dios, 2) u kaʼansiktoʼon bix unaj k-beetik baʼax ku yaʼalik Dios tak ken k-máans talamiloʼob, yéetel 3) u tsʼáaik u kuxtal «bey junpʼéel boʼol» utiaʼal u salvartikoʼoneʼ. Xok Mateo 20:28.

3. ¿Baʼaxten kʼaʼabéetchaj u tsʼaʼabal junpʼéel boʼol?

Junpʼéel boʼoleʼ, letiʼe bajux ku boʼotaʼal utiaʼal u salvartaʼal juntúul máakoʼ (Éxodo 21:29, 30). Dioseʼ maʼ tu beetaj máak utiaʼal ka chʼíijik yéetel ka kíimik kaʼachiʼ. ¿Bix k-ojéeltik leloʼ? Tumen letiʼeʼ tu yaʼalaj tiʼ Adán chéen yaan u kíimil wa maʼ tu yuʼubik tʼaan, lelaʼ letiʼe baʼax ku yaʼalik le Biblia «kʼebanoʼ». Le oʼolal wa maʼ u kʼebantal kaʼacheʼ, mix bikʼin kun kíimil (Génesis 2:16, 17; 5:5). Le Bibliaoʼ ku yaʼalikeʼ, le kíimiloʼ «ook» yóokʼol kaab yoʼolal le baʼax tu beetaj Adanoʼ. Lelaʼ u kʼáat u yaʼaleʼ, Adán máans le kʼeban yéetel le kíimil tiʼ u paalaloʼoboʼ.  Le oʼolal kʼaʼabéetchaj u tsʼaʼabal junpʼéel boʼol. Xok Romailoʼob 5:12; 6:23.

¿Chéen máax jeʼel u páajtal u tsʼáaik le boʼol yéetel u salvartikoʼon tiʼ le kíimiloʼ? Le ken kíimik máakeʼ chéen u kʼeban ku boʼotik. Mix juntúul kʼeban wíinik jeʼel u páajtal u boʼotik u kʼeban yaanal máakeʼ. Xok Salmo 49:7-9.

4. ¿Baʼaxten kíim Jesús?

Jesuseʼ maʼ jeʼex toʼoneʼ, letiʼeʼ maʼ yanchaj u kʼebaniʼ, mantatsʼ tu beetaj baʼax u kʼáat Jéeoba. Le oʼolal maʼ kíim utiaʼal u boʼotik u kʼebanoʼobiʼ, baʼaxeʼ kíim utiaʼal u boʼotik u kʼeban tuláakal máak. Dioseʼ tu yeʼesaj jach nojoch u yaabiltmaj máak le ka tu túuxtaj u Paal kíimil t-oʼolaloʼ. Jesuseʼ tu yeʼesaj xan u yaabiltmoʼon úuchik u beetik baʼax aʼalaʼabtiʼ tumen u Taata yéetel úuchik u tsʼáaik u kuxtal t-oʼolaloʼ. Xok Juan 3:16; Romailoʼob 5:18, 19.

5. ¿Baʼax táan u beetik Jesús teʼ kʼiinoʼobaʼ?

Le tiaʼan kaʼach Jesús way Luʼumeʼ, tu tsʼakaj kʼojaʼanoʼob, tu kaʼa kuxkíintaj kimenoʼob yéetel tu yáantaj le máaxoʼob ku muʼyajoʼoboʼ. Bey tu yeʼesil baʼaxoʼob ken u beet maʼ kun xáantal yoʼolal tuláakal le máaxoʼob uʼuyik u tʼaanoʼ (Mateo 15:30, 31; Juan 5: 28). Le ka kíim Jesuseʼ, Dioseʼ tu kaʼa kuxkíintaj bey juntúul angeleʼ (1 Pedro 3:18). Teʼ kaʼanoʼ, tu x-noʼoj kʼab Dioseʼ, Jesuseʼ yanchaj u páaʼtik ka tsʼaʼabak u beet u reyil utiaʼal u gobernartik tuláakal le Luʼumaʼ (Hebreoʼob 10:12, 13). Teʼ kʼiinoʼobaʼ, Jesuseʼ táan u beetik u reyil teʼ kaʼanoʼ yéetel le máaxoʼob tsaypachtik way Luʼumeʼ táan u kʼaʼaytikoʼob tiʼ tuláakal yóokʼol kaab le maʼalob péektsilaʼ. Xok Daniel 7:13, 14; Mateo 24:14.

Maʼ kun xáantaleʼ Jesús le máax táan u beetik u reyiloʼ yaan u láaj luʼsik le muʼyajiloʼob yéetel le máaxoʼob beetik u yantaloʼ. Tuláakal le máaxoʼob ku tsʼáaik u fejoʼob tiʼ Jesús yéetel ku beetkoʼob baʼax ku yaʼalikoʼ, yaan u kuxtaloʼob minaʼan u xuul teʼ paraíso kun yantal way Luʼumeʼ. Xok Salmo 37:9-11.