Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 Xook 2

¿Máax Dios?

¿Máax Dios?

1. ¿Baʼaxten unaj k-adorartik Dios?

Dioseʼ letiʼe Máax beetmil tuláakal baʼax yaan teʼ kaʼan bey xan way Luʼumeʼ. Letiʼeʼ maʼ yanchaj káajal tiʼiʼ, yéetel minaʼan xuʼulultiʼ (Salmo 90:2). Letiʼ beet u tsʼíibtaʼal le maʼalob péektsiloʼob yanoʼob teʼ Bibliaoʼ (1 Timoteo 1:11). Dios tsʼáatoʼon kuxtal, le oʼolal chéen letiʼ unaj k-adorartik. Xok Apocalipsis 4:11.

2. ¿Bix Dios?

U jaajileʼ mix máak u yil Dios, tumen letiʼeʼ juntúul espíritu yéetel jach nojoch u páajtalil, letiʼeʼ maʼ bey jeʼex le máakoʼob kajakbaloʼob way Luʼumeʼ (Juan 1:18; 4:24). Baʼaleʼ jeʼel u páajtal k-kʼaj óoltik bix u modos Jéeoba yoʼolal le baʼaxoʼob u beetmoʼ. Le jejeláas baʼaxoʼob yanoʼob utiaʼal jaantbil yéetel le jejeláas looloʼoboʼ, ku yeʼesiktoʼon u yaabilaj yéetel le naʼat yaantiʼoʼ. Le u sen nojchil le universooʼ, ku yeʼesiktoʼon jach táaj yaan u páajtalil. Xok Romailoʼob 1:20.

Uláakʼ bix jeʼel u páajtal k-maas kʼaj óoltik Dioseʼ letiʼe ken k-xok le Bibliaoʼ. Teʼeloʼ ku yeʼesiktoʼon baʼax uts tu tʼaan, baʼax u pʼekmaj, bix u tratartik máak yéetel bix u biskuba yéetel u kaajal. Xok Salmo 103:7-10.

3. ¿Yaan wa u kʼaabaʼ Dios?

Jesuseʼ tu yaʼalaj: «K-Taata yanech teʼ kaʼanoʼ, kiliʼichkúuntaʼak a kʼaabaʼ» (Mateo 6:9). Kex yaʼab tsikbeʼen kʼaabaʼob ku tsʼaʼabal tiʼ Dioseʼ, chéen junpʼéel u kʼaabaʼ yaan. Tiʼ cada idiomaeʼ jelaʼan bix u yaʼalaʼal. Ich mayaeʼ tsʼoʼok u suuktal u yaʼalaʼal «Jéeoba». Baʼaleʼ yaan máakoʼobeʼ ku yaʼalikoʼob tiʼ: «Yavé» (Yahveh). Xok Marcos 12:29.

Tiʼ yaʼab bibliaʼobeʼ tsʼoʼok u kʼeʼexel le kʼaabaʼ Jéeoba yéetel tsikbeʼen tʼaanoʼob jeʼex Yuumtsil wa Dios. Baʼaleʼ ka tsʼíibtaʼab  le Bibliaoʼ, u kʼaabaʼ Dioseʼ óoliʼ siete mil u téenel ku chíikpajal kaʼachiʼ. Jesuseʼ tu chʼaʼchiʼitaj u kʼaabaʼ Dios le ka tu kaʼansaj le máakoʼoboʼ. Xok Juan 17:26.

Jeʼex le taatatsil jach u yaabiltmaj u paalaʼ, Dioseʼ yaan baʼax táan u beetik utiaʼal k-utsil

4. ¿Jach wa tu jaajil taak u yáantkoʼon Jéeoba?

Wa jach tu jaajil u yaabiltmoʼon Dioseʼ, ¿baʼaxten maʼ u luʼs le baʼaxoʼob beetik k-muʼyajoʼ? Yaan máaxoʼob aʼalikeʼ Dioseʼ ku beetik k-muʼyaj utiaʼal u túuntik k-óol, baʼaleʼ leloʼ maʼ jaajiʼ. Xok Santiago 1:13.

Dioseʼ u tsʼaamaj u páajtalil tiʼ máak utiaʼal ka u yéey baʼax ken u beet yéetel u kuxtal. ¿Yaan wa k-yéeyik k-meyajtik Dios utiaʼal k-eʼesiktiʼ jach k-yaabiltmaj? (Josué 24:15.) Yaʼab máakeʼ ku yéeyik u beetik baʼaloʼob kʼaastak, le oʼolal yaʼab máak ku muʼyaj. Jéeobaeʼ ku yaatal u yóol ken u yil le baʼaxoʼob maʼ maʼalobtak ku beetaʼalaʼ. Xok Génesis 6:5, 6.

Jéeobaeʼ juntúul Dios jach u yaabiltmoʼon yéetel u kʼáat ka yanaktoʼon kiʼimak óolal, le oʼolal maʼ tun xáantaleʼ yaan u luʼsik le muʼyajiloʼ bey xan le máaxoʼob beetik u yantaloʼ. Dioseʼ jach yaan baʼax oʼolal maʼ u jáan luʼs le muʼyajiloʼ. Teʼ xook 8, yaan k-kanik baʼaxten maʼ u luʼsiʼ. Xok 2 Pedro 2:9; 3:7, 13.

5. ¿Bix jeʼel u páajtal k-natsʼikba tiʼ Dioseʼ?

Jéeobaeʼ ku chaʼik k-natsʼikba tu yiknal ich oración. Letiʼeʼ jach tu jaajil u kʼáat u yáant cada juntúul tiʼ toʼon (Salmo 65:2; 145:18). Tsʼoʼoleʼ jach ku yilik bix k-tsʼáaik k-óol meyajte, yéetel kex yaan kʼiin k-beetik baʼax kʼaaseʼ, letiʼeʼ jach jeʼel u perdonarkoʼoneʼ. Le oʼolal kex kʼebanoʼoneʼ, jeʼel u páajtal k-bisikba maʼalob tu yéeteleʼ. Xok Salmo 103:12-14; Santiago 4:8.

Tumen Jéeoba tsʼaamiltoʼon le kuxtaloʼ, jach unaj k-yaabiltik maas ke tiʼ uláakʼ máak (Marcos 12:30). Jeʼex u bin k-maas kaanbal tiʼ Dioseʼ bey xan unaj k-beetik le baʼax ku yaʼalikoʼ, beyoʼ k-eʼesik k-yaabiltmaj yéetel k-maas natsʼikba tu yiknal. Xok 1 Timoteo 2:4; 1 Juan 5:3.