Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 Xook 3

¿Jach wa tiʼ Dios u taal le maʼalob péektsiloʼoboʼ?

¿Jach wa tiʼ Dios u taal le maʼalob péektsiloʼoboʼ?

1. ¿Máax tiʼ u taal le Bibliaoʼ?

Le maʼalob péektsil ku yaʼalik yaan u kuxtal máak mantatsʼ teʼ Luʼumaʼ, tiʼ tsʼíibtaʼan teʼ Bibliaoʼ (Salmo 37:29). Le Bibliaoʼ yaan 66 mejen libroʼob tiʼ. Dios nuʼukt 40 máakoʼob jach chúukaʼan u yóoloʼob utiaʼal ka u tsʼíibtoʼob. Le yáax cinco libroʼoboʼ tsʼíibtaʼaboʼob tumen Moisés kex walajki tres mil quinientos jaʼaboʼobaʼ. Le u tsʼook librooʼ tsʼíibtaʼab tumen apóstol Juan kex walajki mil novecientos jaʼaboʼobaʼ. Le tuukuloʼob tsʼíibtaʼanoʼob teʼ Bibliaoʼ tiʼ Dios u taal. Letiʼ nuʼukt le máakoʼob yéetel u kiliʼich muukʼ utiaʼal ka u tsʼíibtoʼoboʼ (2 Samuel 23:2). Letiʼobeʼ tu tsʼíibtoʼob u tuukuloʼob Dios, maʼ u tuukuloʼobiʼ. Le oʼolal ku yaʼalaʼal tiʼ Jéeoba u taal le Bibliaoʼ. Xok 2 Timoteo 3:16; 2 Pedro 1:20, 21.

2. ¿Baʼaxten jeʼel u páajtal k-kʼubik k-óol tiʼ le baʼax ku yaʼalik le Bibliaoʼ?

Le Bibliaoʼ tiʼ Dios u taal yéetel yaan u láaj béeychajal le baʼax ku yaʼalikoʼ. Lelaʼ maʼ tu páajtal u beetaʼal tumen mix juntúul kʼeban wíinik (Josué 23:14). Chéen le Dios jach yaan u páajtalil jeʼel u béeytal u jach aʼalik baʼax ku taal u kʼiin u yúuchloʼ. Xok Isaías 42:9; 46:10.

Toʼoneʼ k-ojel minaʼan uláakʼ libro jeʼex le Bibliaoʼ. Tsʼoʼok u beetaʼal u millonesil copiaʼob tiʼ, yéetel tsʼoʼok u jóoʼsaʼal ichil u cientosil tʼaanoʼob. Kex úuch tsʼíibtaʼakeʼ, le baʼaxoʼob ku yaʼalikoʼ maʼatech u bin tu contra le baʼax ku yaʼalik le cienciaoʼ. Tsʼoʼoleʼ le 40 máakoʼob tsʼíibtoʼ, mix juntúul bin tu contra le baʼax tu tsʼíibtoʼoboʼ. * Cada junpʼéel u táan juʼunil le Bibliaoʼ ku yeʼesik u yaabilaj Dios yéetel láayliʼ yaan u páajtalil u kʼexik u kuxtal máakeʼ. Yoʼolal tuláakal lelaʼ, yaʼab máakoʼob tsʼoʼok u tsʼáaikoʼob cuenta tiʼ Dios u taal le Bibliaoʼ. Xok 1 Tesalonicailoʼob 2:13.

 3. ¿Tiʼ baʼax ku tʼaan le Bibliaoʼ?

Le Bibliaoʼ maases ku tʼaan tiʼ le baʼaxoʼob u tukultmaj u beetik Dios yoʼolal le máakoʼoboʼ. Ku tsolik bix tu peʼertil le yáax máakoʼob u jatsʼuts páajtalil u kuxtaloʼob teʼ paraísooʼ, bey xan ku yaʼalik bix kun kaʼa sutbil Paraísoil le Luʼumaʼ. Xok Apocalipsis 21:4, 5.

Ichil le Bibliaoʼ yaan leyoʼobiʼ, nuʼuktajoʼob yéetel tsolnuʼukoʼobiʼ. Ku tʼaan xan tiʼ bix tu bisiluba Jéeoba yéetel le máakoʼob úuchjeakiloʼ; lelaʼ ku yeʼesiktoʼon bix u modos. Le Bibliaoʼ jeʼel u yáantkech a kʼaj óolt Dioseʼ. Tsʼoʼoleʼ ku kaʼansik xan bix jeʼel u páajtal k-bisikba tu yéeteleʼ. Xok Salmo 19:7, 11; Santiago 2:23; 4:8.

4. ¿Baʼax jeʼel u yáantkoʼon k-naʼat le Bibliaoʼ?

Utiaʼal u naʼataʼal «baʼax u kʼáat u yaʼal le Kiliʼich Tsʼíiboʼoboʼ», Jesuseʼ tu chʼaʼchiʼitaj le tekstoʼoboʼ yéetel tu tsolaj baʼax u kʼáat u yaʼaloʼob. Utiaʼal k-naʼatik baʼax ku kaʼansik le Bibliaoʼ, le folletoaʼ yaan u chʼaʼchiʼitik yéetel u tsolik le tekstoʼob jeʼex úuchik u beetik Jesuseʼ. Xok Lucas 24:27, 45.

U jaajileʼ yaan u taasiktech kiʼimak óolal a kʼaj óoltik Dios bey xan le baʼax u tukultmaj u beetik yoʼolal máakoʼ. Baʼaleʼ yaan máakoʼobeʼ maʼ u kʼáat u yojéeltoʼob mix baʼal yoʼolal le maʼalob péektsiloʼ yéetel yaneʼ ken óotaʼak tsikbaltbiltiʼobeʼ ku tsʼíikiloʼob. Baʼaleʼ maʼ a chaʼik u lúuʼsaʼal a wóol tumen le máakoʼob beyaʼ. Jeʼex u yaʼalik le Bibliaoʼ, kʼaʼabéet a kʼaj óoltik Dios utiaʼal u yantaltech kuxtal minaʼan u xuul. Xok Juan 17:3.

 

^ xóot’ol 7 Ilawil le folleto Le Bibliaoʼ tiʼ baʼax ku tʼaan.