Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 Xook 9

¿Bix jeʼel u yantal kiʼimak óolal ichil le familiaʼoboʼ?

¿Bix jeʼel u yantal kiʼimak óolal ichil le familiaʼoboʼ?

1. ¿Baʼax kʼaʼanaʼan utiaʼal u yantal kiʼimak óolal ichil le familiaoʼ?

Le maʼalob péektsiloʼoboʼ tiʼ Jéeoba u taal, letiʼeʼ juntúul Dios kiʼimak u yóol yéetel u kʼáat ka kiʼimakchajak u yóol le familiaʼoboʼ (1 Timoteo 1:11). Letiʼ beet u yantal le tsʼoʼokol beeloʼ. Le tsʼoʼokol beeloʼ jach kʼaʼanaʼan utiaʼal ka yanak kiʼimak óolal ichil le familiaoʼ yéetel chéen bey jeʼel u páajtal u líiʼsik máak maʼalob u paalaloʼobeʼ. Le máaxoʼob meyajtik Diosoʼ unaj u yilik u tsʼoʼokol u beeloʼob jeʼex u yaʼalik le ley tuʼux kajaʼanoʼoboʼ. Xok Lucas 2:1, 4, 5.

¿Bix u yilik Dios le tsʼoʼokol beeloʼ? Letiʼeʼ maʼ u kʼáat ka u pʼatuba le máaxoʼob tsʼokaʼan u beeloʼoboʼ. Jéeobaeʼ maʼ u kʼáat ka u tus u núup máak yéetel yaanaliʼ (Hebreoʼob 13:4). Letiʼeʼ u pʼeek ka u divorciartuba máak (Malaquías 2:16). Baʼaleʼ ku chaʼik u divorciarkuba máak yéetel u kaʼa tsʼoʼokol u beel, wa juntúul tiʼ letiʼob ku núupkʼebantal. Xok Mateo 19:3-6, 9.

2. ¿Bix unaj u biskuba le íichamtsil yéetel le atantsiloʼ?

Jéeobaeʼ tu beetaj wíinik bey xan koʼolel utiaʼal ka páajchajak u paklan áantkubaʼob (Génesis 2:18). U poolil le familiaoʼ letiʼe íichamtsiloʼ, le beetik unaj u tsʼáaik baʼaxoʼob kʼaʼabéettiʼob yéetel unaj u kaʼanskoʼob yoʼolal Dios. Ku kaxtik xan u yutsil u yatan tumen u yaabiltmaj. Cada juntúul tiʼ le tsʼokaʼan u beeloʼoboʼ unaj u yeʼesik yaabilaj yéetel tsiikil ichiloʼob. Tumen tu kaʼatúulal kʼebanoʼobeʼ, jach kʼaʼabéet u kankoʼob perdonar utiaʼal ka yanak kiʼimak óolal ichiloʼob. Xok Efesoiloʼob 4:31, 32; 5:22-25, 33; 1 Pedro 3:7.

3. ¿Unaj wa a pʼatik a núup tumen minaʼanteʼex kiʼimak óolal?

Wa yaantech talamiloʼob yéetel a núupeʼ, tu kaʼatúulal unaj a tsʼáaik a wóoleʼex utiaʼal a wutskíintkeʼex yéetel yaabilaj (1 Corintoiloʼob  13:4, 5). U Tʼaan Dioseʼ maʼatech u yaʼalik tiʼ máak ka u pʼat u núup utiaʼal u yutskíintik chéen jeʼel baʼaxak talamil yaan ichiloʼobeʼ. Xok 1 Corintoiloʼob 7:10-13.

4. Paalaleʼex, ¿bix u kʼáat Dios ka xiʼikteʼex?

Jéeobaeʼ u kʼáat ka kiʼimakchajak a wóoleʼex. Letiʼ tsʼáaik le maas maʼalob tsolnuʼukoʼob yoʼolal bix jeʼel u kiʼimaktal a wóol ta táankelmileʼ. Letiʼeʼ u kʼáat ka a jóoʼs u yutsil le naʼat yaan tiʼ a taataʼoboʼ bey xan tiʼ le baʼaxoʼob maʼalobtak u yojel u beetoʼoboʼ (Colosailoʼob 3:20). Jéeobaeʼ u kʼáat xan ka kiʼimakchajak a wóol ikil a beetik baʼaxoʼob uts tu tʼaan letiʼ yéetel u Hijo. Xok Eclesiastés 11:9–12:1; Mateo 19:13-15; 21:15, 16.

5. Taatatsileʼex, ¿baʼax unaj a beetkeʼex utiaʼal ka kiʼimakchajak u yóol a paalaleʼex?

Le taatatsiloʼoboʼ jach unaj u yilik u tséentik u paalal, u yantal tuʼux u kajtaloʼob bey xan u yantal u nookʼoʼob (1 Timoteo 5:8). Baʼaleʼ utiaʼal ka jach kiʼimakchajak u yóoloʼobeʼ, unaj xan u kaʼansaʼaloʼob u yaabiltoʼob Dios (Efesoiloʼob 6:4). Le bix a weʼesik yaabilaj tiʼ Diosoʼ jach jeʼel u yáantik a paalaleʼ. Wa le tsolnuʼukoʼob ka tsʼáaik tiʼ u taaloʼob tiʼ u Tʼaan Dioseʼ, leloʼ jeʼel u yáantik a paalal utiaʼal ka tuukulnakoʼob tiʼ baʼaloʼob maʼalobtakeʼ. Xok Deuteronomio 6:4-7; Proverbios 22:6.

Jach maʼalob ka a líiʼs u yóol a paalal bey xan ka a waʼaltiʼob baʼax maʼalob tu beetoʼob. Maʼalob xan ka a tsol u nuʼuk tiʼob yéetel ka a castigartoʼob ken kʼaʼabéetchajak. U beetaʼal beyaʼ, jeʼel u yáantaj utiaʼal maʼ u beetkoʼob baʼaloʼob jeʼel u luʼsiktiʼob le kiʼimak óolaloʼ (Proverbios 22:15). Baʼaleʼ maʼ unaj u jach castigartaloʼobiʼ mix u jach kʼeʼekʼeyaʼaloʼobiʼ. Xok Colosasiloʼob 3:21.

U j-jaajkunajoʼob Jéeobaeʼ tsʼoʼok u beetkoʼob yaʼab jóoʼsaʼaniloʼob utiaʼal u yáantkoʼob le taatatsiloʼob yéetel le paalaloʼoboʼ. Le jóoʼsaʼaniloʼobaʼ ku chʼaʼabloʼob tiʼ baʼax ku yaʼalik le Bibliaoʼ. Xok Salmo 19:7, 11.