Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 Xook 5

¿Baʼax u tukultmaj Dios utiaʼal le Luʼumaʼ?

¿Baʼax u tukultmaj Dios utiaʼal le Luʼumaʼ?

1. ¿Baʼaxten tu beetaj Dios le Luʼumaʼ?

Jéeobaeʼ tu beetaj le Luʼum utiaʼal ka kajlak máakoʼoboʼ. Le ka beetaʼab Adán yéetel Evaeʼ, le yáax máakoʼoboʼ, maʼ beetaʼaboʼob utiaʼal ka kajlakoʼob kaʼaniʼ. Dioseʼ tsʼokaʼaniliʼ u beetik angeloʼob utiaʼal ka kajlakoʼob teʼeloʼ (Job 38:4, 7). Jéeobaeʼ tu tsʼáaj le yáax máak tiʼ junpʼéel jatsʼuts jardín ku kʼaabaʼtik Edén (Génesis 2:15-17). Tsʼoʼoleʼ tu tsʼáaj u páajtalil tiʼ letiʼ bey xan tiʼ u paalal u kuxtaloʼob minaʼan u xuul way Luʼumeʼ. Xok Salmo 37:29; 115:16.

Tu káajbaleʼ u jardinil Edeneʼ chéen tiʼ u chan xóotʼ luʼum yaan kaʼachi. Adán yéetel Evaeʼ unaj u yantal kaʼach u paalaloʼob utiaʼal ka u chupoʼob le Luʼumaʼ yéetel ka u láaj sutoʼob paraísoil (Génesis 1:28). Le Luʼumaʼ beetaʼab utiaʼal u kajtal máakiʼ, le oʼolal mix bikʼin kun xuʼulsbiltiʼ. Xok Salmo 104:5.

2. ¿Baʼaxten maʼ junpʼéel paraíso le Luʼum bejlaʼaʼ?

Adán yéetel Evaeʼ maʼ tu yuʼuboʼob u tʼaan Diosiʼ, le oʼolal jóoʼsaʼaboʼob teʼ jardinoʼ. Bey túun úuchik u peʼerchajal le Paraísooʼ, yéetel mix máak páatak u kaʼa jatsʼutskíintik jeʼex yanik kaʼacheʼ. Le oʼolal le Bibliaoʼ ku yaʼalik: «Ku pʼatik le yóokʼol kaab tu kʼab loolob máakoʼob[oʼ]» (Job 9:24). Xok Génesis 3:23, 24.

¿U kʼáat wa túun u yaʼal Jéeobaeʼ maʼ ken u béeykunt le baʼax u tukultmaj utiaʼal le máakoʼoboʼ? Maʼatech. Letiʼeʼ yaan tuláakal páajtalil tiʼ yéetel mantatsʼ ku béeykuntik baʼax ku yaʼalik (Isaías 45:18). Maʼ kun xáantaleʼ, Jéeobaeʼ yaan u tsʼáaik kuxtal minaʼan u xuul tiʼ le máakoʼob jeʼex u tukultmil tu káajbaloʼ. Xok Salmo 37:11, 34.

3. ¿Bix kun sutbil paraísoil le Luʼumaʼ?

Le Luʼumaʼ yaan u suʼutul Paraísoil le ken gobernarnak Jesús, u Reyil u Reino Diosoʼ. Teʼ baʼateʼel ku kʼaabaʼtik Armagedonoʼ, Jesús yéetel le angeloʼoboʼ yaan u xuʼulskoʼob tiʼ tuláakal le máaxoʼob ku tsʼáaikubaʼob tu contra Diosoʼ. Ken tsʼoʼokkeʼ yaan u kʼalik  Satanás mil jaʼaboʼob. U kaajal Jéeobaeʼ yaan u salvarkuba ken taalak le xuʼulsajiloʼ, tumen yaan u nuʼuktaʼal yéetel yaan u kanáantaʼal tumen Jesús. Letiʼobeʼ yaan u kiʼimaktal u yóoloʼob tumen yaan u kuxtaloʼob utiaʼal kʼiinoʼob minaʼan u xuul teʼ Paraísooʼ. Xok Apocalipsis 20:1-3; 21:3, 4.

4. ¿Baʼax kʼiin ken xuʼulsaʼak le muʼyajiloʼ?

¿Baʼax kʼiin ken u xuʼuls Dios tiʼ le kʼasaʼaniloʼ? Jesuseʼ tu tsʼáaj junpʼéel «chíikulal» kun eʼesik tsʼoʼok u náatsʼal u kʼiinil u xuʼulsaʼal. Tuláakal le baʼaxoʼob ku yúuchul bejlaʼaʼ, jeʼel tak u beetkoʼob u kíimil máakeʼ, ku yeʼesiktoʼon «táan u taal u tsʼoʼokol tiʼ le yóokʼol kaabaʼ». Xok Mateo 24:3, 7-14, 21, 22.

Ichil le mil jaʼaboʼob ken u gobernart Jesús le Luʼum desde teʼ kaʼanoʼ, yaan u xuʼulsik tiʼ tuláakal le baʼaxoʼob beetik u muʼyaj máakoʼ (Isaías 9:6, 7; 11:9). Tsʼoʼoleʼ tumen yaan xan u beetik u Nojoch j-Kʼiinileʼ, yaan xan u perdonartik u kʼeban le máaxoʼob yaabiltmil Diosoʼ. Jeʼex túun k-ilkoʼ, tu yoʼolal Jesuseʼ, Dioseʼ yaan u luʼsik le kʼojaʼaniloʼoboʼ, le chʼíijiloʼ yéetel le kíimiloʼ. Xok Isaías 25:8; 33:24.

5. ¿Máaxoʼob kun kuxtaloʼob teʼ Paraísooʼ?

Teʼ Najil Reinooʼ yaan a kʼaj óoltik máakoʼob u yaabiltmoʼob Dios yéetel u kʼáat u beetoʼob baʼax ku yaʼalik

Le máaxoʼob beetik baʼax uts tu tʼaan Diosoʼ yaan u kuxtaloʼob teʼ Paraísooʼ (1 Juan 2:17). Jesuseʼ tuʼ yaʼalaj tiʼ u disipuloʼob ka u kaxtoʼob le máaxoʼob uts u puksiʼikʼaloʼob utiaʼal ka u yáantoʼob u kanoʼob baʼax unaj u beetkoʼob utiaʼal ka kʼaʼamkoʼob tumen Dios. Bejlaʼeʼ, Jéeobaeʼ táan u kaʼansik tiʼ u millonesil máakoʼob bix jeʼel u kuxtaloʼob teʼ Paraísooʼ (Sofonías 2:3). Tu Najil Reino u j-jaajkunajoʼob Jéeobaeʼ, ku kaʼansaʼal tiʼ wíinik bix jeʼel u maas beetkuba juntúul maʼalob íichamtsil yéetel tiʼ le koʼoleloʼoboʼ bix jeʼel u beetik u maʼalob atantsiloʼobeʼ. Teʼ xanoʼ, le paalaloʼob yéetel u taataʼoboʼ ku múul adorartikoʼob Dios yéetel ku kankoʼob bix jeʼel u jóoʼskoʼob u yutsil le maʼalob péektsiloʼoboʼ. Xok Miqueas 4:1-4.