Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 Xook 12

¿Bix jeʼel u natsʼkuba máak tiʼ Dioseʼ?

¿Bix jeʼel u natsʼkuba máak tiʼ Dioseʼ?

1. ¿Ku yuʼubik wa Dios tuláakal le payalchiʼoboʼ?

Dioseʼ ku invitartik tuláakal máak utiaʼal ka u natsʼuba tiʼ letiʼ ich payalchiʼ wa oración (Salmo 65:2). Kex beyoʼ letiʼeʼ maʼatech u yuʼubik wa maʼatech u kʼamik tuláakal le payalchiʼoboʼ. Jeʼex wa yaan juntúul íichamtsil ku mixbaʼalkúuntik u yataneʼ, jeʼel u pʼáatal maʼ u yuʼubaʼal u payalchiʼ tumen Dioseʼ (1 Pedro 3:7). Jeʼex le ka seguernaj u beetik le israelitaʼob baʼaloʼob maʼ maʼalobtakoʼobeʼ, Dioseʼ xuʼul u kʼamik u payalchiʼob. Baʼaleʼ letiʼeʼ ku kʼamik u payalchiʼ le máaxoʼob ku lúubloʼob tiʼ junpʼéel nojoch kʼeban yéetel ku arrepentiroʼoboʼ. Xok Isaías 1:15; 55:7.

2. ¿Bix unaj k-payalchiʼ?

Le payalchiʼoʼ táakaʼan ichil k-adoración, le oʼolal chéen unaj k-payalchiʼ tiʼ Jéeoba, le Máax beetmiloʼonoʼ (Mateo 4:10; 6:9). Tsʼoʼoleʼ tumen kʼebanoʼoneʼ, chéen unaj k-payalchiʼ tu kʼaabaʼ Jesús le máax kíim tu yoʼolal k-kʼebanoʼoboʼ (Juan 14:6). Jéeobaeʼ maʼ u kʼáat ka k-kan de memoriail wa ka k-tsʼíibt k-payalchiʼobiʼ. Letiʼeʼ u kʼáateʼ t-puksiʼikʼal ka jóokʼok le baʼaxoʼob k-aʼaliktiʼoʼ. Xok Mateo 6:7; Filiposiloʼob 4:6, 7.

Le Máax beetmiloʼonoʼ ku páajtal u yuʼubik le payalchiʼob k-beetik ichil k-tuukuloʼ (1 Samuel 1:12, 13). Letiʼeʼ ku invitarkech utiaʼal ka payalchiʼinakech tiʼ jeʼel baʼalak súutukileʼ, jeʼex tu káajbal junpʼéel kʼiin bey xan ken tsʼoʼokok, ken janakech yéetel le ken yanaktech talamiloʼob. Xok Salmo 55:22; Mateo 15:36.

3. ¿Baʼaxten unaj k-bin teʼ muchʼtáambaloʼoboʼ?

Maʼ chéen chʼaʼabil u natsʼkuba máak tiʼ Diosiʼ, kuxaʼanoʼon ichil máakoʼob minaʼan u fejoʼob tiʼ yéetel maʼatech u creertikoʼob wa yaan u yantal jeetsʼelil way Luʼumeʼ (2 Timoteo 3:1, 4;  2 Pedro 3:3, 13). Toʼoneʼ kʼaʼabéet k-muchʼikba yéetel le máaxoʼob meyajtik Dios utiaʼal ka k-paklan k-líiʼs k-óol. Xok Hebreoʼob 10:24, 25.

K-muchʼikba yéetel le máaxoʼob u yaabiltmoʼob Diosoʼ jeʼel xan u yáantkoʼon k-natsʼba tiʼ letiʼeʼ. Le muchʼtáambaloʼob ku beetik u j-Jaajkunajoʼob Jéeobaoʼ ku yáantajoʼob utiaʼal u paklan muʼukʼaʼankúuntaʼal k-oksaj óolal wa k-fe. Xok Romailoʼob 1:11, 12.

4. ¿Bix jeʼel a natsʼkaba tiʼ Dioseʼ?

Jeʼel u páajtal a natsʼkaba tiʼ Jéeoba ikil a tuukul tiʼ le baʼaxoʼob ka kanik teʼ Bibliaoʼ. Tukult baʼax ku kaʼansiktech le baʼaxoʼob ku beetkoʼ, le baʼaxoʼob ku yaʼalikoʼ yéetel le baʼaxoʼob u yaʼalmaj u beetik maʼ kun xáantaloʼ. K-tuukul tiʼ baʼax k-xokik yéetel k-payalchiʼeʼ, ku yáantkoʼon k-naʼat bukaʼaj u yaabilaj yéetel u naʼat Dios. Xok Josué 1:8; Salmo 1:1-3.

Utiaʼal a natsʼkaba tiʼ Dioseʼ unaj a kʼubik a wóol tiʼ yéetel u yantaltech oksaj óolal. Baʼaleʼ le oksaj óolaloʼ bey jeʼex junpʼéel wa baʼax kuxaʼan kʼaʼabéet u tséentaʼaleʼ. Techeʼ jeʼel u páajtal a muʼukʼaʼankúuntik a oksaj óolal ikil a tuukul tiʼ le baʼaxoʼob ka creertikoʼ. Xok Mateo 4:4; Hebreoʼob 11:1, 6.

5. ¿Baʼax utsiloʼob jeʼel u taasiktech a natsʼkaba tiʼ Dioseʼ?

Jéeobaeʼ ku kanáantik le máaxoʼob yaabiltmiloʼ. Letiʼeʼ ku kanáantik máak tiʼ le baʼaxoʼob jeʼel u beetik u pʼáatal minaʼan u oksaj óolal yéetel jeʼel xan u náachkuntik máak tiʼ le kuxtal minaʼan u xuuloʼ (Salmo 91:1, 2, 7-10). Letiʼeʼ jach ku yaʼaliktoʼon baʼaxoʼob jeʼel u beetiktoʼon loob yéetel jeʼel u luʼsiktoʼon k-kiʼimak óolaleʼ. Jéeoba kaʼansiktoʼon le bix maas maʼalob jeʼel k-kuxtaloʼ. Xok Salmo 73:27, 28; Santiago 4:4, 8.