Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

Le kʼasaʼan angeloʼoboʼ u kʼáat u beetoʼob k-tsʼáaikba tu contra Dios

Le kʼasaʼan angeloʼoboʼ u kʼáat u beetoʼob k-tsʼáaikba tu contra Dios

Yaan baʼaxoʼob suukaʼan u beetaʼal tumen ku tuklaʼaleʼ le kimenoʼoboʼ ku yilkoʼob máak

¿Baʼaxten Satanás yéetel u kʼasaʼan angeloʼobeʼ jach ku yilik u tuskoʼonoʼob? Tumen u kʼáat u beetoʼob k-tsʼáaikba tu contra Dios jeʼex letiʼobeʼ. U kʼáatoʼob ka k-adorartoʼob. U kʼáatoʼob ka k-creert u tuusoʼob yéetel ka k-beet le baʼax maʼ utstutʼaan Jéeobaoʼ. Ichil le baʼaloʼob u pʼekmaj Diosoʼ tiaʼan yaʼab tiʼ le baʼaxoʼob suuk u beetaʼal utiaʼal le kimenoʼoboʼ.

Jach ku muʼyaj máak ken kíimik utúul máax u yaabiltmaj, yéetel maʼ kʼaas ka okʼolnak máakiʼ. Tak Jesús «okʼolnaj» le ka kíim Lázaro, u amigooʼ (Juan 11:35).

Bejlaʼeʼ jejeláas baʼaxoʼob suuk u beetaʼal yaan yil yéetel le kimenoʼoboʼ. Yaan tiʼ le baʼax ku beetaʼaloʼ maʼatech u bin tu contra le baʼax ku yaʼalik le Bibliaoʼ. Baʼaleʼ, yaneʼ ku beetaʼal tumen ku tuklaʼal láayliʼ kuxaʼan le kimenoʼoboʼ yéetel táan u yilkoʼob baʼax ku beetik wíinik. Le u velartaʼal utúul kimen bul áakʼaboʼ yéetel le u sen rezartaʼaloʼ, ku beetaʼal tumen ku tuklaʼal jeʼel u yáantaʼal u pixaneʼ. Baʼaleʼ le Bibliaoʼ ku yaʼalikeʼ le kimenoʼoboʼ «maʼ u yojeloʼob mix baʼal[iʼ]», le oʼolaleʼ le máaxoʼob beetik le baʼaloʼobaʼ táan u yáantkoʼob Satanás utiaʼal u tusik máakoʼob (Eclesiastés 9:5).

Uláakʼ baʼaxoʼob suukaʼan u beetaʼaleʼ, ku beetaʼal tumen ku tuklaʼal kʼaʼabéet u yáantaʼal le kimenoʼoboʼ

 Yaʼab xan tiʼ le baʼaxoʼob ku beetaʼal tu yoʼolal le kimenoʼoboʼ ku beetaʼal tumen ku tuklaʼal kʼaʼabéet u yáantaʼaloʼob, wa utiaʼal maʼ u pʼuʼujuloʼob ka u beetkoʼob kʼaas tiʼ máak. Yaan tuʼuxeʼ ken kíimik wa máaxeʼ ku beetaʼal rosarioʼob wa novenaʼob. Lelaʼ ku beetaʼal utiaʼal bin ka kʼuchuk u pixan le kimen tak tuʼux ku binoʼ. Uláakʼ baʼax suuk u beetaʼaleʼ letiʼe u tʼalkúuntaʼal janal yéetel ukʼul tiʼ le kimenoʼoboʼ.

Maʼ maʼalob u beetaʼal le baʼaloʼobaʼ, tumen chéen tuusoʼob ku taal tiʼ Satanás. ¿Utstutʼaan wa Jéeoba ka táakpajkoʼon tiʼ le tuusoʼob ku taaloʼob tiʼ u Kʼaasilbaʼaloʼ? ¡Maʼatech! (2 Corintoiloʼob 6:14-18.)

Máaxoʼob meyajtik Jéeobaeʼ upuliʼ maʼatech u táakpajloʼob tiʼ le baʼaloʼob tiʼ Satanás u taaloʼ. Baʼaxeʼ, letiʼobeʼ jach ku yilkoʼob u yáantkoʼob yéetel u líiʼskoʼob u yóol le máaxoʼob kuxaʼanoʼoboʼ. U yojloʼob chéen Jéeoba jeʼel u yáantik le máaxoʼob tsʼoʼok u kíimloʼoboʼ (Job 14:14, 15).

 Dioseʼ u pʼekmaj le espiritismooʼ

Yaan máakoʼobeʼ ku tʼaanoʼob yéetel le kʼasaʼan angeloʼoboʼ, wa ku beetkoʼob yéetel u yáantaj utúul j-meen. Le baʼax ku beetkoʼobaʼ espiritismo. Le pulyaʼajiloʼ, le wáayiloʼ, le magiaoʼ, le u jóoʼsaʼal suerteoʼ yéetel u tʼaan máak yéetel le kimenoʼoboʼ, baʼaloʼob táakaʼanoʼob ichil le espiritismooʼ.

Dioseʼ u pʼekmaj le baʼaloʼobaʼ. Letiʼeʼ u kʼáat ka adorartaʼak chéen letiʼ (Éxodo 20:5).

Le Bibliaoʼ ku yaʼalik maʼ maʼalob ka beetaʼak le baʼaloʼobaʼ: «Mix máak ichileʼex [...] [unaj] u beetikuba j-meenil, mix u táabal u yaʼal baʼaxoʼob ku taal u kʼiinil, mix u beetik u j-pulyaʼajil, mix u beetik u j-wáayil, mix u bin u kʼáatchiʼit le j-chuchuk naʼatoʼob, mix u kʼáatankil tiʼ pixanoʼob, mix u tʼaan yéetel kimenoʼob. Tumen Yuumtsileʼ u léem pʼeek máaxoʼob beetik le baʼaloʼoboʼ» (Deuteronomio 18:10-12).

¿Baʼaxten ku jach aʼaliktoʼon Jéeoba maʼ k-oksikba tiʼ le baʼaloʼobaʼ?

 Utiaʼal ka xiʼiktoʼon utsileʼ, Jéeobaeʼ ku yaʼaliktoʼon maʼ k-oksikba tiʼ le baʼaxoʼob yaan yil yéetel espiritismooʼ. Letiʼeʼ u yaabiltmaj wíinikoʼob yéetel u kʼáat ka xiʼiktiʼob utsil, u yojeleʼ le máaxoʼob ku yokskubaʼob yéetel le kʼasaʼan angeloʼoboʼ jach ku muʼyajoʼob.

Nildaeʼ, bey úuchiktiʼoʼ. Letiʼ kaʼacheʼ utúul x-meen kajakbal tu luʼumil Brasil. Le kʼasaʼan angeloʼoboʼ jach tu beetoʼob u muʼyaj. Letiʼeʼ ku yaʼalik: «Le kʼasaʼan pixanoʼoboʼ [...] ku yokloʼob kaʼach tin wíinklil. Yaan kʼiineʼ tin wóol yanen, baʼaleʼ yaan kʼiineʼ maʼatech, le oʼolal internartaʼaben, tumen ku tuklaʼal chokochajaʼan in pool. Le kʼaakʼas pixanoʼoboʼ jach maʼ tu pʼatkenoʼob kaʼach, le oʼolal jach kʼojaʼanchajen tiʼ in nervios. Joʼopʼ in lukʼik yaʼab tsʼaakoʼob, joʼopʼ in káaltal yéetel in sen tsʼuʼutsʼik chamal. Bey tin beetil ichil yaʼab jaʼaboʼoboʼ».

Jach ku bin kʼaasil tiʼ le máaxoʼob ku yokskubaʼob tiʼ espiritismooʼ. Jeʼel u peʼertik u yotochoʼobeʼ, jeʼel u kʼaʼalaloʼob carceleʼ yéetel jeʼel tak u kíimskubaʼobeʼ

Yéetel u yáantaj Jéeoba bey xan yéetel u yáantaj u J-jaajkunajoʼobeʼ, Nildaeʼ páajchaj u luʼskuba yáanal u páajtalil le kʼaakʼas pixanoʼoboʼ yéetel bejlaʼeʼ yaan kiʼimak óolal ichil u kuxtal. Letiʼeʼ ku yaʼalik: «Tiʼ tuláakal máak kin jach aʼalikeʼ maʼ u yokskuba tiʼ mix baʼal yaan yil yéetel le kʼasaʼan angeloʼoboʼ».