Xeen tiʼ baʼax ku taasik

U testigoʼob Jéeoba

Yéey u idiomail maaya

¿A k’áat wa a wojéelt u jaajil?

¿A k’áat wa a wojéelt u jaajil?

¿Ti’ ba’ax jaajil k-t’aan? Táan k-t’aan ti’ u jaajil jujump’éel ba’axo’ob jach k’a’anantak. Ma’ xaane’ tak teche’ ts’o’ok xan a beetik le k’áatchi’oba’:

  • ¿U yaabiltmo’on wa Dios?
  • ¿Yaan wa u k’uchul u k’iinil u xu’ulul le ba’ateltáambalo’ob yéetel le mu’yajilo’obo’?
  • ¿Ba’ax ku yúuchul ti’ máak ken kíimik?
  • ¿Yaan wa u ka’a kuxkíinta’al le kimeno’obo’?
  • ¿Bix unaj k-orar utia’al ka u’uya’ak tumen Dios?
  • ¿Ba’ax je’el u taasik ki’imak óolal ti’ máake’?

¿Tu’ux je’el a kaxtik u núukil le k’áatchi’oba’? U milesi libro’obe’ ku t’aano’ob ti’ lela’. Ba’ale’, ma’ up’éelili’ ba’ax ku ya’aliko’ob tu yo’olali’. Yano’obe’ ku yila’al bey ma’alob le ba’ax ku ya’aliko’obo’, ba’ale’ séeba’an u p’áatal ma’ ma’alobtaki’, le o’olal ku yutskíinta’alo’ob wa ku k’e’exlo’ob.

Ba’ale’, yaan up’éel libro ma’alob bix u núukik le k’áatchi’oba’ yéetel le ba’axo’ob ku ya’aliko’ jaajtak. Jesucristoe’ tu ya’alaj ka orarnaj ti’ Dios: «A t’aane’, leti’ u jaajil» (Juan 17:17, Le Tumben Nupt’an). Le «t’aan» ch’a’achi’ita’ab tumen Jesucristoo’ leti’e Kili’ich Bibliao’. Ko’ox ilik bix u núuka’al tumen le Biblia le k’áatchi’ob t-ilaj tu káajbalo’.

¿U yaabiltmo’on wa Dios?

Utúul máak ba’pachta’an tumen ya’ab máako’ob

¿BA’AXTEN KU BEETA’AL LE K’ÁATCHI’A’? Bejla’e’ le yóok’ol kaaba’ chuup yéetel ba’alo’ob k’aastak. Ts’o’ole’ ya’ab religiono’obe’ ku ka’ansiko’ob Dios beetik u yantal le mu’yajilo’obo’.

LE BA’AX KU KA’ANSIK LE BIBLIAO’. Diose’ mix utéen ku beetik ba’ax k’aas. Job 34:10 ku ya’alik: «¡Mix a chéen tukultike’ex wa je’el u beetik [Jéeoba] […] jump’éel ba’al k’aas, wa ba’ax ma’ tubeeli’!». Tumen jach nojoch u yaabilaje’, yaan up’éel ba’ax jach jats’uts u tukulmaj u beetik tu yo’olal tuláakal máak, le o’olal Jesuse’ tu ka’ansaj ba’ax unaj k-a’alik ken orarnako’on: «K-Yuum yanech te’ ka’ano’ […]. Taalak a [reino]. Beeta’ak ba’ax a k’áat way lu’ume’ je’el bix u beeta’al te’ ka’ano’» (Mateo 6:9, 10). U jaajile’ Diose’ jach u yaabiltmo’on, le o’olal ts’o’ok u ts’áaik up’éel nojoch siibal utia’al u béeykuntik le ba’ax u tukulmaj tu yo’olal tuláakal máako’ (Juan 3:16).

Ila’ak xan Génesis 1:26-28; Santiago 1:13 yéetel 1 Pedro 5:6, 7.

¿Yaan wa u k’uchul u k’iinil u xu’ulul le ba’ateltáambalo’ob yéetel le mu’yajilo’obo’?

Soldado’ob

¿BA’AXTEN KU BEETA’AL LE K’ÁATCHI’A’? Bejla’e’ jach ya’ab máako’ob ku kíimlo’ob te’ ba’ateltáambalo’obo’. Ts’o’ole’ tuláakal máak ku mu’yaj yo’olal uláak’ talamilo’ob.

LE BA’AX KU KA’ANSIK LE BIBLIAO’. Diose’ ku ya’alike’ yaan u taasik jeets’elil ti’ tuláakal le Lu’uma’. Yáanal u Reino, wa u gobierno yaan te’ ka’ano’, ma’ «bíin k’a’abéetchajak u yúuchul ka’ambesaj utia’al ba’ateli’», u kajnáalilo’ob le Lu’uma’ «bíin u suto’ob u [espada’ob] u nu’ukulil meyaj» (Isaías 2:4). Ts’o’ole’, Diose’ yaan u xu’ulsik tuláakal ba’alo’ob k’aastak yéetel le mu’yajilo’obo’. Le Bibliao’ ku ya’alik ba’ax ku taal u k’iin u yilik máak: «Jajal Dios kun cho’ik tuláakal u ja’il u yicho’ob, ma’ tun yantal kíimil, mix ok’ol, mix yaj óolal, mix k’i’inamil, tumen tuláakal ba’ax yaan ka’ache’ [je’ex le ba’alo’ob k’aastak yéetel le mu’yajilo’obo’] ts’o’ok u máan» (Apocalipsis 21:3, 4).

Ila’ak xan Salmo 37:10, 11; 46:9 yéetel Miqueas 4:1-4.

¿Ba’ax ku yúuchul ti’ máak ken kíimik?

Up’éel cementerio

¿BA’AXTEN KU BEETA’AL LE K’ÁATCHI’A’? Óoli’ tuláakal le religiono’obo’ ku ka’ansiko’obe’ ken kíimik máake’ yaan ba’ax ku p’áatal kuxa’anil ti’ u wíinklil. Yaan máaxo’ob a’alike’ le kimeno’obo’ je’el u beetko’ob k’aas ti’ máake’, wa ku ya’aliko’obe’ le k’asa’an máako’obo’ ku castigarta’alo’ob utia’al mantats’ tumen Dios ti’ up’éel infierno.

LE BA’AX KU KA’ANSIK LE BIBLIAO’. Ken kíimik máake’ jach xu’ulul ku beetik u kuxtal. Eclesiastés 9:5 ku ya’alike’ le «kimeno’ob[o’] ma’ u yojelo’ob mix ba’ali’». Ma’ tu páajtal u kanko’ob, u yu’ubiko’ob yéetel u beetko’ob mix ba’al. Je’ex túun k-ilko’ ma’ tu páajtal u beetko’ob k’aas mix u yáantko’ob le máaxo’ob kuxa’ano’obo’ (Salmo 146:3, 4).

Ila’ak xan Génesis 3:19 yéetel Eclesiastés 9:6, 10.

¿Yaan wa u ka’a kuxkíinta’al le kimeno’obo’?

Utúul chan ch’úupal yaachaja’an u yóol úuchik u kíimil utúul u láak’tsil

¿BA’AXTEN KU BEETA’AL LE K’ÁATCHI’A’? Tuláakal máak u k’áat kuxtal ich ki’imak óolal u múuch’ yéetel máaxo’ob u yaabilmaj. Le o’olale’ tuláakal máak u k’áat u ka’a il u láak’tsilo’ob ts’o’ok u kíimlo’obo’.

LE BA’AX KU KA’ANSIK LE BIBLIAO’. Óoli’ tuláakal le kimeno’obo’ yaan u ka’a kuxkíinta’alo’ob. Utéenjeakile’ Jesuse’ tu ya’alaj: «Bíin k’uchuk u k’iinil le ken u’uya’ak u t’aan tumen tuláakal le kimeno’obo’», leti’ob túune’ «bin jóok’oko’ob ti’ le muknalo’obo’» (Juan 5:28, 29). Le máaxo’ob kun ka’a kuxkíintbilo’ob way Lu’umo’ yaan u yilko’ob bix kun sutbil Paraísoi tuláakal le Lu’um, je’ex u tukulmi Dios tu káajbalo’ (Lucas 23:43). Te’ jats’uts paraísoo’, le máaxo’ob kun chúukpajal u yóolo’ob u meyajto’ob Dioso’ yaan u kuxtalo’ob utia’al mantats’ yéetel ma’ kun k’oja’antalo’ob. Le Bibliao’ ku ya’alik: «Le utsil máako’obo’ bíin utia’alinto’ob le lu’uma’; ti’ bíin kajlako’ob utia’al ja’abo’ob mina’an u xuul[i’]» (Salmo 37:29).

Ila’ak xan Job 14:14, 15; Lucas 7:11-17 yéetel Beeta’ano’ob [Hechos] 24:15.

¿Bix unaj k-orar utia’al ka u’uya’ak tumen Dios?

Utúul máak táan u orar

¿BA’AXTEN KU BEETA’AL LE K’ÁATCHI’A’? Óoli’ tuláakal le máaxo’ob yaan u religiono’obo’ ku oraro’ob. Ba’ale’, ya’ab máake’ ku tukultike’ ma’atech u yu’uba’al u oración.

LE BA’AX KU KA’ANSIK LE BIBLIAO’. Jesuse’ tu ya’ale’, ken orarnako’one’ ma’ unaj k-babal a’alik chéen up’éelili’ ba’ali’. Leti’e’ tu ya’alaj: «Le ken payalchi’inakeche’, ma’ a babal a’alik» chéen up’éelili’ ba’al (Mateo 6:7). Wa k-k’áat ka u’uyak k-oración tumen Diose’, unaj k-beetik je’ex utstut’aane’. Utia’al lelo’ k’a’abéet k-kanik ba’ax utstut’aan utia’al ka orarnako’on je’ex u k’áate’. Le Bibliao’ ku ya’alik: «Wa k-k’áatik wa ba’ax je’el bix utstut’aane’, leti’e’ ku yu’ubiko’on» (1 Juan 5:14).

Ila’ak xan Salmo 65:2; Juan 14:6, 14 yéetel 1 Juan 3:22.

¿Ba’ax je’el u taasik ki’imak óolal ti’ máake’?

Utúul ko’olel táan u xokik le Biblia utia’al u kaxtik ki’imak óolal

¿BA’AXTEN KU BEETA’AL LE K’ÁATCHI’A’? Ya’ab máake’ ku ch’íikil u kaxt chéen taak’in yéetel fama, wa ku yilik u jats’utskíintik u wíinklil tumen ku tukliko’obe’ leti’e ba’alo’ob bey taasik ki’imak óolalo’. Ba’ale’, kex beyo’ ma’ ki’imak u yóolo’obi’.

LE BA’AX KU KA’ANSIK LE BIBLIAO’. Jesuse’ tu ya’alaj ba’ax je’el u taasik ki’imak óolal ti’ máake’, tu ya’alaj: «Ki’imak u yóol le máaxo’ob ku yilko’ob u k’a’abéetil u nats’kuba’ob ti’ Dioso’» (Mateo 5:3, Nuevo Mundo). Wa k-ilik k-kanik u jaajil yo’olal Dios bey xan yo’olal ba’axo’ob u tukulmaj u beetik t-o’olale’ je’el u yantalto’on ki’imak óolale’. Le u jaajil yo’olal Dioso’ ti’ yaan ichil le Bibliao’, wa k-k’aj óoltke’ yaan u yáantko’on k-il ba’ax ma’alob bey xan ba’ax ma’ ma’alobi’. Wa k-cha’ik k-nu’ukta’al tumen le ba’ax ku ya’alik le Bibliao’, yaan u yantal u beelal k-kuxtal (Lucas 11:28).

Ila’ak xan Proverbios 3:5, 6, 13-18 yéetel 1 Timoteo 6:9, 10.

Ts’o’ok k-ilik u núukil le seis k’áatchi’ob ku ts’áaik le Bibliao’. ¿A k’áat wa a wojéelt u maasil? Wa taak xan a nats’aba ti’ Diose’, ma’ xaane’ a k’áat. Ma’ xaan xane’, a k’áat a wojéelt ba’axten ku cha’ik Dios u sen úuchul mu’yaj yéetel u beeta’al ba’ax k’aas wa jach tu jaajil u yaabiltmo’on. Wa ma’ xaane’ a k’áat a wojéelt bix je’el u yantaltech ki’imak óolal ichil a familiae’. Le Bibliao’ ku núukik le k’áatchi’oba’ bey xan uláak’ k’áatchi’ob.

Ba’ale’ ya’ab máake’ ma’atech u taaktal u xokik le Bibliao’. Tumen ku yilko’obe’ up’éel libro jach nojoch yéetel jach talam u na’ata’al ba’ax ku ya’alik. ¿A k’áat wa ka áanta’akech a wil bix u núuka’al tumen le Biblia le k’áatchi’oba’? Wa beyo’ yaan ka’ap’éel bix je’el a wáanta’al tumen u j-jaajkunajo’ob Jéeobae’.

Yáaxe’ je’el u yáantkecho’ob yéetel le libro ¿Ba’ax jach tu jaajil ku ka’ansik le Bibliao’?; le libroa’ beeta’an utia’al u yáanta’al tuláakal máak u yilo’ob ichil le Biblia u núukil le k’áatchi’ob jach k’a’anantako’. U ka’ap’éele’, leti’obe’ je’el u ts’áaiko’obtech xook ta wotoch x-ma’ bo’olile’. Wa a k’áate’, je’el a xíimbalta’al ta wotoch tumen utúul u j-jaajkunaj Jéeoba utia’al ka a xok le Biblia tu yéetel cada semanao’. U millonesi máako’obe’ ts’o’ok u yilko’ob u yutsil u xokko’ob le Bibliao’, yéetel yano’obe’ jach ki’imak u yóolo’ob tumen ts’o’ok u kanko’ob u jaajil.

Teche’ je’el xan u páajtal a k’amik le utsilo’ob ku taasik u k’aj óolta’al u jaajilo’. U k’aj óoltik máak u jaajile’ ku yáantaj utia’al ka u p’at tuláakal le ba’alo’ob chéen suuka’an u beeta’alo’ob yéetel le ka’ansajo’ob ma’ jaajtako’, ts’o’ole’ ku yáantaj xan utia’al ka yanak u beelal u kuxtal máak bey xan ka yanak ki’imak óolal ti’. Jesuse’ tu ya’alaj: «Bíin a k’aj óolte’ex le jaajo’, le jaaj túuno’ bíin u jáalk’abte’ex» (Juan 8:32).

1. Utúul máak táan u kanik ba’ax ku ya’alik le Bibliao’; 2. Utúul ko’olel táan u kanik ba’ax ku ya’alik le Bibliao’