Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 2

Rebecaeʼ tu kiʼimakkúuntaj u yóol Jéeoba

Rebecaeʼ tu kiʼimakkúuntaj u yóol Jéeoba

Rebecaeʼ juntúul koʼolel jach tu yaabiltaj Jéeoba. U kʼaabaʼ u yíichameʼ, Isaak. Letiʼ xaneʼ tu yaabiltaj Jéeoba. Teʼ tsikbalaʼ yaan k-kanik bix tu kʼaj óoltilubaʼob yéetel bix úuchik u kiʼimakkúuntaʼal u yóol Jéeoba tumen Rebeca.

U kʼaabaʼ u taataʼob Isaakeʼ, Abrahán yéetel Sara. Letiʼobeʼ tiʼ kajaʼanoʼob kaʼach tu luʼumil Canaaneʼ, teʼeloʼ le máakoʼoboʼ maʼatech u meyajtikoʼob Jéeoba. Baʼaleʼ Abrahaneʼ u kʼáat ka tsʼoʼokok u beel u hijo yéetel juntúul x-chʼúupal ku meyajtik Jéeoba. Le oʼolaleʼ tu túuxtaj juntúul tiʼ le máaxoʼob meyajtikoʼ (maʼ xaaneʼ Eliezer) utiaʼal ka xiʼik tak tu kaajil Harán. ¿Baʼaxten? Tumen teʼeloʼ tiʼ kajaʼan jujuntúul u láakʼtsiloʼobiʼ yéetel jeʼel u páajtal u kaxtik juntúul maʼalob atan utiaʼal Isaakeʼ.

Rebecaeʼ anchaj u sen páaytik jaʼ utiaʼal le camelloʼoboʼ

Eliezereʼ bin yéetel uláakʼ tiʼ le máaxoʼob meyajtik Abrahán tak teʼ náanach luʼum tuʼux túuxtaʼaboʼoboʼ. Letiʼobeʼ tu bisoʼob diez u túulal camelloʼob u kuchmoʼob janal yéetel baʼaloʼob utiaʼal u síikoʼob. Baʼaleʼ ¿bix tu yéeyil Eliezer máax yéetel kun tsʼoʼokol u beel Isaak? Letiʼeʼ u yojleʼ le máakoʼob teʼeloʼ ku binoʼob chʼaʼ jaʼ tiʼ chʼeʼen. Le oʼolaleʼ le ka kʼuchoʼob tu kaajil Haraneʼ jeʼeloʼob yiknal junpʼéel chʼeʼen. Letiʼeʼ orarnaj túuneʼ ka tu kʼáataj tiʼ Jéeoba: «Ken in kʼáat tiʼ juntúul x-chʼúupal ka u síiten jaʼ, yéetel letiʼ ku tsʼáaik tiʼ teen bey xan tiʼ in  camelloʼobeʼ, tiʼ ken in wojéelt letiʼe koʼolel tsʼoʼok a yéeyikoʼ».

Jach teʼ súutukoʼ taal chʼaʼ jaʼ Rebeca. Le Bibliaoʼ ku yaʼalikeʼ letiʼeʼ jach kiʼichpan. Eliezereʼ tu kʼáatajtiʼ jaʼ utiaʼal u yukʼeʼ, letiʼ túuneʼ tu yaʼalaj: «Jeʼelaʼ, ukeʼ. Paʼatik xan in jóoʼsik jaʼ utiaʼal a walakʼ camelloʼob». Le camelloʼoboʼ yaʼab u yukʼikoʼob jaʼ, le oʼolaleʼ, ¡chéen tukult bukaʼaj jaʼ anchaj u páaytik Rebeca! Ilawil le dibujo yaan teʼ táan juʼun yaan paachiloʼ. ¿Baʼax ka wilik ku beetik Rebecaiʼ?... Eliezereʼ jaʼakʼ u yóol le ka tu yilaj bix úuchik u núukik Jéeoba u oración.

Eliezereʼ tu síiaj tiʼ Rebeca yaʼab baʼaloʼob jatsʼutstakoʼob. Rebecaeʼ tu invitartaj Eliezer yéetel le máaxoʼob láakʼintik utiaʼal ka xiʼikoʼob tu yotochoʼ. Eliezer túuneʼ tu yaʼalaj baʼax oʼolal túuxtaʼab tumen Abrahán yéetel bix úuchik u núukik Jéeoba u oración. U láakʼtsiloʼob Rebecaeʼ tu yaʼaloʼob jeʼel u chaʼikoʼob u tsʼoʼokol u beel yéetel Isaakeʼ.

Rebecaeʼ bin Canaán yéetel Eliezer ka tsʼoʼok u beel yéetel Isaak

Baʼaleʼ ¿u kʼáat wa ta tʼaan tsʼoʼokol u beel Rebeca yéetel Isaak?... Le ka kʼáataʼabtiʼ tumen u láakʼtsiloʼob wa u kʼáat tsʼoʼokol u beel yéetel Isaakeʼ, tu yaʼalaj: ‹Jaaj, in kʼáat›. ¿Baʼaxten? Tumen Rebecaeʼ u yojel Jéeoba túuxt Eliezer tak teʼeloʼ. Le oʼolaleʼ tu séebaʼanileʼ bin tu yéetel. Ka kʼuchoʼob Canaaneʼ tsʼoʼok u beel yéetel Isaak.

Jéeobaeʼ jach tu kanáantaj Rebeca tumen letiʼeʼ mantatsʼ tu yuʼubaj tʼaan. Tsʼoʼoleʼ ka máan kʼiineʼ Jesuseʼ tiʼ taal tiʼ u familia Rebecaeʼ. Wa ka wuʼuyik tʼaaneʼ yaan a kiʼimakkúuntik u yóol Jéeoba jeʼex Rebecaeʼ, tsʼoʼoleʼ Jéeoba xaneʼ jach yaan u kanáantkech.

XOK TA BIBLIA

  • Génesis 12:4, 5; 24:1-58, 67