Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 9

Jeremíaseʼ maʼ xuʼul u tʼaan tiʼ Jéeobaiʼ

Jeremíaseʼ maʼ xuʼul u tʼaan tiʼ Jéeobaiʼ

¿Baʼaxten pʼuʼuj le máakoʼob yéetel Jeremíasoʼ?

Jéeobaeʼ tu beetaj u salvartaʼal Jeremías

Yaan kʼiineʼ le máakoʼoboʼ ku cheʼejtikoʼonoʼob wa ku pʼuʼujuloʼob ken tʼaanakoʼon tiʼ Jéeoba tu yéeteloʼob. Lelaʼ jeʼel u beetik u xuʼulul k-tʼaan tiʼ Jéeobaeʼ. ¿Yaan wa kʼiin tsʼoʼok u yúuchultech beyaʼ?... Le Bibliaoʼ ku tʼaan tiʼ juntúul xiʼipal jach tu yaabiltaj Jéeoba, baʼaleʼ óolak xuʼuluk u tʼaan tu yoʼolal. U kʼaabaʼ le xiʼipalaʼ Jeremías. Koʼox maas kaanbal tiʼ letiʼ.

Tu táankelmil Jeremíaseʼ, kʼubéentaʼabtiʼ tumen Jéeoba ka u yaʼal tiʼ le máakoʼob ka xuʼuluk u beetkoʼob baʼaloʼob kʼaastakoʼ. Jeremíaseʼ tu yuʼubaj maʼ kun páajtal u beetik lelaʼ yéetel sajakchajiʼ. Letiʼeʼ tu yaʼalaj tiʼ Jéeoba: «Teneʼ chéen juntúul paalen. Maʼ in wojel baʼax ken in waʼaltiʼobiʼ». Baʼaleʼ Jéeobaeʼ tu yaʼalajtiʼ: «Maʼ a sajaktal. Teen kin áantkech».

 Jeremías túuneʼ joʼopʼ u yaʼalik tiʼ le máakoʼob yaan u castigartaʼaloʼob wa maʼ tu xuʼulul u beetkoʼob baʼax kʼaasoʼ. ¿Tu beetaj wa ta tʼaan le máakoʼob le baʼax tu yaʼalaj Jeremíasoʼ?... Maʼatech, maʼ tu beetoʼobiʼ. Yanoʼobeʼ chéen tu cheʼejtoʼob, yéetel uláakʼoʼobeʼ pʼuʼujoʼob tu yéetel. Yanoʼob xaneʼ ¡taakchaj tak u kíimskoʼob! ¿Bix a tuklik tu yuʼubiluba Jeremías?... Letiʼeʼ jach sajakchajeʼ ka tu yaʼalaj: «Mix bikʼin kin kaʼa tʼaan tiʼ Jéeoba». Baʼaleʼ ¿jach wa tu jaajil tu beetaj le baʼax tu yaʼalaʼ?... Maʼatech. Letiʼeʼ jach u yaabiltmaj Jéeoba, le oʼolal maʼ béeychaj u xuʼulul u tʼaan tu yoʼolaliʼ. Yoʼolal le baʼax tu beetoʼ jach kanáantaʼab tumen Jéeoba.

Juntéenjeakeʼ, jun jaats kʼasaʼan máakoʼobeʼ tu puloʼob Jeremías tiʼ junpʼéel taamkach jool chuup yéetel luukʼ. Maʼ tsʼaʼab janal mix jaʼ tiʼiʼ. Le máakoʼoboʼ tiʼ ken u pʼatoʼob kaʼach Jeremías utiaʼal ka kíimkiʼ. Baʼaleʼ ¿baʼax úuch yéetel Jeremías? Yéetel u yáantaj Jéeobaeʼ, salvartaʼabi.

¿Baʼax ka kanik tiʼ Jeremías?... Kex yaan kʼiin sajakchajeʼ, maʼ xuʼul u tʼaan tiʼ Jéeobaiʼ. Teech xaneʼ ken tʼaanakech yéetel le máakoʼob tiʼ Jéeobaoʼ, maʼ xaaneʼ yaan tiʼ letiʼobeʼ jeʼel u cheʼejkechoʼob wa u tsʼíikiloʼobeʼ. Lelaʼ maʼ xaaneʼ jeʼel u beetik a suʼlaktaleʼ wa a sajaktaleʼ. Baʼaleʼ maʼ u xuʼulul a tʼaan tiʼ Jéeoba. Letiʼeʼ yaan u yáantkech jeʼex tu yáantil Jeremíaseʼ.

XOK TA BIBLIA

  • Jeremías 1:4-8; 20:7-9; 26:8-19, 24; 38:6-13