Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 20

¿Táanil wa a wutsil ka kaxtik?

¿Táanil wa a wutsil ka kaxtik?

¿YAAN wa máax a kʼaj óol mantatsʼ ku tsʼíiboltik yáax táanil tiʼ letiʼ ka tsʼaʼabak wa baʼax?... Wa yaʼab máax páaʼtik wa baʼaxeʼ, ku yilik u jupkuba ichil u maasil utiaʼal ka máanak táanil. ¿Tsʼoʼok wa a wilik u yúuchul lelaʼ?... Jesús, le Maʼalob j-Kaʼansajoʼ, tu yileʼ tak le nukuch máakoʼob beetik beyoʼ, baʼaleʼ letiʼeʼ maʼ maʼalob úuchik u yilkiʼ. Koʼox ilik le baʼax úuchoʼ.

¿Yaan wa máax a kʼaj óol mantatsʼ ku tsʼíiboltik u kaxtik táanil u yutsil?

2 Le Bibliaoʼ ku yaʼalikeʼ juntúul fariseoeʼ, tu invitartaj Jesús janal tu yotoch. Ka kʼuch Jesuseʼ tu yileʼ le ken okok le máakoʼoboʼ ku máanoʼob kutal táanil. Le oʼolal tu kaʼansajtiʼob junpʼéel baʼax jach kʼaʼanaʼan yéetel junpʼéel kettʼaan. ¿A kʼáat wa a wuʼuye?...

 3 Jesuseʼ tu yaʼalaj: «Ken u invitartech juntúul máak tiʼ u kʼiinbesajil junpʼéel tsʼoʼokol beeleʼ, maʼ a bin kutal tiʼ le maas maʼalob kúuchiloʼ». ¿A wojel wa baʼaxten tu yaʼalaj leloʼ?... Letiʼeʼ tu yaʼaleʼ maʼ xaaneʼ yaan juntúul máax invitartaʼan maas yaan u páajtalil. Bey túunoʼ, jeʼex a wilik teʼ dibujooʼ, u yuumil le najoʼ jeʼel u taal ka u yaʼaleʼ: ‹Líikʼen utiaʼal ka kulak le máakaʼ, techeʼ xeen kutal teʼeloʼ›. ¿Bix ken u yuʼubiluba le máakoʼ?... Yaan u suʼlaktal ken ilaʼak u túuxtaʼal kutal táanxelil.

4 Jesuseʼ u kʼáat u kaʼanstiʼob maʼ maʼalob ka u beetoʼob beyaʼ. Tu yaʼalajtiʼob: «Le ken invitartaʼakecheʼ xeen kutal teʼ kúuchil yaan maas paachiloʼ, tumen beyoʼ ken taalak le máax invitartechoʼ yaan u yaʼaliktech: ‹Amigo, máankech way táanileʼ›. Bey túunoʼ yaan a nojbaʼalkúuntaʼal tu táan tuláakal le máaxoʼob invitartaʼanoʼob xanoʼ» (Lucas 14:1, 7-11).

¿Baʼax ku kaʼansik kaʼach Jesús le ka tʼaanaj tiʼ u kaxtik máak táanil u yutsiloʼ?

5 ¿Ka naʼatik wa baʼax tu yóotaj u kaʼans Jesús yéetel le kettʼaanoʼ?... Koʼox ketik utiaʼal k-ilik wa ta naʼataj. Koʼox aʼalikeʼ ka naʼakal tiʼ junpʼéel autobús óoliʼ chuup. Wa ka wilik yaan junpʼéel asiento pʼaatleʼ, ¿maʼalob wa ka kulakech kex yaan juntúul nojoch máak maʼ kulakiʼ?... ¿Jeʼel wa u yutstal tu tʼaan Jesús ka a beet beyoʼ?...

6 Maʼ xaaneʼ yaan máax jeʼel u tuklikeʼ Jesuseʼ maʼatech u beetik u cuentail. Baʼaleʼ ¿jach wa tu jaajil maʼatech u beetik u cuentail?... Le tiaʼan Jesús tu yotoch le fariseooʼ, tu yilaj bix u yéeyik le máakoʼob tuʼux kun kutaloʼoboʼ. A tuklikeʼ, ¿maʼ wa bey u yilik le baʼaxoʼob k-beetik xanoʼ?... Bejlaʼa tiaʼan Jesús teʼ kaʼanoʼ jeʼel u páajtal u yilik tubeel le baʼaxoʼob k-beetkoʼ.

 7 U kaxtik máak táanil u yutsileʼ, jeʼel u taasik talamileʼ. U suukileʼ ku kʼuuxil yéetel ku baʼateltʼaan u maasil tu yéetel. Yaan kʼiineʼ bey u yúuchul le ken viajarnak le mejen paalaloʼob teʼ autobusoʼ. Chéen pʼel u jeʼebel u jool le autobusoʼ, ku jóokʼol u yáalkaboʼob utiaʼal u yáax naʼakloʼobiʼ. U kʼáatoʼob kutal tu jáal u ventanillailoʼob. ¿Baʼax jeʼel u yúuchleʼ?... Jeʼel u kʼuuxiloʼob tu baatsiloʼob.

8 Jeʼex túun k-ilkoʼ, u kaxtik máak táanil u yutsileʼ jeʼel u taasik yaʼab talamileʼ. Bey úuchik tak tiʼ u apostoloʼob Jesusoʼ. Jeʼex úuchik k-kanik teʼ xookil 6, letiʼobeʼ baʼateltʼaanajoʼob yoʼolal máax u maas nojchil ichiloʼob. ¿Baʼax tu beetaj túun Jesús?... Tu tsolaj u nuʼuktiʼob. Baʼaleʼ kaʼa baʼateltʼaanajoʼob. Koʼox ilik bix úuchik.

9 Le apostoloʼob yéetel uláakʼ disipuloʼoboʼ táan kaʼach u binoʼob u tsʼook juntéen tu kaajil Jerusalén yéetel Jesús. Jesuseʼ tsʼoʼok u  tsikbaltiktiʼob yoʼolal u Reino, le oʼolal Santiago yéetel Juaneʼ táan kaʼach u tuklikoʼob u beetik u reyiloʼob tu yéetel. Tsʼoʼok tak u tsikbaltikoʼob tiʼ Salomé, u maamaʼob (Mateo 27:56; Marcos 15:40). Le oʼolal le táan u binoʼob Jerusalenoʼ, náatsʼ Salomé yiknal Jesús, ka xolaj tu táaneʼ ka tu yaʼalaj wa jeʼel u páajtal u kʼáatik junpʼéel baʼal tiʼeʼ.

10 Jesús túuneʼ tu kʼáatajtiʼ: «¿Baʼax a kʼáat?». Letiʼeʼ tu yaʼaleʼ u kʼáat ka chaʼabak u kutal u paalal tu tséel teʼ Reinooʼ, juntúuleʼ tu x-noʼoj yéetel uláakʼ juntúuleʼ tu x-tsʼíik. Le ka tu yojéeltaj u chuukáan diez apostoloʼob le baʼax tu yaʼalaj Santiago yéetel Juan ka kʼáataʼak tumen u maamaʼoboʼ, ¿bix a tuklik tu yuʼubilubaʼob?...

¿Baʼax tu kʼáataj Salomé tiʼ Jesús, yéetel baʼax úuch ka tsʼoʼoki?

11 Beyoʼ, jach kʼuuxilnajoʼob yéetel Santiago yéetel Juan. Le oʼolal Jesuseʼ tu tsolaj u nuʼuk tiʼ tuláakal u apostoloʼob. Tu yaʼalajtiʼobeʼ le  gobiernoʼoboʼ uts tu tʼaan u yantal páajtalil tiʼob yéetel u noj baʼalkúuntkubaʼob. U kʼáatoʼob junpʼéel nojoch puesto utiaʼal ka beetaʼak baʼax u kʼáatoʼob. Baʼaleʼ Jesuseʼ tu yaʼalaj tiʼ u disipuloʼobeʼ maʼ unaj u beetkoʼob beyoʼ, baʼaxeʼ ‹le máax u kʼáat u beetuba u maas nojchil ichiloʼobeʼ kʼaʼabéet u beetkuba u palitsiloʼob›. Chéen tukult lelaʼ (Mateo 20:20-28).

12 ¿A wojel wa bix juntúul palitsil?... Juntúul palitsileʼ ku meyajtik u maasil, maʼatech u páaʼtik u meyajtaʼal letiʼ. Ku pʼáatal paachil, maʼ táaniliʼ. Maʼatech u taaskuba maas nojchil, baʼaxeʼ bey maas chichaneʼ. Yéetel maʼ u tuʼubultecheʼ, Jesuseʼ tu yaʼaleʼ le máax u kʼáat u beetuba maas nojchileʼ kʼaʼabéet u beetkuba palitsilil tiʼ u maasil.

13 ¿Baʼax a tuklik ku kaʼansiktoʼon lelaʼ?... ¿Jeʼel wa u baʼateltʼaan juntúul palitsil yéetel u tsʼuulil utiaʼal yilkoʼob máax unaj u kutal teʼ lugar maas maʼaloboʼ? ¿Wa yoʼolal máax unaj u yáax janal? Techeʼ, ¿bix a wilik?... Jesuseʼ tu yaʼaleʼ juntúul palitsileʼ mantatsʼ ku tsʼáaik táanil u meyajtik u tsʼuulil (Lucas 17:7-10).

14 Le oʼolaleʼ, ¿baʼax unaj k-beetik utiaʼal maʼ k-kaxtik táanil k-utsil?... Beyoʼ, unaj k-beetik bey u palitsiloʼon u maasileʼ. Lelaʼ u kʼáat u yaʼaleʼ kʼaʼabéet k-tsʼáaikoʼob táanil yéetel k-ilkoʼob maas kʼaʼanaʼanoʼob tiʼ toʼon. ¿Bix a tuklik jeʼel k-tsʼáaik u maasil táanil tiʼ toʼoneʼ?... Koʼox ilik tu kaʼatéen le táan juʼun 40 yéetel 41, utiaʼal k-ilik bix jeʼel a wáantik u maasil yéetel a tsʼáaikoʼob táanileʼ.

15 Kʼaʼajaktecheʼ Jesuseʼ tu tsʼáaj táanil u maasil le ka tu yáantoʼoboʼ. Teʼ tu tsʼook áakʼab tu máansaj yéetel u apostoloʼoboʼ, pʼoklaj tak u pʼoʼo u yookoʼob. Wa k-tsʼáaik táanil u maasileʼ yaan k-lúubul utsil tiʼ le Maʼalob j-Kaʼansajoʼ bey xan tiʼ Jéeoba Dios, u Taata.

Koʼox xokik uláakʼ tekstoʼob jeʼel u yáantkoʼon k-tsʼáa táanil u maasileʼ: Lucas 9:48; Romailoʼob 12:3, yéetel Filiposiloʼob 2:3, 4.