Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 3

Le Máax beet tuláakal baʼaloʼ

Le Máax beet tuláakal baʼaloʼ

¿Máax beet tuláakal le baʼaxoʼob kuxaʼanoʼ?

TENEʼ in wojel junpʼéel baʼax jach jatsʼuts. ¿A kʼáat wa a wuʼuye?... Pakt a kʼab. Wutsʼ u yaal a kʼab. Beoraaʼ mach wa baʼax. A kʼabeʼ jeʼel u páajtal u beetik yaʼab baʼaloʼobeʼ, tsʼoʼoleʼ jach tubeel u beetik. ¿A wojel wa máax beet le kʼaboʼ?...

2 Beyoʼ, letiʼe máax beet xan le chiʼoʼ, le niʼoʼ yéetel le ichoʼ. Dios, u taata Jesús, le Maʼalob j-Kaʼansajoʼ. ¿Uts ta tʼaan wa tsʼaʼanil le ich tumen Diosoʼ?... Yoʼolal le ichoʼ ku páajtal k-ilik yaʼab baʼaloʼob: le looloʼoboʼ, le xíiw yaʼaxtakoʼoboʼ yéetel le azul kaʼanoʼ. Tsʼoʼoleʼ ku páajtal xan k-ilik u luukʼ le mejen chʼíichʼoʼob, jeʼex le yaan teʼ dibujooʼ. ¿Máasaʼ jatsʼuts tsʼaʼaniltoʼon u páajtalil k-ilik yaʼab baʼaloʼob?...

3 Baʼaleʼ ¿máax beetoʼob? ¿Juntúul máak? Maʼatech. Le máakoʼoboʼ ku páajtal u beetkoʼob junpʼéel naj, baʼaleʼ maʼ tu páajtal u beetkoʼob u nuuktal le xíiwoʼoboʼ, mix juntúul chʼíichʼ, junpʼéel lool wa uláakʼ baʼax kuxaʼan. ¿A wojel wa kaʼach lelaʼ?...

4 Dios beet tuláakal baʼal: letiʼ beet le kaʼanoʼ bey xan le Luʼumaʼ, bey xan le wíinikoʼoboʼ. Jesuseʼ tu kaʼanseʼ Dios beet le yáax xiib yéetel le yáax koʼoleloʼ (Mateo 19:4-6).

 5 ¿Bix úuchik u yojéeltik Jesús leloʼ? ¿Tu yilaj wa u beetaʼaloʼob tumen Dios?... Tu yilaj. Jesuseʼ tu yilaj u beetaʼal le yáax xiib yéetel le yáax koʼolel tumen Diosoʼ. Letiʼeʼ juntúul ángel kaʼach kajaʼan teʼ kaʼan yiknal u Taataoʼ.

6 Le Bibliaoʼ ku yaʼalikeʼ Dioseʼ tu yaʼalaj: «Koʼox beetik wíinik» (Génesis 1:26). ¿A wojel wa máax yéetel ku tʼaan kaʼachi?... Táan u tʼaan kaʼach yéetel Jesús, u Hijo, le taal way Luʼumoʼ.

7 Chéen tukle. Ken joʼopʼok k-uʼuyik baʼax ku yaʼalik Jesuseʼ, táan k-kaanbal tiʼ le máax yaan kaʼach yéetel Dios le ka tu beetaj le Luʼum yéetel u maasil baʼaloʼoboʼ. ¿Máasaʼ jach jatsʼuts lelaʼ? Jesuseʼ tu kanaj yaʼab baʼaloʼob úuchik u múul meyaj yéetel u Taata teʼ kaʼanoʼ. Le oʼolal kʼaj óoltaʼab bey juntúul Maʼalob j-Kaʼansajeʼ.

8 A tuklikeʼ, ¿yaachaj wa u yóol Dios tumen chéen tu juunal yaan táanil tiʼ u beetik u Hijo?... Maʼatech. ¿Baʼaxten túun tu  beetaj angeloʼob, wíinikoʼob yéetel baʼalcheʼob?... Tumen letiʼeʼ juntúul Dios yaan u yaabilaj. Letiʼeʼ u kʼáat ka kuxlak u maasil ich kiʼimak óolal. Unaj k-tsʼáaik u graciasil tiʼ Dios yoʼolal le kuxtal u tsʼaamajtoʼonoʼ.

9 Tuláakal le baʼaxoʼob u beetmaj Diosoʼ ku yeʼesik u yaabilaj. Jeʼex le Kʼiinoʼ ku tsʼáaiktoʼon sáasil yéetel ku kʼíinkuntikoʼon. Wa minaʼan le Kʼiinoʼ, bejlaʼa jach keʼeleʼ yéetel mix baʼal jeʼel u kuxtal way Luʼumeʼ. Techeʼ, ¿bix a wilik le baʼax u beetmaj Diosaʼ?...

10 Dioseʼ ku beetik xan u kʼáaxal jaʼ. Yaan kʼiineʼ maʼ uts ta tʼaan u kʼáaxal jaʼiʼ, tumen maʼ tu páajtal a jóokʼol báaxal. Baʼaleʼ u kʼáaxal le jaʼoʼ ku beetik u nuuktal le looloʼoboʼ. Le oʼolaleʼ, ¿tiʼ máax unaj k-tsʼáaik u graciasil ken k-il le looloʼoboʼ?... Tiʼ Dios. ¿Kux túun ken k-jaant u yich le cheʼob yéetel le janalbeʼen xíiwoʼoboʼ?... Kʼaʼabéet xan k-tsʼáaik u graciasil tiʼ Dios, tumen letiʼe Kʼiin yéetel le jaʼ ku kʼáaxal beetik u nuuktal le paakʼaloʼoboʼ.

11 Koʼox tuklikeʼ ku kʼáataʼaltech tumen wa máax: «¿Dios wa beet xan le wíinik yéetel le baʼalcheʼoboʼ?». ¿Baʼax jeʼel a waʼaliktiʼeʼ?... Maʼalob ka a waʼaltiʼ: «Jaaj, Dios beet wíinik bey xan le baʼalcheʼoboʼ». ¿Kux túun wa maʼ tu creertik, yéetel ku yaʼalik tiʼ baʼalcheʼ u taal wíinik? Leloʼ maʼ letiʼe baʼax ku kaʼansik le Bibliaoʼ. Ku yaʼalikeʼ Dios beet tuláakal baʼax kuxaʼan (Génesis 1:26-31).

Anchaj máax beet le najaʼ. ¿Máax túun beet le looloʼob, le cheʼob yéetel le baʼalcheʼoboʼ?

12 ¿Baʼax jeʼel a waʼalik tiʼ wa máax maʼ tu creertik Dioseʼ?... Jeʼel u páajtal a weʼesik junpʼéel naj tiʼeʼ, tsʼoʼoleʼ ka kʼáatiktiʼ: «¿Máax beet le najoʼ?». Tuláakal máak u yojel anchaj u beetaʼal tumen wa máax. Maʼ tu juunal tu beetubaiʼ (Hebreoʼob 3:4).

13 Tsʼoʼoleʼ jeʼel u páajtal a bisik tuʼux yaan le paakʼaloʼoboʼ, ka weʼesiktiʼ junpʼéel lool, tsʼoʼoleʼ ka kʼáatiktiʼ: «¿Máax  beet le loolaʼ?». Maʼ juntúul wíinikiʼ. Jeʼex le naj maʼ tu juunal tu beetubaoʼ, le loolaʼ maʼ tu juunal xan tu beetubaiʼ. Dios beete.

14 Jeʼel u páajtal xan a waʼalik tiʼ le máak ka u yuʼub u kʼaay le chʼíichʼoʼoboʼ, tsʼoʼoleʼ ka kʼáatiktiʼ: «¿Máax beet le chʼíichʼoʼoboʼ yéetel máax kaʼansoʼob kʼaay?». Dios beet le kaʼanoʼ, le Luʼumaʼ yéetel tuláakal baʼax kuxaʼan, yéetel letiʼ tsʼáaik le kuxtaloʼ.

15 Maʼ xaaneʼ yaan máaxeʼ jeʼel u yaʼaliktech chéen ku creertik le baʼaxoʼob ku yilkoʼ, wa maʼ tu yilkeʼ maʼ tu creertik wa yaan. Yaan máakoʼobeʼ maʼatech u creertikoʼob Dios tumen maʼ tu páajtal u yilkoʼob.

16 U jaajileʼ maʼ tu páajtal k-ilik Dios. Le Bibliaoʼ ku yaʼalik: ‹Mix máak jeʼel u páajtal u yilik Dioseʼ›. Mix juntúul xiib, juntúul koʼolel wa juntúul chan paal jeʼel u páajtal u yilkeʼ. Le oʼolal mix máak unaj u beetik junpʼéel cuadro wa u yoochel Dios. Letiʼeʼ ku yaʼalik maʼ u beetaʼal, yéetel maʼ uts tu tʼaan ka yanaktoʼon mix junpʼéel imagen ichil k-otochiʼ (Éxodo 20:4, 5; 33:20; Juan 1:18).

17 Wa maʼ tu páajtal k-ilik Dioseʼ, ¿bix k-ojéeltik wa jach tu jaajil yaan? Tukult lelaʼ: ¿jeʼel wa u páajtal a wilik le iikʼoʼ?... Maʼatan, mix máak jeʼel u páajtal u yilkeʼ. Baʼaleʼ jeʼel u páajtal a wilik le baʼaxoʼob ku beetkoʼ; jeʼex u péeksik u leʼ le cheʼoboʼ. Ken a wil yaan baʼax ku beetkeʼ bey a wojéeltik yaan le iikʼoʼ.

¿Bix a wojéeltik yaan le iikʼoʼ?

18 Jeʼel xan a wilik le baʼaxoʼob u beetmaj Diosoʼ. Ken a wil junpʼéel lool wa juntúul chʼíichʼeʼ, táan a wilik junpʼéel baʼal beetaʼan tumen Dios. Lelaʼ ku beetik a creertik jach tu jaajil yaan Dios.

19 Maʼ xaaneʼ yaan máax kun kʼáatiktech: «¿Máax beet le Kʼiin yéetel le Luʼumaʼ?». Le Bibliaoʼ ku yaʼalik: «[Dioseʼ] tu beetaj kaʼanoʼob yéetel luʼum» (Génesis 1:1). Beyoʼ, Dios beet tuláakal le baʼaloʼob jatsʼutstakaʼ. Techeʼ, ¿bix a wilik?...

 20 ¿Máasaʼ jatsʼuts le kuxtaloʼ? Jeʼel u páajtal k-uʼuyik bix jatsʼutsil u kʼaay le chʼíichʼoʼoboʼ, k-ilik le looloʼoboʼ yéetel u maasil baʼaloʼob beetaʼan tumen Diosoʼ, bey xan k-jaantik le jejeláas baʼaloʼob u tsʼaamaj Diosoʼ.

21 Kʼaʼabéet k-tsʼáaik u graciasil tiʼ Dios yoʼolal tuláakal le baʼaloʼobaʼ, maases ikil u tsʼáaiktoʼon le kuxtalaʼ. Wa jach tu jaajil k-tsʼáaik u graciasil tiʼeʼ, yaan k-beetik junpʼéel baʼal. ¿A wojel wa baʼax?... K-uʼuyik baʼax ku yaʼalik Dios bey xan le baʼax ku yaʼalik le Bibliaoʼ. Wa k-beetik beyoʼ yaan k-eʼesik k-yaabiltmaj le Máax beetmil tuláakal baʼaloʼ.

Unaj k-tsʼáaik u graciasil tiʼ Dios yoʼolal tuláakal le baʼaxoʼob u beetmoʼ. ¿Bix jeʼel u páajtal k-beetkeʼ? Koʼox xokik le Salmo 139:14; Juan 4:23, 24; 1 Juan 5:21, yéetel Apocalipsis 4:11.