Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 17

Bix jeʼel u yantaltoʼon kiʼimak óolaleʼ

Bix jeʼel u yantaltoʼon kiʼimak óolaleʼ

¿Baʼaxten Jéeobaeʼ juntúul «Dios kiʼimak u yóol»?

¿MÁASAʼ tuláakloʼon k-kʼáat ka yanaktoʼon kiʼimak óolal?... Baʼaleʼ maʼ yaʼab máaxoʼob jach tu jaajil kiʼimak u yóoloʼobiʼ. ¿A wojel wa baʼaxten?... Tumen maʼ u yojloʼob baʼax taasik le kiʼimak óolaloʼ. Ku tuklikoʼobeʼ kʼaʼabéet u yantal yaʼab baʼaloʼob tiʼob utiaʼal ka kiʼimakchajak u yóoloʼob. Baʼaleʼ ken yanaktiʼobeʼ chéen junsúutuk kiʼimak u yóoloʼob.

2 Jesús, le Maʼalob j-Kaʼansajoʼ, tu tsolaj baʼax jeʼel u taasik kiʼimak óolaleʼ: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Baʼaxoʼob 20:35). Bey túunoʼ, ¿bix jeʼel u yantaltoʼon kiʼimak óolaleʼ?... K-tsʼáaik baʼaxoʼob yaantoʼon tiʼ u maasil yéetel k-áantkoʼob. ¿A wojel wa?...

3 Koʼox ilik baʼax u kʼáat u yaʼale. ¿Tu yaʼalaj wa Jesús maʼ kun kiʼimaktal u yóol le máax tiʼ ku siʼibil wa  baʼaxoʼ?... Maʼatech, maʼ letiʼe baʼax tu yaʼaloʼ. ¿Máasaʼ uts ta tʼaan u siʼibiltech wa baʼax?... Tuláakal máax uts tu tʼaan. Ku kiʼimaktal k-óol ken siʼibiktoʼon baʼaloʼob jatsʼuts k-ilik.

4 Baʼaleʼ Jesuseʼ tu yaʼaleʼ maas jeʼel u kiʼimaktal k-óol wa toʼon síik wa baʼaxeʼ. ¿Máax a tuklik maas yaʼab baʼaxoʼob tsʼoʼok u síik tiʼ u maasil?... Beyoʼ, Jéeoba Dios.

5 Le Bibliaoʼ ku yaʼalikeʼ Dioseʼ ku «tsʼáaik kuxtal, iikʼ yéetel tuláakal baʼal tiʼ máak». Ku beetik u kʼáaxal jaʼ yéetel u juul le Kʼiin utiaʼal u nuuktal le cheʼob utiaʼal ka yanak baʼal k-jaantoʼ (Baʼaxoʼob 14:17; 17:25). Le oʼolal le Bibliaoʼ ku yaʼalikeʼ Jéeobaeʼ letiʼ «le Dios kiʼimak u yóoloʼ» (1 Timoteo 1:11). Junpʼéel tiʼ le baʼax kiʼimakkúuntik u yóol Diosoʼ letiʼe u tsʼáaik tiʼ u maasil le baʼaxoʼob yaantiʼoʼ, lelaʼ letiʼe baʼax jeʼel u kiʼimakkúuntik k-óol xanoʼ.

¿Máasaʼ maʼ tu kiʼimaktal a wóol wa ka jaant chéen ta juunal le baʼaxoʼob yaantechoʼ?

6 ¿Baʼax túun jeʼel u páajtal k-tsʼáaik tiʼ u maasileʼ? Techeʼ, ¿baʼax a tuklik jeʼel u páajtal k-tsʼáaikeʼ?... Yaan kʼiineʼ koʼoj le baʼax taak k-síikoʼ. Wa manbil u beetaʼaleʼ kʼaʼabéet taakʼin tiʼ máak. Le oʼolal wa táan a tuklik a síik junpʼéel baʼal beyoʼ, kʼaʼabéet a juntartik u tojol utiaʼal a manik.

7 Baʼaleʼ maʼ tuláakal le baʼaxoʼob ku siʼibil manbil u beetaʼaloʼ. Jeʼex wa ooxoleʼ, jach maʼalob ka síi junpʼéel vaso jaʼ tiʼ wa máax. Wa ka síik tiʼ juntúul máax ukʼajeʼ, yaan u kiʼimaktal a wóol tu yoʼolal.

8 Maʼ xaaneʼ junpʼéel kʼiineʼ ka múul beetik wa baʼax chʼujkil yéetel a maama. Baʼaleʼ ¿baʼax jeʼel u beetik u maas kiʼimaktal a wóoleʼ?... A síik tiʼ juntúul a amigo wa a amiga. ¿A kʼáat wa a beete?...

 9 Jesús, le Maʼalob j-Kaʼansaj, yéetel u apostoloʼoboʼ anchaj tiʼob le kiʼimak óolal ku taasik le u tsʼáaik baʼax yaantiʼoboʼ. ¿A wojel wa baʼax tu tsʼáajoʼob tiʼ u maasil?... Junpʼéel baʼax jach maʼalob. Letiʼobeʼ u kʼaj óoloʼob le maʼalob péektsiloʼ bey xan u jaajil tu yoʼolal Dios, yéetel tu kaʼansoʼob x-maʼ boʼolil yéetel kiʼimak óolal tiʼ u maasil.

10 Juntéenjeakileʼ, apóstol Pablo yéetel Lucas, u amigoeʼ, tu kʼaj óoltoʼob juntúul koʼolel u kʼáat ka yanak xan tiʼ le kiʼimak óolal ku taasik u síik máak baʼax yaantiʼoʼ. Tu yiloʼob yiknal junpʼéel áalkab jaʼ tumen tu yojéeltoʼobeʼ tiʼ suuk u bin le máakoʼob orar tiʼ Diosoʼ. Bey xan úuchikoʼ, ka kʼuchoʼobeʼ tu yiloʼob yaʼab koʼoleloʼob táan u oraroʼobiʼ.

11 Pabloeʼ káaj u tsikbaltik tiʼ le koʼoleloʼob yoʼolal Jéeoba yéetel u Reinooʼ. Juntúul tiʼ letiʼob ku kʼaabaʼtik Lidiaeʼ, jach tu yuʼubaj le baʼax aʼalaʼaboʼ. Tsʼoʼoleʼ tu yeʼesaj jach kʼaʼanaʼan u yilik le baʼax táant u kanikoʼ. Le oʼolal tu kʼáat óoltaj tiʼ Pablo yéetel Lucas: «Wa teʼex tsʼoʼok a wilkeʼex chúukaʼan in wóol tiʼ Jéeobaeʼ, ookeneʼex tin wotoch yéetel pʼáateneʼexiʼ». Bey úuchik u beetik u pʼáatloʼob tu yotochoʼ (Baʼaxoʼob 16:13-15).

¿Baʼax ku yaʼalik Lidia tiʼ Pablo yéetel tiʼ Lucas?

12 Lidiaeʼ jach kiʼimakchaj u yóol úuchik u pʼáatal le máaxoʼob meyajtik Dios tu yotochoʼ. Tu yeʼesaj yaabilaj tiʼob tumen áantaʼab u kʼaj óolt Jéeoba, Jesús yéetel bix jeʼel u yantal le kuxtal minaʼan u xuul tiʼoʼ. Ku kiʼimaktal u yóol kaʼach u tsʼáaik tiʼ Pablo yéetel Lucas baʼal u jaantoʼob yéetel tuʼux u pʼáatloʼob. Leloʼ junpʼéel baʼax unaj xan k-beetik toʼon. Maʼ xaaneʼ yaan máax aʼaliktoʼon kʼaʼabéet k-síik junpʼéel baʼal. Baʼaleʼ wa maʼ tu jaajil k-óol k-tsʼáaikeʼ, maʼ kun kiʼimaktal k-óol.

¿Baʼaxten ku kiʼimaktal u yóol Lidia ikil u kʼamik Pablo yéetel Lucas tu yotoch?

13 Jeʼex wa yaantech wa jaypʼéel chʼujuk, ka in waʼaltech ka a tsʼáa junjaats tiʼ uláakʼ juntúul chan paaleʼ, ¿jeʼel wa a tsʼáaik yéetel kiʼimak óolaleʼ?... ¿Kux túun wa juntúul máax jach a yaabiltmaj? Wa chéen ta puksiʼikʼal ku síijil a tsʼáaik tiʼ a amigoeʼ, ¿máasaʼ jeʼel u kiʼimaktal a wóol ikil a beetkeʼ?...

 14 Yaan kʼiineʼ tumen jach k-yaabiltmaj wa máaxeʼ, jeʼel tak k-láaj tsʼáaik baʼax yaantoʼon, kex ka pʼáatak minaʼantoʼoneʼ. Ken k-maas yaabilt xan Dioseʼ, ku taaktal k-tsʼáaik tuláakal baʼax yaantoʼon tiʼ letiʼ.

¿Baʼaxten kiʼimakchaj u yóol le koʼolel óotsil úuchik u tsʼáaik tuláakal baʼax yaantiʼoʼ?

15 Jesús, le Maʼalob j-Kaʼansajoʼ, tu yilaj juntúul koʼolel óotsil jach u yaabiltmaj Dios. Chéen kaʼapʼéel mejen taakʼin yaan kaʼach tiʼ, baʼaleʼ tu síiaj utiaʼal meyaj teʼ templooʼ. Mix máak obligart u tsʼáaiʼ, tsʼoʼoleʼ u maas yaʼabil tiʼ le máaxoʼob yanoʼoboʼ maʼ tu yiloʼobiʼ. Tu puksiʼikʼal síij u beetik yéetel tumen u yaabiltmaj Jéeoba. Ku kiʼimaktal u yóol ikil u tsʼáaik baʼax yaantiʼ (Lucas 21:1-4).

16 Maʼ chéen junpʼéel bix jeʼel u tsʼáaik máak baʼax yaantiʼeʼ. ¿Jeʼel wa u páajtal a waʼalik jujunpʼéel bix jeʼel u beetaʼaleʼ?... Wa k-síik wa baʼax tumen jach tu jaajil k-kʼáat k-beeteʼ yaan u kiʼimaktal k-óol. Le oʼolal Jesús, le Maʼalob j-Kaʼansajoʼ, ku yaʼaliktoʼon maʼ k-beetik k-tsʼuʼutil yéetel baʼaxoʼob yaantoʼon (Lucas 6:38). Wa k-beetik baʼax ku yaʼalikeʼ yaan k-kiʼimakkúuntik u yóol u maasil. Tsʼoʼoleʼ yaan xan u maas kiʼimaktal k-óol.

Koʼox xokik u maasil yoʼolal le kiʼimak óolal ku taasik u tsʼáaik máak baʼax yaantiʼ tu libroil Mateo 6:1-4; Lucas 14:12-14, yéetel 2 Corintoiloʼob 9:7.