Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 1

Baʼaxten Jesuseʼ juntúul Maʼalob j-Kaʼansaj

Baʼaxten Jesuseʼ juntúul Maʼalob j-Kaʼansaj

MAAS tiʼ dos mil jaʼabjeakileʼ síij juntúul chan xiʼipal jelaʼan tiʼ u maasil, le ka nojochchajeʼ kʼaj óoltaʼab bey letiʼe máax maas nojoch anchajoʼ. Teʼ kʼiinoʼob jeʼeloʼ minaʼan avionoʼob, camionoʼob, computadoraʼob, televisión mix Internet.

2 Le chan xiʼipalaʼ tsʼaʼab u kʼaabaʼt Jesús, yéetel letiʼe máax maas anchaj u naʼat way Luʼumoʼ. Tsʼoʼoleʼ letiʼe maas maʼalob j-Kaʼansaj anchajoʼ, tumen tak le baʼaxoʼob talam u naʼataʼaloʼ tu tsolaj junpʼéel bix jach séeb u naʼataʼal.

3 Jesuseʼ ku kaʼansik kaʼach le máakoʼob yanoʼob jáal jaʼoʼ, teʼ barcoʼoboʼ, teʼ najoʼoboʼ yéetel teʼ bejoʼoboʼ. Tumen minaʼan kaʼach camionoʼob yéetel trenoʼobeʼ, Jesuseʼ xíimbalil u bin u kaʼans le máakoʼob tuláakal tuʼuxoʼ.

4 Yaʼab baʼaxoʼob jeʼel k-kanik tiʼ uláakʼ máakoʼobeʼ, baʼaleʼ le baʼaxoʼob maas kʼaʼanaʼantakoʼ chéen tiʼ Jesús, le Maʼalob j-Kaʼansaj, jeʼel k-kanikoʼ. Ken k-xok teʼ Biblia le baʼaxoʼob tu yaʼaloʼ, bey ka tsikbalnakoʼon tu yéeteleʼ.

5 ¿Baʼax oʼolal jach maʼalob úuchik u kaʼansaj Jesús? Junpʼéel baʼax oʼolaleʼ tumen anchaj xan máax kaʼansik. Tsʼoʼoleʼ Jesuseʼ u yojel jach kʼaʼabéet u yuʼubik máak baʼax ku kaʼansaʼaltiʼ. Baʼaleʼ ¿máax kaʼanse?... Dios, u Taata.

6 Táanil tiʼ u taal Jesús way Luʼumeʼ tiaʼan kaʼach teʼ kaʼan yéetel Diosoʼ. Letiʼeʼ maʼ jeʼex u maasil máakoʼoboʼ, tumen kuxlaj teʼ kaʼan táanil tiʼ u taal kuxtal way Luʼumoʼ. Teʼ kaʼanoʼ, Jesuseʼ jach maʼalob  hijotsil, tumen tu yuʼubaj u tʼaan u Taata. Le oʼolal béeychaj u kaʼansik tiʼ le máakoʼob le baʼaxoʼob tu kanaj tiʼ Diosoʼ. Wa ka wuʼuyik u tʼaan a taataʼobeʼ ka beetik jeʼex úuchik u beetik Jesuseʼ.

7 Uláakʼ baʼax oʼolal jach Maʼalob j-Kaʼansaj Jesuseʼ, tumen u yaabiltmaj le máakoʼoboʼ yéetel u kʼáat u yáantoʼob ka u kʼaj óoltoʼob Dios. Jesuseʼ u yaabiltmaj le nukuch máakoʼoboʼ bey xan le mejen paalaloʼoboʼ. Le mejen paalaloʼob xanoʼ uts tu tʼaan u yantaloʼob tu yiknal, tumen ku tsikbal tu yéeteloʼob yéetel ku yuʼubik baʼax ku yaʼalikoʼob.

¿Baʼaxten uts tu tʼaan u yantal le mejen paalaloʼob yiknal Jesusoʼ?

8 Juntéenjeakileʼ jujuntúul taatatsiloʼobeʼ tu bisaj u mejen paalaloʼob yiknal Jesús. Baʼaleʼ u amigoʼobeʼ tu tukloʼobeʼ minaʼan tiempo tiʼ utiaʼal u tsikbal yéetel le mejen paalaloʼoboʼ, ka tu yaʼaloʼobtiʼob ka xiʼikoʼob. ¿Baʼax túun tu beetaj Jesús?... Tu yaʼalaj tiʼ u amigoʼob: «Chaʼex u taal le mejen paalal tin wiknaloʼ; maʼ a kʼatikeʼex u beeloʼob». U jaajileʼ Jesuseʼ u kʼáat ka u natsʼuba le mejen paalaloʼob tu yiknaloʼ. Kex jach yaan u naʼat yéetel jach yaʼab meyaj yaan u beeteʼ, Jesuseʼ tu  jóoʼsaj tiempo utiaʼal u kaʼansik le mejen paalaloʼoboʼ (Marcos 10:13, 14).

9 ¿A wojel wa baʼaxten Jesuseʼ tu kaʼansaj le mejen paalaloʼob yéetel tu yuʼubaj baʼax tu yaʼaloʼoboʼ? Tumen u kʼáat ka kiʼimakchajak u yóoloʼob, le oʼolal tu tsikbaltajtiʼob yaʼab baʼaloʼob tu yoʼolal Dios, u Taata yaan teʼ kaʼanoʼ. ¿Bix jeʼel u páajtal a kiʼimakkúuntik u yóol uláakʼ máakoʼobeʼ?... Letiʼ a tsikbaltiktiʼob baʼaxoʼob tsʼoʼok a kanik tiʼ Dios.

10 Juntéenjeakileʼ meyajnaj tiʼ Jesús juntúul chan paal utiaʼal u kaʼansik junpʼéel baʼax jach kʼaʼanaʼan tiʼ u amigoʼob. Tu tsʼáaj le chan paal tu chúumuk u disipuloʼoboʼ ka tu yaʼalajtiʼobeʼ kex nuuktakoʼobeʼ kʼaʼabéet u tuukuloʼob jeʼex le chan paaloʼ.

¿Baʼax jeʼel u páajtal u kanik le táankelem paalaloʼob yéetel le nukuch máakoʼob tiʼ juntúul chan paaloʼ?

11 ¿Baʼax tu yóotaj u yaʼal Jesús tiʼob? ¿A wojel wa bix jeʼel u páajtal u beetkuba bey juntúul chan paal juntúul nojoch máak, wa juntúul táankelem paaleʼ?... Juntúul chan paaleʼ maʼ yaʼab baʼax u yojel jeʼex juntúul nojoch máakeʼ, yéetel uts tu yich u kaanbal. Bey túunoʼ Jesuseʼ u kʼáat ka u kan u disipuloʼobeʼ unaj u yeʼeskoʼob kabal óolal. U jaajileʼ tuláakloʼon jeʼel k-kanik yaʼab baʼaloʼob tiʼ uláakʼ máakoʼobeʼ. Tsʼoʼoleʼ kʼaʼabéet k-naʼatik xaneʼ le baʼaxoʼob tu kaʼansaj Jesusoʼ maas maʼalob tiʼ bix k-tuukul (Mateo 18:1-5).

12 Uláakʼ baʼax oʼolal jach Maʼalob j-Kaʼansaj Jesuseʼ tumen séeb u naʼataʼal le baʼax ku kaʼansikoʼ. Ku tʼaan kaʼach tiʼ le chʼíichʼoʼoboʼ, tiʼ le looloʼoboʼ yéetel tiʼ  uláakʼ baʼaloʼob kʼaj óolaʼan utiaʼal u yáantik le máakoʼob u maas kʼaj óoltoʼob Diosoʼ.

13 Juntéenjeakil tiaʼan Jesús tu jáal junpʼéel witseʼ bin yaʼabkach máakoʼob ilik. Jeʼex a wilik teʼ dibujooʼ, Jesuseʼ kulajeʼ ka tu kaʼansajtiʼob yaʼabkach baʼaloʼob. Le baʼax tu kaʼansoʼ kʼaj óolaʼan bey u Kaʼansajil le Puʼukoʼ. Tu yaʼalaj: ‹Ilawileʼex le chʼíichʼoʼob ku xikʼnaloʼob teʼ kaʼanoʼ; letiʼobeʼ maʼ tu paakʼaloʼob, maʼ tu joochoʼob mix tu líiʼskoʼob u yich u paakʼaloʼob tiʼ chʼiiloʼob. Kex beyoʼ, ku tséentaʼaloʼob tumen le Dios yaan teʼ kaʼanoʼ. ¿Maʼ wa maas koʼoj a tojoleʼex tiʼ letiʼobiʼ?›.

¿Baʼax ku kaʼansik kaʼach Jesús le ka tʼaanaj tiʼ le chʼíichʼoʼob yéetel tiʼ le looloʼoboʼ?

14 Tsʼoʼoleʼ tu yaʼalaj: ‹Kaanbalneneʼex tiʼ le looloʼob yanoʼob teʼ kʼáaxoʼ. Maʼatech u kíimskubaʼob meyaj, baʼaleʼ ilawileʼex bukaʼaj jatsʼutsiloʼob. Mix Salomón anchaj u nookʼoʼob jach jatsʼutstak beyoʼ. Wa Dios ku kanáantik u loolil le kʼáaxoʼ, ¿maʼ wa maas jeʼel u kanáantkeʼexeʼ?› (Mateo 6:25-33).

 15 ¿Ka naʼatik wa le baʼax tu yóotaj u kaʼans Jesusoʼ?... Letiʼeʼ maʼ u kʼáat ka chiʼichnakchajkoʼon tu yoʼolal baʼax ken k-jaant wa baʼax ken k-búukintiʼ. Dioseʼ u yojel kʼaʼabéettoʼon le baʼaloʼobaʼ. Baʼaleʼ Jesuseʼ maʼ tu yóotaj u yaʼal wa maʼ unaj k-meyaj utiaʼal k-kaxtik baʼax k-jaant wa utiaʼal k-manik k-nookʼiʼ, baʼaxeʼ táan u yaʼalik unaj k-tsʼáaik táanil ichil k-kuxtal k-meyajtik Dios. Wa k-beetik beyoʼ, Dioseʼ yaan u tsʼáaiktoʼon le baʼaxoʼob kʼaʼabéettoʼonoʼ. ¿Ka creertik wa jeʼel u beetik beyoʼ?...

 16 Le ka tsʼoʼok u kaʼansaj Jesusoʼ, ¿baʼax tu tuklaj le máaxoʼob yanoʼoboʼ?... Le Bibliaoʼ ku yaʼalikeʼ jaʼakʼ u yóoloʼob yoʼolal bix u kaʼansaj. Uts tu tʼaan u yuʼubikoʼob, le tsolnuʼukoʼob tu tsʼáajoʼ tu yáantaj le máakoʼob u beetoʼob baʼax maʼaloboʼ (Mateo 7:28).

17 Bey túunoʼ jach kʼaʼabéet k-kaanbal tiʼ Jesús. ¿A wojel wa bixi?... Le baʼaxoʼob tu yaʼaloʼ tiʼ tsʼíibtaʼan ichil junpʼéel libroeʼ. ¿Baʼax libroil?... Letiʼe Kiliʼich Bibliaoʼ. Wa k-xokik le Bibliaoʼ k-uʼuyik baʼax tu yaʼalaj Jesús. Teʼ Bibliaoʼ ku tsolik bix úuchik u yaʼalik Dios ka k-uʼuy le baʼax tu kaʼansaj Jesusoʼ. Koʼox ilik bix úuchik.

18 Junpʼéel kʼiineʼ, Jesuseʼ naʼak tiʼ junpʼéel wits yéetel óoxtúul u amigoʼob: Pedro, Santiago yéetel Juan. Tiʼ uláakʼ xookoʼobeʼ yaan k-kanik u maasil yoʼolal le óoxtúul máakoʼob tu bisubaʼob yéetel Jesusaʼ. Baʼaleʼ jeʼex a wilik teʼ dibujooʼ, teʼ kʼiin jeʼeloʼ u yich Jesuseʼ joʼopʼ u léembal, yéetel u nookʼeʼ káaj u léembal jeʼex le sáasiloʼ.

«Lelaʼ in Paal, [...] uʼuyeʼex u tʼaan»

19 Jesús túun yéetel u amigoʼobeʼ tu yuʼuboʼob junpʼéel tʼaan teʼ kaʼanoʼ: «Lelaʼ in Paal, máax in yaabiltmaj, tu yoʼolal máax jach kiʼimak in wóol; uʼuyeʼex u tʼaan» (Mateo 17:1-5). ¿A wojel wa máax le tʼaanajoʼ?... Dios. Bey túunoʼ, Dios aʼaltiʼob kʼaʼabéet u yuʼubikoʼob u tʼaan u Hijo.

20 ¿Baʼax ken k-beettoʼon? ¿Yaan wa k-uʼuyik u tʼaan Jesús, le Maʼalob j-Kaʼansaj, jeʼex u yaʼalik Diosoʼ?... Leloʼ tuláakloʼon unaj k-beetik. ¿Kʼajaʼan wa tech bix jeʼel u páajtal k-beetkeʼ?...

21 Beyoʼ, junpʼéel bix k-uʼuyik u tʼaan u Hijo Dioseʼ, letiʼe k-xokik le baʼaxoʼob ku yaʼalik le Biblia tiʼ bix úuchik u kuxtaloʼ. Le Maʼalob j-Kaʼansajoʼ jach yaʼab baʼaxoʼob jatsʼutstak yaan u tsikbalttoʼon, leloʼobaʼ tiaʼanoʼob ichil le Bibliaoʼ. Jach jeʼel u yutstal ta yich a kankoʼobeʼ, yéetel jeʼel u taasiktech kiʼimak óolal wa ka tsikbaltik tiʼ a amigoʼobeʼ.

Wa k-kaxtik teʼ Biblia Juan 3:16; 8:28-30, yéetel Baʼaxoʼob 4:12, jeʼel k-ilik le utsiloʼob ku taasik u yuʼubaʼal u tʼaan Jesusoʼ.