Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 23

¿Baʼaxten k-kʼojaʼantal?

¿Baʼaxten k-kʼojaʼantal?

¿YAAN wa máax a kʼaj óol kʼojaʼan?... Maʼ xaaneʼ yaan kʼiineʼ tak teech ka kʼojaʼantal. Maʼ xaaneʼ, ku tsaʼayaltech seʼen wa ku chiʼibal a nakʼ. Yaan máaxoʼobeʼ jach kʼojaʼanoʼob. Maʼ tu páajtal mix tak u waʼataloʼob chéen tu juunaloʼob, maases wa tsʼoʼok u chʼíijloʼob.

2 Tuláakal máak ku kʼojaʼantal wa baʼax kʼiin. ¿A wojel wa baʼaxten ku kʼojaʼantal máak, ku chʼíijil yéetel ku kíimil?... Jesuseʼ tu yeʼesaj baʼaxten le ka bisaʼab tu yiknal juntúul máak maʼ tu páajtal u xíimbal. Paʼatik in jáan tsikbaltiktech le baʼax úuchoʼ.

3 Jesuseʼ u kʼubéentmuba tiʼ junpʼéel kaaj yaan naatsʼ tiʼ u kʼáaʼnáabil Galilea, teʼeloʼ bin yaʼab máakoʼob ilkiʼ. Jach yaʼab máakoʼob biniʼ, le oʼolal chuʼup le najoʼ. Mix máak jeʼel u páajtal u náatsʼal kaʼach tak chéen teʼ joonajoʼ. Baʼaleʼ láayliʼ táan u kʼuchul yaʼab máakoʼobeʼ. Junmúuchʼ máakoʼobeʼ tu taasoʼob juntúul máak minaʼan u muukʼ u wíinklil yéetel maʼ tu páajtal u xíimbal. Kuchbil bisaʼabik tiʼ junpʼéel camilla tumen kantúul máakoʼob.

4 ¿A wojel wa baʼaxten tu bisoʼob le kʼojaʼan yiknal Jesusoʼ?... Tumen ku creertikoʼob jeʼel u páajtal u tsʼakikeʼ. Baʼaleʼ tumen jach chuup le najoʼ, ¿bix a tuklik páajchajik u kʼujsikoʼob yiknal Jesús?...

5 Teʼ dibujooʼ jeʼel u páajtal a wilik bix úuchik u beetkoʼobeʼ. Yáaxeʼ tu naʼaksoʼob le máak yóokʼol le najoʼ. Tsʼoʼoleʼ ka tu beetoʼob junpʼéel nojoch jooliʼ. Tu tsʼookeʼ ka tu jalkʼesoʼob le máak  minaʼan u muukʼ u wíinklil teʼ jool tu beetoʼoboʼ. ¿Máasaʼ jach yaan u fejoʼob?

6 Le máakoʼob yanoʼob ichil le najoʼ jaʼakʼ u yóoloʼob ka tu yiloʼob baʼax ku beetik le máakoʼoboʼ. Le máak minaʼan u muukʼ u wíinkliloʼ pʼáat chúumuk tiʼob. ¿Kʼuuxilnaj wa Jesús ka tu yilaj le baʼax tu beetoʼoboʼ?... Maʼatech. Baʼaxeʼ kiʼimakchaj u yóol ka tu yilaj yaan u fejoʼob. Tu yaʼalaj tiʼ le máak minaʼan u muukʼ u wíinkliloʼ: «Tsʼoʼok u perdonartaʼal a kʼebanoʼob».

¿Baʼax tu yaʼalaj Jesús tiʼ le máak minaʼan u muukʼ u wíinklil ka u beetoʼ?

7 Yaan tiʼ le máaxoʼob yanoʼoboʼ tu tukloʼob maʼ maʼalob úuchik u yaʼalik Jesús leloʼ. Maʼ tu creertikoʼob wa letiʼeʼ jeʼel u páajtal u  perdonartik le kʼebanoʼ. Le oʼolal utiaʼal u yeʼesik jeʼel u páajtal u beetkeʼ tu yaʼalaj tiʼ le máakoʼ: «Líikʼen, chʼaʼ a camillaeʼ ka xiʼikech ta wotoch».

8 Le ka tu yaʼalaj Jesús lelaʼ, le máakoʼ anchaj u muukʼ u wíinklil. Páajchaj u líikʼil tu juunal yéetel u xíimbal. Le máakoʼob il u tsʼaʼakaloʼ jaʼakʼ u yóoloʼob. Mix juntéen u yiloʼob junpʼéel baʼal beyoʼ. Tu kiʼikiʼtʼantoʼob Jéeoba úuchik u túuxtik tu yiknaloʼob le Maʼalob j-Kaʼansaj, jeʼel tak u páajtal u tsʼakik le kʼojaʼanoʼoboʼ (Marcos 2:1-12).

¿Baʼax k-kanik tiʼ le milagroaʼ?

9 ¿Baʼax k-kanik tiʼ le milagro tu beetoʼ?... Ku yeʼesikeʼ Jesuseʼ yaan u páajtalil tiʼ u perdonartik le kʼebanoʼ bey xan u tsʼakik le kʼojaʼanoʼoboʼ. Baʼaleʼ ku kaʼansik xan toʼoneʼ: k-kʼojaʼantal yoʼolal le kʼebanoʼ.

10 Baʼaleʼ tumen tuláakloʼon k-kʼojaʼantaleʼ, ¿u kʼáat wa túun u yaʼaleʼ láaj j-kʼebanoʼon?... Beyoʼ, le Bibliaoʼ ku yaʼalikeʼ j-kʼebanoʼon desde ken síijikoʼon. ¿A wojel wa baʼax u kʼáat u yaʼal u síijil máak yéetel kʼeban?... U kʼáat u yaʼaleʼ tiaʼan le kʼeban tu wíinklil ken síijikoʼ. Yaan horaeʼ k-beetik baʼax kʼaas kex maʼ k-kʼáatiʼ. Baʼaleʼ ¿bix úuchik k-láaj kʼebantal?...

11 Tumen Adán, le yáax máakoʼ, kʼebanchaj tumen maʼ tu yuʼubaj u tʼaan Diosiʼ. Tsʼoʼoleʼ tu máansaj tiʼ tuláakloʼon le kʼebanoʼ. ¿A wojel wa bix úuchik? Paʼatik in tsoliktech junpʼéel bix jeʼel a naʼatikeʼ.

¿Bix úuchik k-láaj kʼebantal?

 12 Maʼ xaaneʼ tsʼoʼok a wilik u meyaj junpʼéel molde utiaʼal u beetaʼal waaj. ¿Baʼax jeʼel u yúuchul wa yuuchʼul le moldeoʼ? ¿Tsʼoʼok wa máansik ta tuukul?... ¿Máasaʼ jeʼel jaypʼéel waaj ka beetaʼakeʼ yuuchʼul xan?...

13 Adaneʼ bey jeʼex le moldeoʼ, toʼoneʼ beyoʼon jeʼex le waajoʼ. Tumen maʼ tu beetaj Adán le baʼax tu yaʼalaj Diosoʼ, kʼebanchaji. Desde teʼ kʼiin jeʼeloʼ yúuchʼi, wa kʼebanchaji. Le oʼolaleʼ, ka síij u paalaloʼobeʼ, ¿baʼax uchaʼantiʼob?... Láaj yaan u marca le kʼeban tiʼoboʼ.

14 U maas yaʼabil le mejen paalaloʼoboʼ, maʼ chíikaʼan u yilaʼal wa j-kʼebanoʼobiʼ. Yaan tu kaʼapʼéelal u kʼaboʼob yéetel tu kaʼapʼéelal u yookoʼob. Baʼaleʼ yoʼolal le kʼeban yaan tu wíinkliloʼoboʼ yaan u kʼojaʼantaloʼob, yéetel ken máanak kʼiineʼ, yaan u kíimloʼob.

15 Baʼaleʼ yaan máakeʼ maas ku kʼojaʼantal tiʼ u maasil. ¿Baʼaxten ku yúuchul beyoʼ? ¿Tumen wa maas j-kʼebanoʼob?... Maʼatech, tuláakal máak ken síijikeʼ junpʼéeliliʼ le bukaʼaj kʼeban yaan tu wíinkliloʼ. Láaj j-kʼebanoʼon ken síijikoʼon, le oʼolal ku kʼuchul u kʼiinil k-kʼojaʼantal. Tak le máaxoʼob ku beetkoʼob baʼax ku yaʼalik Dios yéetel maʼatech u beetkoʼob baʼaloʼob kʼaastakoʼ ku kʼojaʼantaloʼob.

¿Baʼax kun úuchul ken luʼsaʼak le kʼebanoʼ?

16 ¿Baʼaxten túun yaan máaxeʼ maas ku kʼojaʼantal?... Yaan yaʼab baʼax oʼolal. Maʼ xaaneʼ óoliʼ minaʼan baʼal u jaante wa le baʼax ku jaantikoʼ maʼ jach maʼalobiʼ. Maʼ xaaneʼ ku sen jaantik chʼujuk. Maʼ xaan xaneʼ maʼatech u séeb chitaloʼob, le oʼolal maʼatech u chúukpajal u weenloʼob. Yéetel maʼ xaaneʼ maʼatech u tepʼikubaʼob tubeel kex keʼel. Yaan máaxeʼ tumen jach debileʼ,  maas séeb u kʼojaʼantal kex ku kanáantkuba.

17 ¿Yaan wa u kʼuchul u kʼiinil maʼ k-kʼojaʼantal? ¿Yaan wa u kʼuchul u kʼiinil u luʼsaʼal le kʼeban yaantoʼonoʼ?... ¿Baʼax kaʼach tu beetaj Jesús tiʼ le máak minaʼan u muukʼ u wíinklileʼ?... Tu perdonartaj u kʼebaneʼ ka tu tsʼakaj. Bey úuchik u yeʼesik Jesús baʼax ken u beet maʼ kun xáantal tiʼ le máaxoʼob ku xachkubaʼob u beetoʼob baʼax maʼaloboʼ.

18 Wa k-ilik maʼ k-beetik baʼax kʼaas yéetel k-pʼektik le baʼax kʼaasoʼ yaan k-tsʼaʼakal tumen Jesús. Tumen letiʼ u Reyil u Reino Dioseʼ, yaan u luʼsik le kʼeban yaan t-wíinkliloʼ. Le kʼebanoʼ maʼ junpuul kun luʼsbiliʼ, baʼaxeʼ jujunpʼíitil. Le ken láaj luʼsaʼak t-wíinklileʼ maʼ ken k-kaʼa kʼojaʼantal mix bikʼin. Tuláakal máak kun antal toj óolal tiʼ. ¡Bukaʼaj jatsʼutsil waleʼ!

Koʼox ilik uláakʼ tekstoʼob eʼesik le muʼyajiloʼob ku taasik le kʼeban tiʼ tuláakal máak tu libroil Job 14:4; Salmo 51:5; Romailoʼob 3:23; 5:12, yéetel 6:23.