Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 38

¿Baʼaxten kʼaʼabéet k-yaabiltik Jesús?

¿Baʼaxten kʼaʼabéet k-yaabiltik Jesús?

TUKULTEʼ tiaʼanech ichil junpʼéel barco táan u búululeʼ. ¿Jeʼel wa u kiʼimaktal a wóol wa ka salvartaʼakech tumen wa máaxeʼ?... ¿Kux túun wa ku tsʼáaik u kuxtal utiaʼal u salvartikech?... Lelaʼ letiʼe baʼax tu beetaj Jesucristooʼ. Jeʼex úuchik k-kanik teʼ xookil 37, letiʼeʼ tu tsʼáaj u kuxtal t-oʼolal utiaʼal u salvartikoʼon.

2 Baʼaleʼ lelaʼ maʼ u kʼáat u yaʼal wa Jesuseʼ tu salvartoʼon utiaʼal maʼ k-búulul. ¿Kʼajaʼan wa tech tiʼ baʼax tu salvartoʼon?... Tiʼ le kʼeban yéetel tiʼ le kíimil tu máansajtoʼon Adanoʼ. Kex wa yaan máaxoʼob u beetmoʼob baʼaloʼob kʼaastakeʼ, kíim xan Jesús tu yoʼolaloʼob. Techeʼ, ¿jeʼel wa a wóotik a tsʼáa a kuxtal yoʼolal juntúul máak beyoʼ?...

3 Le Bibliaoʼ ku yaʼalik: «Mix máak ku tsʼáaik u kuxtal yoʼolal juntúul máak toj u kuxtal; baʼaleʼ yoʼolal le máak utsoʼ, maʼ xaaneʼ yaan máax jeʼel u yóotik u tsʼáa u kuxtal tu yoʼolaleʼ». Baʼaleʼ ku yaʼalik xaneʼ Jesuseʼ «kíim yoʼolal kʼasaʼan máakoʼob» maʼatech u meyajtikoʼob Dios. Le Bibliaoʼ ku yaʼalikeʼ «kex j-kʼeban máakoʼon kaʼach», wa kex k-beetik baʼaloʼob kʼaastakeʼ, «Cristoeʼ kíim t-oʼolal» (Romailoʼob 5:6-8).

4 ¿Kʼajaʼan wa tech máax beet baʼaloʼob kʼaastak táanil tiʼ u beetkuba apostolil?... Letiʼe máax tsʼíibt le tʼaanoʼobaʼ: «Cristo Jesuseʼ taal way yóokʼol kaabeʼ utiaʼal u salvartik le j-kʼeban máakoʼoboʼ. Ichil tuláakloʼobeʼ teen u maas j-kʼebanil». Le máak jeʼelaʼ, letiʼe apóstol Pablooʼ. Letiʼeʼ tu yaʼaleʼ, ‹minaʼan u naʼat› kaʼachi yéetel chéen ‹chʼiikil u beet u kʼasaʼanil› (1 Timoteo 1:15; Tito 3:3).

5 Chéen tukult bukaʼaj yaabilaj tu yeʼesaj Dios úuchik u túuxtik u Hijo kíimil tu yoʼolal le kʼasaʼan máakoʼoboʼ. Kaxt teʼ Biblia le baʼax ku  yaʼalik Juan, capítulo 3, versículo 16: «Dioseʼ tumen jach u yaabiltmaj yóokʼol kaabeʼ [wa le máaxoʼob kajakbaloʼob teʼ Luʼumaʼ] tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul».

¿Baʼaxoʼob tu muʼyajtaj Jesús le ka tu kʼubaj u kuxtal t-oʼolaloʼ?

6 Jesuseʼ tu yeʼeseʼ jach u yaabiltmoʼon jeʼex u Taataeʼ. Maʼ xaaneʼ kʼajaʼantech teʼ xookil 30 tiʼ le libroaʼ, t-ilaj bukaʼaj beetaʼabik u muʼyaj le áakʼab ka maʼachoʼ. Yáaxeʼ bisaʼab juzgartbil tu yotoch Caifás, u nojchil le sacerdoteʼoboʼ. Tu taasoʼob máakoʼob aʼalik baʼaloʼob maʼ jaajtak tu contraiʼ, tsʼoʼoleʼ loʼoloxaʼab tumen le máakoʼoboʼ. Teʼ áakʼab jeʼeloʼ, Pedroeʼ tu yaʼalaj maʼ u kʼaj óoliʼ. Beoraaʼ tukulteʼ tiaʼanoʼoniʼ yéetel táan k-ilik baʼax ku yúuchul.

7 Tsʼoʼok u sáastal. Jesuseʼ bul áakʼab maʼ weeniʼ. Tumen maʼ maʼalob bix úuchik u juzgartaʼaleʼ, le sacerdoteʼoboʼ tu yiloʼob u jáan muchʼkoʼob le Sanedrín utiaʼal u beetkoʼob uláakʼ juiciooʼ. Teʼelaʼ ku kaʼa aʼalikoʼobeʼ Jesuseʼ táan u kʼebantal tu táan Dios.

8 Tsʼoʼoleʼ le sacerdoteʼoboʼ tu yaʼaloʼob ka kʼaʼaxak Jesús yéetel ka bisaʼak tu táan Pilato, u gobernadoril Roma. Tu yaʼaloʼobtiʼ: ‹Jesuseʼ tsʼoʼok u tʼaan tu contra le gobiernooʼ. ¡Unaj u kíimsaʼal!› Baʼaleʼ Pilatoeʼ tu tsʼáaj cuenta chéen táan u tuus le sacerdoteʼoboʼ, le oʼolal tu yaʼalajtiʼob: ‹Teneʼ maʼ tin wilik wa yaan baʼax kʼaas u beetmaj, yaan in jáalkʼabtik›. Le sacerdoteʼob yéetel uláakʼ máakoʼoboʼ tu yawtoʼob: ‹¡Maʼ, kíimse!›.

9 Maʼ sáam tiʼ leloʼ, Pilatoeʼ tu ka aʼalaj tiʼ le máakoʼoboʼ yaan u chaʼik Jesús. Baʼaleʼ le sacerdoteʼoboʼ tu beetoʼob u yawtaʼal tumen le máakoʼoboʼ: ‹Wa ka jáalkʼabtikeʼ táan a tsʼáaikaba tu contra le gobiernooʼ. ¡Kíimse!›. Le máakoʼoboʼ joʼopʼ u maas yawtikoʼob lelaʼ. ¿A wojel wa baʼax tu beetaj Pilato?...

10 Tu chaʼaj u beetkoʼob baʼax u kʼáatoʼob. Yáaxeʼ tu túuxtaj jaʼajatsʼbil Jesús, tsʼoʼoleʼ tu kʼubaj tiʼ le soldadoʼob utiaʼal ka u kíimsoʼoboʼ. Letiʼobeʼ tu tsʼáajoʼob tu pool Jesús junpʼéel corona beetaʼan yéetel kʼiʼix  ka joʼopʼ u pʼaʼastikoʼob. Tsʼoʼoleʼ tu tsʼáajoʼob u páajkalt junpʼéel cheʼ utiaʼal u bis teʼ tuʼux ku kʼaabaʼtik U Kúuchil Baakel Pooloʼ. Teʼeloʼ tu bajoʼob u kʼab yéetel u yook Jesús, tsʼoʼoleʼ ka tu waʼakúuntoʼob le cheʼ utiaʼal ka chʼuylak u wíinkliloʼ. Le tuʼux beetaʼan loob tiʼoʼ táan u yáalal u kʼiʼikʼel, bey túunoʼ jach yaj u muʼyaj.

11 Baʼaleʼ Jesuseʼ maʼ séeb kíimiʼ. Xáanchaj táan u muʼyaj teʼ cheʼoʼ. Teʼ súutuk jeʼeloʼ joʼopʼ u pʼaʼastaʼal tumen le sacerdoteʼoboʼ, yéetel le máakoʼob ku máanoʼoboʼ ku yaʼalikoʼob: «¡Wa u paalech Dioseʼ, éemkech tiʼ u cheʼil le muʼyajoʼ!». Baʼaleʼ Jesuseʼ u yojel túuxtaʼab tumen u Taata utiaʼal ka u kʼub u kuxtal t-oʼolal utiaʼal ka béeychajak u yantaltoʼon kuxtal minaʼan u xuul. Tu tsʼookeʼ, kex bey láas tres u chíinil Kʼiineʼ, tu kʼaʼamtʼantaj u  Taataeʼ ka kíimi (Mateo 26:36-27:50; Marcos 15:1; Lucas 22:39-23:46; Juan 18:1-19:30).

12 ¿Máasaʼ jach maʼ chíikaʼan le baʼax tu beetaj Jesús tiʼ le baʼax tu beetaj Adanoʼ? Adaneʼ maʼ tu yaabiltaj Diosiʼ, le oʼolal maʼ tu yuʼubaj u tʼaaniʼ. Tsʼoʼoleʼ maʼ tu yaabiltaj wíinikiʼ, tumen yoʼolal le baʼax tu beetoʼ tuláakloʼon j-kʼebanoʼon ken síijikoʼon. Baʼaleʼ Jesuseʼ tu yeʼesaj u yaabiltmaj Dios bey xan wíinik. Letiʼeʼ tu beetaj baʼax ku yaʼalik Dios yéetel tu tsʼáaj u kuxtal utiaʼal u yutskíintik le talamil beetaʼab u yantal tumen Adanoʼ.

¿Baʼax unaj k-beetik utiaʼal k-eʼesik k-yaabiltmaj Jesús?

13 ¿Máasaʼ jach nojoch le baʼax tu beetaj Jesusoʼ?... Ken orarnakech tiʼ Dioseʼ, ¿ka tsʼáaik wa gracias tiʼ úuchik u túuxtik u Hijo?... Apóstol Pabloeʼ tu tsʼáaj u graciasil tiʼ Dios yoʼolal le baʼax tu beetaj Cristooʼ. Tu yaʼaleʼ ‹yaabiltaʼab tumen u Hijo Dios le oʼolal tu kʼubaj u kuxtal tu yoʼolal› (Galaciailoʼob 2:20). Jesuseʼ kíim ta woʼolal yéetel tin woʼolal. Tu tsʼáaj u kuxtal utiaʼal u yantaltoʼon kuxtal minaʼan u xuul. Le oʼolal unaj k-yaabiltik.

14 Apóstol Pabloeʼ tu yaʼalaj tiʼ le cristianoʼob yanoʼob tu kaajil Corintooʼ: «U yaabilaj Cristoeʼ ku péeksikoʼon k-beet tuláakal baʼal». ¿Baʼax a tuklik ku péeksikoʼon k-beete?... Ilawil baʼax ku yaʼalik Pablo: «Cristoeʼ kíim tu yoʼolal tuláakal, utiaʼal beyoʼ le máaxoʼob kuxaʼanoʼoboʼ maʼ u kuxtaloʼob chéen u tiaʼal letiʼob, baʼaleʼ ka kuxlakoʼob tu yoʼolal letiʼ» (2 Corintoiloʼob 5:14, 15, QB).

 15 ¿Ku taal wa ta tuukul baʼax jeʼel a beetik utiaʼal a lúubul utsil tiʼ Cristoeʼ?... Junpʼéel bix jeʼel a beetkeʼ letiʼe a tsikbaltik tiʼ uláakʼ máakoʼob le baʼax ka kanik tiʼ letiʼoʼ. Máans ta tuukul xan lelaʼ: koʼox aʼalikeʼ maʼ kulaʼan a maamaiʼ, a papá mix uláakʼ máax ilkech. ¿Jeʼel wa a chaʼantik tiʼ televisión wa tiʼ Internet baʼaloʼob a wojel maʼ uts tu tʼaan Jesús ka a chaʼanteʼ?... Kʼaʼajaktecheʼ Jesuseʼ kuxaʼan yéetel ku yilik tuláakal baʼax k-beetik.

¿Máax ilik tuláakal le baʼaxoʼob k-beetkoʼ?

16 Uláakʼ baʼax oʼolal unaj k-yaabiltik Jesuseʼ tumen k-kʼáat k-beet jeʼex u beetik Jéeobaeʼ. Jesuseʼ tu yaʼalaj: «U yaabiltmen le Taataoʼ». ¿A wojel wa baʼaxten yaabiltaʼan Jesús tumen Jéeoba yéetel baʼaxten kʼaʼabéet k-yaabiltik xan toʼon?... Tumen Jesuseʼ tu yóotaj u kʼub u kuxtal utiaʼal u béeytal baʼax u tukultmaj u beetik Dios (Juan 10:17). Le oʼolal unaj k-beetik le baʼax ku yaʼalik le Bibliaaʼ: «Beeteʼex jeʼex u beetik Dioseʼ, tumen teʼexeʼ u paalaleʼex, yéetel u yaabiltmeʼex. Maʼ u xuʼulul xan a weʼeskeʼex yaabilaj jeʼex úuchik u yaabiltikeʼex Cristoeʼ. Letiʼeʼ tu kʼububa ta woʼolaleʼex» (Efesoiloʼob 5:1, 2).

Utiaʼal k-maas yaabiltik Jesús yéetel k-tsʼáaik u graciasil le baʼax tu beetaj t-oʼolaloʼ, koʼox xokik Juan 3:35; 15:9, 10, yéetel 1 Juan 5:11, 12.