Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 16

¿Baʼax maas kʼaʼanaʼan ichil k-kuxtal?

¿Baʼax maas kʼaʼanaʼan ichil k-kuxtal?

¿Baʼax talamil yaan kaʼach tiʼ le máakaʼ?

JUNTÉENJEAKILEʼ bin juntúul máak u yil Jesús, tumen u yojel jach yaan u naʼateʼ tu kʼáatajtiʼ: «J-Kaʼansaj, aʼal tiʼ in sukuʼun ka u tsʼáaten junjaats tiʼ le herenciaoʼ». Le máakoʼ tu tukleʼ tak tiʼ letiʼ unaj u tsʼaʼabal.

2 Wa teech kaʼach le Maʼalob j-Kaʼansajoʼ, ¿baʼax jeʼel a waʼaliktiʼeʼ?... Jesuseʼ tu yileʼ le máakoʼ yaan junpʼéel talamil tiʼ: maʼ tumen wa kʼaʼabéet u herencia u sukuʼun tiʼiʼ, baʼaxeʼ maʼ u yojel baʼax maas kʼaʼanaʼan ichil u kuxtaliʼ.

3 Koʼox tukultik lelaʼ: ¿baʼax maas kʼaʼanaʼan ichil k-kuxtal? ¿U yantaltoʼon le báaxaloʼob uts t-ichoʼ, túumben nookʼ yéetel uláakʼ baʼaloʼob?... Maʼatech. Jesuseʼ tu kaʼanseʼ yaan junpʼéel baʼax maas kʼaʼanaʼan. Le oʼolal tu tsikbaltaj baʼax úuch tiʼ juntúul máax tu tuʼubsaj Dios. ¿A kʼáat wa a wuʼuye?...

4 Tʼaanaj tiʼ juntúul máak jach ayikʼal yaan yaʼab luʼumoʼob tiʼ yéetel yaʼab chʼiiloʼob. Jach yaʼab u yich u paakʼal tsʼoʼok u jochik, baʼaleʼ minaʼan tuʼux u líiʼsik. ¿Baʼax túun tu tuklaj u beetik? Tu tuklaj: ‹Yaan in nikik in chʼiiloʼob yéetel yaan in beetik uláakʼ maas nuuktak, teʼeloʼ tiʼ ken in líiʼs tuláakal u yich in paakʼal yéetel le baʼaloʼob maʼalobtak yaantenoʼ›.

 5 Le máak ayikʼaloʼ tu tukleʼ maas maʼalob ka u líiʼs yaʼab baʼaloʼob. Tu tuklaj: ‹Yaanten yaʼab baʼaloʼob in líiʼsmaj utiaʼal yaʼab jaʼaboʼob. Le oʼolal maʼ kin chiʼichnaktal. Nikaʼaj janal, ukʼul yéetel nikaʼaj in kiʼimakkúunt in wóol›. Baʼaleʼ maʼ maʼalob le bix u tuukuloʼ. ¿A wojel wa baʼaxten?... Tumen chéen tiʼ letiʼ ku tuukul yéetel chéen tiʼ u yutsil, baʼaleʼ tu tuʼubsaj Dios.

¿Tiʼ baʼax ku tuukul kaʼach le ayikʼal máakoʼ?

6 Le oʼolal tʼaʼan tumen Dios ka aʼalaʼabtiʼ: «J-maʼ naʼat, teʼ áakʼabaʼ yaan u luʼsaʼaltech a kuxtal. ¿Máax túun ken u tiaʼalint le baʼaxoʼob ta líiʼsoʼ?». ¿Jeʼel wa u páajtal u meyajtiʼ tuláakal le baʼaxoʼob yaantiʼ ken tsʼoʼokok u kíimiloʼ?... Maʼatan, tiʼ yaanal máax kun pʼáatal. Jesuseʼ tu yaʼalaj: «Bey u yúuchul tiʼ le máak chéen ku muchʼkíintik ayikʼaliloʼoboʼ, baʼaleʼ maʼ ayikʼal tu táan Diosiʼ» (Lucas 12:13-21).

7 ¿Máasaʼ techeʼ maʼ a kʼáat a beet jeʼex úuchik u beetik le máak ayikʼaloʼ?... Letiʼeʼ maas kʼaʼanaʼan u yilik u yantal ayikʼaliloʼob tiʼ. Letiʼe  baʼax maʼ maʼalob tu beetoʼ, mantatsʼ u kʼáat u maasil, baʼaleʼ «maʼ ayikʼal tu táan Diosiʼ».

8 Yaʼab máakeʼ bey u tuukuloʼob jeʼex le ayikʼal máakoʼ, chéen u kʼáatoʼob u maasil. Baʼaleʼ lelaʼ jeʼel u taasik yaʼab talamil tiʼobeʼ. Jeʼex techeʼ, ¿máasaʼ yaʼab a báaxaloʼob yaan?... ¿Máakalmáakoʼobiʼ?... ¿Baʼax jeʼel u yúuchul wa juntúul tiʼ a amigoʼobeʼ yaan junpʼéel u bola, junpʼéel u muñeca wa uláakʼ báaxal minaʼantech? ¿Maʼalob wa ka a sen aʼal tiʼ a taataʼob ka u manoʼobtech junpʼéeliʼ?...

9 Yaan horaeʼ bey jach kʼaʼanaʼan junpʼéel báaxaleʼ. Baʼaleʼ ¿baʼax ku yúuchultiʼ ken xáanak?... Ku kʼastal. Le oʼolaleʼ ku pʼáatal maʼ uts ta wichiʼ. U jaajileʼ yaantech junpʼéel baʼax maas kʼaʼanaʼan tiʼ le báaxaloʼoboʼ. ¿A wojel wa baʼaxiʼ?...

¿Baʼax maas kʼaʼanaʼan tiʼ le báaxaloʼob yaantechoʼ?

10 Le kuxtaloʼ. Le kuxtaloʼ jach kʼaʼanaʼan, tumen wa maʼ tu yoʼolaleʼ maʼ tu páajtal a beetik mix baʼal. Baʼaleʼ kʼaʼabéet a beetik baʼax ku yaʼalik Dios utiaʼal ka seguernak a kuxtal, ¿máasaʼ?... Le oʼolal maʼ unaj k-beetik jeʼex le máak ayikʼal tu tuʼubsaj Diosoʼ.

 11 Maʼ chéen le mejen paalal ku beetik baʼaxoʼob maʼ maʼalobtak jeʼex le máak ayikʼaloʼ. Yaʼab nukuch máakoʼob beetik xan beyoʼ. Yanoʼobeʼ ku tsʼíiboltkoʼob ka maas ayikʼalchajkoʼob. Maʼ xaaneʼ yaan baʼal u jaantoʼob sáamsamal, u nookʼoʼob yéetel yaan u yotochoʼob. Baʼaleʼ ku tsʼíiboltkoʼob ka yanak u maasil nookʼ tiʼob yéetel junpʼéel naj maas nojoch. Tuláakal le baʼaloʼob beyaʼ koʼojtak. Le oʼolal ku sen meyajoʼob utiaʼal u náajaltikoʼob, tsʼoʼoleʼ jeʼex u bin u maas antal taakʼin tiʼobeʼ bey u bin u maas tsʼíiboltkoʼob u maasil.

12 Yaan nukuch máakeʼ yaʼab u meyaj utiaʼal u náajaltik taakʼin, le oʼolal maʼatech u yantal tiempo u máans yéetel u familia mix utiaʼal u adorartik Dios. ¿Jeʼel wa u salvartaʼaloʼob tumen u taakʼinoʼobeʼ?... Maʼatan. ¿Jeʼel wa u páajtal u meyajtiʼ u taakʼin ken tsʼoʼokok u kíimileʼ?... Maʼatan, tumen le kimenoʼoboʼ maʼ tu páajtal u beetkoʼob mix baʼal (Eclesiastés 9:5, 10).

13 ¿U kʼáat wa túun u yaʼal maʼ maʼalob ka yanak taakʼin tiʼ máakiʼ?... Maʼatech. Yéetel le taakʼinoʼ jeʼel u páajtal k-manik k-oʼoch yéetel k-nookʼeʼ. Le Bibliaoʼ ku yaʼalikeʼ le taakʼinoʼ ku yáantaj (Eclesiastés 7:12). Baʼaleʼ wa k-yaabiltik le taakʼinoʼ yaan u yantaltoʼon talamil. Yaan u yúuchultoʼon jeʼex le máak chéen tu ayikʼalkúuntubaoʼ, baʼaleʼ maʼ tu yilaj u ayikʼaltal tu táan Diosiʼ.

14 ¿Baʼax u kʼáat u yaʼal u ayikʼaltal máak tu táan Dios?... U tsʼáaik máak táanil ichil u kuxtal u meyajtik Dios. Yaan máakeʼ ku yaʼalikeʼ ku creertik Dios yéetel ku tuklikeʼ mix baʼal uláakʼ unaj u beetik. Baʼaleʼ ¿jach wa tu jaajil ayikʼaloʼob tu táan Dios?... Maʼatech, beyoʼob jeʼex le máak ayikʼal tu tuʼubsaj Diosoʼ.

15 Jesuseʼ mix juntéen tu tuʼubsaj u Taata yaan teʼ kaʼanoʼ. Maʼ tu yilaj u náajaltik yaʼab taakʼiniʼ mix u yantal yaʼab baʼaloʼob tiʼiʼ. Jesuseʼ u yojel baʼax maas kʼaʼanaʼan ichil u kuxtal. ¿A wojel wa baʼax?... U ayikʼaltal tu táan Dios.

¿Baʼax jach kʼaʼanaʼan ku beetik le chan x-chʼúupaloʼ?

16 ¿Bix a tuklik jeʼel k-ayikʼaltal tu táan Dioseʼ?... Letiʼe k-beetik baʼax uts tu tʼaanoʼ. Jesuseʼ tu yaʼalaj: «Mantatsʼ kin beetik le baʼaxoʼob uts tu  tʼaanoʼ» (Juan 8:29). Leloʼ uts tu tʼaan Dios. Techeʼ, ¿baʼax a tuklik unaj a beetik utiaʼal a lúubul utsil tiʼ?... A xokik le Bibliaoʼ, a bin muchʼtáambal, a orar tiʼ Dios yéetel a wáantik uláakʼ máakoʼob utiaʼal ka kaanbalnakoʼob tiʼ letiʼ. Lelaʼ letiʼe baʼaxoʼob maas kʼaʼanaʼantak ichil u kuxtal máakoʼ.

17 Jesuseʼ ayikʼal kaʼach tu táan Dios, le oʼolal kanáantaʼab tumen Jéeoba. Tu tsʼáaj kuxtal minaʼan u xuul tiʼ. Wa k-beetik jeʼex úuchik u beetik Jesusoʼ, yaan u yaabiltikoʼon Jéeoba yéetel yaan u kanáantkoʼon. Bey túunoʼ maas maʼalob ka k-beet jeʼex úuchik u beetik Jesusoʼ, maʼ jeʼex le ayikʼal máak tu tuʼubsaj Diosoʼ.

Koʼox ilik jujunpʼéel tekstoʼob ku yeʼeskoʼob bix unaj k-ilik le ayikʼaliloʼoboʼ: Proverbios 23:4; 28:20; 1 Timoteo 6:6-10, yéetel Hebreoʼob 13:5.