Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 30

Áantaj utiaʼal u xuʼulul k-sajaktal

Áantaj utiaʼal u xuʼulul k-sajaktal

¿CHÉEN chʼaʼabil wa a wilik a meyajtik Jéeoba?... Jesús, le Maʼalob j-Kaʼansajoʼ, tu yaʼaleʼ maʼ chéen chʼaʼabil kun beetbiliʼ. Le áakʼab táanil tiʼ u kíimsaʼaloʼ tu yaʼalaj tiʼ u apostoloʼob: «Wa le yóokʼol kaab ku pʼektikeʼexoʼ, a wojleʼex teen tu yáax pʼekten táanil tiʼ u pʼektikeʼex» (Juan 15:18).

2 Pedroeʼ tu yaʼalaj kaʼacheʼ mix bikʼin ken u pʼat Jesús. Baʼaleʼ Jesuseʼ tu yaʼaleʼ, tiʼ le áakʼab jeʼeloʼ Pedroeʼ yaan u yaʼalik óoxtéen maʼ u kʼaj óoliʼ. Leloʼ jach bey úuchikoʼ (Mateo 26:31-35, 69-75). ¿Baʼaxten úuchtiʼob lelaʼ?... Tumen Pedro yéetel uláakʼ apostoloʼoboʼ sajakchajoʼob.

3 ¿A wojel wa baʼaxten sajakchajoʼob?... Tumen maʼ tu beetoʼob junpʼéel baʼax jach kʼaʼanaʼaniʼ. Wa k-ilik baʼaxeʼ, yaan u béeytal k-meyajtik Jéeoba kex jeʼel baʼalak ka aʼalaʼak wa ka beetaʼaktoʼoneʼ. Táanileʼ koʼox ilik le baʼax úuch teʼ tu tsʼook áakʼab tu máansaj Jesús yéetel u apostoloʼoboʼ.

4 Yáaxeʼ tu kʼiinbesoʼob le Pascuaoʼ, lelaʼ ku beetaʼal juntéen tiʼ junpʼéel jaʼab utiaʼal u kʼaʼajsaʼal tumen le judíoʼob bix úuchik u salvartaʼaloʼob tumen Dios tu luʼumil Egiptooʼ. Ka tsʼoʼokeʼ, Jesuseʼ tu káajsaj junpʼéel túumben kʼiinbesaj yéetel u apostoloʼob. Tuláakʼ xookiloʼobeʼ yaan k-kanik bix u yáantkoʼon k-kʼaʼajs Jesús le kʼiinbesajaʼ. Ka tsʼoʼokeʼ Jesuseʼ tu líiʼsaj u yóol u apostoloʼob, tsʼoʼoleʼ ka bin tu yéeteloʼob tu jardinil Getsemaní, teʼeloʼ suuk kaʼach u binoʼobiʼ.

5 Ka kʼuchoʼobeʼ Jesuseʼ bin junpáayil utiaʼal orar. Tu yaʼalaj xan tiʼ Pedro, Santiago yéetel Juan ka orarnakoʼob, baʼaleʼ letiʼobeʼ  weenoʼob. Óoxtéen bin Jesús junpáayil orar, baʼaleʼ cada ken suunakeʼ ku yilik táan u wenel Pedro bey xan u maasiloʼoboʼ (Mateo 26:36-47). ¿A wojel wa baʼaxten maʼ unaj u weenloʼob yéetel unaj oraroʼob kaʼachi?... Koʼox ilik.

¿Baʼaxten maʼ unaj kaʼach u wenel Pedro, Santiago yéetel Juaniʼ?

6 Judas Iscarioteeʼ tu kʼiinbesaj xan le Pascua junmúuchʼ yéetel Jesús yéetel u maasil apostoloʼoboʼ. Maʼ xaaneʼ kʼajaʼantecheʼ Judaseʼ juntúul j-ookol, baʼaleʼ beoraaʼ nukaʼaj u traicionart Jesús. Letiʼeʼ u yojel tuʼux tséelil tiʼ le Getsemaní suuk u bin Jesús yéetel u apostoloʼoboʼ, le oʼolal tiʼ tu bisaj le soldadoʼob utiaʼal ka u machoʼoboʼ. Ka ilaʼaboʼob tumen Jesuseʼ, tu kʼáatajtiʼob: «¿Máax ka kaxtikeʼex?».

7 Le soldadoʼoboʼ tu yaʼaloʼob: «Jesús». Letiʼeʼ maʼ saajkiʼ, le oʼolal tu yaʼalajtiʼob: «Teen». Le soldadoʼoboʼ «suunajoʼob kukulpaachileʼ ka lúuboʼob luʼum». Jesús túuneʼ tu yaʼalajtiʼob: ‹Wa teen ka kaxtikeneʼexeʼ, chaʼex u bin in apostoloʼob› (Juan 18:1-9).

8 Le ka maʼach Jesús tumen le soldadoʼob yéetel le ka kʼaʼax u kʼaboʼoboʼ, sajakchaj le apostoloʼoboʼ ka púutsʼoʼob. Baʼaleʼ Pedro yéetel Juaneʼ u kʼáat u yiloʼob baʼax kun beetbil tiʼ Jesús, le oʼolal joʼopʼ u binoʼob tu paach. Jesús túuneʼ bisaʼab tu yotoch Caifás, u nojchil le sacerdoteʼoboʼ. Tumen kʼaj óoltaʼan Caifás tumen Juaneʼ, chaʼab u máan yéetel Pedro tumen le koʼolel kanáantik le jooloʼ.

9 Le sacerdoteʼoboʼ tsʼoʼok kaʼach u muchʼtaloʼob tu yotoch Caifás utiaʼal u juzgartikoʼob. U kʼáat u kíimsoʼob Jesús, le oʼolal tu taasoʼob máaxoʼob aʼalik baʼaloʼob maʼ jaajtak tu contraiʼ. Tsʼoʼoleʼ joʼopʼ u loʼoxol yéetel u laʼajal tumen le máakoʼoboʼ. Le táan u yúuchul lelaʼ, naatsʼ yaan kaʼach Pedroiʼ.

10 Le koʼolel kanáantik le joonajoʼ tu chaʼaj u yokol Pedro yéetel Juan, tu jach paktaj Pedroeʼ ka tu yaʼalajtiʼ: ‹¿Máasaʼ techeʼ u disipuloech xan Jesús?›. Baʼaleʼ letiʼeʼ tu yaʼaleʼ maʼ u kʼaj óoliʼ. Maʼ sáam  tiʼ leloʼ, uláakʼ juntúul x-chʼúupal ku meyaj xan teʼeloʼ, tu kʼaj óoltaj Pedroeʼ ka tu yaʼalaj tiʼ le máaxoʼob yanoʼoboʼ: «Le máakaʼ tiʼ yaan xan kaʼach tu yéeteleʼ». Pedroeʼ tu kaʼa aʼalaj maʼ jaajiʼ. Maʼ sáam tiʼ leloʼ, ilaʼab tumen jujuntúul máakoʼobeʼ, ka aʼalaʼabtiʼ: «Techeʼ juntúulech xan tiʼ letiʼob». Pedroeʼ tu yaʼalaj tu yóoxtéen: «¡Maʼ in kʼaj óol le máakoʼ!». Ka joʼopʼ u yaʼalik ka taalak kʼaas tu yóokʼol wa chéen táan u tuus. Teʼ súutuk jeʼeloʼ, tu sutuba Jesuseʼ ka tu paktaj Pedro (Mateo 26:57-75; Lucas 22:54-62; Juan 18:15-27).

¿Baʼaxten jach sajakchaj Pedro ka tu yaʼalaj maʼ u kʼaj óol kaʼach Jesusiʼ?

11 ¿A wojel wa baʼaxten tuusnaj Pedro?... Tumen sajakchaji. Baʼaleʼ ¿baʼaxten sajakchaji? ¿Yaan wa baʼax maʼ tu beetaj jeʼel u yáantik kaʼach utiaʼal maʼ u sajaktaleʼ? Tuukulnen tiʼ lelaʼ: ¿baʼax tu beetaj Jesús utiaʼal maʼ u chʼaʼik saajkil?... Orarnaj tiʼ Dios, le oʼolal áantaʼab utiaʼal maʼ u sajaktal. Kʼaʼajak xan techeʼ Jesuseʼ óoxtéen tu yaʼalaj tiʼ Pedro maʼ u wenel. Baʼaleʼ ¿baʼax tu beetaj?...

12 Tu yóoxtéenil ween Pedro. Maʼ orarnajiʼ yéetel náay u yóol. Le oʼolal naayal u yóoloʼob ka maʼach Jesús. Le táan u juzgartaʼaloʼ, Pedroeʼ jaʼakʼ u yóol ka tu yilaj bix u loʼoxol yéetel ka tu yuʼubaj  táan u tuklaʼal u kíimsaʼal Jesús. Baʼaleʼ ¿baʼax kaʼach aʼalaʼabtiʼob tumen Jesús yoʼolal bix kun tratartbiloʼob tumen u maasil máakoʼoboʼ?... Tu yaʼalajtiʼobeʼ jach yaan u pʼektaʼaloʼob jeʼex úuchik u pʼektaʼal letiʼoʼ.

¿Tiʼ baʼax súutukil jeʼel u yúuchultech le baʼax úuch tiʼ Pedrooʼ?

13 Koʼox tuklik junpʼéel baʼal jeʼel u beetik k-uʼuyikba jeʼex úuchik u yuʼubikuba Pedrooʼ. Tukulteʼ a wéet xookoʼob wa uláakʼ paalaleʼ ku joʼopʼol u yaʼalikoʼob baʼal tiʼ le máaxoʼob maʼatech u saludartikoʼob le banderaoʼ wa maʼatech u kʼiinbeskoʼob le Navidadoʼ. Juntúul tiʼ letiʼob túuneʼ ku paktikecheʼ ku yaʼalik: «¿Jaaj wa techeʼ  maʼatech a saludartik le banderaoʼ?». Wa maʼ xaaneʼ jeʼel u yaʼalikoʼobtecheʼ: «Tsʼoʼok u yaʼalaʼaltoʼoneʼ mix le Navidad ka kʼiinbesikoʼ». ¿Jeʼel wa a sajaktal a waʼal u jaajileʼ?... ¿Jeʼel wa u taaktal a tuus jeʼex tu beetil Pedroeʼ?...

14 Pedroeʼ jach yaachaj u yóol ka tsʼoʼok u yaʼalik maʼ u kʼaj óol Jesusiʼ. Le ka tu tsʼáaj cuenta le baʼax tsʼoʼok u beetkoʼ, jóokʼ paachileʼ ka joʼopʼ u yokʼol. Baʼaleʼ Pedroeʼ suunaj u tsaypacht Jesús (Lucas 22:32). ¿Baʼax a tuklik jeʼel u yáantkoʼon utiaʼal maʼ k-jach sajaktal ka tak k-beet le baʼax tu beetaj Pedrooʼ?... Kʼaʼajaktecheʼ letiʼeʼ maʼ orarnajiʼ yéetel weeni. Le oʼolaleʼ, ¿baʼax a tuklik unaj k-beetik utiaʼal k-tsaypachtik Jesús, le Maʼalob j-Kaʼansajoʼ?...

15 Unaj k-orar tiʼ Jéeoba utiaʼal k-kʼáatik u yáantaj. ¿A wojel wa baʼax tu beetaj Dios le ka orarnaj Jesús tiʼ letiʼoʼ?... Tu túuxtaj juntúul ángel utiaʼal líiʼsik u yóol (Lucas 22:43). ¿Jeʼel wa u yáantkoʼon xan u angeloʼob Dioseʼ?... Le Bibliaoʼ ku yaʼalik: ‹U ángel Jéeobaeʼ ku kanáantik yéetel ku salvartik le máaxoʼob tsikik Jéeobaoʼ› (Salmo 34:7). Baʼaleʼ utiaʼal u yáantkoʼon Dioseʼ maʼ chéen unaj k-orar tiʼiʼ. ¿A wojel wa baʼax uláakʼ unaj k-beetik?... Jesuseʼ tu yaʼalaj tiʼ u disipuloʼob maʼ u náayal u yóoloʼob yéetel maʼ u weenloʼob. ¿Bix a tuklik jeʼel u páajtal k-beetkeʼ?...

16 Jach unaj k-uʼuyik le baʼax ku kaʼansaʼal teʼ muchʼtáambaloʼoboʼ bey xan le baʼax k-xokik teʼ Bibliaoʼ. Tsʼoʼoleʼ kʼaʼabéet k-orar mantatsʼ tiʼ Jéeoba yéetel k-kʼáatiktiʼ ka u yáantoʼon k-meyajte. Wa k-beetkeʼ, yaan u yáantkoʼon utiaʼal maʼ k-chʼaʼik saajkil. Beyoʼ yaan u kiʼimaktal k-óol ken yanak u páajtalil k-tʼaan tiʼ Jesús, le Maʼalob j-Kaʼansajoʼ, yéetel tiʼ u Taata.

Le tekstoʼobaʼ jeʼel u yáantkoʼon utiaʼal maʼ k-sajaktal k-beet baʼax maʼalob tu táan u maasileʼ: Proverbios 29:25; Jeremías 26:12-15, 20-24, yéetel Juan 12:42, 43.