Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 54

Jesuseʼ «u waajil le kuxtaloʼ»

Jesuseʼ «u waajil le kuxtaloʼ»

JUAN 6:25-48

  • JESUSEʼ LETIʼE «WAAJ KU TAAL TEʼ KAʼANOʼ»

Le tiaʼan Jesús tu laakʼin u kʼáaʼnáabil Galileaoʼ tu tséentaj u milesil máakoʼob, tsʼoʼoleʼ ka púutsʼtiʼob le ka óotaʼab machbil utiaʼal u tsʼaʼabal u beet u reyil. Ka áakʼabchajeʼ xíimbalnaj yóokʼol le jaʼ ku woʼoltaʼal tumen le kʼaʼamkach iikʼoʼ yéetel tu salvartaj Pedro le ka káaj u búulul tumen sajakchajoʼ. Jesuseʼ tu salvartaj u disipuloʼob utiaʼal maʼ u búululoʼob le ka tu beetaj u jéetsʼel le kʼaʼamkach iikʼoʼ.

Beoraaʼ Jesuseʼ tsʼoʼok u kʼuchul tu chiikʼin le kʼáaʼnáaboʼ, aktáan tiʼ Capernaum. Le máaxoʼob tu tsʼáaj baʼal u jaantoʼoboʼ bin u yiloʼobiʼ, ka tu yaʼaloʼobtiʼ: «¿Baʼax kʼiin ka kʼuchech wayeʼ?». Baʼaleʼ kʼeʼeyoʼob tumen Jesús, tu yaʼalajtiʼobeʼ chéen u kʼáatoʼob ka u tsʼáa baʼal u jaantoʼob tu kaʼatéen. Ka tsʼoʼokeʼ tu yaʼalajtiʼob ka u kaxtoʼob «le janal maʼ tu kʼastal ku tsʼáaik kuxtal minaʼan u xuuloʼ». Letiʼob túuneʼ tu yaʼaloʼob: «¿Baʼax unaj k-beetik utiaʼal ka k-tsʼoʼokbes le meyaj ku yaʼalik Diosoʼ?» (Juan 6:25-28).

Maʼ xaaneʼ letiʼobeʼ táan u tuukuloʼob tiʼ le baʼaxoʼob ku yaʼalik le Ley unaj u beetaʼaloʼ, baʼaleʼ Jesuseʼ tu beetaj u tuukuloʼob tiʼ junpʼéel baʼax maas kʼaʼanaʼan: «Lelaʼ letiʼe meyaj ku yaʼalik Diosoʼ: ka a tsʼáa a fejeʼex tiʼ le máax tu túuxtoʼ». Baʼaleʼ le máakoʼoboʼ maʼatech u tsʼáaik u fejoʼob tiʼ Jesús kex yaʼab milagroʼob tsʼoʼok u beetik ichiloʼob. Letiʼobeʼ tu kʼáatoʼob ka beetaʼak junpʼéel milagro utiaʼal u páajtal u creertikoʼob baʼax ku yaʼalik. Tu yaʼaloʼob: «¿Baʼax chíikulal túun ken a weʼestoʼon utiaʼal ka k-creertech? ¿Baʼax chíikulal ken a beete? K-úuchben láakʼtsiloʼobeʼ tu jaantoʼob maná teʼ desiertooʼ, jeʼel bix tsʼíibtaʼanilaʼ: ‹Letiʼeʼ u waajil kaʼan tu tsʼáaj u jaantoʼob›» (Juan 6:29-31; Salmo 78:24).

Le ka tu kʼáatoʼob ka beetaʼak junpʼéel milagroeʼ, Jesuseʼ tu beetaj u tuukuloʼob tiʼ le Máax tsʼáaik baʼal jaantbiloʼ, tu yaʼalajtiʼob: «Jach tu jaajil kin waʼalikteʼex: Moiseseʼ maʼ tu tsʼáajteʼex u waajil kaʼaniʼ, baʼaleʼ in Taataeʼ ku tsʼáaikteʼex le u jaajil waaj ku taal teʼ kaʼanoʼ. Tumen le waaj ku tsʼáaik Diosoʼ letiʼe máax ku yéemel teʼ kaʼanoʼ yéetel ku tsʼáaik kuxtal tiʼ yóokʼol kaab». Letiʼobeʼ maʼ tu naʼatoʼob tiʼ baʼax ku tʼaan Jesusiʼ, le oʼolal tu yaʼaloʼob: «Yuumtsil, tsʼáatoʼon mantatsʼ le waajaʼ» (Juan 6:32-34). ¿Baʼax «le waaj» tu yaʼalaj Jesusoʼ?

Letiʼeʼ tu yaʼalajtiʼob: «Teen u waajil le kuxtaloʼ, le máax ku taal tin wiknaleʼ junpuliʼ maʼ kun wiʼijtal, le máax ku tsʼáaik u fe tiʼ teneʼ mix bikʼin kun ukʼajtal. Baʼaleʼ teneʼ tsʼoʼok in waʼalikteʼex: Teʼexeʼ kex tsʼoʼok a wilkeneʼexeʼ maʼ ta creertikeneʼex. [...] Tsʼoʼok in wéemel teʼ kaʼan utiaʼal in beet le baʼax u kʼáat le máax túuxtenoʼ, maʼ utiaʼal ka in beet baʼax in kʼáatiʼ. Lelaʼ letiʼe baʼax u kʼáat le máax túuxtenoʼ: maʼ in satik mix juntúul tiʼ le máaxoʼob u tsʼaamajtenoʼ, baʼaxeʼ ka in kaʼa kuxkíint teʼ tu tsʼook kʼiinoʼ. Tumen lelaʼ letiʼe baʼax u kʼáat in Taataoʼ: ka yanak kuxtal minaʼan u xuul tiʼ tuláakal le máax ku kʼamik le Paal yéetel ku tsʼáaik u fe tiʼ letiʼoʼ» (Juan 6:35-40).

Lelaʼ tu beetaj u pʼuʼujul le máakoʼoboʼ, ka joʼopʼ u tʼaan le judíoʼob tu contraoʼ. Joʼopʼ u yaʼalikoʼob bix u páajtal u yaʼalik letiʼ «le waaj éem teʼ kaʼanoʼ» (Juan 6:41). Letiʼobeʼ ku yilkoʼob Jesús chéen bey u hijo juntúul u kajnáalil Nazareteʼ. Ka joʼopʼ u yaʼalikoʼob: «¿Maʼ wa letiʼe Jesús u paal Joseaʼ? ¿Maʼ wa letiʼe máax k-kʼaj óoltmaj u taata yéetel u maamaoʼ?» (Juan 6:42).

Jesuseʼ tu núukaj: «Xuʼuluk a x-mukul tʼaaneʼex ta baatsileʼex. Mix máak jeʼel u páajtal u taal tin wiknal wa maʼ letiʼe Taata, le máax túuxten, natsʼikoʼ; teen túuneʼ yaan in kaʼa kuxkíintik teʼ tu tsʼook kʼiinoʼ. Tsʼíibtaʼaniliʼ tumen le Profetaʼoboʼ: ‹Tuláakloʼobeʼ yaan u kaʼansaʼaloʼob tumen Jéeoba›. Tuláakal máax tsʼoʼok u yuʼubik baʼax ku yaʼalik le Taata yéetel tsʼoʼok u kaanbaleʼ, ku taal tin wiknal. Lelaʼ maʼ u kʼáat u yaʼal wa yaan máax tsʼoʼok u yilik  le Taataoʼ, baʼaxeʼ chéen le máax tiʼ Dios u taal tsʼoʼok u yilik le Taataoʼ. Jach tu jaajil kin waʼalikteʼex: Le máax ku creertikeneʼ yaan kuxtal minaʼan u xuul tiʼ» (Juan 6:43-47; Isaías 54:13).

Ka tʼaanaj yéetel Nicodemoeʼ, Jesuseʼ tu chʼaʼchiʼitaj le kuxtal minaʼan u xuuloʼ yéetel tu yaʼalaj u kʼaʼabéetil u tsʼáaik u fe máak tiʼ u Hijo le xiiboʼ, tu yaʼalaj: «Utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:15, 16). Baʼaleʼ beoraaʼ tiʼ maas yaʼab máakoʼob ku yaʼalik yéetel u yáantajeʼ jeʼel u yantal kuxtal minaʼan u xuuleʼ. Lelaʼ junpʼéel baʼax maʼ tu páajtal u tsʼáaik le maná yéetel le janal jeʼel u páajtal u maʼanal tu luʼumil Galileaoʼ. Baʼaleʼ ¿bix túun jeʼel u yantal tiʼ máak le kuxtal minaʼan u xuuloʼ? Jesuseʼ tu kaʼa aʼalaj: «Teen u waajil le kuxtaloʼ» (Juan 6:48).

Jesuseʼ yaan u seguertik u tsikbalil le waaj ku taal teʼ kaʼanoʼ, baʼaleʼ yaan u beetik teʼ sinagoga yaan tu kaajil Capernaumoʼ.