Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 20

Ku beetik u kaʼapʼéel milagro tu kaajil Caná

Ku beetik u kaʼapʼéel milagro tu kaajil Caná

MARCOS 1:14, 15 LUCAS 4:14, 15 JUAN 4:43-54

  • JESUSEʼ KU KʼAʼAYTIK: «U REINO DIOSEʼ TSʼOʼOK U NÁATSʼAL»

  • KU TSʼAKIK JUNTÚUL XIʼIPAL NÁACH YAAN

Ka tsʼoʼok u máansik kaʼapʼéel kʼiin Jesús tu luʼumil Samariaeʼ, bin tu luʼumil Galilea. Kex sen kʼaʼaytajnaj Judeaeʼ, letiʼeʼ maʼ bin Galilea chéen utiaʼal ka jeʼelekiʼ. Baʼaxeʼ tu yilaj u maas kʼaʼaytajiʼ. Baʼaleʼ letiʼeʼ u yojliliʼ maʼ kun kʼambil tubeeliʼ, le oʼolal juntéenjeakileʼ tu yaʼalaj: «Juntúul profetaeʼ maʼatech u yeʼesaʼal tsiikil tiʼ tu kaajal» (Juan 4:44). U disipuloʼobeʼ maʼ pʼáatoʼob tu yéeteliʼ, baʼaxeʼ suunajoʼob tu yotochoʼob utiaʼal u chʼaʼjoʼoltik le meyajoʼob suuk u beetkoʼob kaʼachoʼ.

Le ka káaj u kʼaʼaytaj Jesusoʼ tu yaʼalaj: «U Reino Dioseʼ tsʼoʼok u náatsʼal. Kʼex a tuukuleʼex yéetel yanak a fejeʼex tiʼ le maʼalob péektsiloʼ» (Marcos 1:15). ¿Baʼax túun tu beetaj le máakoʼoboʼ? Yaʼab tiʼ le galileailoʼoboʼ tu kʼamoʼob maʼalob Jesús, ka joʼopʼ u tsʼáaikoʼob nojbeʼenil tiʼ. Baʼaleʼ maʼ chéen yoʼolal le baʼax ku kʼaʼaytikoʼ. Yaan tiʼ le máakoʼob binoʼob xan Jerusalén utiaʼal u kʼiinbesajil le Pascuaoʼ tu yiloʼob le milagroʼob tu beetaj Jesusoʼ (Juan 2:23).

¿Tuʼux tu káajsaj u kʼaʼaytaj Jesús? Maʼ xaaneʼ tu kaajil Caná tiʼ u luʼumil Galilea, le tuʼux tu sutaj vinoil le jaʼ utiaʼal le tsʼoʼokol beeleʼ. Le ka suunaj Canaoʼ, tu yojéeltaj jach kʼojaʼan juntúul xiʼipal, taʼaytak u kíimil. Letiʼeʼ u hijo juntúul máak ku meyaj yiknal rey Herodes Antipas, le máax beet u kíimsaʼal Juan Bautistaoʼ. Le máakoʼ tu yuʼubaj tsʼoʼok u kʼuchul Jesús tu kaajil Caná. Ka lukʼ tu kaajil Capernaumeʼ ka bin u yil Jesús tu kaajil Caná. Le máakoʼ yaachajaʼan u yóol ka tu yaʼalajtiʼ: «Yuumtsil, koʼox tu séebaʼanil, antes u kíimil in chan paal» (Juan 4:49).

Jesuseʼ tu yaʼalaj junpʼéel baʼax beet u jaʼakʼal u yóol le máakoʼ: «Suunen ta wotoch, a chan paaleʼ kuxaʼan» (Juan 4:50). Le máak ku meyaj yiknal Herodesoʼ tu creertaj le baʼax aʼalaʼabtiʼoʼ ka káaj u suut tu yotoch. Le táan u binoʼ ilaʼab tumen u palitsiloʼob, letiʼobeʼ bin u yaʼaloʼobtiʼ tsʼoʼok u yutstal u hijo yéetel maʼalob yanil. Letiʼ túuneʼ tu kʼáatajtiʼob «baʼax hora ka utschaj le chan xiʼipaloʼ».

Letiʼobeʼ tu yaʼaloʼob: «Joʼoljeak teʼ hora siete ka síischaj u chokwiloʼ» (Juan 4:52).

Le máakoʼ tu tsʼáaj cuenta jach letiʼe hora ka aʼalaʼabtiʼ tumen Jesús: «A chan paaleʼ kuxaʼan». Ka tsʼoʼokeʼ le ayikʼal máakaʼ tu beetuba disipuloil tiʼ Cristo paʼteʼ yéetel u palitsiloʼob bey xan u maasil máaxoʼob yanoʼob ichil u yotoch.

Jesuseʼ tu beetaj kaʼapʼéel milagro tu kaajil Caná, yáaxeʼ tu sutaj vinoil le jaʼoʼ, u kaʼapʼéeleʼ tu tsʼakaj juntúul xiʼipal kex maas tiʼ 6 leguas (26 kilómetros) yanil. U jaajileʼ maʼ chéen letiʼe milagroʼob tsʼoʼok u beetik teʼ kʼiinoʼob jeʼeloʼ. Baʼaleʼ le úuchik u tsʼakik le xiʼipal Galileaoʼ tu yeʼesaj letiʼeʼ juntúul u profeta Dios. ¿Eʼesaʼab wa túun tsiikil tiʼ tu kaajal jeʼex le unaj u tsʼaʼabal tiʼ juntúul profetaoʼ?

Lelaʼ yaan u chíikpajal yoʼolal le bix kun kʼambil tu kaajil Nazaretoʼ. ¿Baʼax kun úuchul tiʼ teʼeloʼ?