Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 65

Bin u kaʼansaj tu bejil Jerusalén

Bin u kaʼansaj tu bejil Jerusalén

MATEO 8:19-22 LUCAS 9:51-62 JUAN 7:2-10

  • BIX ILAʼABIK JESÚS TUMEN U YÍITSʼINOʼOB

  • ¿BAʼAXTEN JACH KʼAʼANAʼAN U KÁAJAL U MEYAJ LE REINOOʼ?

Jesuseʼ tsʼoʼok u máan kʼiin káajak u kʼaʼaytaj tu luʼumil Galilea, tumen maas kʼaʼam tumen le máakoʼoboʼ, ke tu luʼumil Judea. Tsʼoʼoleʼ ka tu tsʼakaj juntúul máak tu kʼiinil sábado tu kaajil Jerusaleneʼ «le judíoʼoboʼ maas taakchaj u kíimskoʼob» (Juan 5:18; 7:1).

Beoraaʼ septiembre wa octubre, tsʼoʼok u náatsʼal u kʼiinil utiaʼal u kʼiinbesaʼal le paseloʼoboʼ (wa le jooch) tiʼ u jaʼabil 32. Le kʼiinbesajaʼ ku xáantal siete kʼiinoʼob, tu ocho kʼiinileʼ ku beetaʼal junpʼéel nojoch asamblea. Le kʼiinbesajaʼ ku yeʼesik tsʼoʼok u moʼolol u yich tuláakal le paakʼaloʼoboʼ, le oʼolal jach yaan kiʼimak óolal yéetel ku kʼuʼubul yaʼab siibaloʼobiʼ.

Santiago, Simón, José yéetel Judas, u majan íitsʼinoʼob Jesuseʼ tu yaʼaloʼobtiʼ: «Lukʼkech wayeʼ ka xiʼikech Judea». Tuláakal le máakoʼoboʼ ku binoʼob adorar tu kaajil Jerusalén. Teʼ óoxpʼéel kʼiinbesajoʼob ku beetaʼal cada jaʼabaʼ jach yaʼab máakoʼob ku binoʼobiʼ. U yíitsʼinoʼob Jesuseʼ ku yaʼalikoʼob: «Le máax u kʼáat ka kʼaj óoltaʼak tumen tuláakal máakeʼ, maʼ tu beetik mix baʼal taʼakumbail. Le oʼolaleʼ wa táan a beetik le milagroʼobaʼ, eʼesaba tiʼ tuláakal máak» (Juan 7:3, 4).

U jaajileʼ le u kantúul íitsʼinoʼobaʼ ‹maʼatech u creertikoʼob wa letiʼ› le Mesíasoʼ. Letiʼobeʼ u kʼáatoʼob ka ilaʼak u beetik milagroʼob tumen le máaxoʼob kun binoʼob teʼ kʼiinbesajoʼ. Jesuseʼ u yojel pʼektaʼaniʼ, le oʼolal tu yaʼalaj: «Le yóokʼol kaaboʼ minaʼan baʼax oʼolal u pʼektikeʼex, baʼaleʼ teneʼ u pʼekmen, tumen kin waʼalik jach kʼaastak le baʼaxoʼob ku beetkoʼ. Teʼexeʼ xeeneʼex teʼ kʼiinbesajoʼ; teneʼ maʼ tin jáan bin, tumen maʼ jach kʼuchuk le kʼiin aʼalaʼantenoʼ» (Juan 7:5-8).

Le ka tsʼoʼok u bin u yíitsʼinoʼob yéetel u maasil máaxoʼob ku binoʼob teʼ kʼiinbesajoʼ, Jesús yéetel u disipuloʼobeʼ binoʼob yaanal bejil utiaʼal maʼ u yilaʼaloʼob tumen le máakoʼoboʼ. Letiʼobeʼ tu chʼaʼajoʼob u bejil Samaria utiaʼal u binoʼob u taatsʼ, maʼ le tuʼux suuk u bin u maasil tak tu jáal u áalkab jaʼil le Jordanoʼ. Jesús yéetel u disipuloʼobeʼ kʼaʼabéet tuʼux u pʼáatloʼob ken kʼuchukoʼob Samaria, le oʼolal tu túuxtaj jujuntúul u disipuloʼob táanil utiaʼal kaxtik. Le máakoʼob tiʼ junpʼéel kaajoʼ maʼ tu yóotaj u kʼamoʼob Jesusiʼ, tumen táan u bin utiaʼal le kʼiinbesaj tu kaajil Jerusalén ku beetik le judíoʼoboʼ. Le oʼolal Santiago yéetel Juaneʼ tu yaʼaloʼob: «Yuumtsil, ¿a kʼáat wa ka k-aʼal ka éemek kʼáakʼ teʼ kaʼan utiaʼal ka xuʼulsaʼakoʼoboʼ?» (Lucas 9:54). Jesuseʼ tu kʼeyoʼob yoʼolal le baʼax tu yaʼaloʼoboʼ, ka tsʼoʼokeʼ seguernaj u binoʼob.

Le táan u binoʼoboʼ aʼalaʼab tiʼ Jesús tumen juntúul escriba: «J-Kaʼansaj, yaan in bin ta paach jeʼel tuʼuxak ka xiʼikecheʼ». Jesuseʼ tu yaʼalajtiʼ: «Le chʼomakoʼoboʼ yaan u sajkaboʼob, yéetel le chʼíichʼoʼob ku máanoʼob teʼ kaʼanoʼ yaan u kʼuʼob, baʼaleʼ u Paal  máakeʼ minaʼan tuʼux u tʼalkúuntik u pool» (Mateo 8:19, 20). Letiʼeʼ tu yaʼalaj tiʼ le escriba yaan u muʼyaj wa ku joʼopʼol u tsaypachtikoʼ. Baʼaleʼ le escribaoʼ jach ku taaskuba noj baʼalil, le oʼolal maʼ tu yóotaj u tsaypacht Jesusiʼ. Cada juntúul tiʼ toʼoneʼ unaj u tuklik: «¿Bix in weʼesik teneʼ in kʼáat in tsaypacht Jesús?».

Jesuseʼ tu yaʼalaj tiʼ uláakʼ juntúul máak: «Koʼoten tin paach». Le máakoʼ tu yaʼalaj: «Yáax táanil chaʼa in bin in muk in taata». Baʼaleʼ Jesuseʼ tu yaʼalajtiʼ: «Chaʼa tiʼ le kimenoʼob ka u muk u yéet kimeniloʼoboʼ, baʼaleʼ techeʼ xeen tuláakal tuʼux a kʼaʼayt u Reino Dios» (Lucas 9:59, 60). Baʼaleʼ u taata le máakoʼ maʼ kíimkiʼ. Wa tsʼoʼok u kíimileʼ bejlaʼa maʼ tu bin yiknal Jesús kaʼacheʼ. Letiʼeʼ maʼ u kʼáat u tsʼáa táanil u Reino Dios ichil u kuxtaliʼ.

Le táan u bin Jesús tu kaajil Jerusalenoʼ aʼalaʼabtiʼ tumen uláakʼ juntúul máak: «Yuumtsil, jeʼel in taal ta paacheʼ, baʼaleʼ yáaxeʼ chaʼa in bin in despedirtinba tiʼ le máaxoʼob yaan tin wotochoʼ». Jesuseʼ tu yaʼalaj: «Le máax ku machik u nuʼukul utiaʼal u bukʼlik le luʼum, ku tsʼoʼokoleʼ ku sutkuba u pakt le baʼaxoʼob tu pʼataj paachiloʼ, maʼ maʼalob utiaʼal u Reino Diosiʼ» (Lucas 9:61, 62).

Le máaxoʼob u kʼáatoʼob u tsaypachtoʼob Jesusoʼ unaj u chʼikik u paakatoʼob tiʼ le Reinooʼ. Wa le máax ku bukʼlik le luʼum ku paakat paachiloʼ, maʼ xaaneʼ yaan u lóochol le surco ku pakʼikoʼ. Wa ku sutik u paakat utiaʼal u paktik le baʼaxoʼob ku pʼatik le táan u bin u bukʼlik le luʼumoʼ yaan u taaktal u pʼatik u meyaj. Bey túun xanoʼ, le máaxoʼob ku sutik u paakatoʼob utiaʼal u yilkoʼob le baʼax yaan teʼ kʼasaʼan yóokʼol kaabaʼ, jeʼel u tʼóochpajloʼob ka tak jóokʼkoʼob tu bejil le kuxtal minaʼan u xuuloʼ.