Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 137

Yaʼabkach máakoʼob il táanil tiʼ le Pentecostesoʼ

Yaʼabkach máakoʼob il táanil tiʼ le Pentecostesoʼ

MATEO 28:16-20 LUCAS 24:50-52 BAʼAXOʼOB 1:1-12; 2:1-4

  • JESUSEʼ KU CHÍIKBESKUBA TIʼ YAʼABKACH MÁAKOʼOB

  • KU BIN TEʼ KAʼANOʼ

  • JESUSEʼ KU TSʼÁAIK LE KILIʼICH MUUKʼ YÓOKʼOL 120 DISIPULOʼOBOʼ

Le ka tsʼoʼok u kaʼa kuxtal Jesusoʼ, tu yaʼalaj tiʼ u 11 apostoloʼob ka xiʼikoʼob Galilea. Teʼeloʼ tiaʼan uláakʼ kex 500 disipuloʼobiʼ, maʼ xaaneʼ jujuntúuloʼobeʼ maʼ tu jach creertikoʼob wa tsʼoʼok u kaʼa kuxtal (Mateo 28:17; 1 Corintoiloʼob 15:6). Baʼaleʼ le baʼax tu yaʼalaj Jesús beoraaʼ tu yáantoʼob u creertoʼob jach tu jaajil kuxaʼan.

Jesuseʼ tu yaʼalajtiʼobeʼ tsʼoʼok u tsʼaʼabaltiʼ tuláakal páajtalil teʼ kaʼanoʼ bey xan teʼ Luʼumaʼ. Tsʼoʼoleʼ ka tu yaʼalajtiʼob: «Xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob, táan a tsʼáaikeʼex u yokjaʼob tu kʼaabaʼ le Taataoʼ, le Paaloʼ yéetel le kiliʼich muukʼoʼ, yéetel táan a kaʼanskeʼexoʼob u tsʼoʼokbesoʼob tuláakal le baʼaxoʼob tsʼoʼok in waʼalikteʼex ka a beeteʼexoʼ» (Mateo 28:18-20). Jach beyoʼ, Jesuseʼ maʼ chéen tsʼoʼok u kaʼa kuxtaliʼ, baʼaxeʼ u kʼáat ka maas kʼaʼaytaʼak le maʼalob péektsiloʼ.

Tuláakal le máaxoʼob tsaypachtik Jesusoʼ, xiiboʼob, koʼoleloʼob yéetel mejen paalaleʼ unaj u beetkoʼob disipuloʼob. Le máaxoʼob pʼekmiloʼoboʼ yaan u yóotik u xuʼuls u kʼaʼaytajoʼob, le oʼolal Jesuseʼ tu yaʼalajtiʼob: «Tsʼoʼok u tsʼaʼabalten tuláakal páajtalil teʼ kaʼanoʼ bey xan way Luʼumeʼ». ¿Baʼax u kʼáat u yaʼal tiʼ le máaxoʼob tsaypachtik yéetel le tʼaanoʼobaʼ? Letiʼeʼ ku yaʼalik: «¡Ileʼex!, tiʼ yanen ta wéeteleʼex tak teʼ kʼiinoʼob táan u kʼuchul u xuul yóokʼol kaaboʼ». Jesuseʼ maʼ tu yaʼalaj wa tuláakal le máaxoʼob ku kʼaʼaytik le maʼalob péektsil kun kʼamik u poderil u beetkoʼob milagroʼobiʼ. Baʼaxeʼ tu yaʼaleʼ yaan u tsʼáaik kiliʼich muukʼ tiʼob utiaʼal áantkoʼob.

Bey túunoʼ Jesuseʼ tu chíikbesuba tiʼ u disipuloʼob «tu yáamil cuarenta kʼiinoʼob» tsʼoʼokok u kaʼa kuxtaloʼ. Letiʼeʼ «yaʼab bix úuchik u chíikbeskubatiʼob utiaʼal u yeʼesik jach tu jaajil kuxaʼan» yéetel tu kaʼansajtiʼob «le baʼaloʼob yaan yil yéetel u Reino Diosoʼ» (Baʼaxoʼob 1:3; 1 Corintoiloʼob 15:7).

Maʼ xaaneʼ le tiaʼan yéetel le apostoloʼob Galileaoʼ tu yaʼalajtiʼob ka suunakoʼob Jerusalén. Le ka tu yiloʼoboʼ tu yaʼalajtiʼob: «Maʼ a lukʼleʼex Jerusalén, baʼaxeʼ seguernak a páaʼtkeʼex le baʼax u yaʼalmaj le Taata u tsʼáaikoʼ, jeʼex úuchik in waʼalikteʼexoʼ; tumen u jaajileʼ, Juaneʼ yéetel jaʼ tu tsʼáaj okjaʼ, baʼaleʼ teʼexeʼ yaan u tsʼaʼabal a wokjaʼex yéetel kiliʼich muukʼ maʼ yaʼab kʼiinoʼob úuchuk lelaʼ» (Baʼaxoʼob 1:4, 5).

Tuláakʼ súutukileʼ Jesuseʼ tu chíikbesuba tiʼ u apostoloʼob. Letiʼeʼ bin tu yéeteloʼob «tak tu kaajil Betania», le yaan tu níix u lakʼinil u puʼukil le Olivoʼoboʼ (Lucas 24:50). Kex u yaʼalmaj Jesús tiʼob yaan u bineʼ, letiʼobeʼ ku tuklikoʼob kaʼacheʼ way Luʼum ken u tsʼáa le Reinooʼ (Lucas 22:16, 18, 30; Juan 14:2, 3).

Le apostoloʼoboʼ tu yaʼaloʼob tiʼ Jesús: «Yuumtsil, ¿yaan wa a jel tsʼáaik u Reino Dios tu luʼumil Israel teʼ kʼiinoʼobaʼ?». Letiʼeʼ tu yaʼalajtiʼob: «Chéen tiʼ le Taata yaan teʼ kaʼan yaan u páajtalil u yaʼalik baʼax kʼiin ken úuchuk le baʼaloʼobaʼ, baʼaleʼ teʼexeʼ maʼ kʼaʼabéet a wojéeltikeʼex baʼax kʼiin ken úuchkoʼobiʼ». Tsʼoʼoleʼ, utiaʼal u yeʼesik le baʼax meyajil unaj u tsʼáaik u yóol u beetoʼoboʼ, tu yaʼalajtiʼob: «Yaan a kʼamkeʼex páajtalil ken kʼuchuk le kiliʼich muukʼ ta wóokʼoleʼexoʼ, yéetel yaan a beetkabaʼex j-jaajkunajil tiʼ teen tu kaajil Jerusalén, tiʼ tuláakal u luʼumil Judea, Samaria bey xan tak tu maas náachil le Luʼumaʼ» (Baʼaxoʼob 1:6-8).

Le apostoloʼoboʼ tiaʼanoʼob tu puʼukil le Olivoʼob ka tu yiloʼob u chʼúuypajal Jesús utiaʼal u bin teʼ kaʼanoʼ. Maʼ sáam tiʼ leloʼ, ka piʼix tumen junpʼéel múuyal. Le ka tsʼoʼok u kaʼa kuxtal Jesusoʼ tu chʼaʼaj u wíinklil wíinik utiaʼal u chíikbeskuba tiʼ u disipuloʼob. Baʼaleʼ beoraaʼ tu chʼaʼaj le wíinklil jeʼex le yaan tiʼ le angeloʼob utiaʼal u kaʼa bin teʼ kaʼanoʼ (1 Corintoiloʼob 15:44, 50; 1 Pedro 3:18). Le táan u paakat le apostoloʼob teʼ kaʼanoʼ, chíikpaj «kaʼatúul xiiboʼob sak u nookʼoʼob» tu  táanoʼob. Letiʼobeʼ angeloʼob, ka tu kʼáatoʼob: «Xiibeʼex tiʼ u luʼumil Galilea, ¿baʼaxten waʼalakbaleʼex táan a paktikeʼex le kaʼanoʼ? Le Jesús chʼaʼab ichileʼex utiaʼal bisbil teʼ kaʼanoʼ, yaan u suut tu kaʼatéen jeʼex tsʼoʼok a wilkeʼex u bin teʼ kaʼanoʼ» (Baʼaxoʼob 1:10, 11).

Ka bin Jesús teʼ kaʼanoʼ, chéen u disipuloʼob ile. Letiʼeʼ yaan u suut «jeʼex» úuchik u binoʼ, chéen le disipuloʼob chúukaʼan u yóoloʼob kun ilik u suut yéetel u páajtalil le Reinooʼ.

Ka tsʼoʼokeʼ le apostoloʼoboʼ suunajoʼob Jerusalén. Ichil le kʼiinoʼob seguernajoʼ, tu muchʼubaʼob yéetel uláakʼ disipuloʼob, tak «María u maama Jesús [...] yéetel u yíitsʼinoʼob Jesús» (Baʼaxoʼob 1:14). Tuláakloʼobeʼ ku muchʼkubaʼob orar. Junpʼéel baʼax oʼolal orarnajoʼobeʼ utiaʼal ka áantaʼakoʼob u yéeyoʼob máax kun jeelintik Judas Iscariote, utiaʼal u kaʼa chukik 12 u túulal le apostoloʼoboʼ (Mateo 19:28). Letiʼobeʼ tu yaʼaloʼobeʼ kʼaʼabéet juntúul máak il le baʼaxoʼob tu beetaj Jesusoʼ bey xan tu yilaj tsʼoʼok u kaʼa kuxtal. Le u tsʼook ku chʼaʼchiʼitaʼal ichil le Bibliaoʼ letiʼe úuchik u buuloʼob utiaʼal u yilkoʼob máax yéeyaʼan tumen Diosoʼ (Salmo 109:8; Proverbios 16:33). Matías, juntúul tiʼ le 70 máaxoʼob túuxtaʼaboʼob kʼaʼaytaj tumen Jesuseʼ, letiʼ yéeyaʼabi, letiʼeʼ «táakpaj yéetel le once apostoloʼoboʼ» (Baʼaxoʼob 1:26).

Diez kʼiinoʼob xiʼik Jesús teʼ kaʼanoʼ, ka kʼuch u kʼiinil u káajal le Pentecostés tiʼ u jaʼabil 33, suuk u kʼiinbesaʼal tumen le judíoʼoboʼ. Yaan kex 120 disipuloʼob u muchʼmubaʼob ichil junpʼéel naj tu kaajil Jerusalén. Chéen ka uʼuyaʼab u yáambal junpʼéel baʼal jeʼex u juum junpʼéel kʼaʼamkach iikʼ ichil tuláakal le najoʼ. Ka chíikpaj mejen aakʼoʼob beyoʼob kʼáakʼ yóokʼol cada juntúul tiʼ le máaxoʼob yanoʼoboʼ. Tuláakal le disipuloʼob túunoʼ káaj u tʼaanoʼob ich jejeláas idiomaʼob. Lelaʼ béeychaj le ka tsʼaʼabtiʼob le kiliʼich muukʼ u yaʼalmaj Jesús u túuxtik tu yóokʼoloʼoboʼ (Juan 14:26).