Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 129

Pilatoeʼ ku yaʼalik: «¡Ileʼex! ¡Jeʼel le máakaʼ!»

Pilatoeʼ ku yaʼalik: «¡Ileʼex! ¡Jeʼel le máakaʼ!»

MATEO 27:15-17, 20-30 MARCOS 15:6-19 LUCAS 23:18-25 JUAN 18:39–19:5

  • PILATOEʼ KU YÓOTIK U JÁALKʼABT JESÚS

  • LE JUDÍOʼOBOʼ KU KʼÁATOʼOB KA JÁALKʼABTAʼAK BARRABÁS

  • KU PʼAʼASTAʼAL JESÚS YÉETEL KU BEETAʼAL U SEN MUʼYAJ

Pilatoeʼ tu yaʼalaj tiʼ le máakoʼob u kʼáatoʼob ka kíimsaʼak Jesusoʼ: «¡Ileʼex!, teneʼ ta táaneʼex tsʼoʼok in beetik kʼáatchiʼob tiʼ, yéetel tsʼoʼok in wilik mix baʼal kʼaas u beetmaj utiaʼal a takikeʼex u pool. Tak Herodes tu yilaj mix baʼal kʼaas u beetmaj» (Lucas 23:14, 15). Beoraaʼ, utiaʼal u yilik Pilato wa ku jáalkʼabtik Jesuseʼ, tu yaʼalaj tiʼ le máakoʼoboʼ: «Yaan máax kin jáalkʼabtikteʼex tu kʼiinil le Pascuaoʼ. ¿A kʼáateʼex wa ka in jáalkʼabt tiʼ teʼex u Rey le judíoʼoboʼ?» (Juan 18:39).

Pilatoeʼ kʼajaʼantiʼ juntúul máak ku kʼaabaʼtik Barrabás, letiʼeʼ juntúul j-ookol, j-kíimsaj wíinik yéetel ku tsʼáaikuba tu contra le gobiernooʼ. Ka tu kʼáataj tiʼ le máakoʼoboʼ: «¿Máax a kʼáateʼex ka in jáalkʼabte? ¿Barrabás, wa Jesús le ku yaʼalaʼal Cristo tiʼoʼ?». Baʼaleʼ u nuuktakil le sacerdoteʼoboʼ tu yoksoʼob tu pool le yaʼabkach máakoʼob ka u kʼáatoʼob ka jáalkʼabtaʼak Barrabás, maʼ Jesusiʼ. Pilatoeʼ tu kʼáataj tu kaʼatéen: «¿Máakalmáak tiʼ le kaʼatúuloʼob a kʼáateʼex ka in jáalkʼabtoʼ?». Letiʼobeʼ tu yaʼaloʼob: «Barrabás» (Mateo 27:17, 21).

Pilato túuneʼ tu kʼáatajtiʼob: «¿Baʼax túun ken in beet tiʼ Jesús le máax ku yaʼalaʼal Cristo tiʼoʼ?». Le máakoʼoboʼ tu yaʼaloʼob: «¡Baʼajak tiʼ cheʼ!» (Mateo 27:22). Minaʼan u suʼtaloʼob, tumen táan u kʼáatkoʼob ka kíimsaʼak juntúul máak mix baʼal kʼaas u beetmaj. Pilatoeʼ tu yaʼalajtiʼob: «¿Baʼax kʼaasil túun u beetmaj? Teneʼ maʼ tin wilaj wa yaan baʼax kʼaas u beetmaj ka u náajmat u kíimsaʼaliʼ; nikaʼaj in castigarte, ken tsʼoʼokkeʼ kin jáalkʼabtik» (Lucas 23:22).

Kex taak u jáalkʼabtaʼal Jesús tumen Pilatoeʼ, le máakoʼob jach pʼujaʼanoʼoboʼ joʼopʼ u maas aʼalikoʼob: «¡Baʼajak tiʼ cheʼ!» (Mateo 27:23). U nuuktakil le judíoʼoboʼ tsʼoʼok u kʼaskúuntikoʼob u tuukul le máakoʼob utiaʼal ka u beetoʼob u weʼekel kʼiʼikʼoʼ. Baʼaleʼ maʼ u kʼiʼikʼel juntúul kʼasaʼan máakiʼ mix juntúul j-kíimsaj máakiʼ. U kʼiʼikʼel juntúul máak mix baʼal kʼaas u beetmaj, chéen cinco kʼiinoʼob táanil tiʼ lelaʼ kʼaʼam tu kaajil Jerusalén bey juntúul Reyeʼ. Wa tiaʼan u disipuloʼob Jesús teʼeloʼ, letiʼobeʼ mix baʼal tu yaʼaloʼob utiaʼal maʼ u kʼaj óoltaʼaloʼob.

Pilatoeʼ tu yilaj maʼ tu páajtal u beetik mix baʼal, baʼaxeʼ maas táan u pʼuʼujul le máakoʼoboʼ. Ka tu chʼaʼaj jaʼ utiaʼal u pʼoʼik u kʼab tu táanoʼob. Ka tu yaʼalajtiʼob: «Mix baʼal yaan in wil yéetel u kʼiʼikʼel le máakaʼ. A kaʼakajeʼex teʼex». Mix beyoʼ, maʼ tu kʼexaj u tuukuloʼobiʼ. Baʼaxeʼ tu yaʼaloʼob: «Taalak u kʼiʼikʼel t-óokʼol bey xan tu yóokʼol k-paalal» (Mateo 27:24, 25).

 Le gobernadoroʼ maas tu yilaj u beetik baʼax ku yaʼalikoʼob ke ka u beet baʼax maʼalob. Ka tu jáalkʼabtaj Barrabás tiʼ le máakoʼoboʼ. Baʼaleʼ tu yaʼalaj ka luʼsaʼak u nookʼ Jesuseʼ ka jaʼajatsʼaʼabi.

Ka tsʼoʼok u jaʼajatsʼaʼal Jesús tumen le soldadoʼoboʼ tu bisoʼob tu palacio le gobernadoroʼ. Ka joʼopʼ u pʼaʼastaʼal tumen tuláakal le soldadoʼoboʼ. Tu jitʼoʼob junpʼéel corona yéetel kʼiʼixeʼ ka tu tsʼáajoʼob tu pool Jesús. Ka tu tsʼáajoʼob xan junxéetʼ cheʼ tu x-noʼoj kʼab yéetel tu tsʼáajoʼob junpʼéel chak nookʼ tu yóokʼol, jeʼex le ku tsʼáaik le reyoʼoboʼ. Ka joʼopʼ u yaʼalikoʼobtiʼ: «¿Bix sáaschajik tiʼ u Rey le judíoʼoboʼ?» (Mateo 27:28, 29). Baʼaleʼ joʼopʼ tak u túubikoʼob Jesús yéetel u lajkoʼob tu yich. Ka tu chʼaʼajoʼob le cheʼ tu tsʼáajoʼob tiʼ Jesusoʼ ka joʼopʼ u kʼoʼokʼolkoʼob u pool tu yéetel, ka maas tʼúub u kʼiʼixel le «corona» tsʼaʼan tu pooloʼ.

Ka tu yilaj Pilato bix u chúukpajal u yóol Jesús u muʼyajt le baʼax ku beetaʼaltiʼoʼ, taakchaj u kaʼa ilik wa jeʼel u páajtal u jáalkʼabtikeʼ, tu yaʼalaj tiʼ le máakoʼoboʼ: «¡Ileʼex! Táan in jóoʼsik ta wiknaleʼex utiaʼal ka a wojéelteʼexeʼ, teneʼ maʼ tin wilik wa yaan baʼax kʼaas u beetmaj». Maʼ xaaneʼ Pilatoeʼ tu tukleʼ jeʼel u chʼaʼabal óotsilil tiʼ Jesús ken ilaʼak bix boʼonboʼonil yéetel u kʼiʼikʼeleʼ. Ka waʼalaj Jesús tu táan le máakoʼoboʼ, Pilatoeʼ ku yaʼalik: «¡Ileʼex! ¡Jeʼel le máakaʼ!» (Juan 19:4, 5).

Kex tsʼoʼok u jaʼajatsʼaʼal yéetel tsʼoʼok u beetaʼal loob tiʼ Jesuseʼ mix baʼal ku beetik, le oʼolal Pilatoeʼ tʼaanaj yéetel chʼaʼ óotsilal bey xan yéetel tsiikil tiʼ letiʼ.