Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 70

Jesuseʼ ku tsʼakik juntúul máak chʼóop desde ka síiji

Jesuseʼ ku tsʼakik juntúul máak chʼóop desde ka síiji

JUAN 9:1-18

  • KU TSʼAʼAKAL JUNTÚUL MÁAK CHʼÓOP DESDE KA SÍIJI

Jesuseʼ láayliʼ tiaʼan tu kaajil Jerusalén tu kʼiinil sabadoeʼ. Le táan u bin u xíimbal yéetel u disipuloʼob ichil le kaajoʼ tu yiloʼob juntúul máak chʼóop desde ka síiji. U disipuloʼobeʼ tu kʼáatoʼobtiʼ: «J-Kaʼansaj, ¿máax kʼebanchaj utiaʼal ka síijik chʼóopil le máakaʼ: u taataʼob wa letiʼ?» (Juan 9:2).

Le disipuloʼoboʼ u yojloʼobeʼ le máakoʼ maʼ jel síijil tu beetaj tiʼ yaanal wíinkliliʼ, baʼaleʼ ku tuklikoʼobeʼ jeʼel u kʼebantal máak desde tiaʼan tu jobnel u maamaeʼ. Jesuseʼ tu yaʼalajtiʼob: «Mix u taataʼob kʼebanchajoʼob, mix le máakaʼ, baʼaxeʼ lelaʼ úuch utiaʼal ka chíikpajak u nukuch meyajoʼob Dios yoʼolal le máakaʼ» (Juan 9:3). Bey túunoʼ mix le máak kʼebanchajoʼ, mix u taataʼob beet baʼax kʼaas. Baʼaxeʼ tu yoʼolal u kʼeban Adaneʼ, yaan kʼiineʼ yaan baʼax maʼ maʼalob tiʼ u wíinklil máak ken síijik, jeʼex le máak chʼóopoʼ. Baʼaleʼ le máak chʼóopoʼ tu tsʼáaj u páajtalil u yeʼesik Jesús le meyajoʼob ku páajtal u beetik Diosoʼ, jeʼex tsʼoʼok u beetik ka tu tsʼakaj uláakʼ kʼojaʼanoʼoboʼ.

Jesuseʼ u yojel unaj u beetik tu séebaʼanil le meyajoʼobaʼ. Letiʼeʼ tu yaʼalaj: «Táanil tiʼ u bin kʼiineʼ, unaj k-beetik le meyajoʼob u tsʼaamaj le máax túuxtenoʼ, tumen táan u yáakʼabtal, tsʼoʼoleʼ ken áakʼabchajkeʼ mix máak ku páajtal u meyaj. Le tiaʼanen way yóokʼol kaabeʼ, u sáasilen yóokʼol kaab» (Juan 9:4, 5). Jach beyoʼ, maʼ kun xáantaleʼ Jesuseʼ yaan u bin ichil u éeʼjochʼeʼenil le muknal tuʼux maʼ kun páajtal u beetik mix baʼaloʼ. Táanil tiʼ u yúuchul lelaʼ, Jesuseʼ letiʼ u sáasilil yóokʼol kaab.

Baʼaleʼ ¿bix túun úuchik u tsʼakik Jesús le máakoʼ? Túubnaj teʼ luʼumoʼ ka tu beetaj luukʼ tu yéetel. Ka tu tsʼáaj junpʼíit tu yich le máakoʼ ka tu yaʼalajtiʼ: «Xeen a pʼoʼ a wich tu pilail Siloam» (Juan 9:7). Le máakoʼ bini. Ka tu beetaj le baʼax aʼalaʼabtiʼoʼ ka utschaji. Máans ta tuukul bukaʼaj úuchik u kiʼimaktal u yóol le ka páajchaj u paakatoʼ.

U vecinoʼob yéetel uláakʼ máakoʼob u kʼaj óoloʼob kaʼachoʼ jaʼakʼ u yóoloʼob ka tu yiloʼob. Letiʼobeʼ tu kʼáatoʼob: «¿Maʼ wa letiʼe máak kulukbal kaʼach u kʼáat caridadaʼ?». Yaan tiʼ letiʼobeʼ tu yaʼaloʼob: «Letiʼ». Baʼaleʼ yanoʼobeʼ maʼ tu creertikoʼob, ka joʼopʼ u yaʼalikoʼob: «Maʼ, maʼ letiʼiʼ, baʼaleʼ chíikaʼan tiʼ letiʼ». Le máak túunoʼ tu yaʼalajtiʼob: «Teen le máak ka waʼalikeʼexoʼ» (Juan 9:8, 9).

Letiʼobeʼ tu kʼáatoʼobtiʼ: «¿Bix túun úuchik u yantal u sáasilil a wich?». Letiʼeʼ tu núukaj: «Le máak ku kʼaabaʼtik Jesusoʼ tu beetaj luukʼeʼ ka tu choʼaj tin wich, tsʼoʼoleʼ ka tu yaʼalajten: ‹Xeen Siloameʼ ka a pʼoʼ a wich›. Teen túuneʼ bineneʼ ka tin pʼoʼaj in wich, ka yanchaj u sáasilil in wich». Le máakoʼob túunoʼ tu kʼáatoʼobtiʼ: «¿Tuʼux yaan le máak ka waʼalikoʼ?». Letiʼeʼ tu núukaj: «Maʼ in wojliʼ» (Juan 9:10-12).

Le máakoʼoboʼ tu bisoʼob yiknal le fariseoʼob  taak u yojéeltikoʼob xan bix úuchik u tsʼaʼabal u sáasiloʼ. Le máakoʼ tu yaʼalajtiʼob: «Letiʼeʼ tu choʼaj luukʼ tin wichoʼob, tsʼoʼoleʼ ka tin pʼoʼaj, le oʼolal ku páajtal in paakat». Le fariseoʼoboʼ unaj u kiʼimaktal u yóoloʼob kaʼach úuchik u tsʼaʼabal u sáasil le máakoʼ. Baʼaleʼ jujuntúul tiʼ letiʼobeʼ tu yaʼaloʼob yoʼolal Jesús: «Le máakoʼ maʼ tiʼ Dios u taaliʼ, tumen maʼatech u tsʼoʼokbesik u leyil le Sabadooʼ». Uláakʼoʼobeʼ ku yaʼalikoʼob xan: «¿Bix jeʼel u páajtal u beetaʼal tumen juntúul j-kʼeban máak le milagroʼob beyaʼ?» (Juan 9:15, 16). Bey túunoʼ maʼ junpʼéeliliʼ baʼax ku yaʼalikoʼobiʼ.

Le oʼolal taaloʼob yiknal le máakoʼ ka tu kaʼa kʼáatoʼobtiʼ: «Bey tumen tu tsʼáaj u sáasilil a wichoʼ, ¿baʼax túun ken a waʼal tu yoʼolal?». Le máakoʼ jach u yojel máax Jesús, le oʼolal tu yaʼalaj: «Letiʼeʼ juntúul profeta» (Juan 9:17).

Le judíoʼoboʼ maʼ tu yóotaj u creertoʼobiʼ. Letiʼobeʼ tu tukloʼobeʼ Jesús yéetel le máakoʼ u chʼaʼtukultmoʼob bix ken u tusiloʼob u maasil. Letiʼobeʼ tu tukloʼobeʼ maas maʼalob ka kʼáataʼak tiʼ u taataʼob le máak utiaʼal ka u yojéeltoʼob wa jach tu jaajil chʼóop kaʼachoʼ.