Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 JAATS 1

‹Bíin in taas le tséeloʼob yaanal bejoʼ›

‹Bíin in taas le tséeloʼob yaanal bejoʼ›

Le tamanoʼ jakʼaʼan u yóol. Le táan u bin u janaloʼ, náachchaj jujunpʼíitil tiʼ u maasil tamanoʼoboʼ. Ka tu tsʼáaj cuentaeʼ minaʼan u maasil tu yiknaloʼ mix le j-kanan tamanoʼ. Tsʼoʼoleʼ nukaʼaj áakʼabtal. Chéen tu juunal yaan teʼ tuʼux yaan tsʼíitsʼik baʼalcheʼoboʼ, mix máak yaan utiaʼal kanáantik. Baʼaleʼ chéen ka tu yuʼubaj u tʼaan juntúul máax u kʼaj óol bix u tʼaan, ka méekʼaʼabeʼ teʼepʼ yéetel junpʼéel nookʼ utiaʼal u bisaʼal tu yotoch.

JÉEOBAEʼ yaʼab u téenel ku ketkuba yéetel juntúul j-kanan taman. Ichil le Bibliaoʼ ku yaʼalik: «Teen bíin in kanáant in tamanoʼob maʼ [...] yaanaliʼ» (Ezequiel 34:11, 12).

«In tamaneʼex»

¿Máax u tamanoʼob Jéeoba? Ichil junpʼíit tʼaanoʼobeʼ, letiʼe máaxoʼob yaabiltmil yéetel adorartikoʼ. Le Bibliaoʼ ku yaʼalik: «Koʼoneʼex chintal utiaʼal adorar, koʼoneʼex xoltal tu táan Jéeoba, le Máax Beetmiloʼonoʼ. Tumen letiʼ k-Dios, u kaajaloʼon yéetel ku kanáantkoʼon jeʼex u kanáantaʼal tamanoʼobeʼ» (Salmo 95:6, 7TNM). Jeʼex le tamanoʼob ku binoʼob tu paach le máax kanáantkoʼoboʼ, le máaxoʼob meyajtik Jéeobaoʼ jach u kʼáatoʼob bin tu paach le Máax kanáantkoʼoboʼ. Baʼaleʼ ¿perfectoʼob wa? Maʼatech. Le máaxoʼob meyajtik Diosoʼ yaan kʼiineʼ ku ‹kʼiʼitpajloʼob›, ku «saʼatloʼob» yéetel ku pʼáatloʼob bey «tamanoʼob saatloʼobeʼ» (Ezequiel 34:12; Mateo 15:24; 1 Pedro 2:25). Kex beyoʼ, ken náachchajak juntúul máak tiʼ Jéeobaeʼ, letiʼeʼ ku tsʼíiboltik ka kʼuchuk u kʼiinil u suut tu yiknal tu kaʼatéen.

 ¿Láayliʼ wa ka wilik Jéeoba bey a j-Kanan tamaneʼ? ¿Bix u beetik Jéeoba jeʼex juntúul j-kanan taman bejlaʼeʼ? Ilawil óoxpʼéel bixi:

Ku tsʼáaiktoʼon kaʼansaj ku keʼetel yéetel janal. Jéeobaeʼ ku yaʼalik: «Bíin in bisoʼob u jaantoʼob u [maas] maʼalobil xíiw». Tsʼoʼoleʼ ku yaʼalik: «Teʼeloʼ bíin páatak u jeʼeleloʼob yéetel u jaantkoʼob u [maas] maʼalobil janaloʼob» (Ezequiel 34:14). Jéeobaeʼ mix juntéen xuʼuluk u tsʼáaiktoʼon yaʼabkach kaʼansaj ku keʼetel yéetel kiʼikiʼ janal. ¿Kʼajaʼan wa tech junpʼéel baʼax ta xokaj, junpʼéel tsoltʼaan wa junpʼéel video ta chaʼantaj tu tsʼáajtech le áantaj ta kʼáataj ichil a oracionoʼ? ¿Tu yáantech wa a wil jach tu jaajil u yaabiltmech Jéeoba?

Ku kanáantkoʼon yéetel ku yáantkoʼon. Jéeobaeʼ ku yaʼalik: «Bíin in taas le tséeloʼob tiʼ u beeloʼoboʼ, bíin in toʼo u yook le kaachal u yookoʼoboʼ, bíin in wáant le lúubul u muukʼoʼoboʼ» (Ezequiel 34:16). Jéeobaeʼ ku líiʼsik u yóol le tsʼoʼok u lúubul u muukʼoʼob yoʼolal le chiʼichnakiloʼoboʼ. Ku toʼik u yajil le máaxoʼob beetaʼan loob tiʼob, maʼ xaaneʼ tak tumen uláakʼ sukuʼunoʼob. Tsʼoʼoleʼ ku yáantik ka suunak le tsʼoʼok u náachtaloʼoboʼ bey xan le ku yuʼubikoʼob mix baʼal u biilaloʼoboʼ.

Maʼatech u xuʼulul u kanáantkoʼon. Jéeobaeʼ ku yaʼalik: «Bíin xiʼiken in chʼaʼob tu kúuchil tuʼux kʼiʼitpajaʼanoʼob». Tsʼoʼoleʼ ku yaʼalik: «Bíin in kaxant le tamanoʼob saatloʼoboʼ» (Ezequiel 34:12, 16). Utiaʼal Jéeobaeʼ ken saʼatak juntúul tamaneʼ maʼ u kʼáat u yaʼal wa maʼ kun kaʼa suut tu yiknaliʼ. Ken náachchajak juntúul tamaneʼ ku bin u kaxte, le ken u kaxteʼ ku kiʼimaktal u yóol (Mateo 18:12-14). Letiʼeʼ ku yaʼalik tiʼ le máaxoʼob meyajtikoʼ: «Teʼexeʼ in tamaneʼex, u tamanileʼex in kool» (Ezequiel 34:31). Techeʼ juntúulech tiʼ u tamanoʼob.

Utiaʼal Jéeobaeʼ ken saʼatak juntúul tamaneʼ maʼ u kʼáat u yaʼal wa maʼ kun kaʼa suut tu yiknaliʼ. Ken u kaxteʼ ku kiʼimaktal u yóol

«¡Beet u kaʼa pʼáatal k-kuxtal jeʼel bix yanil kaʼacheʼ!»

¿Baʼaxten ku kaxtikech Jéeoba yéetel ku yaʼaliktech ka suunakech tu yiknal? Tumen u kʼáat ka yanaktech kiʼimak óolal. Letiʼeʼ ku yaʼalik tiʼ le máaxoʼob meyajtikoʼ: «Bíin in túuxt u kiʼtʼaaniloʼob u kʼáaxal jaʼ [ta wóokʼol] jeʼel bix u najmaleʼ» (Ezequiel 34:26). Lelaʼ maʼ chéen ku yaʼalik u beetkiʼ. Techeʼ tsʼoʼok a yáax ilik bey u beetkoʼ.

Kʼaʼajs bix ta wuʼuyilaba ka ta kʼaj óoltaj Jéeoba. ¿Bix ta wuʼuyilaba le ka kaʼansaʼabtech u jaajil yoʼolal u kʼaabaʼ bey xan yoʼolal le baʼax u tukultmaj u beetik yoʼolal wíinikoʼ? ¿Kʼajaʼan wa tech bix u kiʼimaktal a wóol ken xiʼikech teʼ asambleaʼob yéetel u maasil sukuʼunoʼoboʼ? Ken tsikbalnakech kaʼach yéetel juntúul máax uts tu tʼaan u yuʼubik le maʼalob péektsiloʼ, ¿máasaʼ jach ku taasiktech kiʼimak óolal ken suunakech ta wotoch?

Techeʼ jeʼel u kaʼa kiʼimaktal a wóoleʼ. Le máaxoʼob meyajtik Dios úuchjeakiloʼ tu yaʼaloʼob: «¡Yuumtsil[,] beet k-suut tiʼ techeʼ, ka suunakoʼon! ¡Beet u kaʼa pʼáatal k-kuxtal jeʼel bix yanil kaʼacheʼ!» (Lamentaciones 5:21). Jéeobaeʼ tu núukaj le oracionaʼ, bey túunoʼ tu seguertaj u adorartikoʼob yéetel kiʼimak óolal (Nehemías 8:17). Jéeobaeʼ jeʼel u yáantkech xan beyoʼ.

Baʼaleʼ maas chéen chʼaʼabil u yaʼalik máak yaan u suut yiknal Jéeoba, ke u beetik. Le oʼolal ilawil jujunpʼéel baʼaxoʼob jeʼel u yáantkech a beeteʼ.