Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

U tsʼoʼokbal

U tsʼoʼokbal

«Beetabaʼex jeʼex le máaxoʼob ku tiaʼalintikoʼob le promesaʼob tu yoʼolal u fejoʼob yéetel tu yoʼolal u chúukaʼan óolaloʼoboʼ.» (HEBREOʼOB 6:12)

1, 2. ¿Baʼaxten unaj k-séeb muʼukʼaʼankúuntik k-fe? Kete.

JUNPʼÉEL tiʼ le tʼaanoʼob jatsʼutstak yanoʼ fe, tumen junpʼéel tiʼ le modos jach unaj u yantal tiʼ máakoʼ. Baʼaleʼ ken k-uʼuy wa ken k-il le tʼaanaʼ, unaj xan k-tuukul tiʼ le uláakʼ tʼaanaʼ: «¡Tu séebaʼanil!». Wa minaʼantoʼon fejeʼ, tu séebaʼanil unaj k-ilik u yantaltoʼon. Baʼaleʼ wa yaantoʼoneʼ, tu séebaʼanil unaj k-ilik k-kanáantik yéetel k-muʼukʼaʼankúuntik. ¿Baʼaxten?

2 Tukult táan a kʼáatmáansik xíimbalil junpʼéel nuxiʼ desierto. Mix junpʼíit jaʼ pʼáataltech, tsʼoʼoleʼ táan a kíimil yéetel ukʼaj. Le ken a kaxt tuʼux a chʼaʼik jaʼeʼ, ¿máasaʼ ka wilik a tsʼáaik boʼoy utiaʼal maʼ u saʼapʼal? Tsʼoʼoleʼ ka wilik a kaʼa chupik utiaʼal u páajtal a kóojol teʼ tuʼux ka binoʼ. Bejlaʼeʼ kuxaʼanoʼon bey tiʼ junpʼéel desierto, tuʼux jeʼex u yúuchul yéetel le jaʼoʼ, óoliʼ tiʼ mix máak yaan fe yéetel jach séeb u saʼatal wa maʼ tu kanáantaʼal mix xan tu muʼukʼaʼankúuntaʼaleʼ. Lelaʼ junpʼéel baʼax unaj k-séeb beetik, tumen jeʼex mix máak ku páajtal u kuxtal wa minaʼan jaʼ tiʼeʼ, bey xan jeʼel u yúuchul wa ku saʼatal k-fejeʼ.

3. ¿Baʼax u beetmaj Jéeoba utiaʼal k-muʼukʼaʼankúuntik k-fe, yéetel baʼax kaʼapʼéel baʼaloʼob unaj k-beetik?

3 Jéeobaeʼ u yojel jach kʼaʼabéettoʼon le fejoʼ, yéetel u yojel xan maʼ chéen chʼaʼabil u yantal yéetel k-kanáantik teʼ talam kʼiinoʼobaʼ. Le oʼolal tu yaʼalaj ka tsʼíibtaʼak teʼ Biblia le baʼaxoʼob tu beetaj le máaxoʼob adorart úuchjeakil, utiaʼal k-beetik jeʼex letiʼoboʼ. Jéeobaeʼ tu péeksaj apóstol Pablo u tsʼíibt: «Beetabaʼex jeʼex le máaxoʼob ku tiaʼalintikoʼob le promesaʼob tu yoʼolal u fejoʼob yéetel tu yoʼolal u chúukaʼan óolaloʼoboʼ» (Heb. 6:12). Le oʼolal u kaajal Jéeobaeʼ, tsʼoʼok u jach líiʼsik k-óol utiaʼal k-beetik jeʼex le xiiboʼob yéetel koʼoleloʼob chúukpaj u yóol u meyajtoʼob Dios, jeʼex le tsʼoʼok k-xakʼaltikoʼob teʼ libroaʼ. ¿Baʼax unaj k-beetik beoraaʼ? Yáaxeʼ unaj k-ilik k-muʼukʼaʼankúuntik k-fe; u kaʼapʼéeleʼ maʼ u tuʼubultoʼon le baʼaxoʼob u yaʼalmaj Dios u tsʼáaiktoʼon wa ku chúukpajal k-óol tiʼoʼ.

4. ¿Bix tsʼoʼok u yeʼesik Satanás jach u pʼeek u yantal u fe máak, yéetel baʼaxten maʼ unaj k-tuklik maʼ ken k-tsaʼayal tu contraiʼ?

4 Maʼ u xuʼulul a muʼukʼaʼankúuntik a fe. Satanaseʼ jach táaj u pʼeek u yantal u fe máak. Utiaʼal ka saʼatak k-fejeʼ, letiʼeʼ tsʼoʼok u beetik u suut bey junpʼéel desierto le yóokʼol kaab ku gobernartikoʼ. Letiʼeʼ maas yaan u páajtalil tiʼ toʼon. ¿Unaj wa k-chʼaʼik saajkil ka tak k-tukult maʼ kun béeytal k-muʼukʼaʼankúuntik k-fe yéetel yaan tak u saʼatal? ¡Maʼatech! Jéeobaeʼ ku maʼalob biskuba yéetel le máaxoʼob jach tu jaajil yaan u fejoʼoboʼ. Ku yaʼalik xaneʼ wa k-pʼáatal naatsʼ tiʼeʼ, yaan u páajtal k-tsʼáaikba tu contra le Kʼaasilbaʼaloʼ yéetel yaan tak u yáalkab tiʼ toʼon (Sant. 4:7). Baʼaleʼ utiaʼal leloʼ,  sáamsamal unaj k-ilik k-muʼukʼaʼankúuntik k-fe tiʼ Dios. ¿Bix jeʼel k-beetkeʼ?

5. ¿Bix úuchik u yantal fe tiʼ le xiiboʼob yéetel koʼoleloʼob ku chʼaʼchiʼitaʼaloʼob teʼ Bibliaoʼ? Tsole.

5 Jeʼex tsʼoʼok k-ilkoʼ, le xiiboʼob yéetel le koʼoleloʼob ku chʼaʼchiʼitaʼaloʼob teʼ Bibliaoʼ minaʼan u fejoʼob ka síijoʼob. Le bix úuchik u kuxtaloʼoboʼ tu yeʼesajeʼ le fejoʼ u kiliʼich muukʼ Dios tsʼáaik tiʼ máak (Gal. 5:22, 23). Le ka tu kʼáatoʼob áantajeʼ, Jéeobaeʼ tu núukaj u payalchiʼobeʼ ka tu beetaj u maas muʼukʼaʼantal u fejoʼob. Unaj k-beetik jeʼex letiʼobeʼ; wa k-kʼáatik áantaj yéetel wa k-kuxtal jeʼex úuchik k-kʼáatkoʼ, Jéeobaeʼ yaan u tsʼáaiktoʼon le kiliʼich muukʼ kʼaʼabéettoʼonoʼ (Luc. 11:13). Baʼaleʼ ¿yaan wa uláakʼ baʼax unaj k-beetik?

6. ¿Bix jeʼel k-jóoʼsik u yutsil tiʼ u tsikbalil le máaxoʼob ku chʼaʼchiʼitaʼaloʼob teʼ Bibliaoʼ?

6 Le libroaʼ chéen ku tʼaan tiʼ jujuntúul máaxoʼob jach tu yeʼesoʼob fe. Baʼaleʼ yaan u maasil bey tu beetiloʼoboʼ (xok Hebreoʼob 11:32). Le ken xooknakoʼon t-juunaleʼ, unaj k-xakʼaltik tubeel le tsikbaloʼob yaan teʼ Bibliaoʼ yéetel unaj k-ilik kaanbal tiʼob. Wa chéen k-jáajan xokikoʼobeʼ maʼ kun muʼukʼaʼantal k-fe. Le beetkeʼ utiaʼal k-jóoʼsik u yutsileʼ, kʼaʼabéet k-xakʼaltikoʼob tubeel, k-tuukul tuʼux yaan yéetel baʼax táan kaʼach u aktáantik le máax tiʼ ku tʼaan le xookoʼ. Beyoʼ yaan k-kʼuchul il le xiiboʼob yéetel le koʼoleloʼob ku chʼaʼchiʼitaʼaloʼob teʼ Bibliaoʼ láayliʼ máakoʼob «jeʼex toʼoneʼ» (Sant. 5:17). Wa k-uʼuyikba jeʼex letiʼobeʼ, maʼalob ka k-tukult baʼax tu beetoʼob le ka tu aktáantoʼob talamiloʼob jeʼex le k-máansikoʼ.

7-9. 1) ¿Bix jeʼel u yuʼubikuba le máaxoʼob meyajt Dios úuchjeakil wa ka u adorartoʼob Jéeoba jeʼex k-beetik bejlaʼeʼ? 2) ¿Baʼaxten unaj k-muʼukʼaʼankúuntik k-fe bey xan tuláakal baʼax maʼalob k-beetik?

7 Ku muʼukʼaʼantal xan k-fe ken k-il k-tsʼoʼokbesik le meyaj u tsʼaamajtoʼon Jéeobaoʼ. Le Bibliaoʼ ku yaʼalikeʼ ‹le fe minaʼan utsil meyajoʼob tiʼoʼ, kimen yanil› (Sant. 2:26). ¿Máasaʼ jach jeʼel u kiʼimaktal u yóol le máaxoʼob meyajt Dios úuchjeakil wa ka tsʼaʼabak u beetoʼob xan le meyaj u tsʼaamajtoʼon Jéeoba teʼ kʼiinoʼobaʼ?

8 Chéen tukult bix jeʼel u yuʼubikuba Abrahán wa ka aʼalaʼaktiʼ maʼ kʼaʼabéet u adorartik Jéeoba chéen yóoʼ altaroʼob beetaʼanoʼon yéetel tuunich tuʼux píiʼkabiʼ, baʼaxeʼ yaan u muchʼtal yéetel uláakʼ sukuʼunoʼob tiʼ jatsʼuts Najiloʼob Reino bey xan tuʼux ku beetaʼal asambleaʼob. Jach jeʼel wal u kiʼimaktal u yóol wa ka u yuʼub u tsoʼolol tubeel bejlaʼa le baʼaxoʼob aʼalaʼabtiʼ tumen Jéeoba kun úuchuloʼ, baʼaleʼ letiʼeʼ chéen tu yilaj «desde náachil» (xok Hebreoʼob 11:13). Tukult xan bix jeʼel u yuʼubikuba Elías wa le meyaj tsʼaʼantiʼoʼ maʼ letiʼe u xuʼulsik tiʼ u profetaʼob Baaloʼ mix xan u meyajtik Dios tiʼ junpʼéel luʼumil tuʼux ku gobernar juntúul kʼasaʼan reyiʼ, baʼaxeʼ letiʼe u bisik maʼalob péektsil ku taasik jeetsʼelil yéetel esperanza tiʼ le máakoʼoboʼ. Jach tu jaajil le máaxoʼob chúukpaj u yóol u meyajtoʼob Dios úuchjeakiloʼ yéetel kiʼimak óolal jeʼel u beetkoʼob le baʼaxoʼob u kʼáat Jéeoba utiaʼal ka k-adorart bejlaʼoʼ.

9 Le oʼolal jach maʼalob ka seguernak k-muʼukʼaʼankúuntik k-fe bey xan tuláakal baʼax  maʼalob k-beetik. Ken k-beet beyoʼ táan k-tsʼáaik ichil k-kuxtal le baʼaxoʼob tsʼoʼok k-kanik yoʼolal le máaxoʼob ku chʼaʼchiʼitaʼaloʼob ichil le Bibliaoʼ. Bey túunoʼ, jeʼex úuchik u yaʼalaʼal tu káajbal le libroaʼ, letiʼobeʼ yaan u kʼuchul u beetubaʼob k-amigoʼob yéetel maʼ kun xáantaleʼ yaan xan k-maas bisikba tu yéeteloʼob.

10. ¿Baʼaxoʼob ken u taastoʼon kiʼimak óolal teʼ Paraísooʼ?

10 Maʼ u xuʼulul a tsʼáaik a paakat tiʼ le esperanzaoʼ. Le máaxoʼob chúukpaj u yóol u meyajtoʼob Dios úuchjeakiloʼ muʼukʼaʼanchaj u fejoʼob yoʼolal le esperanza ku tsʼáaik letiʼoʼ. ¿Ka wilik wa xan a beetik beyoʼ? Tukult bukaʼaj wal jatsʼutsil kun kʼambil yéetel kiʼimak óolal le xiiboʼob yéetel le koʼoleloʼob ken ‹kaʼa kuxkíintaʼak le utsoʼoboʼ› (xok Baʼaxoʼob 24:15). ¿Baʼax jeʼel u taaktal a sen kʼáatiktiʼobeʼ?

11, 12. Teʼ túumben yóokʼol kaaboʼ, ¿baʼaxoʼob jeʼel u taaktal a kʼáatik tiʼ Abel, Noé, Abrahán, Rut, Abigail yéetel tiʼ Estereʼ?

11 Jeʼex tiʼ Abeleʼ, ¿baʼax jeʼel u taaktal a kʼáatiktiʼeʼ? Maʼ xaaneʼ jeʼel u taaktal a wojéeltik jach bix u taataʼobeʼ, bey xan wa yaan kʼiin tsikbalnaj yéetel le querubinoʼob kanáantik u yookbal u jardinil Edenoʼ. ¿Kux túun tiʼ Noé? Maʼ xaaneʼ jeʼel u taaktal a wojéeltik wa sajakchaj tiʼ le sen kaʼanal baakel wíinikoʼoboʼ, bey xan baʼax tu beetaj utiaʼal u kanáantik le yaʼabkach baʼalcheʼob teʼ arca ichil junpʼéel jaʼaboʼ. ¿Kux túun tiʼ Abrahán? Maʼ xaaneʼ jeʼel a kʼáatiktiʼ wa talam tu yilil u pʼatik u kaajil Ur, bey xan wa Sem áant u kʼaj óolt Jéeoba.

12 Maʼ xaan xaneʼ yaan baʼaxoʼob jeʼel u taaktal a kʼáatik tiʼ le koʼoleloʼob tu meyajtoʼob xan Dios úuchjeakiloʼ. Maʼ xaaneʼ tiʼ Ruteʼ jeʼel u taaktal a kʼáatik baʼax péeks utiaʼal u káajal u meyajtik Jéeobaeʼ. Tiʼ Abigaileʼ wa sajakchaj u yaʼal tiʼ Nabal le baʼax tu beetaj yoʼolal Davidoʼ. Tiʼ Estereʼ maʼ xaaneʼ jeʼel a kʼáatik baʼax úuch yéetel u kuxtal bey xan tiʼ Mardoqueo le ka xuʼul u chʼaʼchiʼitaʼaloʼob teʼ Bibliaoʼ.

13. 1) ¿Baʼax wal jeʼel u kʼáatiktoʼon le máaxoʼob kun kaʼa kuxkíintbiloʼoboʼ? 2) ¿Bix a wuʼuyikaba a wojéeltik yaan u páajtal a kʼaj óoltik le xiiboʼob yéetel le koʼoleloʼob chúukpaj u yóoloʼoboʼ?

13 U jaajileʼ, le xiiboʼob yéetel le koʼoleloʼob chúukpaj u yóoloʼob úuchjeakiloʼ yaʼab baʼaxoʼob xan jeʼel u taaktal u yojéeltikoʼobeʼ. ¿Máasaʼ jach yaʼab jatsʼuts baʼaloʼob jeʼel k-tsikbaltiktiʼobeʼ? Maʼ xaaneʼ jeʼel k-tsikbaltiktiʼob baʼaxoʼob sen úuch teʼ tsʼook kʼiinoʼoboʼ yéetel bix tu yáantil Jéeoba u kaajal teʼ kʼiinoʼob talamtakoʼoboʼ. Jach u jaajileʼ yaan u kiʼimaktal u yóol u yojéeltikoʼob Dioseʼ tu láaj béeykuntaj le baʼaxoʼob tu yaʼaloʼ. Tsʼoʼoleʼ maʼ chéen yaan k-máansik t-tuukul jach bixoʼobiʼ, baʼaxeʼ yaan u yantaloʼob t-éetel teʼ Paraísooʼ. Baʼaleʼ le maʼ kʼuchuk u kʼiiniloʼ, unaj k-ilik jach k-tuukul tiʼ le baʼax tu beetaj k-amigoʼobaʼ yéetel u yantaltoʼon le fe anchajtiʼoboʼ. Wa k-beetik beyoʼ yaan u béeytal k-meyajtik Jéeoba utiaʼal mantatsʼ.