Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOKIL 1

‹Kex kimeneʼ, láayliʼ táan u tʼaaneʼ›

‹Kex kimeneʼ, láayliʼ táan u tʼaaneʼ›

1. ¿Baʼax yaan kaʼach tu jool u jardinil Edén utiaʼal maʼ u yokol mix máakiʼ, yéetel baʼax jach ku tsʼíiboltik kaʼach Abel ka úuchuk?

ABELEʼ táan kaʼach u yilik bix u janal u yalakʼ tamanoʼob tu ebekníixil junpʼéel puʼuk. Maʼ xaaneʼ desde teʼeloʼ ku páajtal kaʼach u yilik junpʼéel chan baʼax ku léembal desde teʼ náachiloʼ. Letiʼeʼ u yojel teʼeloʼ tiʼ yaan le tʼabaʼan táatsʼ máaskab mantatsʼ táan u pirinsuut utiaʼal maʼ u yokol mix máak tu jardinil Edenoʼ. U taataʼobeʼ tiʼ kajaʼanoʼob kaʼachiʼ, baʼaleʼ beoraaʼ mix máak ku páajtal u yookliʼ. Chéen tukult bix u wiltaʼal u tsoʼotsel u pool Abel le táan u bin u tʼúubul Kʼiin, yéetel táan u paakat kaʼan le táan u tuukul tiʼ Diosoʼ. Maʼ xaaneʼ táan kaʼach u tuklik wa yaan u kʼuchul u kʼiinil u yantal máak ichil u familia Dios tu kaʼatéen. Lelaʼ letiʼe baʼax jach ku tsʼíiboltik kaʼach ka úuchkoʼ.

2-4. ¿Bix u tʼankoʼon Abel teʼ kʼiinoʼobaʼ?

2 Abel, le u kaʼatúul paal Adanoʼ, táan u tʼaan ta wéetel bejlaʼeʼ. Baʼaleʼ maʼ xaaneʼ ka tuklik: ¿Bix túun jeʼel u tʼanken wa úuch kíimkeʼ? Tsʼoʼoleʼ u wíinklileʼ úuch suunak luʼumil yéetel tsʼoʼok kex seis mil jaʼaboʼob joʼopʼok u xaʼaxakʼpajal yéetel le luʼumoʼ. Le Bibliaoʼ ku yaʼalikeʼ le kimenoʼoboʼ «maʼ u yojloʼob mix baʼaliʼ» (Ecl. 9:5, 10). Tsʼoʼoleʼ teʼ Bibliaoʼ maʼatech u chíikpajal mix junpʼéel tiʼ le baʼaxoʼob tu yaʼalaj Abeloʼ. ¿Baʼaxten túun ku yaʼalaʼal táan u tʼankoʼon?

3 Dioseʼ tu tsʼáaj tu tuukul apóstol Pablo ka u yaʼal yoʼolal Abel: «Kex kíimeʼ tak bejlaʼa táan u tʼaan tu yoʼolal le fe yanchajtiʼoʼ» (xok Hebreoʼob 11:4). Jeʼex k-ilkoʼ Abeleʼ ku tʼankoʼon yoʼolal u fe. Letiʼ le yáax máak tu yilaj u muʼukʼaʼankúuntikoʼ. Le nojoch fe tu yeʼesoʼ láayliʼ kuxaʼan tak bejlaʼeʼ yéetel jeʼel u páajtal xan k-beetik jeʼex letiʼoʼ. Wa k-kaanbal tiʼ letiʼ yéetel wa k-ilik u yantaltoʼon le fe anchajtiʼoʼ, k-eʼesik táan k-uʼuyik u tʼankoʼon.

4 Baʼaleʼ ¿baʼax jeʼel k-kanik tiʼ Abel yéetel tiʼ le fe anchajtiʼ, wa chéen junpʼíit baʼax ku yaʼalik le Biblia tu yoʼolaloʼ? Koʼox ilik.

Síij yéetel líikʼ tu káajbal yóokʼol kaab

5. ¿Baʼax tiʼ ku tʼaan kaʼach Jesús le ka tu yaʼalaj Abeleʼ síij yéetel líikʼ «desde le ka káaj u síijil wíinikoʼ»? (Ilawil le tsolajiloʼ.)

5 Abeleʼ síij jach tu káajbal yóokʼol kaab. Ka máan kʼiineʼ Jesuseʼ tu yaʼaleʼ Abeleʼ síij yéetel líikʼ «desde le ka káaj u síijil wíinikoʼ» (xok Lucas 11:50, 51). Teʼelaʼ Jesuseʼ táan u tʼaan tiʼ le máaxoʼob kun luʼsbil  u kʼebanoʼoboʼ. Kex Abel, letiʼ u kantúul máak anchaj way yóokʼol kaabeʼ, tu táan Dioseʼ letiʼ le yáax wíinik ku náajmatik u luʼsaʼal u kʼebanoʼ. * Jeʼex k-ilkoʼ Abeleʼ líikʼ ichil máaxoʼob maʼatech u meyajtikoʼob Jéeoba.

6. ¿Baʼax jatsʼuts baʼaloʼob tu peʼertaj u taataʼob Abel?

6 Kex káajal ku beetik kaʼach u yantal máakeʼ, tsʼoʼok u jáan antal baʼax taasik muʼyajil. Maʼ xaaneʼ Adán yéetel Eva, u taataʼob Abeleʼ, jach jatsʼutstakoʼob yéetel jach toj u yóoloʼob kaʼachi. Baʼaleʼ letiʼobeʼ tu peʼertoʼob tuláakal le baʼaxoʼob jatsʼuts yaantiʼoboʼ. Letiʼobeʼ minaʼan kaʼach u kʼebanoʼob yéetel jeʼel u páajtal u kuxtaloʼob minaʼan u xuuleʼ. Tsʼoʼoleʼ tu tsʼáajubaʼob tu contra Jéeoba yéetel tojolchʼintaʼaboʼob tiʼ u jardinil Edén. Tumen tu kaxtoʼob chéen u tsʼíibolaloʼob, yéetel maʼ tuukulnajoʼob mix tiʼ u chʼiʼibaloʼobeʼ, kʼebanchajoʼob yéetel tu peʼertoʼob u páajtalil u kuxtaloʼob minaʼan u xuul (Gén. 2:15–3:24).

7, 8. ¿Baʼax tu yaʼalaj Eva ka síij Caín, yéetel baʼax ku tuklik kaʼach tu yoʼolal?

7 Le ka tsʼoʼok u jóoʼsaʼaloʼob teʼ jardinoʼ, Adán yéetel Evaeʼ jach yaj bix úuchik u kaxtik u kuxtaloʼob. Le ka síij u yáax paaloʼobeʼ tu tsʼáajoʼob u kʼaabaʼint Caín, yéetel Evaeʼ tu yaʼalaj: «Yaanten juntúul in xibil paal, Yuumtsil tsʼáaten». Yéetel le tʼaanoʼobaʼ tu yeʼesaj láayliʼ kʼajaʼantiʼ le baʼax tu yaʼalaj Jéeoba tu jardinil Edenoʼ, teʼeloʼ aʼalaʼab yaan u yantal u «chʼiʼibal» juntúul koʼolel yéetel le chʼiʼibaloʼ yaan u kʼuchul u kʼiinil u xuʼulsik tiʼ le máax beet u kʼebantal Adán yéetel Evaoʼ (Gén. 3:15; 4:1). Maʼ xaaneʼ Evaeʼ tu tukleʼ letiʼ le koʼoleloʼ, yéetel Caíneʼ letiʼ le «chʼiʼibal» aʼalaʼaboʼ.

8 ¡Jach óotsil wa bey tu tukliloʼ! Tsʼoʼoleʼ wa letiʼ yéetel u yíicham tu yoksoʼob tu pool Caín letiʼ le «chʼiʼibal[oʼ]», tu kʼaskúuntoʼob tumen  tu beetoʼob u taaskuba noj baʼalil. Ka máan kʼiineʼ, Evaeʼ anchaj uláakʼ juntúul u paal, baʼaleʼ mix tuʼux k-ilik wa tu yaʼalaj baʼaloʼob maʼalobtak tu yoʼolal, baʼaxeʼ tu tsʼáajoʼob u kʼaabaʼint Abel, maʼ xaaneʼ lelaʼ u kʼáat u yaʼal «Múus iikʼ» wa «Chéen kunel» (Gén. 4:2). ¿Tu tsʼáajoʼob wa bey u kʼaabaʼ tumen maas yaʼab baʼax ku páaʼtkoʼob tiʼ Caín ke tiʼ Abeloʼ? Maʼ xaaneʼ beyoʼ.

9. Le taatatsiloʼob bejlaʼoʼ, ¿baʼax jeʼel u kankoʼob tiʼ le yáax taatatsiloʼoboʼ?

9 Kex bey tu beetiloʼob wa maʼeʼ, le taatatsiloʼob bejlaʼoʼ jeʼel u páajtal u kankoʼob yaʼab baʼaloʼob tiʼ le yáax taatatsiloʼobaʼ. Le baʼaxoʼob ku yaʼalikoʼob yéetel ku beetkoʼoboʼ, ¿táan wa u kaʼansik tiʼ u paalal ka u yaabiltoʼob Jéeoba yéetel ka u bisubaʼob tu yéetel? ¿Wa táan u beetik ka u nojbaʼalkúuntubaʼob, u tsʼuʼuttaloʼob yéetel u tsʼíiboltkoʼob yaʼab baʼaloʼob? Le yáax taatatsiloʼoboʼ maʼ maʼalob baʼax tu beetoʼobiʼ, kex beyoʼ yaan esperanza tiʼ le máaxoʼob beetik baʼax uts tu tʼaan Diosoʼ.

¿Baʼax áant Abel u muʼukʼaʼankúunt u fe tiʼ Dios?

10, 11. ¿Baʼax meyajil tu kanaj u beet Caín yéetel Abel tu paaliloʼob, yéetel baʼax jatsʼuts modosil tu yilaj u muʼukʼaʼankúuntik Abel?

10 Jeʼex úuchik u bin u nojochtal le kaʼatúul xiʼipaloʼobaʼ bey xan úuchik u kaʼansaʼaloʼob meyaj tumen Adán, utiaʼal u tsʼáaikoʼob baʼax kʼaʼabéet tu yotochoʼoboʼ. Caíneʼ tu kanaj u meyajt le luʼumoʼ yéetel Abeleʼ tu yalakʼtaj tamanoʼob.

11 Baʼaleʼ Abeleʼ yaan uláakʼ baʼax maas maʼalob tu beetaj. Jeʼex máanik le jaʼaboʼoboʼ bey xan úuchik u muʼukʼaʼankúuntik u fe, lelaʼ letiʼe jatsʼuts modos tu chʼaʼchiʼitaj Pablo ka máan kʼiinoʼ. ¡Chéen tukle! Mix juntúul máak kaʼans tiʼ Abel bix jeʼel u beetkeʼ. ¿Bix túun tu muʼukʼaʼankúuntil u fe tiʼ Jéeoba? Koʼox ilik óoxpʼéel baʼax áante.

12, 13. Le baʼaxoʼob u beetmaj Jéeobaoʼ, ¿bix úuchik u yáantik Abel utiaʼal ka muʼukʼaʼanchajak u fe?

12 Le baʼaxoʼob u beetmaj Jéeobaoʼ. Dioseʼ tu beetaj u jóokʼol kʼiʼixoʼob yéetel kʼaakʼas xíiwoʼob teʼ luʼumoʼ, le oʼolal talamchaj u meyajtaʼal. Kex beyoʼ le luʼumoʼ jach maʼalob bix u tsʼáaik u yich kaʼach utiaʼal u tséentkuba Abel yéetel u láakʼtsiloʼob. Tsʼoʼoleʼ Dioseʼ maʼ tu kʼaakʼastʼantaj baʼalcheʼob, chʼíichʼoʼob yéetel kayoʼobiʼ; mix xan puʼukoʼob, áakʼaloʼob, áalkab jaʼob, kʼáaʼnáaboʼob, kaʼan, múuyaloʼob, Kʼiin, luna yéetel le estrellaʼoboʼ. Jeʼel tuʼuxak ka paakatnak kaʼach Abeleʼ ku páajtal u yilik bukaʼaj nojchil u yaabilaj, u naʼat yéetel u yutsil Jéeoba Dios, le Máax beet tuláakal baʼaloʼ (xok Romailoʼob 1:20). U fe Abeleʼ muʼukʼaʼanchaj úuchik u tuukul tiʼ le baʼaxoʼob u beetmaj Diosoʼ bey xan tiʼ u jatsʼuts modos.

Le baʼaxoʼob u beetmaj Diosoʼ le áant Abel utiaʼal ka muʼukʼaʼanchajak u fe tiʼ le Máax beetmil tuláakal baʼaloʼ

13 Abeleʼ suuk wal u jóoʼsik u súutukil utiaʼal u tuukul tiʼ Dioseʼ. Máans ta tuukul bix u kanáantik u tamanoʼoboʼ. Juntúul máax beetik leloʼ yaʼab u xíimbal. Ku bisik u yaalakʼoʼob tiʼ puʼukoʼob yéetel tiʼ táax  luʼumoʼob, ku kʼáatmáan tiʼ áalkab jaʼob, ku kaxtik maʼalob suʼukoʼob, maʼalob áakʼaloʼob yéetel maʼalob kúuchiloʼob utiaʼal u jeʼeleloʼob. Tiʼ tuláakal le baʼalcheʼoboʼ, le tamanoʼoboʼ bey letiʼe maas kʼaʼabéet u nuʼuktaʼaloʼob yéetel u kanáantaʼaloʼob tumen máakoʼ. ¿Tu tsʼáaj wa cuenta Abel kʼaʼabéet xan u nuʼuktaʼal yéetel u kanáantaʼal tumen le Máax maas yaan u naʼat yéetel u páajtaliloʼ? Tu tsʼáaj cuenta yéetel yaʼab u téenel wal tu yaʼalaj tiʼ Dios ich payalchiʼeʼ, leloʼ tu beetaj u maas muʼukʼaʼantal u fe.

14, 15. ¿Baʼax kʼuch u creert Abel úuchik u tuukul tiʼ le baʼaxoʼob u yaʼalmaj Dios u beetkoʼ?

14 Le baʼaxoʼob u yaʼalmaj Jéeoba u beetkoʼ. Adán yéetel Evaeʼ tu tsikbaltoʼob wal tiʼ u paalaloʼob baʼaxten jóoʼsaʼaboʼob tu jardinil Edén. Le beetik Abeleʼ jach anchaj tiʼ baʼaxoʼob u tuukul.

15 Abeleʼ tu yilaj jach bix béeychajik le baʼax tu yaʼalaj Jéeoba yoʼolal u kʼastal le luʼum le ka joʼopʼ u yantal kʼiʼixoʼob yéetel kʼaakʼas xíiwoʼoboʼ. Jéeoba xaneʼ tu yaʼalaj yaan u muʼyaj Eva ken kʼojaʼanchajak tiʼ chaambal bey xan ken u yóolintuba. Le ka síij u yíitsʼnoʼobeʼ, Abeleʼ tu yilaj béeychaj xan le baʼax aʼalaʼaboʼ. Jéeobaeʼ tu yaʼalaj xan tiʼ Eva yaan u yuʼubik bey jach kʼaʼabéet u yaabiltaʼal yéetel u kanáantaʼal tumen u yíichameʼ, tsʼoʼoleʼ Adaneʼ yaan u «yantal u páajtalil [tu] yóokʼol». Abeleʼ tu yilaj jach béeychaj tuláakal le baʼax tu yaʼalaj Jéeobaoʼ. Le oʼolal jach tu creertaj Dioseʼ yaan u tsʼáaik junpʼéel «chʼiʼibal» utiaʼal u yutskíintik le baʼax kʼaskúuntaʼab teʼ Edenoʼ (Gén. 3:15-19).

16, 17. ¿Baʼax tu kanaj Abel tiʼ le querubinoʼoboʼ?

16 Le máaxoʼob meyajtik Jéeobaoʼ. Kex tumen tu kʼiiniloʼob Abel  mix juntúul tiʼ u láakʼtsiloʼob ku tsʼáaik u yóol u meyajt Dioseʼ, yaan uláakʼ máaxoʼob tu yilaj way luʼum muʼukʼaʼan u fejoʼob tiʼ Jéeobaeʼ. Le ka jóoʼsaʼab Adán yéetel Eva teʼ jardinoʼ, Jéeobaeʼ tu yilaj maʼ u yokloʼob letiʼob mix u paalaloʼob teʼ Paraísooʼ. Tu yookbal le jardinoʼ tu tsʼáaj querubinoʼob —angeloʼob jach tsʼaʼan páajtalil tiʼob— bey xan junpʼéel tʼabaʼan táatsʼ máaskab mantatsʼ táan u pirinsuut (xok Génesis 3:24).

17 Máans ta tuukul Abel tu paalil táan u yilik le querubinoʼoboʼ. Yoʼolal le wíinklil tsʼaʼabtiʼoboʼ, Abeleʼ béeychaj u yilik le jach nojoch páajtalil yaantiʼoboʼ. Le táatsʼ máaskab xan mantatsʼ táan u pirinsuut yéetel ku tóochʼbal u kʼáakʼiloʼ, ku beetik kaʼach u chʼaʼabal junpʼéel maʼalob saajkilil tiʼ Dios. ¿Jaytéen tu yilaj Abel u náakal u yóol le querubinoʼob yéetel u pʼatkoʼob le meyaj tsʼaʼabtiʼoboʼ? Mix juntéen. Sáamsamal, bul kʼiin yéetel bul áakʼab, tu yáamil le mesoʼob yéetel le jaʼaboʼoboʼ, le angeloʼoboʼ kex tsʼaʼan páajtalil tiʼob yéetel yaʼab u naʼatoʼobeʼ maʼ lukʼoʼob teʼ tuʼux tsʼaʼaboʼob tumen Diosoʼ. Abel túuneʼ tu kanaj yaan máaxoʼob jach chúukaʼan u yóol u meyajtoʼob Jéeoba. Tu kanaj xaneʼ le querubinoʼobaʼ chúukaʼan u yóoloʼob yéetel mantatsʼ ku yuʼubikoʼob u tʼaan Jéeoba, maʼ jeʼex u láakʼtsiloʼobeʼ. Leloʼ le áant utiaʼal u maas muʼukʼaʼantal u fe.

Abeleʼ tu yilaj bix u yuʼubik tʼaan le querubinoʼoboʼ yéetel bix chúukpajik u yóoloʼob tiʼ Jéeoba

18. ¿Baʼaxoʼob jeʼel u yáantkoʼon k-muʼukʼaʼankúunt k-fe teʼ kʼiinoʼobaʼ?

18 Le úuchik túun u tuukul Abel tiʼ le baʼaxoʼob u beetmaj Jéeobaoʼ, tiʼ le baʼaxoʼob tu yaʼalaj u beetkoʼ yéetel tiʼ le máaxoʼob meyajtikoʼ, le beet u maas muʼukʼaʼantal u fe. Lelaʼ ku yeʼesiktoʼon jach yaʼab baʼaxoʼob jeʼel k-kanik tiʼeʼ. Ku kaʼansik xan tiʼ le táankelem paalaloʼob jeʼel u páajtal u muʼukʼaʼankúuntik u fejoʼob tiʼ Jéeoba kex  maʼ maʼalob baʼax ku beetik u láakʼtsiloʼobeʼ. Toʼon xaneʼ jeʼel k-maas muʼukʼaʼankúuntik k-fe wa k-tuukul tiʼ tuláakal le baʼaxoʼob u beetmaj Diosoʼ, tiʼ le Bibliaoʼ bey xan tiʼ le yaʼabkach máakoʼob chúukaʼan u yóol u meyajtoʼob Jéeobaoʼ.

Baʼaxten maas maʼalob ilaʼabik le siibal tu kʼubaj Abeloʼ

19. Ka máan kʼiineʼ, ¿baʼax kʼuch u naʼat Abel yoʼolal Jéeoba?

19 Jeʼex binik u muʼukʼaʼantal u fe Abeleʼ bey xan úuchik u bin u maas taaktal u beetik wa baʼax utiaʼal u yeʼesik. Baʼaleʼ ¿baʼax jeʼel u tsʼáaik juntúul kʼeban máak tiʼ Dios, le Máax beetmil tuláakal baʼaloʼ? Tiʼ letiʼeʼ maʼ kʼaʼabéet mix junpʼéel áantajiʼ mix ka siʼibik wa baʼax tiʼ tumen máakiʼ. Baʼaleʼ Abeleʼ kʼuch u naʼat junpʼéel baʼal: Wa yéetel u jaajil u yóol ku kʼubik tiʼ Jéeoba u maas maʼalobil le baʼaxoʼob yaantiʼoʼ, Jéeoba u Taata yaan teʼ kaʼanoʼ yaan u kʼamik yéetel kiʼimak óolal.

Abeleʼ yéetel fe tu kʼubaj u siibal, Caíneʼ maʼ

20, 21. Caín yéetel Abeleʼ, ¿baʼax tu kʼuboʼob yéetel baʼax tu beetaj Jéeoba?

20 Abel túuneʼ tu kíimsaj jujuntúul tiʼ u tamanoʼob utiaʼal u kʼubik tiʼ Jéeoba. Tu yéeyaj u maas maʼalobiloʼob, le yáax síijoʼoboʼ, ka tu chʼaʼaj le xéexetʼaloʼob maas maʼalobtak utiaʼal u kʼuboʼ. Caín xaneʼ u kʼáat kaʼach ka kiʼikiʼtʼantaʼak tumen Dios yéetel ka lúubuk utsil tu táan, le oʼolal tu yéeyaj xan jujunpʼéel u yich u paakʼal utiaʼal u kʼube. Baʼaleʼ maʼ tu beetaj yéetel u jaajil u yóol jeʼex Abeleʼ. Lelaʼ chíikpaj yoʼolal le baʼax úuch le ka tu kʼubaj u siibaloʼoboʼ.

21 Maʼ xaaneʼ tiʼ tu kaʼatúulal meyajnaj multunoʼob yéetel kʼáakʼ utiaʼal u kʼubik u siibaloʼoboʼ, maʼ xaan xaneʼ lelaʼ tu beetoʼob naatsʼ tiʼ le querubinoʼoboʼ, tumen teʼ kʼiinoʼoboʼ chéen letiʼob representartik Jéeoba way Luʼumeʼ. ¿Baʼax túun úuchi? Jéeobaeʼ «tu kʼamaj yéetel utsil óolal Abel bey xan u tiʼibil óolal [wa siibal, TNM]» (Gén. 4:4). ¿Bix túun úuchik u yeʼesik Jéeoba táan u kʼamik le siibalaʼ? Le Bibliaoʼ maʼatech u yaʼalik. Baʼaleʼ ¿baʼaxten chéen u siibal Abel kʼaʼami?

22, 23. ¿Baʼaxten Jéeobaeʼ tu kʼamaj u siibal Abel?

22 Úuchik u kʼubik Abel u kuxtal jujuntúul tamanoʼob yéetel tumen tu wekaj u kiʼichkelem kʼiʼikʼeloʼob tu táan Dioseʼ, maʼ xaaneʼ le oʼolal kʼaʼam le baʼax tu kʼuboʼ. ¿Tu tsʼáaj wa cuenta Abel jach koʼoj u tojol le siibal tu kʼuboʼ? Ka máan yaʼab sigloʼobeʼ Dioseʼ tu yaʼalaj ka kíimsaʼak le u maas maʼalobil tamanoʼoboʼ, utiaʼal u yeʼesik bix ken u kʼub u kuxtal u Paal minaʼan u kʼebanoʼ. Le oʼolal tiʼ u Paal Dioseʼ ku yaʼalaʼal xan «u Taman Dios», le máax tu wekaj u kʼiʼikʼel t-oʼolaloʼ (Juan 1:29; Éxo. 12:5-7). Baʼaleʼ Abeleʼ maʼ tu láaj naʼataj bukaʼaj u tojol le baʼax tu kʼuboʼ.

23 Kex beyoʼ yaan junpʼéel baʼax k-ojel: letiʼeʼ tu kʼubaj tiʼ Jéeoba le u maas maʼalobil yaantiʼoʼ. Abeleʼ lúub utsil tiʼ Jéeoba yoʼolal le baʼax ilaʼab tu puksiʼikʼaloʼ, maʼ chéen yoʼolal le baʼax tu kʼuboʼ. Letiʼeʼ tu beetaj yoʼolal u yaabilaj yéetel u fe tiʼ Jéeoba.

24. 1) ¿Baʼaxten jeʼel u páajtal k-aʼalik maʼ kʼaas kaʼach le siibal tu kʼubaj Caínoʼ? 2) Jeʼex yaʼab máakoʼob bejlaʼeʼ, ¿baʼax tu tuklaj kaʼach Caín?

 24 Baʼaleʼ maʼ bey úuchik yéetel u sukuʼunoʼ. Le Bibliaoʼ ku yaʼalik «maʼ bey kʼaʼamik Caín mix u tiʼibil óolaliʼ» (Gén. 4:5). ¿Baʼaxten bey úuchikoʼ? Maʼ tumen wa kʼaas le baʼax tu kʼuboʼ; ka máan kʼiineʼ u Ley Dioseʼ tu yaʼalaj jeʼel xan u páajtal u kʼuʼubul bey siibal u yich le paakʼaloʼoboʼ (Lev. 4:14, 15). Baʼaleʼ le Bibliaoʼ ku yaʼalikeʼ «le baʼax ku beetik [kaʼach] Caínoʼ kʼaas» (xok 1 Juan 3:12). Jeʼex u tuukul yaʼab máakoʼob bejlaʼeʼ, Caíneʼ tu tuklaj jeʼel u kʼaʼamal tumen Dios kex maʼ yéetel u jaajil u yóol táan u meyajtikeʼ. Le baʼaxoʼob tu beetoʼ tu séebaʼanil tu yeʼesaj maʼ jaaj wa u yaabiltmaj Diosiʼ, mix xan u tsʼaamaj u fe tiʼiʼ.

25, 26. Jéeobaeʼ, ¿bix tu yilaj u yáantik Caín, baʼaleʼ baʼax tu beetaj letiʼ?

25 Le ka tu yilaj Caín maʼ lúub utsil tiʼ Jéeobaeʼ, ¿tu yilaj wa u beetik baʼaloʼob maʼalobtak jeʼex Abeleʼ? Maʼatech, baʼaxeʼ tu jach chʼaʼpʼektaj u yíitsʼin. Jéeobaeʼ tu yilaj yaan baʼax maʼ maʼalob tu puksiʼikʼaliʼ, le oʼolal tu yilaj u yáantik utiaʼal maʼ u beetik baʼax kʼaas. Tu yaʼalajtiʼeʼ wa maʼ tu luʼsik le baʼax yaan tu puksiʼikʼaloʼ jeʼel u lúubul tiʼ nojoch kʼebaneʼ, baʼaleʼ wa ku luʼskeʼ yaan u bin utsil tiʼ (Gén. 4:6, 7).

26 Caíneʼ maʼ tu yuʼubaj tʼaaniʼ. Baʼaxeʼ tu yaʼalaj tiʼ u yíitsʼin ka xiʼik tu yéetel teʼ kʼáaxoʼ, teʼ túunoʼ tu loobiltajeʼ ka tu kíimsaj (Gén. 4:8). Jeʼel u páajtal u yaʼalaʼaleʼ Abeleʼ letiʼ le yáax máax loobiltaʼab yéetel kíimsaʼab ikil u meyajtik Diosoʼ. Baʼaleʼ kex kimeneʼ maʼ tuʼubsaʼan tumen Jéeobaiʼ.

27. 1) ¿Baʼaxten jach k-ojel yaan u kaʼa kuxkíintaʼal Abel? 2) ¿Baʼax unaj k-beetik utiaʼal k-ilik Abel teʼ Paraísooʼ?

27 U kʼiʼikʼel Abeleʼ bey awatbil u kʼáatik tiʼ Jéeoba ka u beet justiciaeʼ. Dioseʼ tu castigartaj Caín yoʼolal le kʼaakʼas baʼal tu beetoʼ (Gén. 4:9-12). Baʼaleʼ u maas kʼaʼanaʼanileʼ, láayliʼ ku páajtal k-kaanbal tiʼ le bix tu yeʼesil u fe Abeloʼ. Le bukaʼaj kʼiinoʼob kuxlajoʼ —maʼ xaaneʼ kex óoliʼ cien jaʼaboʼobeʼ— chéen junpʼíit tu tséel le bukaʼaj jaʼaboʼob ku xáantal kaʼach u kuxtal le máakoʼob teʼ kʼiinoʼob jeʼeloʼ. Ichil tuláakal u kuxtaleʼ tu yilaj u kiʼimakkúuntik u yóol Jéeoba. Letiʼeʼ kíim yéetel u tuukulil yaabiltaʼan yéetel kʼamaʼan tumen Jéeoba, u Taata yaan teʼ kaʼanoʼ (Heb. 11:4). Toʼoneʼ jach k-ojel láayliʼ tiaʼan Abel tu tuukul Jéeobaeʼ yéetel maʼ kun xáantal ken kaʼa kuxkíintaʼak teʼ Paraíso kun yantal way Luʼumeʼ (Juan 5:28, 29). ¿Yaan wa a wilik Abel teʼ Paraísooʼ? Yaan u béeytal wa ka chʼaʼtuklik a wuʼuyik baʼax ku yaʼalik bey xan wa ka kaanbal tiʼ le nojoch fe tu yeʼesoʼ.

^ xóot’ol 5 Le tʼaan «desde le ka káaj u síijil wíinikoʼ» ku tsʼáaik naʼatbil le ka joʼopʼ u yantal u chʼiʼibal le yáax máakoʼoboʼ. Kex Caín letiʼe yáax paal síij tiʼ Adán yéetel Evaoʼ, ¿baʼaxten maʼ tu yaʼalaj Jesús wa letiʼ le yáax máax síij «desde le ka káaj u síijil wíinikoʼ»? Tumen le baʼaxoʼob tu chʼaʼtuklaj u beetik Caínoʼ tu yeʼesaj u tsʼaamuba tu contra Jéeoba. Jeʼex u taataʼobeʼ, Caíneʼ mix bikʼin kun perdonartbil yéetel maʼ kun kaʼa kuxkíintbil.