Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 14

Le profetaʼoboʼ tu bisoʼob u tʼaan Dios

Le profetaʼoboʼ tu bisoʼob u tʼaan Dios

Jéeobaeʼ tu tsʼáaj profetaʼob utiaʼal u yaʼaloʼob baʼax ku taal u kʼiin u yúuchul, bix u kʼáat ka adorartaʼak yéetel bix kun kʼaj óoltbil le Mesíasoʼ

TU KʼIINIL táan u gobernar le reyoʼob tu luʼumil Israel yéetel Judaoʼ, Dioseʼ tu túuxtaj profetaʼob utiaʼal u yaʼaloʼob baʼax ku taal u kʼiin u yúuchul. Tuláakloʼobeʼ kʼaʼabéetchaj maʼ u chʼaʼikoʼob saajkil yéetel ka yanaktiʼob upʼéel fe muʼukʼaʼan utiaʼal u tsʼáaikoʼob ojéeltbil baʼax ku yaʼalik Dios. Koʼox ilik jujumpʼéel tiʼ le baʼaxoʼob tu yaʼaloʼoboʼ.

1. Bix kun xuʼulsbil tiʼ Jerusalén. Profeta Isaías yéetel Jeremíaseʼ tu yaʼaloʼob bíin xuʼulsaʼak tiʼ Jerusalén yéetel bíin pʼáatak minaʼan u kajnáaliloʼob, lelaʼ yaʼab jaʼab u bin u yúuchul ka tu yaʼaloʼob. Tu yaʼaloʼob xan baʼax oʼolal kʼuuxilnaj Dios tu contra le kaajoʼ. Kex u kajnáaliloʼob ku yaʼalikoʼob táan kaʼach u adorarkoʼob Dioseʼ, joʼopʼ u adorarkoʼob yaanal diosoʼob yéetel joʼopʼ u beetkoʼob uláakʼ baʼaloʼob kʼaastak (2 Reyes 21:10-15; Isaías 3:1-8, 16-26; Jeremías 2:1–3:13).

2. Le bix kun káajal u kaʼa adorartaʼal Jéeobaoʼ. Ka tsʼoʼok u máan le setenta jaʼaboʼob bisaʼak le israelitaʼob Babiloniaoʼ, suunajoʼob Jerusalén, letiʼob túuneʼ tu jel utskíintoʼob le templooʼ yéetel joʼopʼ u kaʼa adorarkoʼob Jéeoba (Jeremías 46:27; Amós 9:13-15). Doscientos jaʼaboʼob táanil tiʼ u yúuchul lelaʼ, Isaíaseʼ tu yaʼaleʼ Ciro u kʼaabaʼ le máax kun xuʼulsik tiʼ Babilonia yéetel kun jáalkʼabtik le israelitaʼoboʼ. Tsʼoʼoleʼ tu yaʼalaj tak bix kun okol ichil le kaajoʼ (Isaías 44:24–45:3).

3. Tʼaanajoʼob tu yoʼolal le Mesíasoʼ. Le Mesíasoʼ aʼalaʼab yaan u síijil tiʼ upʼéel kaaj ku kʼaabaʼtik Belén (Miqueas 5:2). Aʼalaʼabeʼ yaan u yeʼesik kabal óolal yéetel chéen yóokʼol utúul chan burro kun okol tu kaajil Jerusalén (Zacarías 9:9). Aʼalaʼab xaneʼ kex yéetel yaabilaj ken u tratartil le máakoʼoboʼ, yaan u pʼektaʼal tumen yaʼab tiʼ letiʼobiʼ (Isaías 42:1-3; 53:1, 3). Tsʼoʼoleʼ jach yaan u beetaʼal u muʼyaj táanil tiʼ u kíimsaʼal. Baʼaleʼ kex kíimsaʼabeʼ yaan u kaʼa kuxkíintaʼal utiaʼal ka u kʼub tiʼ Dios le u tojol u kuxtal tu tsʼáajoʼ, beyoʼ yaan u perdonartaʼal u kʼeban tuláakal wíinik (Isaías 53:4, 5, 9-12).

4. Le utsiloʼob ken u taas u gobierno le Mesíasoʼ. U gobierno kʼeban wíinikoʼobeʼ maʼ tu páajtal u taaskoʼob jeetsʼelil, baʼaleʼ u gobierno le Mesíasoʼ jeʼeleʼ. Tsʼoʼoleʼ le Bibliaoʼ ku yaʼalikeʼ le Mesíasoʼ u Reyil Jeetsʼelil (Isaías 9:6, 7; Jeremías 10:23). Ken u gobernart le Luʼumaʼ, jach yaan u yantal jeetsʼelil, mix le baʼalcheʼob ken u beetoʼob loob tiʼ wíinikoʼ (Isaías 11:3-7). Yaan u pʼáatal minaʼan kʼojaʼaniloʼob (Isaías 33:24). Tak le kíimiloʼ yaan u xuʼulul (Isaías 25:8). Yéetel yaan u kaʼa kuxkíintaʼal u millonesi máakoʼob (Daniel 12:13).

(Chʼaʼabaʼan tu libroiloʼob Isaías, Jeremías, Daniel, Amós, Miqueas yéetel Zacarías.)