Xeen tiʼ baʼax ku taasik

Xeen tu cuadroil baʼax ku taasik

U testigoʼob Jéeoba

Yéey u idiomail maaya

 XOOK 1

Le Máax beet tuláakal baʼaloʼ tu síiaj upʼéel paraíso tiʼ wíinikoʼob

Le Máax beet tuláakal baʼaloʼ tu síiaj upʼéel paraíso tiʼ wíinikoʼob

Dioseʼ tu beetaj tuláakal baʼal yéetel tu tsʼáaj kuxtal way Luʼumeʼ. Tu beetaj utúul xiib yéetel utúul koʼolel minaʼan kʼeban tu wíinkliloʼob. Tu tsʼáajoʼob tiʼ upʼéel jardín yéetel tu yaʼalajtiʼob baʼaxoʼob unaj u beetkoʼob yéetel baʼax maʼ

TIʼ TULÁAKAL le baʼaxoʼob ku yáax aʼalaʼal tu káajbal upʼéel libroeʼ, ku yaʼalaʼaleʼ le tʼaanoʼob maas kʼaj óolaʼanoʼoboʼ, letiʼ lelaʼ: «Tu [káajbaleʼ Dioseʼ] tu beetaj kaʼanoʼob yéetel luʼum» (Génesis 1:1). Yéetel le jatsʼuts tʼaanoʼobaʼ, u libroi Genesiseʼ ku chíikbesik tiʼ máax maas kun tʼaan le Bibliaoʼ, tiʼ Jéeoba, le Dios yaan tuláakal páajtalil tiʼoʼ, le Máax beet tuláakal baʼaloʼ, tak le Luʼumaʼ. Tsʼoʼoleʼ ku tsolik xan bix úuchik u bin u beetik tuláakal baʼal. Ku yaʼalikeʼ, cada upʼéel kʼiin ku xokaʼal de milesi jaʼaboʼobeʼ, Dioseʼ jejeláas meyajoʼob tu beetaj utiaʼal u maas jatsʼutskíintik le Luʼumaʼ.

Tiʼ tuláakal le baʼaxoʼob tu beetaj Jéeoba way Luʼumoʼ, le maas jatsʼuts bix tu beetiloʼ letiʼe wíinikoʼ. Le yáax xiiboʼ tu beetaj yéetel luʼum. Tu beetaj jeʼex letiʼeʼ, lelaʼ u kʼáat yaʼaleʼ tu tsʼáaj u páajtalil tiʼ utiaʼal u yeʼesik yaabilaj, naʼatil yéetel u maasil u jatsʼuts modosoʼob. Tu tsʼáaj u kʼaabaʼteʼ Adán yéetel tu tsʼáaj tiʼ upʼéel paraíso ku kʼaabaʼtik Edén. Lelaʼ upʼéel jatsʼuts jardín beetaʼab tumen Dios tuʼux yaan yaʼabach cheʼob ku yichankiloʼob utiaʼal jaantbil.

Upʼéel kʼiineʼ, Dioseʼ tu yilaj tsʼoʼok u kʼuchul u súutukil utiaʼal u tsʼáaik u núup le xiiboʼ. Le oʼolaleʼ tu jóoʼsaj upʼéel u chʼalaʼatel Adaneʼ ka tu beetaj Eva, le yáax koʼoleloʼ, ku tsʼoʼoleʼ ka tu tsʼoʼoksaj u beeloʼob. Adaneʼ jach kiʼimakchaj u yóoleʼ ka tak tu yaʼalaj le jatsʼuts tʼaanoʼobaʼ: «¡Lelaʼ jach tu jaajileʼ u bakʼel in bakʼel, u baakel xan in baakeloʼob!». Le Bibliaoʼ ku yaʼalik xan: «Le oʼolaleʼ xiibeʼ yaan u pʼatik u taata bey xan u maama, utiaʼal u nupikuba tiʼ u yatan, beyoʼ ku pʼáataloʼob juntúuliloʼob» (Génesis 2:22-24; 3:20).

Adán yéetel Evaeʼ kaʼapʼéel baʼax unaj u beetkoʼob kaʼachi. Yáaxeʼ unaj u kanáantkoʼob yéetel u meyajtkoʼob le Luʼumaʼ yéetel unaj u yaʼabtal u paalaloʼob. U kaʼapʼéeleʼ maʼ unaj u jaantkoʼob u yich ukúul tiʼ le cheʼob yaan teʼ jardinoʼ, chéen u yich ukúul aʼalaʼabtiʼob maʼ u jaantkoʼobiʼ, lelaʼ letiʼe «u yich u cheʼil u kʼaj óolilalil uts yéetel kʼaas[oʼ]» (Génesis 2:17). ¿Baʼax kun úuchultiʼob wa ka u jaantoʼob? Yaan u kíimloʼob. U jaajileʼ, lelaʼ tu tsʼáajtiʼob u páajtalil u yeʼeskoʼob wa ku tsʼáaikubaʼob yáanal u nuʼuktaj Dios, wa jach tu jaajil u yaabiltmoʼob yéetel wa kiʼimak u yóoloʼob yoʼolal bix u nuʼuktaʼaloʼob. Jeʼex túun k-ilkoʼ, le baʼax aʼalaʼabtiʼob tumen le Máax beetmailoʼoboʼ maʼ jach talam jeʼel u beetkoʼob kaʼacheʼ. Letiʼobeʼ jach maʼalob beetaʼabikoʼob kaʼachi, le Bibliaoʼ ku yaʼalik: «Dioseʼ tu yilaj tuláakal baʼax tu beetajoʼ sen maʼalob» (Génesis 1:31).

(Chʼaʼabaʼan tiʼ Génesis capítulo 1 yéetel 2.)